Matyu 23:8 - Nobonob Baibel

⁸ Anam ana amu Nug nai tuɗitta ippunittak awak danab nuhikkud amelagppa aum. “Amge ag amu, ag danab laala ag ahilagnu, ‘Ippunittak danab,’ akkulagnu oolag aib dayom. Laippu aakkuib am ahilag ippunittak danab, ag oh am awag amag aakkuib daatteb.

Matyu 23:8 Referans Kwoze

Jems 3:1

O lailad, danab kuɗum laa ele ag oolagppanu ippunittak danab bekkulagnu aib dabmeppig. Aɗinu? Ag dootteb, dimppa Kayak Nug epeɗiak ɠagattag ippunittak danab ihinigppa haaha, Nug epeɗiak nakok bodoettak Nug baekkudppa laala dilagppa hekku.

1 Pita 5:3

Ag ikki danab, ag Kayaknu danab sipsip bia, Kayak Nug ag eppelagppa maattom daatteb ele amu, ag amu dilagnu hamu bia anadna, kobol ɠagattagppa gumadkkulagnu aib heppig. Iitta! Ag antte oo maittak danab daanna, amuppa ag ib tutukku ippuanatteg!

Luk 22:32

amge Saimon, da na ehanitten, ooppa genab doyak nahip amu iitta ii memanu Kayak unuqidmi. Amu geha na eɗun ɠagattag daanna, na laipad ɠagattag daaglagnu ehanatte!” awa aum.

Matyu 23:10

Am laa ele, laa nug ahilagnu, ‘Ikki danab,’ aib aum. Ahilag ikki danab laippu amu Kristus.

Matyu 17:5

Nug anam mattieye, lombig hakkab amemɗia awak ele tonattette, lombig ooppanu baag laa inam a dooppig. “Imuam da Bekkal, da nuhignu ool mauhtte. Da nuhignu enanag doottem. Ag nuhig nai doyeg!” awa aum.

Revelesen 1:9

Da Jon, da ag lailag, da ag ele ig oh Jesus nuhigppa laippu daat, uug mua ele imu maottem. Da Kayaknu ɗo maɗoɗ ooppa, amunu uɗat haknu, ag ele daattem. Ig oh Jesus ig hekkunignu atte amu, ig nuhig ɠagattag aot daatta, ig tuɗidta, uug doyaya eɗittaknuib dabmak awak kobol dim lamidttem. Da Kayak nai mattimi da Jesus Kristusnu oolppa genab doottemnu ami, amunu ag da nud laa onig Patmos, amuppa meiɗppig.

Revelesen 22:9

amge nug da amelppa aum. “Na anam aib heme! Da am Kayaknu maɗi nid, na, na laipad propet danab, amu aun laa oh ag buk imuppanu nai dim lamidtteb ele, ag nuhig maɗi nid daatteb, amubia. Na Kayak aakkuib Nug noobppa dup nona binag me!” awa aum.

Revelesen 19:10

Anam a amu da nug noobppa dup noin binag mekkulnu nug baegppa laippun gatel qaun oin gomelen, iɗul wanppa memi, amge nug da amelppa aum. “Na anam ii hemana! Da na, amu na laipad ele, ag oh Jesusnu oolagppa genab doonna, nuhignu mehuqtteb ele, da na ag ele, ig oh am Kayaknu maɗi nid. Na Kayak noobppa dup nona binag me! Aɗinu? Propet ag Kayak Ouɗi ɠagattagppa Jesusnu mehuqak heppig, amubia Jesusnu mehuqak oh am Kayak Ouɗi ɠagattagppa bette,” awa aum.

Epesus 3:15

Nug baekkudppa oh, laa hab aabppanu, laa ag wanppanu, ag oh nuhigppaib ag onilag aotteb.

2 Korint 4:5

Anukka Kayak Nug aum. “Gatatu ooppa amahlak nug amahlaɗ!” awa aum. Kayak anam aum, amu Nug ele he, ig Jesus iɗuppa Kayak binag amahlak oppiaawak ele anidta doottem amunu, ig ikka ihinignu nai ii mehuqttem. Iitta. Ig Kristus Jesus, Nug am Naɗi daatte, anam mehuqtata, Jesusnu nai dim lamidttem, amuppa amu ig ahilag maɗi nid daattemnu ele mehuqttem.

2 Korint 1:24

Ag ahilag ooppa genab doyakppa daatteb amunu, ig ahilag ooppa genab doyak gumagnignu ii hettem. Iitta. Ig ag maɗoɗppan gamag ahak dooglagnu ig ag ele, ig tamanit, uɗat hettem.

Matyu 26:49

Aria, ag uɗina, Judas nug pahanab Jesus gumitta ukka, “Tuqan ena Ippunittak Danab,” awowa, nug ootuqittom.

Matyu 10:25

Amu danab ag ippunittak danab, nuhigppa aɗi hekkulag amu, ag nuhikkud ippunittak awak danab, ag amu dilagppa ele anamib hekkulag. Aria, danab ag gumak danab, nuhigppa aɗi hekkulag amu, ag nuhikkud maɗi nid, amu dilagppa ele anamib hekkulag. Danab ag lag mamegnu, ‘Nug am ouɗi nau ikkilag,’ appig dayeb amu, geha nuhikkud lag laippu amu, ag ahilagnu onig amunu nau eɗittak, onilkad naunab akkulag.

Matyu 23:7

amu ee oɗiak abenppa ele danab ah ag humadkkulagnu, ahilagnu, ‘Ippunittak danab,’ akkulagnu ele oolag mauhtte,” awa aum.

Matyu 26:25

Jesus anam a amu Judas nug Jesus kekeɗ eppelagppa mekkunu heum ele, nug aum. “Ippunittak danab, na ame am date?” awa aum. A amu Jesus aum. “Na ame,” awa aum.

Mak 9:5

Anam daaegeg amu, Pita nug Jesus amegppa aum. “Ippunittak danab, ig aben imuppa daagnignu am enanag amunu, na appe, ig peh ewam buugnig; nahip laippu, Mosesnu laippu, amu Elaiyanu laippu ele,” awa aum.

Mak 10:51

Nug gumitta wa amu, Jesus nug oɗ mettom. “Da nahipnu aɗi hekkulnu oot daatte?” awa aum. Awa a amu nug aum. “Ippunittak danab, na heppe, da neegkkulnu ool daatte,” awa aum.

Mak 11:21

Jesus ad amu amegppa aɗi aum, nai amu eɗua Pita daugppa do, nug Jesus amegppa aum. “Ippunittak danab, antte! Tumai na ad fig eheɗ laa awaknu waappa daakkunu ame amu, am aakku bunaɗom!” awa aum.

Mak 14:45

Aria, ag uɗina, Judas nug pahanab Jesus gumitta ukka, “Ippunittak Danab,” awowa, nug ootuqittom.

Jon 1:38

Jesus Nug eɗua anata, Nug aum. “Aa aɗi madittep?” awa aum. Nug anam a amu, aa apiɗ. “Rabi, na adeppa daattem?” aoi apiɗ. Rabi eɗuak am ippunittak danab.

Jon 1:49

Jesus anam a amu, Nataniel oɗeppa awa aum. “Ippunittak danab, na am Kayak Bekka, na Israel dilag king,” awa aum.

Jon 3:2

danab amu nug tuqan Jesus gumitta uɗia, Nug amegppa aum. “Ippunittak danab, ig doottem, na am ippunittak danab Kayak toppanu uɗime. Aɗinu? Kayak Nug danab laa ii ehanitteb amu, nug Kayak dabmettaknu kobol danab haknu elele iitta, na hettem ele amu, nug hekkunu elele iitta,” awa aum.

Jon 3:26

Ag anam hena amu, Jonnu ippunittak awak danab ag gona, Jon amegppa inam appig. “Ippunittak danab, danab laa Nug na ele anukka Jodan le laihppa daayya, na nuhignu mattime ele, danab amu Nug danab layattette, danab ah oh nuhigppaib gotteb,” aon appig.

Jon 4:31

Amge haen gamag amuppa nuhikkud ippunittak awak danab ag Jesus amegppa appig. “Ippunittak danab, na ee la!” aon appig.

Jon 6:25

Ag gona, Jesus laih dayeye anidna, oɗ mettan appig. “Ippunittak danab, na haen aɗippa ippa uɗime?” aon appig.

Jon 9:2

Anam amu Jesusnu ippunittak awak danab ag amu anidna appig. “Ippunittak danab, aun nug hipunin he, anig nug danab amu ameg gaɗuak ele menuom. Nug hipunin heumte, o iitta anig mameg eletai hipunin hepiɗ?” aon appig.

Jon 11:8

Nug anam a amu ag appig. “Ippunittak danab, tumainab iikku Juda ag menppa oidkkulagnu heppig, am na eɗun gokkutnu aakku hettemte?” aon appig.

Jon 20:16

Anam a amu, Jesus eɗua, ah onig diia, “Maria,” awa aum. Anam a amu, Maria nug eɗua Hibru naippa, “Rabonai,” awa aum. Amu diig am, “Ippunittak danab.”

Pilemon 1:16

Nug tatam nahip begbeg maɗi nidib dayaya uɗat heum, amge gemu nug am nahip begbeg maɗi nid aakkuib ii daatte. Iitta. Gemu amu nug na ele, aa oh Jesusnu oolahppa genab doottep amunu, nug na amap ele daatte. Da nuhignu ool mauhtte, amge gemu na nuhignu oot huana mauhkku. Aɗinu? Nug gemu danab, amge danab hamu iitta, nug Kristen danab daatte amunu, nug nahip uɗat pehettak haaha, ooppa genab doyakppa nug am na amap ele daatte.