Matyu 21:35 - Nobonob Baibel

³⁵ Ag ukkaeg amu, dad uɗat danab ag nuhikkud maɗi nid amu diin, laa makkuɗna, laa qeeg mauhe, laa amu menppa makkuɗppig.

Matyu 21:35 Referans Kwoze

Nehemaia 9:26

Na ahilagnu enanag anam heme, amge ag na oɗen ii dim lamidna, nahip nai tappaeg ne, ag nahip ɗo ag dimulagppa meppig. Ag nahipad propet danab, danab amu ag ag eɗun, na waatppa daaglagnu ag amelagppa madippig amu, ag ag aqaeg mauhppig. Ag dabittak nai nau ele madippig.

Aposel 7:52

Amu propet aun laa dayom, ag mamelkad aɗi ag nug eheɗ iite hedappig? Laa iitta. Anukka propet ag Genab Tutukku Hak Danab uɗikkunu nai amu mehuqegeg, ag mamelkad aɗi ag ag aqatteg mauhppig. Aria, Genab Tutukku Hak Danab Nug uɗie, ag gemu daatteb amu, ag Nug aon, kekeɗ eppelagppa mena heeg, Nug mauhom.

Matyu 5:12

Danab kobol nau amu hetteb ele, anukka danab ag Kayaknu propet ele anam eheɗ hadappig amunu, ag gemu ahilagnu ele anam heppeg, aria, ag gamalag ahebeb, ag oolag enaib dayaɗ! Aɗinu? Nob ahilag hab attan am okkainab.

Revelesen 6:9

Amu Sipsip Nag Nug buk itoɗiak qataqak ebqak 5 tolom. Tole amu qaɗab waappa danab ah Kayak nainu oolagppa genab doona, mehuqppig ele amunu, laa ag aqaeg mauhppig ele amu, da ag dottolkad anadmi.

Jeremaia 2:30

Da ag Israel ag oolag eɗukkunu bu mattami, amge ag oolag eɗukkunu uuppig. Ag laion doɗ laa aqe mauhtteb, amubia ag qep elabppa dahil propet aqaeg mauhppig.

2 Stori 16:10

Propet danab nug anam a, Asa doya, nug nuhignu oo nauhom. Nug oo huana nauhom amunu, nug Hanani maniguittakppa me dayom. Amu haen amuppa Asa nug eheɗ laa ele ha, nug Juda danab laala, ag nug waappa gai-iitta daappig amu, nug ag eheɗ hattom.

1 King 22:24

Mikaia nug anam a, amu Kenana bekka Sedekaia nug Mikaia nai amu Ahap amegppa mattieye doya, nug aha, Mikaia gumitta ukka, hippeg mataɗa, nug aum. “Ouɗi Yawenu uɗiom amu, nug da uuiɗa, ib attem nahip-ppa ukka, nai amu na amenppa aum?” awa oɗ mettom.

1 King 19:10

Yawe Nug anam oɗ mette, Elaiya nug nob ma aum. “O Yawe Kayak Nakka Ɠagattag Oh Ele, da na oɗen haen oh dim lamidkkulnu yag-nab-bak doyen hettem, amge Israel danab ah ag na hee, na ag ele ag nug tituanna nai qagappig amu, ag nai amu tippalna ii dim lamidtteb. Ag amu henana, ag qaɗab nahip ele loppaɗna, ag nahipad propet laa oh ele qep elabppa aqaeg mauhppig; da dakka iikku daattem, amu gemu ag da ele iuppeg mauhkkulnu mattiɗtteb,” awa aum.

1 King 19:2

Nug a doye amu, Jesebel nug nai inam me, Elaiya toppa ukkom. “Na gemu dahil kayaknu propet kuɗum aqee, ag mauhppig daatteb amunu, da heppi, butti haen inamppa batak amu, na ag oolagppanu laa daatte bia ii daakkut dayeb amu, kayak laala ag bu okkainab meɗaglagnu ool daatte.” Nug nai amu me ukkom.

1 King 18:13

Haen Jesebel nug Yawenu propet danab aqe mauheg amu, da Yawenu propet danab 100 men oɗe okkai laalappa diie, lokkumatti daappig. 50 laa da men oɗe laappa lokkumattoya, 50 laa am men oɗe laihppa lokkumatti daappig. Maatti daaegeg, da ag ee, le ele mattai lappig. Am na da amu hemi amu, na doottemtai?

1 King 18:4

Amu haen kuin Jesebel nug Yawenu propet danab aqeeqe, Obadaia nug propet danab amunu 100 diia, men oɗe aɗit, amuppa lokkumattom. Nug propet danab 50 laa amu men oɗe laappa lokkumattowa, 50 laa amu men oɗe laappa lokkumatte daaegeg, bret, le ele matte, lanan daappig.

Jeremaia 26:8

Jeremaia nug keeke oh Yawe nug akkununab aum danab ah oh amelagppa mattia male amu, mana mettak danab, propet, amu danab ah oh ele ag oh dona, nug aɗana, “Na mauhkkutoitte,” aon appig.

Jeremaia 37:15

Nug eppelagppa me, ⌊ag nug Jeremaianu nai aum am doon,⌋ ag oolag nauhe, ag heeg, laa ag Jeremaia ad mahappa makkuɗeg, ag Jeremaia aon gona, nai yaak danab Jonatan laugppa meppig. Aɗinu? Okkai danab ag matu heeg, lag amuam maniguittak lag dayom.

Matyu 21:34

Dimppa, haen grep meu awak haen miag do, nug nuhikkud maɗi nid laa maatte, ag grep meu nuhig aoglagnu dad uɗat danab gumadna goppig.

Matyu 21:36

Ag anam heeg amu, dad mameg nug nuhikkud maɗi nid laala baula maatte goppig. Nug tatam maatte goppig amubia iitta, nakok kuɗum maatte goppig. Ukkaeg, dad uɗat danab ag tatam heppig, anamib eɗun heppig.