Matyu 1:20 - Nobonob Baibel

²⁰ Josep nug amunu dabmak awewe, tuqan tulppa Naɗinu engel nug gumitta neum. Na amu nug aum. “Josep, Dawit bekka, na Maria ah nahip daakkunu, na nug aokkutnu aib baɗame. Doye! Kayak Ouɗi Nug nukka nid amu mettom.

Matyu 1:20 Referans Kwoze

Luk 1:19

A amu engel nug oɗeppa awa aum. “Da am Gabriel. Da Kayak noobppa daattem, amu Nug he, da amenppa nai ena imu appi dookkutnu uɗimi.

Matyu 1:18

Anam amu, Jesus Kristus, nuhig menuaknu nai am inam. Josep nug Maria aokkunu baeg aɗaeg daye ukkom, amge aa ewau matulak ii aopiɗppa Maria nug Kayak Ouɗinu ɠagattagppa oo ele dayom.

Matyu 2:19

Aria, Josep aɗi ag Isip gona daaegeg, Herot nug mauhe, Naɗinu engel tulppa Josep gumitta doum.

Joel 2:28

Yawe Nug atte. “Amu dimppa da dahil Ouɗi danab ah diig oh dilagppanu ⌊danab ah laala⌋ madakkul. Da madappi, ag bekkalkad, aɗelkad ele ag propet nai madippeppeg, ahilkad danab kaino ag tul niiakppa keeke anidppeg, ahilkad danab bau ag tuleglegppa keeke anidkkulag.

Luk 2:4

Aria, Josep nug Dawit buɗub amunu, nug Galilinu aab Nasaret appanu aha, Juda wanppa Dawit appag diig Betlehem, nug appa ukkom.

Matyu 28:5

Am engel nug ah aɗit amelahppa aum. “A aib baɗapiɗ! Da doottem, aa Jesus, ad emaitakppa atulppig amu, aa Nug madittep.

Aisaia 26:3

O Yawe, danab ah ag nahipnu dabmenan oin, dabmak amu ɠagattag aɗan oitteb ele amu, na hee, maɗoɗ enanagnab ag oolagppa daatte. Aɗinu? Ag nahipnu oolagppa genab dootteb.

Ikki Danab 13:3

Aa anam daaeheh amu, Yawenu engel nug Manoa wau gumitta noa, nug aum. “Na ah mattoi, nid iitta ele daattem, amge na geha oot ele daan, nid danab laa aokkut

Genesis 31:11

Anatti amu, Kayaknu engel nug da onil diia a, da inam ami. ‘Da ina, aɗitai, appe dookkul,’ awe ami.

Matyu 2:22

Goppig amge Josep nug Herot bekka Akelaus, nug mameg abenab awa, Juda dilag king dayeye doya, nug appa ukkaknu oo baɗom. Oo baɗeɗe, tuqan tulppa Kayak Nug Josep, Juda wanppa gokkunu, “Aib,” aum amunu, nug aha, wan atu onig Galili ukkom.

Sam 143:8

Da nahipnu oolppa genab doottem amunu, na buttua oh nahip oo mauhaknab kobolnu dabmenana, ehaniɗkkutnu oɗ medattem. Da na unuqidttem amunu, na oot meɗan, nahip ib tutukku ippuniɗkkutnu unuqidttem.

Sam 119:125

Da am nahip maɗi nid. Da nahip ɗo oh diilag pehettak dookkulnu, na diignu doyak tutukku da meɗakkutnu oɗ medattem.

Sam 94:19

Haen da ool unuqagppa baɗak he, na oot meɗan hee, da maɗoɗppan gamag ahak doomi.

Matyu 2:13

Ag ukkaeg, Naɗinu engel tulppa Josep amegppa aum. “Na ahan, nid nakok anig ele diiatna, oolna Isip wanppa gona, appa daappe, da na eɗun uɗikkutnu appi doona uɗikkut. Aɗinu? Haen nakokib ukkeb, Herot nug nid nakok mattia antta qekkunu hekku,” awa aum.

Jeremaia 33:26

da Jakop buɗub geɗatten, da dahil maɗi nid Dawit buɗub laa nug Abraham, Aisak, amu Jakop ele buɗulkad gumadkkunu ele ii tituanpa. Amge anam iitta. Da nai amu qakkami, ɗo ele amu memi amunu, da gumadkkunu tituankkul. Aɗinu da amu hekkul? Da Israel, Juda ele dilah danab ah dilag ool gai-iitta doye, ool matten ehanadppi, ag eɗun, wan imuppa uɗin, enaib daaglag.”

Aisaia 30:21

Ag oippeppeg, ag dimulagppa baag laa ag ib attem aon gokkulagnu ippunadkkunu, “Ib iikku, aakkud ukkeg!” ab dooglag. Aɗinu? Ag oinna, ag ib naɗiap-ppa gokkulagnu daatteb dayeb amu, ag baag doon, naɗiap-ppa gokkulag. O ag ib nanehppa gokkulagnu daatteb dayeb amu, ag baag doon, nanehppa gokkulag.

Prowerb 12:5

Genab tutukku hak danabnu maittak awak am nai doya mala hettoɗia epeɗia elele mettak kobol dim lamidtte; amge nau hak danabnu ulum nai am hambuppuak ele.

1 King 17:13

Amge Elaiya nug ah qab amegppa aum. “Na aib baɗame! Na ame bia gona, anam he! Amge tatam na plaua amunu nakok laa goɗen ele aon, bret batappatak dahil main, aon uɗiona, dimppa na bret nahipnu, nid nahipnu plau, goɗen amuppanu ele mane!

Jeremaia 40:9

Ag gona teeg, Ahikam bekka Gedalaia, nug alag am Sapan, nug ag ena daaglagnu ag amelagppa nuhig nai ɠagattag qetta aum. Nug aum. “Ag Babilon waappa daan, ahilag maɗi nid daaglagnu aib baɗappig. Ag wan imuppa daan oinna, ag Babilon dilag king waappa daan, nuhig maɗi nid daaglag dayeb amu, ag enaib daaglag.

Jeremaia 31:22

O Israel danab ah, ag am nid ah laa, nug mameg oɗe ii doyaya, kobol digdig hette, ag amubia da dimeɗona kayak hambuppuak laala dim lamadtteb; amu haen gane laa ele ukkeb, ag kobol amu uun, eɗun Yawe ele laippu daaglag? ⌊Yawe Nug heeb, ag eɗun uɗiglag⌋ am kobol baunab aakku. Ah ag digmena, danab gumalob amuam kobol baunab aakku daalo, amubia Yawe Nug heeb, ag eɗun uɗiglag am kobol baunab aakku.

Aisaia 51:7

Ag danab ah dahilad, ag kobol tutukku dootteb, ag dahil ɗo ag oolagppa daatte amu, ag dahil nai doyeg! Ag danab dilag nai haknu aib baɗappig. Ao, ag awa awa qettak nai naunab ahilagnu atteb amu, ag amunu baɗak eheɗ nau aib dooppig.

Namba 12:6

Nug aum. “Aa nai dahil doyeɗ! Haen dahil propet danab laa ag oolagppa daatte amu, da Yawe, da tuleglegppa da diil, dahil nai ele nug ippunidttem, tul niiakppa da nug amegppa nai madittem.

Genesis 46:3

Jakop anam a amu, Kayak Nug aum. “Da Kayak, na mamennu Kayak. Na Isip gokkutnu aib oot baɗom. Aɗinu? Na appa daappe, da heppi, na buɗunad ag appatna, huu okkainab, ɠagattag ele daaglag.

Aisaia 7:2

⌊Amu king aɗit amu aa qagmeeh, haen amuppa⌋ laa Juda dilag king Ahas, nuhikkudppan ele nai laa aeg dooppig. Amu ag inam appig. “Aram ban danab ag Israel ele oh qagmeppig,” aon appig. Ahas nug nai amu doye, nug, nuhikkud danab ah ele ag baɗan, eheɗ hahaɗppig.

Aisaia 7:13

Anam a amu ⌊Aisaia⌋ nug aum. “King Dawit buɗub ag, ag gemu tutukku doyeg! Ag kobol ahilag amunu amu, danab ah ag ahilagnu bahilag yaatte amunu, gemu ag heppeg, dahil Kayak Nug ele ahilagnu bahi yaakkute?

1 King 3:5

Solomon nug anam ha, nug tuqan Gibeon appa niieye, Yawe Nug tul niiakppa gumitta na, amu Kayak Nug aum. “Na aɗi keeke da medakkulnu oot hette amu, na appe doyei!” awa aum.

Matyu 2:12

Mettona, ag niiegeg, tuqan tulppa Kayak ag eɗun Herot toppa ii gomananu aum amunu, ag eɗun, ib laa aon, ag appalagppa goppig.

Matyu 27:19

Pailat nug anam oɗ matta, nug hettoɗiak abenppa dayeye, nug wau nai inam me uɗiom. “Danab beɗuppa aab iitta amunu amu, na nuhigppa keeke laa aib heme. Da gemu nuhignu tul niimi, amu da uug, guittak ele huanak doomi,” awa aum.

Aposel 5:19

amge tuqan amuppa Naɗinu engel nug maniguittak lag od matula he dimittim doeg, nug amelagppa aum.

Revelesen 19:7

Gemu ig maɗoɗppan gamag ahak doot, binag amahlak oppiaawak metu! Aɗinu? Sipsip Nag Nug nuhig ah aokkunu haen aakku beum, amu ah nuhig nug ha, nug amunu babaittak daatte.