Mak 15:14 - Nobonob Baibel

¹⁴ Ag anam eppig, amge Pailat nug oɗ mattom. “Aɗinu? Nug aɗi eheɗ heum?” awa aum. Nug anam aum, amge ag huanak ena appig. “Ad emaitakppa atule!” eppig.

Mak 15:14 Referans Kwoze

Luk 23:41

I nitaeg mauhttep imunu am ag eheɗ laa ii hetteb; ag kobol elele hetteb. I nob imu aognihnu am nai iitta. Aɗinu? Ihinih eheɗ hemuɗ nob iikku aottep, amge danab imu Nug eheɗ laa ii heum,” awa aum.

1 Pita 1:19

Ag Kristus, Kayaknu Sipsip Nag, Nug am hipunin iitta, dubuttid ele iitta, ag Nug tiig enanag, amuppa ag uhuqak amu aoppig.

Hibru 7:26

Mana mettak ikki danab anam nug ig ehanigkkunu daakkunu am enanag. Nug am oppiaawak, ooppa kaliak laa iitta. Nug oppiak ele, hipunin danab bia ele iitta. Nug onig attannab tak daatte.

Aposel 19:34

Amge muttub qenan daappig ele, haen ag nug anidna dooppig, nug am Juda amunu, ag oh oɗelag ooho, ag huanak eppig. “Kayak ah Artemis, nug amu ig Epesus ihinig kayak, nug am onig, ɠagattag ele!” Ag anamib aam ameg aɗit anam anana eppig.

Jon 19:6

Anam a amu mana mettak danab okkai, ahilkad daup ele ag Jesus anidna, huanak ena appig. “Ad emaitakppa atule! Ad emaitakppa atule!” aon appig. Anam aeg amu Pailat nug aum, “Ag akka aon, ad emaitakppa atuleg! Da am nuhigppa ɗo tippalak laa ii anidmi,” awa aum.

Jon 18:38

Nug anam a amu Pailat amegppa aum. “Doyak diig genabib am aɗi?” awa aum. Nug anam ana, nug aha, dimittim Juda gumatta ukka aum. “Da nuhigppa ɗo tippalak laa ii anidmi.

Luk 23:47

Jesus mauhe, ban daup 100 dilag ikki nug amu antta, nug Kayak binag ma aum. “Genabnab danab imu Nug genab tutukku hak danab,” awa aum.

Luk 23:21

amge ag enan appig. “Ad emaitakppa atule, ad emaitakppa atule!” aon eppig.

Luk 23:4

Aakku Pailat nug mana mettak ikki danab amu danab ah kuɗum ag amelagppa aum. “Da danab imu nuhigppa eheɗ hak laa da ii anidmi,” awa aum.

Matyu 27:54

Amu ban daup 100 dilag ikki nug, amu daup laa ag nug ele daanna Jesus guman daappig, ag mim ne, keeke laala oh ele beeg anidna, baɗak eheɗ nau doon appig. “Genab, danab imu Nug Kayak Bekka!” aon appig.

Matyu 27:19

Pailat nug anam oɗ matta, nug hettoɗiak abenppa dayeye, nug wau nai inam me uɗiom. “Danab beɗuppa aab iitta amunu amu, na nuhigppa keeke laa aib heme. Da gemu nuhignu tul niimi, amu da uug, guittak ele huanak doomi,” awa aum.

Matyu 27:4

nug aum. “Da hipunin hemi. Da danab nug eheɗ laa ii heum amu da hamu kekeɗ eppelagppa mauhkkunu memi,” awa aum. Anam awa a doona ag appig. “Amu ihinig keeke iitta. Am nahip keeke,” aon appig.

Aisaia 53:9

Nug nau hak danab oolagppa mauhom, amge danab enub ele boumtteb, amubia ag nug boumppig. Ag heeg, nug mauhom, amge nug laa dilagppa eheɗ laa ii heum, oɗeppa nai hambuppuak ele ii dayom.

Aisaia 53:3

Danab ah ag nuhignu ena iinab doon, ag nug guhuɗidppig. Nug bau dayaya, nug oo doyak huanaknab doyaya, guittak huanak ele doyom. Danab ah ag laa, ag nug nakok laa anidkkulagnu oolag iinab hette amu, ag Yawenu maɗi nidnu ena iinab dooppig. Ig nug binag nakok laa ii mettamut.

Sam 69:4

Danab ah kuɗum, ahilag ebqak amu da ikkil uɗug ikkilppanu eɗittak daatteb, ag oolagppa dahilnu diig iittappa nau ninig ele dootteb. Genab, da eheɗ heminu ag atteb ele amu, da ii hemi, amge kekeɗ dahilad ag hambuppuna, da eheɗ heminu atteb. Ag ɠagattag daana, da iuppeg mauhkkulnu hetteb. Da ahilag keeke laa yab ii aomi, amge ag da yab aomi anana, duttuniɗna, da keeke amu yab aolom bia nob mekkulnu hetteb.

Mak 15:13

Nug anam a amu ag eppig. “Ad emaitakppa atule!” aon eppig.

Mak 15:15

Ag anam eeg amu Pailat nug danab kuɗum ag oolag ena daakkunu Barabas uhuqom. Barabas uhuqa amu, nug nuhikkud daup ag Jesus bu qaun eleppa eheɗ mataɗkkulagnu ana, ag ad emaitakppa atulkkulagnu ag eppelagppa meum.

Aposel 13:28

Ag eheɗ hak laappa Nug qeppeg mauhkkunu laa ii anidppig, amge ag Pailat nug hamu qeeb mauhkkunu eppig.