Maika 1:16 - Nobonob Baibel

¹⁶ ⌊O gadon,⌋ ag Israel, ag ahilkad nid naunau, ahilagnu ag enanagnab dootteb, amge ag nid ahilkad dilagnu oolagppa uug naunab nau doon, ag mahina, aakku ikkilag uɗug ohnab otaɗatteg! Ao, ag uug naunab doon, ag mahin, ikkilkad uɗug oh otaɗna aon, ag ai walsa igippa uɗig laa iitta, ag amubia dayeg! Aɗinu? Kekeɗ ag nid naunau ahilkad diin gona, ag wan laappa diia ukka laih me dayak danab ah daaglagnu maadppeg daaglag,” awa atte.

Maika 1:16 Referans Kwoze

Aisaia 22:12

Uug imu bak haenppa Naɗi, Nug Yawe Nukka Ɠagattag Oh Ele, Nug ag haen amuppa ⌊eheɗ heppignu⌋ ag oo doyak doon gaan, ag ikkilag uɗug oh otaɗna, ag lamen heɗiag ele takkadkkulagnu amelagppa akku.

Jeremaia 7:29

Amu Yawe Nug atte. “Ag Juda, ag ikkilag uɗug otaɗna, buɗippeg ukkaɗ! Ag qauko attannab, igippa keeke laa ii daatte, ag amuppa tena, appa ag nai oo doyak ele mattieg! Aɗinu? Da Yawe, da ag gemu daatteb, ag dahil oppoɗi bak waappa daatteb, da ag dimatte, ag geɗadmi,” awa atte.

Job 1:20

Danab amu oh ag uɗin dona, Job amegppa amu ohnu aeg doya, nug aha, lamen elab pattiɗa, ikki uɗug hoye ukke, nug dup noa, gateg qaun o, gomela, iɗu wanppa ma, nug Kayak binag ma,

Amos 8:10

Ag gemu hobul dayaknu gamag ahak dootteb, amge haen amuppa da heppi, ahilag hobul dayak haen anen anen am gamag ahak haen ii daamna. Iitta! Mahiak haen daaglag. Ao, gemu ag ahi edatteb, amge haen amuppa da heppi, ag ahi ii ettamna. Iitta. Ag gayakib gaaglag. Haen amuppa da heppi, ag oh oolagppa uug nau doon, lamen heɗiag ele takkan, ag ikkilkad uɗug hoiglag. Yo, da heppi, haen amuppa ag nid danab laippuib mauhe, anig mameg mahittep bia mahiglag. Ge, haen amu gogppa tak, amuam deɗ nau ninig ele daatte bia daakku,” awa atte.

Jeremaia 16:6

Danab onig ele, danab onig iitta ele Juda wan ohppa mauhkkulag. Laa ag danab ah mauhkkulag ii boumadmana, Ag mauhak dilagnu ii mahina, oo doyak kobol laala ele amu dilagnu ii hemana.

Jeremaia 6:26

O dahilad danab ah ag lamen heɗiag ele takkan, uhuɗppa niinna, beɗulag itoɗin, itoɗinna, danab bekka laippu mauhe, huanaknab qanak baag eleppa mahitte, ag amubia mahieg! Aɗinu? He nauhak danab nug ihinigppa pahanab tula bekku.

Aisaia 15:2

Moap danab ah Dibon aabppa daatteb, ag amu doon, ahilag mettid lakka, ahilag kayak hambuppuak dilag mettid lag nakokppa ele tena, appa gaaglag. Ao, kekeɗ ag aab aɗit Nebo, Medeba ele, ag amu heppeg nauhpeɗ, Moap danab ah ag amunu dabmenana, ag qanaglag. Moap danab ah ag uug naunab doon gaan, ag ohnab ikkilag uɗug otaɗna, bikkalag ele daaglag. Ag id ele aoglag.

2 King 17:6

Hosia nug Israel dilag king dayaya, nuhig king dayaknu maɗ eblaih waɗeleppa amu, Asiria dilag king nug Samaria eɗatta, aab okkai amu awom. Awa, nug Israel danab ah diia, Asiria ukka, nug Israel laala aab Hala maattowa, laala amu diia, aab Gosan, nuhig wan ele, appa le Habor guguittak ele maattowa, Midia wanppan aab laalappa ele maattom.

Duteronomi 28:41

Ag nid naunau menuadkkulag, amge ag ele ii daamna. Amu bekkunu diig am, kekeɗ ag banppa diin goppeg, ag appa ag eppelagppa daaglag.

Jeremaia 47:5

Uug amu beebeb, danab ah Gasa daatteb doon, ag ikkilag uɗug hoiglag. Ao, danab ah Askelon daatteb, ag oɗelag qamuttak daaglag. O Pilistia oɗo yaak danab, ag uɗem naɗippa daatteb, ag akka ag ⌊ahilag kayak hambuppuak ag ag dabmattaglagnu ag⌋ beɗulag guittak medatteb; amu haen gane laa ele ukkeb, ag amu uuglag?

Amos 7:11

⌊Amuam genab.⌋ Aɗinu? Amos nug inam atte. ‘Jeroboam nug geha qep elabppa mauheb, kekeɗ ag Israel danab ah diin, ag diia ukka laih me dayak danab ah wan laappa, ahilag wan iittappa daaglagnu gokkulag.’ Nug anam atte,” awa aum.

Amos 7:17

Na da baula amunu ii madipanu attem amunu, Yawe Nug inam atte. ‘Uug naunab nahip-ppa bekku. Beeb, ah nahip nug aab okkai imuppa ib baag ah daakku. Nid danab nahipad, nid ahin nahipad ele amu, kekeɗ ag qep elabppa aqappeg mauhkkulag. Wan nahip amu, laa ag oppatppeg neeb, panin aoglag. Na amu, na wan laappa, wan imuppa iitta, laappa mauhkkut. Wan amuppa ag Kayak ii dimlamidtteb; ag kayak laa dim lamidtteb. Nahip-ppa anam beeb amu, kekeɗ ag heppeg, Israel ag genabnab genab ahilag wan imuppanu ahan gona, diia ukka laih me dayak danab ah wan laappa daaglag.’ Yawe Nug anam awa atte,” awa aum.

Jeremaia 4:8

Anam bekku amunu, ag lamen heɗiag ele takkanna, ag mahia, gayak okkai ele heig! Aɗinu? Ihinig hipunin haknu amu, Yawenu oo nauhak huanaknab aakku daatte. Ii iitta meum,” awe ami.

Gayak Nai 2:19

Juda danab ah ag tuqan, aɗi uɗitte anttak danab ag ahilag uɗat digmetteb haenppa ag ahan, Kayak huana unuqitteg! Le gokkaɗa gotte, amubia ag Naɗi noobppa Nug unuqitteg! Ag ahilkad nid naunau enugnu aabnu ib ukkak ohppa nena qena, mauhkkulagnu hetteb ele amu; ag ahilagnu ag eppelag human, Nug unuqitteg!