Luk 21:36 - Nobonob Baibel

³⁶ Amunu ag hanhan tutukku dabmena daanna, keeke amu oh anidmananu amu, ag Danab Bekkalag da, da noolppa hippaidkkulagnu elele daaglagnu ele unuqitteg!” awa aum.

Luk 21:36 Referans Kwoze

1 Jon 2:28

Ao, nid naunau dahilad, haen Nug miag atieb, ig ɠagattag daagnignu, ig uɗa nak ele ii aomtanu amu, ag Nug ele laippu dayeg!

1 Pita 5:8

Ag hanhan dabmena autna aweg! Satan, kekeɗ ahilag, nug am laion laa bia danab laa diia lakkunu oiyaya, huanak gayaya oitte.

Matyu 25:13

Jesus Nug anam ana amu, Nug nai tuɗitta aum. “Anam daakku amunu, ag dabmenan dayeg! Aɗinu? Da eɗuen uɗikkulnu haen amu, ag deɗ, haen ele ii dootteb,” awa aum.

Matyu 24:42

Amunu ag Danab Bekkalag da, da eɗuen nekkulnu dabmenan dayeg! Aɗinu? Deɗ adekkuppa ahilag Naɗi uɗikku amu, ag ii dootteb.

1 Pita 4:7

Aria, keeke oh iitta mekkulagnu haen aakku guguittak daatte amunu, ag unuqittak hekkulagnu elele daaglagnu, ag dabmen autna aona, ag nukka nug nuhig oiyak pehettak atognoak kobol ele dim lamidna dayeg!

1 Korint 16:13

Ag Korint danab ag ib apiɗidna eheɗ gomananu amu, ag dabmettan autna aona, ag ahilag ooppa genab doyakppa ɠagattag daan, ag ooppa ɠagattag dayak ele daanna, ɠagattag ele dayeg!

Luk 18:1

Amu Jesus Nug keeke danab ag dootteb ii dootteb ele ouaqata ippuanatta, ag haen oh unuqidkkulagnu, ag bahilag yaamanu ele amelagppa aum.

Mak 13:33

Ag haen amu ii dootteb amunu, ag dabmenan dayeg!

Jut 1:24

Aria Kayak Nug ag dabmatta auta aweb, ag ii nena qemananu elele daatte, Nug nukka ag diia, Nug noobppa, aben amuam binag amahlak oppiaawak ele, appa nuhig neekkakppa ag oolagppa kaliak laa iitta ele, maɗoɗppan gamag ahak naɗi eleppa maatteb daaglagnu ele elele daatte.

Matyu 26:41

Satan ag eeɗatteb eheɗppa gomananu ag dabmenan daanna, unuqitteg! Ag tutukku hekkulagnu dabmetteb, amge ag beɗulag am ɠagattag iitta,” awa aum.

Malakai 3:2

Nug anam uɗikku, amge haen nug uɗieb amu, aun nug deɗ amuppa ɠagattag daakkunu elele? Ao, haen Nug miag atieb amu, aun nug ena hibaitta daakku? Aɗinu? Nug silwa, gol keeke babaitta epeɗia awak uɗat hak danab nug aab gakkaɗaknab, amuppa he, dubuttid laa ii daatte, Nug aab amubia daakku. O iitta, Nug sop ɠagattag, dubuttid ihaeg na gotte, Nug amubia daakku.

1 Tesalonaika 5:17

Ag unuqittak haen oh henana dayeg!

Mak 13:37

Nai imuam ahilagib iitta. Da danab ah oh dilagnu ele attem. “Ag dabmenan dayeg!” awa aum.

2 Timoti 4:5

Amge nahipnu amu, na haen oh dabmak amahlak ele daye! Uug haenppa na ɠagattag daanna oiye! Kayak nai mehuqak uɗat am na he! Na Kayaknu mehuqak danab daakkutnu amu, na aɗi uɗat hekkutnu daatte amu na he!

Kolosi 4:2

Amu ag oh ag Kolosi daatteb amu, ag unuqittak hekkulagnu oolag mettan, ag unuqidnana, ag hamu aib heppig. Iitta. Ag dabmak ele unuqidkkulag, amu ag anam henana, ag Kayak amegppa, “Ena hen mekkame,” ele aon aig!

Aposel 10:2

Danab amu nug baekkudppa ele ag oh Kayaknu ebehilag oh bodoetta le meum. Amu nug men doɗo kuɗum, Juda danab men doɗo iitta ele, nug ag ehanatta madatta, haen oh nug Kayak unuqidttom.

Sam 1:5

Ag amubia daatteb amunu, Yawe Nug nau hak danab naippa maatteb, ag nau aomnanu oolna, laih laa ii gomana. Ao, hipunin danab ag am genab tutukku hak danab ah oolagppa ii daamna.

Job 27:10

Danab nug Kayaknu nuhig haknu ele uuak danab daatte amu, nug Laa Nukka Ɠagattag Oh Elenu enanagnab dookkute? Ge, nug haen oh Kayak unuqidkkute?

Luk 20:35

amge butti aɗi haen amu, Kayak Nug danab ah haen amu daaglagnu elele anatteb, ag eɗun hippaidna amu, danab ag ah ii diimna, ah ele ag danab ii diimna. Iitta.

Jeremaia 35:19

Ag amu hetteb amunu Yawe Nukka Ɠagattag Oh Ele, Israel dilag Kayak, Nug inam atte. ‘Rekap bekka Jonadap, nug buɗub am iitta ii memana. Iitta. Hanhan nug buɗubppan laa nug da waalppa dayaya, da oɗel dim lamidkku,’ awa atte.” Jeremaia nug Jonadap buɗub amelagppa anam aum.

Matyu 8:20

A amu, Jesus Nug ɗo mehuqak danab amegppa aum. “Doɗ laa onig foks, biun bia, ag wan oɗeppa niiaknu aben ele, ai ag ele teɗ ele, amge Danab Bekkalag da amu, da niiaknu aben laa iitta,” awa aum.

Matyu 24:43

Ag doyeg! Lag mameg nug haen adekkuppa tuqan yabhok danab uɗikku doolo, nug ib aɗaɗa heeb, yabhok danab nug laug loppaɗa, lag ooppa ii nolo.

Matyu 24:44

Amunu ag ele bappaidna dayeg! Aɗinu? Danab Bekkalag da, da haen laa ag ii dabmekkulag ele, haen amuppa uɗikkul,” awa aum.

Luk 1:19

A amu engel nug oɗeppa awa aum. “Da am Gabriel. Da Kayak noobppa daattem, amu Nug he, da amenppa nai ena imu appi dookkutnu uɗimi.

Luk 21:35

Aɗinu? Deɗ amu danab ah oh wan ohppa daatteb ag beeb anidkkulag.

2 Korint 4:14

Aɗinu? Ig doottem, Kayak Nug he, Naɗi Jesus Nug eɗua hibaittom, anamib geha Nug ig ele, Jesusnu ɠagattagppa ig ele maɗekkeb, ig eɗut hippaidpput amu, Nug ig ag ele oh omaikkeb gota, Nug ele oh laippu ouqak daagnig.

Revelesen 6:17

Aɗinu? Deɗ naɗi, amuam aa danab ah hipunin ahilagnu bu aqaglahnu deɗ, deɗ amu aakku beum daatte. Aun nug ɠagattag daya, haen naɗi amu eɗidkku? Auntai laa iitta!” aon appig.

Revelesen 7:9

Imu oh dimppa da baula neekke, danab ah kuɗum kuɗumnab qagmena daaegeg anadmi. Aun laa nug danab ah amu oh ebaqakkunu elele? Iitta! Elele iitta! Danab ah amu ag wanppan wan ohppanu, huu ohppanu, beɗulag iɗu iɗu ohppanu amu nai ohppanu ele, ag Sipsip Nag amu Kayak, Nug sia king ⌊anuqak,⌋ appa daatte ele, ag aa noolahppa hippaidna daappig. Ag lamen elab hakkab takkaladna, ad pam ebekkud eppelagppa aɗualadna daappig.

Revelesen 8:2

Amu dimppa da engel eblaih aɗit, Kayak noobppa hippaidna daatteb ele amu, da ag anadmi; ag trampet eblaih aɗit ele aakku mattaeg aoppig.

Revelesen 11:4

Ad olip aɗit, amu lam maknu balal aɗit ele, aa wan imu ohnu Naɗi, aa Nug noobppa daattep ele amu, aa danab aɗit imu ippunigttep.