Luk 16:15 - Nobonob Baibel

¹⁵ amge Nug ag amelagppa aum. “Ag amu danab dilag neekkakppa genab tutukku hak danab daaglagnu, ag amunuib oolag daatte, amge Kayak Nug ag oolag diig dootte. Danab ag aɗi keekenu enanag dootteb ele, Kayak Nug amunu ooppa uuaknab dootte.

Luk 16:15 Referans Kwoze

1 Samuel 16:7

Samuel nug ooppa anam aum, amge Yawe Nug Samuel amegppa aum. “Na nid imu, nug beɗu, iɗu ele ena anidna, ‘Imuam king daakku,’ aib ame! Aɗinu? Da nug king daakkunu geɗidmi. Da amu heminu diig am, da danab keeke anidna epeɗitteb, da amubia ii hettem. Iitta. Ag am keeke dimittim amuib anidna epeɗitteb. Da am danab oolag anidttem,” awa aum.

Prowerb 21:2

Keeke oh danab nug hette amu, nuhig dabmakppa am tutukkuib; amge Yawe Nug danab nug aɗi diignu nug keeke hette amu, nug amu atognoa neekkitta auta aotte.

1 Korint 4:5

Epeɗiak uɗat amu ig gemu ii gumattem amunu, haen gamag imuppa ig anam ii hemata. Ag Naɗi uɗikkunu haen ameg meig! Nug uɗia, keeke oh gatatuppa lokkumak daatteb amu heeb, amahlakppa miag atippeg, aria Nug ele heeb, danab ag diig aɗinu keeke laala heppig amu, danab oh dilag dabmak amu miag bekku. Haen amuppa geha Kayak Nug ig danab oh laib laib ihinig haknu nob tutukku megakku.

Jeremaia 17:10

Anam, amge Yawe Nug atte. “Da Yawe, da danab, nuhig hak aɗi ippuniɗtte amu, da amu dabmein, nob tutukkuib medakkulnu, da nuhig kobol aɗi ippuniɗtte amu, da amu ele dabmein, nob tutukkuib medakkulnu, da danab oolag unuqag andette, da ahilag dabmak ele anidttem.

Prowerb 16:5

Yawe Nug dada hak danab dilagnu ooppa uuaknab dootte. Genab, na imu ootppa genab doye! Nug genab ag bu madakku.

Aposel 15:8

Amu Kayak, Nug danab ah oh oolag diig dootte ele, Nug iitta aɗi nuhig Ouɗi ig mekkom bia ag mattom, amuppa Nug eɗua diiadkkunu oo dayom ig ippunikkom.

1 Pita 3:4

Iitta. Ag oolag unuqagppa bala mettaglag am ena. Bala mettak amuam nauhkkunu elele iitta. Bala amuam oo bodoettak kobol, amu dagom kobol ele. Kobol amu Kayak noobppa amu enanag.

Luk 11:39

Anam heum amge Jesus Nug amegppa aum. “Ag ɗo gumak danab-Parasia ag kap, tappiɗ ele gaɗaib ihatteb, amge ooppa baubau awaknu hik qak, nau hak kobol ele ambak daattep.

1 Stori 29:17

O Kayak dahil, da doottem, na danab oolagppa attem attem daatte, ag oolag italttem. Amu na danab nug nuhig dabmak oiyak ele am tutukkuib anidna, na amunu ootppa ena doottem. Anam amu, keeke imu oh da na mettami amu, da oo qak iitta ele, da dabmak genab dim lamitten mettami. Laa amu, da danab nahipad ag ina daatteb amu, ag oo qak iitta ele keeke medappig, da amu ele antten, gamag ahak okkai doottem.

Luk 10:29

Nug anam aum, amge ɗo doyak danab nug nukka onig ena daakkunu ha, nug Jesus oɗ metta aum. “Am dahil mudippan laippu am aun?” oɗ mettom.

Revelesen 2:23

Da nuhikkud nid ele heppi mauhkkulag. Amuppa Kristen tamaniak oh ag dooglag, da danab oolag, amu ahilag dabmak ele epeɗie aute aottem. Amu ele, da Taiataira daatteb, da ahilag hak attemu amu, da amuppa nob madakkul.

1 Pita 5:5

Ag danab bau ag onilag qeppeg neeb, ikki danab waalagppa dayeg! Ag oh ag ag onilkad qeppeg neeb, ag nug ehanittak kobol heig! Aɗinu? Kayak naippa, nai amunu inam daatte. “Kayak Nug dada danab ippulag oo nette, amge danab ag akka onilag qeeg nette ele, Nug ahilagnu ii helo bia me, Nug ag ehanadtte.”

Rom 3:20

Ɗo nai am danab oh dilag daatte, amge danab ohnab ag pehettak ii dim lamidtteb amunu, ɗo dim lamittak kobolppa danab laippu laa Kayak amegppa genab tutukku hak danab daakkunu elele iittanab. Aɗinu? Ɗo nai am ig hipunin ihinig uhuqa megakkunu keeke iitta. Ɗo nug he, eheɗ hak ihinig miag atitte aakkuib.

Jon 2:25

Nug danab dilag dabmak, diilag ele oh doyatta malom amunu, Nug danab laippu laa nug danab dilag dabmaknu, diilagnu ele Nug amegppa akkunu duttunak laa ii doyom. Iitta!

Matyu 23:5

Ag keeke oh danab amelagnuib hetteb. Ag Kayak nai inaknu kunup okkai henan, uɗalagppa amu eppelagppa ele qakkana, unuqittak lamen daugppa bala elab elab ele hetteb.

Luk 18:21

Jesus Nug anam a amu Juda dilag ikki danab amu nug aum. “Da nid nakokppanu ɗo amu dim lamitti uɗie, gemu ele anamib hettem,” awa aum.

Prowerb 20:6

Danab kuɗumnab ag lailkad dilagnu, “Da ahilagnu oo mauhaknab doottem,” aon atteb; amge auntai laa nug oo metta ii uuak kobol genab dim lamidtte?

Luk 18:11

Amu ɗo gumak danab-Parasia nug hibaitta, attan neekka dayaya, nukka nuhignu unuqitta aum. ‘Kayak, da am danab laala oh bia iitta. Ag am yab danab, eheɗ hak danab, am ewau pakkua gappai hak danab ele. Da am anam iitta, takis awak danab imu hette bia ele iitta amunu, da na amenppa, “Ena heme,” attem.

Sam 7:9

O Kayak, na genab tutukku hak kobolib dim lamidttem, na danab ah dilag dabmak unuqagnab daatte, na amu neegna anidttem. O Kayak, na heppe, nau hak danab, ag laa guittak nau mauhnoak madatteb, ag amu uuglagnu, na laa oh ag na oɗen dootteb ele, na ag ehanadkkutnu oɗ medattem.

2 Stori 6:30

amu Yawe na, na dayak aben nahip, amuam hab aab, na appa daanna, unuqittak amu dookkutnu ool daatte. Doon, hipunin attem daatte amu, na uhuqna mekkan, na nakkaib danab ah oh dilag dabmak doottem amunu, na dabmak amu anidnana, na ag anen anen kobol heppig ele, na amuppa na ag melemel elele mattan, na ag kobol heppignu nob elele madakkutnu oɗ medattem.

Aposel 1:18

(Judas nug eheɗ ha, uɗat amunu men doɗo awom ele amuppa ag wan laih laa daden meppig. Aria, nug nukka wan amuppa nug beɗu aiha na qe, beɗu aoɗe, biig oh wanppa ne,

Luk 20:47

Ɗo mehuqak danab ag anam henana, ag ah qab hambuppualadna, ag laulkad yab aotteb. Ag yab awona, ahilag hipunin amu danab ah amelagppa lokkumkkulagnu ag unuqittak elab hetteb amunu, epeɗiak haenppa geha ag uug okkainab aoglag,” awa aum.

Luk 20:20

Aria mana mettak danab okkai amu ɗo mehuqak danab ele ag Jesus meidnana daanna heeg, ameg qakkak danab laala ag ahan Jesus gumidna goppig. Ag gona, Nug noobppa danab tutukku bia henan daappig, amge ag nuhig nai mattiak amuppa, ag ib laa anidna, aon gabmannu hettoɗiak eppegppa mekkulagnu heppig.

Matyu 6:16

Amu haen ag ee ohnu kud men daatteb amu, ag iɗulag aib tiguguɗom. Hambuppuak danab ag ee ohnu kud men daatteb, haen amuppa danab laa oh ag anam hetteb anidkkulagnu, ag heeg, iɗulag tiguguɗtte. Da genab ag amelagppa attem. Hambuppuak danab, ag anam hetteb amu, ag ahilag hak amunu nob ena oh aakku aon malappig.

Matyu 6:5

Amu haen ag unuqidtteb amu, ag hambuppuak danab ag nai doyak lag ooppa, o iitta ib oɗatleppa danab ah ag anadkkulagnu hippaidna daanna unuqidkkulagnu oolag okkai daatte amu, ag amubia aib heppig. Da genab ag amelagppa attem. Hambuppuak danab, ag anam hetteb amu, ag ahilag hak amunu nob ena oh aakku aon malappig.

Matyu 6:2

Anam amunu, haen na daɗek danab ehanadttem amu, na hambuppuak danab ag nai doyak lakka, o iitta ib manppa ele danab ah ag binalag mekkulagnu hetteb, amubia ag muttub ele daɗek danab aib ehanadppig. Ag lokkumakppa heig! Da genab ag amelagppa attem. Hambuppuak danab, ag anam hetteb amu, ag ahilag hak amunu nob ena oh aakku aon malappig.

Malakai 3:15

Anam amunu, ig inam attem. Beɗuppa tak danab ag itittak ena aon oitteb. Laa ag eheɗ hetteb, ag en okkai aotteb, am laa ag Kayak Nug ahilagnu eheɗ hekkunu, Nug amegppa atteb ele amu, ag uug laa ii anidtteb amunu, ig anam attem. Ag dahilnu anam atteb.” Yawe Nug anam atte.

Sam 49:18

Danab nug bau dayaya, nug enub awawa, nug enub amu ohnu gamag ahakkutai. Ao, nug anam dayebeb, wanppan danab ah ag anidna, ag onig okkai mettaglagtai.

Sam 49:13

Imu ele dabmetteg! Danab ah ag akka ahilagnu, “Ig ikka ig elelenab daat, laappanu ehanittak keeke laanu awaknu ii daattem,” atteb amu, ahilagppa inam bekku. Ao, laa ag akka ahilagnu ena, elelenab dootteb amu, ahilagppa inam bekku. Sila.

Jon 21:17

Jesus baula ewam batak Pita oɗ mettom. “Saimon, Jon bekka, na dahilnu oot mauhttete?” awa aum. Pita Jesus haen ewam batak, “Na dahilnu oot mauhttete?” aum amunu ooppa guittak doyaya, nug Jesus amegppa aum. “Naɗi, na keeke oh doon malame, amu na da nahipnu ool mauhtte ele doottem,” awa aum. Pita anam a amu Jesus amegppa aum. “Dahil sipsip bekkadna meɗe!” awa aum.

Sam 10:3

Aɗinu? Nau hak danab ag eheɗ henana, en kuɗum aoglagnu dabmenana, ag amu haknu ag akka binalag metteb. Ao, ag danab baubau awaknu hik qak kobol dim lamidtteb binalag mena, ag Yawe Nug eheɗ laa awaknu anak waappa daakkunu anan, dimedatteb.

Luk 18:9

Am Jesus Nug danab laala ag akka ahilagnuib, “Igib genab tutukku hak danab,” anana, ag danab laa dilagnu, “Ag nau, hipunin ele,” aon appig ele amu, Jesus Nug ag amelagppa keeke danab ag dootteb ii dootteb ele ouaqata ippuanatta nai imu mattiom.

Luk 18:14

Jesus Nug nai amu mattiowa, Nug baula amelagppa aum. “Da ag amelagppa attem, Kayak he, takis awak danab nug genab tutukku hak danab daye, eɗua laugppa ukkom, amge danab laa nug am anam iitta. Amunu laa nug onig humatte amu, Kayak Nug heeb danab amu nug onig nekku, amge danab nug onig qe nette amu, Kayak Nug danab amu nug onig humakku,” awa aum.

Aposel 1:24

Ag danab aɗit otiatona, ag inam unuqidppig. “Naɗi, na danab oh oolag diig doottem amunu, danab aɗit imu oolahppan na aun nug Judas abenabppa ba, totol uɗat imu aokkunu tituanme amu, na ig ippunigkkutnu oɗ medattem. Judas nug nuhig abenppa gokkunu uɗat amu uuom,” unuqidna anam appig.

Rom 8:27

Amu Kayak, Nug danab oo unuqagnab anidtte ele, Nug nuhig Ouɗinu unuqittak amu dootte. Aɗinu? Kayak Ouɗi Nug Kayaknu danab ah oppiaawak ele dilag unuqittak awa, Nug Kayak oo niitte bia amunu unuqidtte.