Lewitikas 4:28 - Nobonob Baibel

²⁸ Haen nug hipunin heum doya amu, nug mana mettak haknu meeme balat, beɗuppa eheɗ laa iitta ele, amu awa, nug hipunin heumnu mana mettak hekkunu wakkuoitte.

Lewitikas 4:28 Referans Kwoze

Lewitikas 4:23

Haen nug hipunin heum doya amu, nug meeme dawai laa, eheɗ laa beɗuppa iitta ele amu awa, nug hipunin heumnu mana mettak hekkunu wakkuoitte.

Lewitikas 4:32

Am laa nug ib etta hipunin haknu ofa hekkunu haaha, nug sipsip awa dotte dayeb, nug sipsip balat eheɗ laa beɗuppa iitta ele, amuppa hekkuoitte.

Lewitikas 4:3

Laa amu hekku, nug mana mettak ikki danab daatte dayeb, nug Israel oh ag hipunin hekkulagnu elele daatteb bia hipunin hekku dayeb, nug Yawe toppa makau gaiɗ laa, ib etta hipunin haknu ofa daakkunu, beɗuppa eheɗ laa iitta ele amu awa, Yawe gumitta ukka, Nug medakuoitte.

Galesia 3:28

Amunu gemu Juda danab, Grik danab ele, begbeg maɗi nid, begbeg maɗi nid iitta ele, danab amu ah ele, ag oh elele eleleib daatteb. Ag oh Jesus Kristusnu daan, laippu daatteb.

Rom 8:3

Amu inam. Ig oonig alag nug he, ɗonu ɠagattag am gai-iitta dayom amunu, ɗo nug heeb, ig ena bekkunignu elele iittanab, amge keeke ɗo nug hekkunu elele iitta amu, keeke amu Kayak nukka heum. Kayak Nug nukka Nug Bekka me uɗia, danab beum. Nug beɗu am, ig hipunin danab, ig beɗunig bia tagittom, amge Nug am hipunin laa iitta. Amu Jesus Nug ib etta hipunin haknu ofa dayeb, amuppa Kayak Nug ihinig hipunin uhuqa megakkunu, Nug Jesus me uɗiom. Ib amuppa amu, Kayak Nug danab ah ag hipunin waappa ii daamnanu heum.

Jeremaia 31:22

O Israel danab ah, ag am nid ah laa, nug mameg oɗe ii doyaya, kobol digdig hette, ag amubia da dimeɗona kayak hambuppuak laala dim lamadtteb; amu haen gane laa ele ukkeb, ag kobol amu uun, eɗun Yawe ele laippu daaglag? ⌊Yawe Nug heeb, ag eɗun uɗiglag⌋ am kobol baunab aakku. Ah ag digmena, danab gumalob amuam kobol baunab aakku daalo, amubia Yawe Nug heeb, ag eɗun uɗiglag am kobol baunab aakku.

Aisaia 7:14

Na atnu oɗmak hekkutnu uume amunu, Naɗi Nug nukka geha at laa na ippunidkku. At amuam inam. Ah makkun laa nug oo ele daya, geha nug nid danab menua, nid onig Imanuel ataɗkku.

Lewitikas 5:6

Nug nuhig hipunin miag uhuqowa, nug hipunin amu heum, amunu nug sipsip balatte, o meeme balatte laa awa, Yawe toppa wakkuoitte. Amuam nuhig ib etta hipunin haknu ofa aakku. Mana mettak amuppa amu, mana mettak danab nug heeb, eheɗ haknu nob nau doɗ tiigppa iitta meeb elele medakku.

Lewitikas 4:14

Amu haen ag hipunin heppig, ag amu doona, ag ib etta hipunin haknu ofa hekkulagnu, ag makau gaiɗ aon uɗiglagoitte. Ag doɗ amu aon, mettid haknu peh lag danab ah appa qagmetteb ele, ag lag amu odppa Yawe gumidna wana, Nug mettaglagoitte.

Genesis 3:15

Amu da heppi, na ah ele gamalahppa hanhan kekeɗ daakku. Ele amu, ah buɗub, amu na buɗun ele gamagppa kekeɗ daakku. Amu ah buɗub laa aha, na ikkin tappeb toɗeb, na danab amu baeg bittub heppe hinqekku,” awa aum.

Sam 90:8

Na hee, ihinig hipunin oh na noomppa miag atiak daatteb. Ao, na am amahlak ele, amu na hee, ihinig hipunin, ig lokkumakppa hemut ele amu, hipunin amuam na noomppa amahlakppa miag atiak daaegeg anadttem.