Lewitikas 27:28 - Nobonob Baibel

²⁸ Amge keeke laa danab nug amu he, Yawenuib nuhig pelemppa daatte amu, ag daden ha maknu, o en mettakppa uhuqaknu iinab hemana. Danab laate, o doɗ laate, o aug wan laate, amge keeke amu mameg nug keeke Yawenuib nuhig pelemppa daatte, nug keeke amu tituanakppanu eɗua uhuqak hekkunu elele iitta; ma heeb, laa daden mekkunu ele, elele iitta. Nug anam ii hema. Keeke laa Yawenuib nuhig pelemppa daatte, amuam Yawenu, tituanaknab daatte.

Lewitikas 27:28 Referans Kwoze

Eksodas 22:20

Da am Yawe, amu ag doɗ main, daib meɗeg! Danab laa nug doɗ laa mana, kayak hambuppuak laa medakku dayeb, ag heppeg, danab amu nug dahilnuib, dahil pelemppa dayaɗ!

Lewitikas 27:21

Haen maɗoɗnu gamag ahak dayaknu maɗ tituanak daatte, maɗ amu dob amu, wan amu eɗua mameg toppa ii wama. Iittanab, amuam Kayaknu tituanak daakku. Amuam wan laa Yawenuib nuhig pelemppa daatte, am amubia daakku. Amuam mana mettak danab dilag.

Duteronomi 25:19

Ag anam heppig amunu, haen Yawe, ahilag Kayak, haen Nug heeb, ag hik aon ena daaglagnu, wan Nug ag aulag daakkunu madatte, ag amuppa daanna amu, haen amuppa ag banelag gona, Amalek danab ah ag iitta mena autna aoppeg, hab waappa, danab laa nug baula ahilagnu dab-ii-memanu heig! Ag amu hekkulagnu aib daulag atiom.

1 Samuel 15:18

Yawe Nug anam he, na king daattem, amu Nug na amenppa na keeke laa hekkutnu anana, Nug aum. ‘Na gona, Amalek danab, ag am nau hak danab amu, na gona heppe, ag dahilnuib, dahil pelemppa dayeg! Na ag ele ban heppeg ukkeb, ag iitta meig!’ Yawe Nug na anam hekkutnu aum

Josua 7:1

Amge Israel ag keeke Yawenuib nuhig pelemppa daappig, ag keeke amunu Kayak ippunattomnu oo metta ii uuak kobol ii dim lamitteg, laa nug keeke amunu laala awom. Danab onig Aakan nug keeke amu laa yab awom amunu, Kayak nug Israel dilagnu oo huana nauhom. Aakan nug Karmi bekka. Karmi nug Simri bekka. Simri nug Sera bekka. Aakan nug Israel dilag huu okkai Juda, amuppanu.

Josua 6:26

Haen amuppa Josua nug nau aomnanu dabmettak nai aum: “Aun laa nug Jeriko aab okkai eɗua buukkun hekku amu, nug Yawe noobppa eheɗ laa awaknu anak waappa daakku. Aun laa nug anam hekku dayeb amu, nug digma buuebeb, nug nid danab tatamnu am mauhkku, amu nug bekka dimnunab am aab okkai eɗua buua malakkun haaha mauhkku,” awa aum.

Namba 18:14

Israel oolagppa amu, aɗi am da Yawe dahilnuib dahil pelemppa daatte amu, amuam na, na begapad ele, ahilag daatte.

Galesia 3:13

Ɗo ig eheɗ laa awaknu anak waappa daattemnu atte, amge Kristus Nug Kayak naippa yaak, “Danab oh ag ad attan aihadtteb ele, danab amu ag eheɗ laa awaknu anak waappa daatteb,” Nug nai amu attenu qagaiettak awa, amuppa Nug qagaiettak amuppanu eɗua uhuqak ha megakka, nob nau amu awa ehanikkom.

Galesia 3:10

Amge danab ag genab tutukku hak danab bekkulagnu amu, ag, “Ig ɗo dim lamidta genab tutukku hak danab bekkunig,” dabmenan atteb ele, danab amu ag eheɗ laa awaknu anak waappa daatteb. Aɗinu? Kayak naippa nai amunu inam daatte. “Danab oh ag nai huppu oh ɗo yaak bukppa daatte tutukkunab ii dim lamidna, oh elele ii hena amu, ag eheɗ laa awaknu anak waappa daatteb.”

1 Korint 16:22

Am danab laa nug Naɗinu oo ii mauhtte dayeb, nug eheɗ laa awaknu anak waappa dayaɗ! Naɗi, na uɗie!

Rom 9:3

Kayak Nug da lailad, ag am da ele tiinig laippu, Nug ag eɗua diikkunu ool okkai daatte amunu, ib laa elele daalo, ib amuam da eheɗ laa awaknu anak waappa daalom, Kristus da geɗileb, da laih wain padal melom, ib amuppa da Israel danab ah ag Kayak noobppa ena daaglagnu ehanadkkulnu elele daalom amu, da anam helom. Amge ib anam bia laa iitta.

Matyu 25:41

Aria, laa nanehppa daatteb ele, da ag amelagppa akkul. ‘Ag laa ag eheɗ laa awaknu anak waappa daatteb amu, ag uuiɗna ukkeg! Ag aab aɗu ii qauha, hanhan eotte ele, Naɗi Nug Satan, amu nuhikkud engel ele dilag heum amu, ag amuppa ukkeg!

1 Samuel 15:3

Da amu hekkul amunu, na heppe, na Israel danab ele ag ahan, banelag gona, Amalek ele ban hena, ag Amalek oh, amu ahilkad keeke ohnab ele heppeg, ag dahilnuib, dahil pelemppa dayeg! Ag keeke laippu laa aibnab uuppeg dayom. Ag Amalek danab, ah, nid naunau, nid yuɗ ele, amu ahilkad makau, sipsip, kamel amu donki ele, ag amu ohnab aqappeg mauheg!’ ” awa aum.

Ikki Danab 21:18

Amge ig Israel ig ihinig nai ɠagattag qettat, inam amut. ‘Aun laa nug aɗeg Benyamin ted, nug wau daakkunu nug medakku amu, danab amu nug eheɗ laa awaknu anak waappa dayaɗ!’ amut amunu, ig ag, ig aɗenkad ii mattamta,” aon appig.

Ikki Danab 21:11

“Ag inam iikku hekkulag. Ag danab amu oh, ah oh ag makkun iitta ele, ag ag oh heppeg, ag Yawenuib nuhig pelemppa dayeg!” appig.

Ikki Danab 21:5

Ag amu hewona amu, ag appig. “Haen ig Mispa appa, ig Yawe noobppa qagmeta, ig Benyamin huunu attem haknu maidmut amu, aun laala ag Israel dilag huu okkai attenppanu ii daappig?” aon oɗ mettan appig. Ag oɗmak amu heppignu diig am, haen ag Mispa qagmeppig amu, haen amuppa ag imu bekkunu ahilag nai ɠagattag qettan appig. “Laa nug ippa, Yawe noobppa uɗiaknu uuom amu, nug mauhkku!” aon appig.

Josua 7:25

Anam daye, Josua nug Aakan amegppa aum, “Na aɗinu ihinigppa uug aon uɗime? Yawe Nug gemu nahip-ppa uug mekku,” awa aum. Nug anam a, Israel ag Aakan, aria nuhignu ele menppa makkuɗattegeg mauheg, ag nug gaɗa, nuhignu ele manatteg eoppig.

Lewitikas 27:27

Amge, doɗ ii lanaknu epeɗiak daatte ele, amunu laa ⌊dawai⌋ tatamnu laa dokku dayeb amu, doɗ mameg nug nug daden haknu men doɗo melemel gane, mana mettak danab nug aum, nug amu tuɗitta, 20 pesent laa ele ma, daden mekkunu elele. Amge nug doɗ amu tituanakppanu eɗua uhuqak amu ii hekku dayeb amu, mana mettak danab nug awa, nob ganenu meeb, laa nug daden mekku.

Lewitikas 27:29

Amu danab nug nauhkkun Yawenuib nuhig pelemppa daatte amu, laa nug en mettakppa uhuqkkunu elele iitta. Laa nug anam daatte amu, ag nug qeppeg mauhaɗ!

Duteronomi 7:26

Ag aib kayak hambuppuak dottog laa, o amunu keeke laa aon, ag laulagppa noppig. Yawe Nug keeke amunu ooppa uuaknab dootte. Keeke amuam Yawenuib nuhig pelemppa daatteb amunu, ag laulkadppa akkan nokkulag dayeb amu, ag ele am geha Yawenuib nuhig pelemppa daaglag. Keeke amuam Yawenuib nuhig pelemppa daatteb amunu, ag keeke amu aɗaglagnu oolagppa uuaknab doyeg!

Esekiel 44:29

Mana mettak danab ag Israel danab ah dilag ee aegnu ofanu aeg, amu ib etta hipunin haknu ofanu teppu laa, amu eheɗ haknu ofanu teppu laa ele aon lakkulag. Ag amu lakkulag, amu aɗi keeke Israel ooppa Yawenuib nuhig pelemppa daatte ele amu, amuam ele mana mettak danab dilag aakku.

Esekiel 48:14

Wan ag da meɗaglag amu, Lewi buɗub ag meppeg, laa nug uɗia aib daden meum. Lewi buɗub, ahilagib dayaɗ! Wan amuam wan enanagnab, laa oh eɗattak. Wan amuam da, Yawe, dahilnu tituanak daatte amunu, danab laa wan amu aib awom.

Lewitikas 21:22

Nug amu ii hema me, nug Kayaknu mana mettak hak, laa Kayaknu tituanak daatteb, laa Kayaknu, tituanaknab daatteb amu, nug amu lakku.

2 Stori 31:14

Ag amu heegeg, Imna bekka Kore, nug Lewi buɗubppan mana mettak danab iitta, ag oolagppanu, nug Yawenu mettid lagnu aɗ od kaɗag uɗitteppanu daattenu gumak okkai amu, nug Israel danab ah ɗo hamu mettaknu ofa aon uɗin, amu keeke Israel danab ah ag Yawenu daakkunu tituanna, Nug medappig ele aon uɗippig, nug amu oh gumaama, nug keeke amu oh mana mettak danab, amu Lewi buɗubppan mana mettak danab iitta, ag ele, nug ahilagnu otiatta mattom.