Kolosi 2:18 - Nobonob Baibel

¹⁸ Danab laa nug danab amelagppaib nug onig qe nette, amge ooppa nug nukka nuhignu, “Da am danab onil ele,” dootte, nug ele engel binalag mette amu, nug ag hambuppualatteb, ag nob ena Kayak madakkunu dabmette ele ii aomnanu ag danab amubia waappa aib daappig. Danab amubia amu nug tul niiakppa o ib attenppa aɗi keeke anttom ele amu, nug amunu nai kuɗum mattiaya, nuhig dabmak, Kayak Ouɗi Nug dabmak nuhig ii gumatte ele amu, nuhig dabmak amu he, danab amu nug nukka nuhignu am binag okkai ele dootte.

Kolosi 2:18 Referans Kwoze

Kolosi 2:8

Ag danab laa nug ag ulah nai, nai meu iitta ele amelagppa mattia hambuppualatteb, nug waappa daamnanu dabmeig! Danab kobol amu hetteb ele amu, ag mattiak ahilagppa alai aɗi dilag kobolnu, amu wan imuppan ɗo ɠagattag iitta ele, ag amunu maditteb. Kristusnu amu ag ii maditteb.

1 Timoti 1:7

Ag Kayaknu ɗo mehuqak danab daaglagnu oolag daatte. Ag ele atteb. “Ig ihinig nai amu genabnab,” amge ag akka ag nai amu pehettak ii dootteb, nuhig diig ele ii dootteb.

Kolosi 2:23

Genab, ɗo meu iitta kuɗum, amuam ag mettid haknu atteb, ag ig ikka ig oninig qepput nekkunu atteb amu, ag ig beɗunig ele guittak mettagnignu atteb amu, ag neekkak hamuppa amu ena bia daatteb, amge anamnab iitta. Ig doottem, danabnu dabmakppanu ɗo laa nug ig ehanikkeb, beɗunu oo alag kobol, beɗunigppa eeɗigtte amu, ig ɗo amuppa qepput nokkunu elele iitta.

1 Timoti 4:1

Kayak Ouɗi Nug miag ippunigtte, haen gamag imuppa danab laala ag oolagppa genab doyak uuna, ag ouɗi hambuppuak dilag nai, amu ouɗi nau dilag nai ele dim lamidkkulag.

2 Korint 11:3

Amge da baɗattem. Mat nug lokkumakppa kobol kobol hekkunu doya auta awak kobol nuhigppa anukka Ewa bubuitte na qeum amu, amubia kobol anam laa ahilagppa ba eeɗatteb, ag oppiak kobolppa dayaknu ib apiɗidna, ag Kristusnuib daaglagnu daatteb ii dabmemananu ool baɗatte.

Rom 1:25

Danab anam amu ag Kayaknu nai doyak diig genabibppanu uun baolin, ag nai hambuppuak aoppig. Amu ag keeke Kayak hattom ele, ag keeke amu noolagppa dup nona binalag mena, amu dilag uɗat hena, ag waalagppa daanna, ag Kayak, Nug am keeke ohnu diig daatte ele, ag Nug dimedappig. Kayak amu, ig hanhan Nug binag metu! Genab.

Matyu 24:24

Aɗinu? Geha danab laa ag hambuppuna, ‘Da am Kristus,’ o ‘Da am propet,’ akkulag. Ag anam anana, ag epponak keeke danab haknu elele iitta okkainab, amu kobol danab haknu elele iitta laala ele hekkulag. Ag amuppa Kayak danab ah, nuhikkud tituanattom ele, ag agnab hambuppualadkkulagnu hekkulag, amge elele iitta.

Revelesen 3:11

Da paha eɗue uɗikkul. Laa nug nahip keeke ena, king haɗ bia amu, nug aomanu, keeke na aome amu na ɠagattag aɗan daye!

1 Jon 2:26

Da aun ag hambuppualadkkulagnu hetteb amu, ag ahilag hambuppuak amu miag atiak anidkkulagnu iikku yaattem.

Pilipai 3:14

da hab aabppa gokkulnu wagai mein, qaiedattem. Aɗinu? Kayak Nug da hab aabppa Kristus Jesusnu uɗatppa keeke ena meɗakkunu onilppa eum amunu, da amu aokkulnu anam hettem.

Epesus 5:6

Laa nug nai hamu mattiakppa ag eeɗatteb, kobol nau oh amuppa nomananu dabmeig! Aɗinu? Kayaknu oppoɗi bak uɗitte ele am danab oh ag Kayaknu ɗo tappaeg nette ele, ahilagppa daakku

1 Korint 8:1

Aria, dimittimnu danab, ag Jesusnu oolagppa genab ii dootteb ele, ag doɗ main kayak hambuppuak dottolkad madatteb amu, ig Kristen ig teppu amu lakkunigtai, o iittatai, imu am amunu nai. Ig doottem, ig oh am keeke amunu doyak ele, amge doyak ⌊nukka dayeye, oo mauhak ulum ii medatte dayeb,⌋ doyak am heeb, danab nug doyak ele dada danab bette. Amge layagnu oo mauhak kobol am danab oo ɠagattag qedatte.

Daniel 11:38

Nug kayak laa oh, Kayak genab ele ii dabmema, amge nug kayak laippuib binag mekku; amuam kayak laa aab aɗ ɠagattagnab ele ehanadtte atteb, kayak hambuppuak amu nug binag mekku. Nug mamekkud aɗi ag kayak amu ii dooppig. Nug kayak amu binag maama, gol, silwa, men daden nob okkainab ele, amu laa, nuhig daakkunu keeke, daden nob okkainab ele, am nug medakku.

Esekiel 13:3

Naɗi Yawe Nug inam atte. ‘Ag propet hambuppuak, ag dabmak tutukku iitta ele, ag akka ahilag dabmak dim lamidtteb, ag keeke laa da ii ippunadminu mattinna, da ag ippunadmi bia maditteb amu, ahilagnu am gadonnab gadon.

Genesis 3:13

Awa a amu, Yawe Kayak Nug ah oɗ mettom. “Aɗinunab na anam heme?” awa oɗ mettom. Oɗ mette amu, ah nug eɗua amegppa aum. “Iitta! Mat nug da hambuppuiɗe, ad meu imu lami,” awa aum.

Revelesen 19:10

Anam a amu da nug noobppa dup noin binag mekkulnu nug baegppa laippun gatel qaun oin gomelen, iɗul wanppa memi, amge nug da amelppa aum. “Na anam ii hemana! Da na, amu na laipad ele, ag oh Jesusnu oolagppa genab doonna, nuhignu mehuqtteb ele, da na ag ele, ig oh am Kayaknu maɗi nid. Na Kayak noobppa dup nona binag me! Aɗinu? Propet ag Kayak Ouɗi ɠagattagppa Jesusnu mehuqak heppig, amubia Jesusnu mehuqak oh am Kayak Ouɗi ɠagattagppa bette,” awa aum.

Revelesen 13:14

Kayak nug doɗ dakkuɗ geha ahom ele amu, Nug nuhig ib oo ii neum amunu, nug uɗat digdig amu, amuppa doɗ dakkuɗ tatamnu amu ehanitta heum. Amu kobol amuppa wanppanu danab ah hambuppualattom. Nug danab amelagppa inam aum. “Ag doɗ dakkuɗ anukka qep elabppa yaak awom, amge ii mauhom, nug bau dayom, ag nug dottog hoina, binag meig!” awa aum.

Revelesen 13:8

Danab ag wanppa daatteb ele amu, ag oh nug noobppa dup nona binag menana unuqidkkulag. Yo, danab ah oh, ag onilag Sipsip Nag mauhom ele amu nuhig buk laa, onig Bauklel Awe Onig Yaaknu Buk, buk amuppa ii yaak amu, ag oh doɗ dakkuɗ noobppa dup nona binag mekkulag. Sipsip Nag mauhom ele amu, Kayak Nug anukkanab, wan digma heum haenppa, Nug anam mauhkkunu dabmeum.

Revelesen 12:9

Amunu ⌊Maikel, nuhikkud engel ele⌋ ag nug maoeg wanppa noum. Mat naɗinab amu nug anukkanu, nug onig laa am Satan, onig laa am Dewel. Nug wanppanu danab ah oh hambuppualadtte ele. Ag nug maoeg wanppa noum, nuhikkud daup oh ele buɗiatteg wanppa noppig.

2 Pita 2:14

Hambuppuak ippunittak danab amu ag ewau pakkua gappai hak kobol hekkulagnu ah oh neekkadnana daatteb, ag hipunin hekkulagnu oolag ahakib daatte. Ag kobol amu henana, laa ag kobol tutukku dim lamittaknu bodoettak amu eeɗatteh, ag hipunin hetteb. Ag baubau awaknu hik aqeeqe men doɗo awaknu kobol amu, ag amu doon autna aotteb. Ag eheɗ laa awaknu anak waappa daanna oitteb.

Kolosi 2:4

Amu da danab laa nug nuhig nai ittag ele amge meu iittappa ag eeɗadmanu dabmein, da ag amelagppa nai amu madittem.

2 Korint 12:20

Haen da ag gumatte ukke tein, da ag danab attem daaglagnu ool daatte amu, da anam bia ii anadkkulnu, ag ele da aniɗna, da danab attem daakkulnu oolag daatte, ag anam bia ii aniɗkkulagnu amu, da ool ii daatte. Da nai a ona a doak kobol, dahil doya laa aomanu doyak aɗa dayak kobol, nai hak kobol, obatak obatak dayak kobol, baeg qak kobol, dimug nai mattiak kobol, beɗuppa tak kobol, Kristen tamaniak kaboliak kobol ele amu, da amu anidkkulnu ool ii daatte.

1 Korint 13:4

Danab nug oo mauhak dootte ele, nug laa dilagnu paha eheɗ ii dootte, amu nug laa dilagnu oo bodoettak dootte. Nug laanu ameg qe oo elele ii dayak kobol ii hette. Nug nukka onig ii humatte, nug dada ii hette.

1 Korint 9:24

Danab ag qaiqaɗ gona, nug eɗid eɗid hetteb ele, ag oh qaiqaɗ gotteb, amge danab laippuib nug nob ena aotte, ag iite dootteb? Aria, ag ele qaiqaɗ gonana, laih laih aib neegppig. Iitta! Ag nob ena aoglagnu aakkuib dabmenana qaietteg!

1 Korint 4:18

Da Timoti meppi ahilagppa gokku, amge dimppa da ele gumatte gokkul. Da tatam ii gomi, dimppa gokkul amunu ag oolagppa laala, “Nug eɗua ig gumikka ii uɗima,” anana, beɗuppa tak kobol hetteb.

1 Korint 3:3

Aɗinu? Ag dabmak alagppa daatteb. Kristen kobol amu ag beɗulagppa ii beum. Ag lailkad dilagnu, ihinigppa anam daalon dabmak aɗan daatteb, ag nug mehqak henan daatteb ele amunu, ig ag kobol alagppa, Kristen kobol iittappa daatteb anidkkunignu elele. Kobol amuam dabmak alagnu, wanppan danab dilag kobol.

Rom 16:18

Danab amu ag ihinig Naɗi Kristus waappa daan nuhig uɗat ii hetteb. Iitta. Ag am beɗulagnu dabmak nau amuib dim lamidtteb. Amu oo eeɗaknu nai ittag ele, ag amuppa danab ag kobol atten am ena, kobol atten am nau ii dootteb ele amu, ag buppualadtteb.

Aisaia 57:9

Ag danab ah eheɗ hetteb ele, ag kayak hambuppuak onig Molek, ag nuhig neekkakppa ena daaglagnu ag olip goɗen gaɗalag laaidna, leppu muttuɗig enanag ele huanaknab laaidna, ag gona, nug noobppa dup nona binag metteb. Ag kayak hambuppuak laa ele anadna, noolagppa dup nona binalag mekkulagnu ag heeg, nai awa ukkak danab ahilkad ag umanab gona mattiadppig; ag mauhak abenppa batak amu hekkulagnu heppig.

Job 38:2

“Laa nug nai doyak iitta ele mattiaya ha, dahil ulum nai gatatuppa tonom daatte amu, laa amu nug aun?

Duteronomi 29:29

Yawe, ihinig Kayak, Nug haen gemunu keeke, o butti aɗinu keeke amu, Nug amunu diignu doyak tutukku oh ig ii mekkom, amge ig, amu ig buɗunkad ele ɗo mekkom, Nug ig amu dim lamittaknu haknunab anak nai ihinignu aum.

1 Korint 4:6

O lailad, da ag ehanadppi, ag da Apolos ele, ag i anitna, kobol ihinihppa ag antte oo maittak laa anidna, nai laanu meu anidkkulagnu da nai mattimi. Nai laa ag amunu meu anidkkulagnu am inam. “Yaak niitte aakkuib ag dabmenan oiyeg!” Ag nai amunu diig dooglag dayeb, ag danab laa onig ii humana, laa onig tabappeg ii nema.

Epesus 4:17

Amunu da imu ag amelagppa attem. Da Naɗi onigppa iikku ɠagattag madittem. Ag nai imu aotteb ele amu, ag iitta aɗi ag dabmak apiɗidna oitteb ele amu, ag kobol amubiappa baula aib oippig.