Kolosi 1:23 - Nobonob Baibel

²³ Anam amge, keeke laa ag Nai Ena am ena baknu dabmak aɗa dayak ippunigtte, am dabmak amuppanu eeɗatteb, ag Jesusnu Nai Ena doona, oolagppa genab dooppig ele, ag ooppa genab doyak amu uuna, ag nena qemananu, ag tuɗidna, ooppa genab doyak amu ɠagattag aɗan ɠagattagnab daaglagoitte. Jesusnu Nai Ena ag dooppig ele amu, danab wan ohppa daatteb, ag amunu mehuqak dooppig. Amu da Pol, da am nai amunu maɗi nid daattem.

Kolosi 1:23 Referans Kwoze

Hibru 3:14

Aɗinu? Ig Kristus ele tamanit, laippu daagnignu ib am laippuib. Laa iitta. Ib amuam inam. Ig tatam Kristusnu oonigppa genab doomut amu, ig amuib aɗapput ukkeb, mauhak haen ihinigppa ele ooppa genab doyak nuhignu amu aakkuib aɗagnig dayeb, amuppa ig genab Kristus ele tamanit daattem.

Hibru 3:6

Amge Kristus Nug am Kayak Bekkanab, Nug oo metta ii uuak kobol dim lamitta, Kayaknu danab dilag ikki dayaya ag gumadtte. Amu ig ihinkad oo ɠagattag qettak aɗat, amu ig Kristus, Nug am ena bekkunu dabmak aɗa oiyaknu diig, ig amunu mehuqttem amu, ig Nug ele aɗat amu, ig Kayaknu danab ah daattem.

Hibru 10:38

Genab tutukku hak danab dahilad, ag dahilnu oolagppa genab dootteb amunu, ag bau daaglag. Amu laippu laa nug dimeɗakku amu, nuhignu amu da oolppa ena ii doopa.”

Galesia 6:9

Amunu ig kobol ena hekkunignu amu ebehinig aib bodoettom. Ig ebehinig bodo-ii-edakku amu, aria geha meu awak haenppa ig meu ena aakku aognig.

Aposel 14:22

Aa goyaya, aa Kristen ɠagattag aqai, ag ɠagattag daanna oiyegeg, ahilag ooppa genab doyak na qemanu ayaya, inam ele apiɗ. “Ig Kayaknu ɗo maɗoɗ ooppa nokkunignu, ig tatam uug kuɗum aot oignigoitte,” aoya apiɗ.

Epesus 3:17

ag ahilag ooppa genab doyakppa Kristus Nug ag oolagppa daakkunu, amu Kayaknu oo mauhak ag ɠagattag aqeb, ad diɗi nug wan aɗe ad ɠagattag daatte, amubia ag ɠagattag daaglagnu unuqidttem.

Rom 10:18

Amge da oɗ mettem. Israel danab amu ag nai iite dooppig? Yo, ⌊Kayak nai atte, amubia⌋ ag dooppig. ⌊Nai amuam inam.⌋ “Keeke amu oh baalag am wan atu ohppa ukka malom daatte. Yo, ahilag nai amu wan oh tualom daatte.”

Hibru 6:19

Amu gog tak haenppa ig genab bauklel aognig, dabmak amuam ig dabmak digdig dim lamidmatanu, uub mameg nug uubnu anka eum daatte, amubia aɗaikke daattem. Ihinig ehanittak amuam keeke genab, hab attannu Kayaknu mettid lag Oo Gunnab Eleppa omaikka gotte.

1 Tesalonaika 3:5

Amunu da baula hamu daakkulnu elele iitta oolppa doyena, da ahilag ooppa genab doyak anidkkulnu Timoti mei ukkom. Da oolppa uug doomi. Aɗinu? Da eheɗ haknu oo eeɗak danab nug ag eheɗ hekkulagnu eeɗatte, ag oolag eɗuomtai dabmemi. Anam dayeb amu uɗat ig hemut ele amu hamu daalo.

Epesus 1:18

Da Nug heeb, ahilag dabmak amahleb, butti aɗi ag aɗi keekenu Nug ag onilagppa eum ele amu, ag amunu dabmak ɠagattag aona, ag maɗoɗppan gamag doon, itittak enanagnab oh Nug nuhikkud danab ah oppiaawak ele oh aoglagnu nai qakka tituanom ele amu, ag amu oh dooglagnu ele unuqidttem.

2 Korint 3:6

Kayak Nug he, ig elele daata, ig nug tituana nai qakkak baunu maɗi nid daattem. Tituanak bau imu amu, nuhig ɗo nai yaak laa iitta. Iitta. Nug am Kayak Ouɗinu keeke. Ɗo nai yaak, amuam danab qe mauhtte, amge Kayak Ouɗi Nug danab bauklel medatte.

Aposel 2:5

Haen amuppa wan ohppanu Juda danab ag Kayaknu ebehilkad oh bodoetta le meum ele, ag gona, wanppan wan ohppa daappig amu, ag appanu uɗin Jerusalem daappig.

Revelesen 2:10

Nakok laa ele ag Smerna, ag uug baula maoglag, amge ag keeke amunu aib baɗappig. Doyeg! Ag Smerna daatteb, ag ahilag ooppa genab doyak am genab, o genab iitta doyaknu, ag ma anttak aoglag. Amuam Satan nug heeb, ahilkad kekeɗ ag oolagppanu laala maniguittakppa maadkkulag. Laa amu, ag deɗ 10 ag Smerna eheɗ hattaglag. Na oo metta ii uuak kobol dim lamidna, ootppa genab doyak ɠagattag aɗappe ukkeb, haen na mauhttem, amuppa amu da na bauklel hanhannu medakkul.

Kolosi 1:25

Kayak nukka Nug da tituaniɗe, da Kristen tamaniaknu maɗi nid, ag ehanadkkulnu bemi. Uɗat dahil amu da Kayaknu Nai Ena oh genab tutukku mehuqkkulnu daatte.

Jon 15:6

Laa nug dahilppa ii daatte ele, nug muɗi grep ebekkud danab ag okkulna akkaeg ukke bunaɗtteb, amubia daatte. Danab ag muɗi grep ebekkud amu qagmaadna akkaeg, aab aɗuppa teeg eotte.

Luk 22:32

amge Saimon, da na ehanitten, ooppa genab doyak nahip amu iitta ii memanu Kayak unuqidmi. Amu geha na eɗun ɠagattag daanna, na laipad ɠagattag daaglagnu ehanatte!” awa aum.

1 Pita 1:3

Ig Kayak, Nug am ihinig Naɗi Jesus Kristus Mameg amu, ig Nug binag metu! Aɗinu? Nug ihinignu oo gai-iitta doya oo mekka ehanikkom. Jesus Kristus mauha, eɗua hibaittom, amuppa ig bau menuak mekkom. Nug ig amu mekkom amunu, ig Kayak noobppa bauklel ele daagnignu genab dootta, amunu dabmak aɗat oittem.

Hibru 4:14

Anam daatte amunu, ig ooppa genab doyak ihinig, ig heut miag atitte ele amu, ig amu aɗat auta aotu! Aɗinu? Ig ihinig mana mettak ikki danab, Nug hab aabppa teum daatte. Nug am Jesus, Kayak Bekka.

Kolosi 2:7

Ag nuhigppa ad wanppa ɠagattag hibaitta daatte bia ɠagattag dayeg! Ag nuhigppaib ɠagattag aweg! Ag Kayak amegppa, “Ena hen mekkame,” okkainab anana, laa ag ooppa genab doyaknu nai ippuanatteg, ag oolagppa genab dooppig, ag heppeg, ooppa genab doyak amu ɠagattag dayaɗ!

Galesia 5:7

Anukka ag am ena oippig. Am aun nug ib oo ne, ag doyak diig genabib baula ii dim lamidtteb? Nug attem he, ag amu uuppig?

2 Korint 6:1

Ig Kayak ele oh uɗat hettem amunu, ag Kayaknu ehanittak okkai Nug hamu mattom amu, ag amu ii kakidmananu dabmekkulagnu ahilkad dabmak maɗedattem.

Mak 16:15

Daulag batowa, Nug ag amelagppa aum. “Ag ahan, wan atu ohppa gona, dahilnu Nai Ena danab oh amelagppa mehuqeg!

Sepanaia 1:6

Da heppi, laa ag anukka da noolppa dup nona binal meppig, amge ag uun uuiɗna, kayak laanu dabmetteb; ag da, Yawe, ag da aniɗna dim lamiɗkkulagnu ii mattiɗna, ag da ulum madakkulnu oɗ ii meɗatteb amu, da ag ele heppi, ag nauhkkulag.” Yawe Nug anam awa atte.

Duteronomi 4:19

Aria ag neegppeppeg, lomppa teeb, ag aam, kalam, hoɗoppai ele, ag keeke amu oh anadna amu, ag aib amuam kayak daatteb anana, noolagppa dup nona binalag mak heppig. Yawe, ahilag Kayak, Nug keeke oh hab waappa daatteb amu, Nug am wanppan danab ah oh ehanadkkunu hattom.

Duteronomi 2:25

Gemu digmak da heppi, wan ohppan danab ag digmena, baɗak eheɗ nau ele ahilagnu dooglag. Ag aɗi hettebnu doona amu, ag naunab doon, ag baɗak okkai dooglag,” awa aum.

1 Jon 2:27

Amge ag Kristus eppegppanu Kayak Ouɗi aoppig, ag oolagppa ele daatte amunu, auntai laa nug ag keeke laa ippunadkkununab ii daatte. Aɗinu? Kayak Ouɗi, Nug keeke ohnu diig tutukku ippunadtte, Nug am genabib ippunadtte, Nug hambuppuak laa ii ippunadtte amunu, Nug ag ippunadtte amu, ag amu dim lamidna, Kristus ele laippu dayeg!

1 Pita 1:5

Amu ahilag ooppa genab doyakppa Kayak Nug nuhig ɠagattagppa ag atognoadtte. Nug ag atognoatteb ukkeb, ehanittak okkai ahilagnu Nug babaittom daatte amu, gog tak haenppa ag aoglag.

1 Timoti 2:7

Diig amunu amu, Kayak Nug da nai mehuqak danab, totol danab ele meiɗom. Da nai yaattem imuam genabib yaattem, da ham-ii-bubuttem. Nug da iitta aɗi dilag, ag ele Jesusnu oolagppa genab dooglagnu, ippunittak danab meiɗom.

1 Timoti 1:12

Da Kristus Jesus, ihinig Naɗi, Nug da uɗat imu hekkulnu ɠagattag meɗom amu, da Nug amegppa, “Ena heme,” awe attem. Aɗinu? Nug uɗat imu da eppelppa meeb hekkulnu elele aniɗa, Nug nukka da uɗat imunu tituaniɗom.

2 Tesalonaika 2:16

Aria, ihinig Naɗi Jesus Kristus Nugnab, amu ig Mamenig Kayak, Nug ihinignu oo mauhom, Nug nuhig ehanittak okkai hamu mettakppa oo ɠagattag qak hanhannu, ena baknu dabmak aɗa oiyak enanag ele mekkom amu, aɗit amu aa hepeɗ,

1 Tesalonaika 5:8

amge ig am amahlak bekkod, amunu ig ikka ig ihinig oiyak pehettak atognoak kobol dim lamidta oita, ig ooppa genab doyak, oo mauhak kobol ele aota, ban danab ag kekeɗ ag momolag heppeg nauhmanu qahaɗ palatteb, amubia ig kobol aɗit amu meta, Kayak Nug eɗua awigkkunu dabmak aɗat daattem ele, kobol amu ban danab ag ikkilagppa aen hat metteb ele amu, amubia ig meta oitu!

Epesus 4:16

Danab beɗunu laih kuɗum oh ag diɗippa tuɗittak daanna, ahilag uɗat anen anen pehettak heegeg, beɗu ena ɠagattag mette, amubia ig tamaniak ooppa daattem ele, ig ihinig ikki Kristus nuhigppa laippu daat, ig uɗat ihinig anen anen hetata, ig nug oo mauhakppa oitut, tamaniak ena, ɠagattag mette.

Epesus 2:21

Danab ag lag ebehi oh tutukku tuɗidtteb, amubia Kristus Nugib he, Kristen danab oh ag laippu qagmena, Naɗi noobppa oppiaawak daanna, nuhig uɗat hekkulagnu, Kayaknu mettid lag bia beegeg, okkai mette.

Galesia 5:5

Amge ihinignu amu Kayak Ouɗi Nug ehanikkekke, ig ooppa genab doyak ihinigppa, ig Kayak Nug ihinignu, “Genab tutukku hak danab,” awa akkunu ameg metta, keeke amu bekkunu haen tapaɗidta daattem.

Galesia 4:11

Ag anam hetteb amunu, da ahilagnu uɗat okkai hemi ele, da amunu, “Da hamutai kakidmi,” ainne, baɗe daattem.

2 Korint 11:23

Ag Kristusnu maɗi nidte? (Da gemu dahil dabmak eɗile, da nai madittem.) Kristusnu uɗatppa amu da ag eɗadttem. Dahil hak ɠagattagppa da ag eɗadmi, Jesusnu nai mehuqaknu maniguittakppa dayak am da ag eɗadmi. Danab ag da muɗi qaun eleppa mataɗileg, kuɗumnab batom, amuppa da genab ag eɗadmi. Aria, laa ele, haen kuɗum da mauhkkulnu miag daami, ag am anam bia iitta.

1 Korint 15:58

Anam amunu O lailad, ag ɠagattag dayeg! Bittumttum amu aib goppig! Ag hanhan Naɗinu uɗat yagbak ele heig! Aɗinu? Ag dootteb, ag Naɗinu uɗat hetteb, amu geha hamu ii qettoɗma.

1 Korint 3:5

Ag tutukku dabmak aon antteg! Apolos nug am aun? Am da Pol am aun? I am maɗi nidib; Naɗi Nug i uɗat ihinih piɗe piɗe metom. Nug uɗat amu mete, i uɗat amu heuɗuɗ, ag Kristusnu oolagppa genab dooppig.

Rom 15:16

da iitta aɗi ag oolagppa uɗat hekkulnu Kristus Jesusnu maɗi nid bemi. Da iitta aɗi ag Kayak Nug oo daatte amubia daaglagnu, Kayak Ouɗi Nug heeb, ag oppiaawak danab bena daaglagnu, da ag diie, Kayak medakkulnu mana mettak danab bia bein, Kayaknu Nai Ena mehuqttem.

Rom 5:5

Amu keeke ena bekkunu dabmak aɗa dayak amu heeb, meu okku; ig meu amu genab anidkkunig. Aɗinu? Kayak Nug nuhig Ouɗi ig mekka, nuhigppa amu Kayak Nug nuhig oo mauhak ig oonigppa me ambette.

Rom 2:7

Danab laala ag binag amahlak oppiaawak ele, bau hanhan dayak, binag ele mattinna, kobol tutukku hetteb amu, geha Kayak Nug danab amu bauklel hanhannu madakku.

Aposel 26:16

Amge na ahan, hippaidna daye! Da na dahil maɗi nid daakkutnu, na dahilnu aɗi anidme, amu dimppa da na aɗi ippunidkkul, na amunu aɗi heehe anttomnu mattiak danab daanna, laala amelagppa madikkutnu aakku tituanidttem amunu da gumitten uɗimi.

Aposel 20:24

Amge da amunu ii dabmettem. Da beɗul bau daakkunu amu, da dabmak amu ɠagattag ii aɗattem. Iitta! Da ib Naɗi Jesus ippuniɗa, uɗat ele meɗom amu, da amuib tuɗitten oiyeye gog tekkulnu dabmettem; amuam Kayak Nug nuhig ehanittak okkai hamu megakka, eɗua awikkunu Nai Ena, nai amu mehuqppi danab ah dooglag.

Aposel 11:23

Haen nug Antiok ukka teum amu, nug danab ah ag Kayaknu ehanittak okkai hamu mettak, ag ehanittak amu aoeg, ag oolagppa uɗat heehe, ag Kayak dim lamidppig antta amu, nug oo gamag ahe, dabmak aoglagnu, ag hanhan ag oolag Naɗiib mettan oiglagnu ɠagattag aqom.

Aposel 4:12

Wan imuppan danab aun nug ig eɗua awikkeb, ig hipunin waappa ii daamta? Laa iitta! Jesus Nug nukkaib elele. Wan imu ohppa ig laa onigppa ehanitta padal ii mak aognignu iitta, Jesus nukka,” awa aum.

Aposel 1:17

Danab amu nug ig ele daatta, ig ele oh uɗat laippu hemut.” Pita nug anam mattion.

Luk 6:48

Nug am danab laa nug lag buukkunu ha, nug tatam moɗ awe, uma noa ukke, wan ooppa men qaɗeppa lag ukku aɗe, men aɗa dayeye, aria dimppa nug amu attan lag heum bia daatte. Danab amu nug lag anam heum amunu, dimppa le ui na duttune, lag na qekkunu elele iitta dayom. Aɗinu? Danab nug lag ena elele heum.

Esekiel 18:26

Genab tutukku hak danab nug genab tutukku hak uua, hipunin hekku dayeb, nug hipunin heum, diig amunu nug mauhkku.

Gayak Nai 3:66

O Yawe, na ahilagnu oot nauheb, eheɗ hadappe, padal mena; ag wanppa baula ii daamnanu oɗ medattem.

Sam 125:5

Amge, O Yawe, na laa ag hipunin hetteb ele hadappe nauhppeg, na laa ag kobol kaliak dim lamidtteb ele, na amu ele hadappe nauhkkulagnu oɗ medattem. Israel ag maɗoɗ aon dayeg!

2 Korint 4:1

Kayak Nug ihinignu oo gai-iitta doya oo mekka ehanikka, uɗat imu ig mekkom amunu, ig oo bai noak ii doottem.

Aposel 1:8

Amge geha dimppa Kayak Ouɗi Nug ahilagppa neeb, ag ɠagattag aon, geha ag dahil aɗi heehe anttomnu mattiak danab daanna, ag dahilnu Jerusalem mehuqna, ag gona, Juda wan ohppa, Samaria appa ele mehuqna, ag wan atu ohppa ele gona mehuqkkulag,” awa aum.

2 Korint 10:1

Da am Pol. Am danab laala ag nai da beɗulppa yaan, inam aon maditteb. “Nug ig ele daattem haenppa amu, nug nukka onig qe ne, ig ele daattem, amge haen nug piɗe dayaya amu, nug nai ɠagattag ig megatte,” aon atteb. Amge da Pol, da am Kristusnu kobol, Nug nukka Nug binagnu ii dabmaama, Nug dagom kobol, oo bodoettak kobol ele danab dilagppa heum, amubia da ahilagppa hein, nai madippi, ag dahil nai dooglagnu unuqadttem.

1 Timoti 3:16

Genab, ig Kristen tamaniakppa daattem, ig doyak laa aɗattem, amu doyak amuam lokkumak dayeye, gehaib miag atiom. Doyak amuam unuqagnab ele daatte. Doyak amuam inam. Jesus Nug danab beɗu awa, miag atia beum. Kayak Ouɗi Nug ig Nug tutukkunab ippunikke, engel ag Nug ele anidppig. Nuhig nainu mehuqak am wanppan ɗo maɗoɗppa ukke, wanppanu danab ah ag oolagppa genab dooppig. Kayak he, Nug hab aabppa teum.