Kolosi 1:16 - Nobonob Baibel

¹⁶ Ig amuam genab anidkkunignu diig am Kayak Bekka Jesus, Nug wan imuppan keeke, hab attannu keeke, keeke ig anidttem ii anidttem ele amu, amu oh Nug heum. Nug amu heum, amu keeke Nug heum ooppa amu, Nug gumak uɗat digdig ele daakkunu babaittom; laa am gumak uɗat anuqak, laa am gumak uɗat ɠagattag ele, laa am gumak uɗat okkainab, am laa am gumak uɗat okkai. Nug amu oh heum, babaittom ele, am amu oh am Nug binag mekkulagnu daatteb.

Kolosi 1:16 Referans Kwoze

Rom 11:36

Iittanab! Nug nukka aakkuib keeke oh diig daatte. Nug nukka aakkuib keeke ohnu Mamelag daatte. Keeke oh am nuhignuib daatteb. Binag amahlak oppiaawak ele hanhan nuhignu dayaɗ! Genab.

Jon 1:3

Kayak Nug keeke oh Nai Kayak Ippunigtte eppegppa me, Nug keeke oh haattom. Keeke laa ib laappa ii beum.

1 Korint 8:6

Amge ihinignu, Kayak laippuib daatte, Nug am ig Mamenig, Nug am keeke ohnu diig daatte amunu, ig am nuhignuib bau daattem. Naɗi ele am laippuib daatte, Nug am Jesus Kristus. Kayak Nug nuhigppa keeke oh hattom, amu ig nuhigppa bauklel aottem.

Hibru 2:10

Kayak, Nug keeke oh diig, keeke oh Nug hattom ele, amu Nug bekkod kuɗum oh diia attan teeb, binag amahlak oppiaawak ele daaglagnu dabmaama, Nug Jesus Nug guittak doyaya, ib amuppa Nug Eɗua Diiaknu Anuqak Danab elelenab ba daakkunu aum. Amuppa Kayak Nug kobol elelenab heum.

1 Stori 29:11

O Yawe, habppanu keeke oh, wanppan keeke oh ele am nahipadib daatteb amunu, na onin, ɠagattag ele. Na ebehin ele, na binag amahlak oppiaawak ele. Na dagom onig ɠagattag ele. Na ɠagattag okkai naɗi ele daattem. Gumak uɗat oh am nahipib, na laa oh eɗattak, oh ikkilag daattem.

Hibru 1:2

amge Nug gemu, gog tak haen imuppa amu, Nug Bekka oɗeppa ig amenigppa nai mattiom. Kayak Nug Bekka Nug aug daakkunu Nug keeke oh aokkunu aum, amu nuhigppa Nug keeke oh ele hattom.

Epesus 1:10

Nug oo niitte am inam. Nug ulum aɗebeb, Nug haen epeɗiom ele amu uɗieb, keeke hab attannu, wanppanu ele amu Nug oh qagmaatteb, Kristus waappaib daappeg, Kristus Nug keeke amu oh ikkilag daakku.

Aisaia 44:24

Yawe, Nug ag qagaiettakppanu eɗua uhuqaknu ehanittak daatte, Nug he, nid anig ooppa ena mette, amubia nug he, ag Israel ag huu laippu daatteb amu, Nug atte. “Da am Yawe, da keeke oh hemi. Da dakka da hab hemi. Da dakka da wan ele hemi.

Prowerb 16:4

Yawe Nug keeke oh Nug oo hette bia gokkunu bappaidtte; nau hak danab ag ele ag akka ahilag hakppa bu awaknu deɗppanu bu aoglagnu bappaidtteb.

Kolosi 1:15

Kayak Bekka Nug am Kayak, danab laa nug Nug anidkkunu elele iitta, Nug bianab aakku daatte. Nug am keeke oh Kayak he beum daatte, Nug amunu ikki anuqaknab daatte.

Kolosi 2:10

Nugib okkai ohnu, amu okkainab ohnu ele ikki daatte. Nuhigppaib amu Kayak Nug aɗi keeke madakkunu hette amu, am ahilagppa ambette.

Aisaia 43:21

Da Israel danab ah ag dahil hak ena anidna, ag amunu danab ah laa amelagppa akkulagnu da hei, ag huu laa aakku daan, dahiladnab daatteb.

Duteronomi 4:39

Amunu ag imu dabmettanna, ahilag dabmakppa ɠagattag aɗeg! Yawe Nug am wanppan, habppan ele Kayak daatte, kayak laal iitta.

Pilipai 2:10

Kayak Nug geha danab oh hab attannu, wanppanu, amu mauhakppanu ele, ag oh Jesus onig doona, ag Nug noobppa gatelag qaun okkulagnu, ag, “Jesus Kristus Nug am Naɗi,” amu ele akkulagnu, Nug onig amu Jesus mettom. Danab oh ag, “Jesus Kristus Nug am Naɗi,” akkulag amu, amuppa Mame Kayak, Nug binag amahlak oppiaawak ele aokku.

Kolosi 1:20

Kayak Nug wanppan keeke oh, hab aabppanu keeke oh ele heeb, ag Nug ele oolag laippu daaglagnu oo dayom. Anam oo dayom amunu, Nug Kristus ad emaitakppa mauhehe, tiig gokkaɗe, Kristus tiigppa amu Nug nuhikkud kekeɗ oh amu ebehilag okkule, maɗoɗ daatte.

1 Pita 3:22

Jesus Nug eɗua hibaitta, Nug hab aabppa teum. Nug Kayak eppeg naɗiap-ppa daatte. Engel oh, laa ag gumaknu ehah ele oh, aria ɠagattag digdig oh ele, ag oh Nug waappaib daatteb.

Kolosi 2:15

Nug Satannu daup laa ag gumak uɗat ɠagattag ele hetteb, amu laa ag gumak uɗak okkai ele hetteb amu, Nug ɠagattag ahilag aɗatta, ad emaitakppa Nug ag eɗattowa, nug danab amelagppa diia, keeke hamu bia hattom.

Epesus 6:12

Aɗinu? Ig danab ele ban ii hettem. Iitta. Ig wan imuppan gatatu kobolnu ikki danab oh, danab gumaknu ehah ele oh, aria ɠagattag oh ele, ag am ouɗi nau ig danab ig amenigppa ag anadkkunignu elele iitta, ig ag ele ban hettem

Rom 8:38

Amu da imu oolppa genab doottem. Ig Kristusnu oo mauhakppa daattem amunu, aɗitai keeke laa iinab amuppanu matakkigma. Ge, mauhak, o iitta bau dayak, o iitta engel ena ag, o ouɗi nau ag, o iitta gemu haen imu aɗi keeke bette, o iitta butti keeke aɗi aɗi bekku, o iitta aɗi keeke ɠagattag ele ag,

Nehemaia 9:6

Ag nai amu ana malaeg, ⌊Esra aha, inam Yawe unuqittom.⌋ “Na nakka am Yawe. Na hab, hab waappa, hab attan ukke ukke, adekku batatte ele, na amu oh hattame. Na habppan hoɗopai oh, wan, wanppa aɗi aɗi keeke daatte, yu, yuppan keeke oh ele hattame. Na keeke oh bau daatteb ele bau madattem. Hab aabppan daup, ag kuɗumnab ele, ag oh na noomppa dup nona binan metteb.

Jon 1:10

Ao, Kristus, onig laa Nai Kayak Ippunigtte, Nug wanppa dayom; wan imu amu Nug he beum, amge wanppan danab ah ag Nug ii dooppig.

Rom 9:5

Kayaknu danab anukkanu amu, ag am Israel danab memetalkadnab. Amu Kristus ele amu, Nug danab daakkunu, Nug Israel buɗulagppa doum. Nug am Nug Kayak, keeke oh dilag ikki daatte. Ig Nug binag hanhan metu! Genab.