Jeremaia 8:2 - Nobonob Baibel

² ag wanppa hamu maadppeg daaglag. Juda danab ah amu ag anukka bau daanna, ag aam kalam hoɗoppai ele dilagnu, ‘Ihinig kayak,’ anana, ag keeke amu noolagppa dup nona binalag mena, ag amu dilag oolag mauhak doon, ag amu dilag mana mettak danab dilag nai doon dim lamidna, ahilagppanu aɗi aɗi hekkulagnu nai ele aoppig. Juda danab ah ag amu heppig amu, haen amuppa ag ebehilkad am wan qaɗeppa kinipan bia daappeg, laa ag qagmena, moɗppa ii memana.

Jeremaia 8:2 Referans Kwoze

2 King 23:5

King Josaia nug mana mettak danab ag kayak hambuppuak dilag mettid lag nakok, ag appa kalu danab ile muttuɗig enanag bette ele manadppig ele lamattom. Anukka Juda dilag king ag mana mettak danab amu ag Juda dilag aabaabppa kayak hambuppuak dilag mettid lag nakok, kayak hambuppuak dilag mettid lag nakok Jerusalem guguittak daappig, amuppa ele ag kalu danab ile muttuɗig enanag bette ele manadkkulagnu otiadppig. Mana mettak danab ag amu henana, ag kalu danab ile muttuɗig enanag bette ele, ag amu kayak hambuppuak Balnu, aamnu, kalamnu am hoɗopai huu mak ele amotppig. Amu king nug amu oh lamattom.

Aposel 7:42

Ag anam heeg, Kayak Nug heqo matta, ‘Ag eheɗ hekkulagnu oolag dayeb amu uuadpput heig!’ awa aum, amu ag aam, kalam, hoɗoppai ele noolagppa dup nona binalag menana, propet naippa, nai daatte bia heppig. Nai amuam inam. ‘O Israel danab ah, ag atu taɗakppa maɗ 40 oinna, ag ⌊oolag genab meɗan, da ool hette bia⌋ ofa iɗu iɗu meɗappigte. Iitta!

Jeremaia 9:22

Yawe Nug da nai imu appi dooglagnu da amelppa aum. “Yawe Nug inam awa atte. ‘Qinob, haen amuppa, danab mauhppig ele, ag gaɗalag am dad okkaippa kinipan bia niiglag. Ag danab ee aeg awewe, gumu kuɗum wanppa nena qetteb, ag gaɗalag am amubia daaglag. Ag anam daappeg, laa diin boumadkkulagnu laa ii daama. Iitta,’ ” awa atte.

Duteronomi 4:19

Aria ag neegppeppeg, lomppa teeb, ag aam, kalam, hoɗoppai ele, ag keeke amu oh anadna amu, ag aib amuam kayak daatteb anana, noolagppa dup nona binalag mak heppig. Yawe, ahilag Kayak, Nug keeke oh hab waappa daatteb amu, Nug am wanppan danab ah oh ehanadkkunu hattom.

Sepanaia 1:5

Da heppi, laa ag laulkad koɗokko uɗem ukkakppa tena, appa ag aam, kalam, hoɗoppai ele dilagnu, ‘Umu ag am kayak laa,’ anana, ag amu noolagppa dup nona binalag metteb ele amu, ag oh nauhkkulag. Ao, da heppi, laa ag da, Yawe, ag da dim lamiɗtteb anan, ag da onilppa ele ahilag nai ɠagattag qettan atteb, amge ag kayak hambuppuak Molek onigppa ele ahilag nai ɠagattag qettan atteb amu, ag nauhkkulag.

Esekiel 8:16

Kayak Nug anam awowa, Nug omaiɗa, Yawe laugnu mana mettak danab dilag haɗap ooppa meiɗe, da neekki ukke, appa Yawenu mettid lag odppa, Oo Gun Eleppa ukkaknu oo veranda bia, qaɗab ele gamalahppa da danab 25 anam daaegeg anadmi. Ag Yawenu mettid lag dimettan, ag aam bedeppa neegnana, aam noobppa dup nona binag meppig.

Jeremaia 36:30

Jeremaia nug nai amu doya, nug nai imu ele doyom. “Anam amunu, da Yawe, da Juda dilag king Jehoiakimnu inam attem. ‘Nug buɗubppan laa nug Dawitnu sia kingppa heɗep na dayaya, king daakkunu laa ii daama. Laa ag Jehoiakim qeppeg mauheb, ag nug gaɗa buɗippeg, dimittim na, wanppa dayebeb, amunppa aam qeeb, tuqan am oug nau qekku.

Jeremaia 22:19

Danab ag doɗ donki ii boumtteb, amubia danab ag Jehoiakim ii boummana. Iitta. Ag nug gaɗa eeɗna, aab Jerusalem dimittim buɗippeg gokku.

Jeremaia 16:4

“Ag oɗe naunabppa mauhkkulag. Ag mauhppeg, laa ag ii mahimna, ii boumadmana ele. Ag gaɗalag hamu kinipan bia wanppa niiglag. Ele amu, kekeɗ ag qep elabppa ag aqappeg mauhppeppeg, ag enugppa ele mauhkkulag. Ag mauhna, ag gaɗalag am ai hab waappa hagagaɗna oitteb, doɗ dakkuɗ wanppa oitteb ele dilag ee daaglag,” awa atte.

Sam 83:10

Na Sisera, Jabin ele, amu ahilti daup ele Endor guguittak appa hatte nauheg, ban danab ahilti beɗulag oh amu wanppa kinipan bia niippig.

2 King 21:3

Nug mameg Hesekaia aabaabppanu mettid lag nakok loppaɗom amu, Manase nug lag amu eɗua buualattom. Nug kayak hambuppuak Bal binag maknu qaɗab ele hatta, nug kayak hambuppuak Aserah dabmekkulagnu biidod ele heum. Amuppa, Manase nug Israel dilag king Ahap heum, amubia nug ele amu heum. Manase nug anam ha, nug ele aam, kalam, hoɗopai ele noolagppa dup noa binalag meum.

Sepanaia 1:17

Amu Yawe Nug atte. “Danab ah ag da, Yawe, ag dahilppa hipunin heegeg uɗie, gemu ele hetteb amunu, da uug nau madakkul. Ao, da heppi, ag danab ameg gaɗuak ele ib antta, wana gokkunu ib maditte bia henan daaglag. Kekeɗ ag aqappeppeg, ag tiilag huanak, wanppan nekku. Ge, ag aqappeppeg, ag biilag am wanppa doɗ biiak bia daaglag,” awa atte.

Eklisiastis 6:3

Danab laa nug haen elabnab wanppa oikkutai, nid 100 menuadkkutai, amge nug bau dayak nuhignu ena dookkunu elele ii daatte dayeb, nug mauheb, ag kobol enappa ii boumkkulag dayeb amu, dahil dabmakppa nid laa anig ooppa mauhe, anig menue dotte, amuam kobol amu eɗidtte; am kobol ena.

2 King 21:5

Amu Yawenu mettid lag, lag amuppa haɗap aɗit ohppa Manase nug aam, kalam, hoɗoppai ele binalag maknu qaɗab aqom.

2 King 17:16

Israel ag Yawe, ahilag Kayak, ag nuhig haknunab nai oh amu uun, ag gol aon, golppa makau gaiɗ aɗit dottolah haatna, noolahppa dup nona binalah meppig. Ag kayak hambuppuak Aserah dabmekkulagnu biidod ele hena, ag amu noobppa dup nona binag meppig. Ag hoɗopai ele noolagppa dup nona binalag menana, kayak hambuppuak Bal ele noobppa dup nona binag meppig.

Duteronomi 17:3

nug kayak hambuppuak laala noolagppa dup noa binalag mekku dayeb, o nug aam, kalam, o hoɗoppai lomppan dilagnu dup noa binag mak kobol hekku dayeb, da ag kobol amu hemananunab aib ami daatte amu,

Sam 53:5

Kayak Nug heeb, danab ah nau hetteb ele ag baɗan humananab qekkulag. Ag anukka baɗappig, amge haen imuppa ag eheɗnab baɗaglag. Aɗinu? Kayak Nug ⌊nuhikkud danab ah, Nug⌋ ahilag kekeɗ, ag banelag uɗiglag ele amu, Nug ag hatteb nauhna autna aoglag. Yo, ag Israel, ag heppeg, ag uɗalag nekku. Aɗinu? Kayak Nug ag geɗadkku.

Jeremaia 14:16

Ag anam mauhkkulag, amu danab ah laa, propet amu ag ag amelagppa nai ahilag maditteb amu, danab ah amu ele ag anamib mauhkkulag. Ag mauhppeg, laa ag ag gaɗalag agappeg gona, lag dimittim aab Jerusalemnu ibppa hamu anam niiglag. Huanak mauhkkulag amunu, laa ag, ag waalkad, ag bekkalkad, ag aɗelkad ele boumadkkunu ii daama. Danab ah amu ag nai hambuppuak amu doon, dim lamidnana, hipunin huanak hetteb amunu, ag bu nau aoglagnu daanna, da heppi, ag bu anam aakku aoglag.

Jeremaia 16:11

na ag amelagppa inam appe doyeg! ‘Yawe Nug inam atte. “Diig imunu uug naunab amu bekku. Ag mamelkad aɗi ag da uuiɗna, ag kayak laa waappa daanna, ag oɗelag dim lamidnana, ag ag noolagppa dup nona binalag meppig. Ag da uuiɗna, ag dahil ɗo ele ii dim lamidppig.

Jeremaia 31:40

Aria oolnu noak onig Hinom, appa ag danab boumadtteb, aab uhuɗ ele buɗieg gotte amu, aben amuam dahilnu tituanak daakku. Aria, wan adqaɗ bia ukka ukka, oolnu noak onig Kidron batak, aab okkainu aɗnu od onig Hosnu Od batak, wan amu oh ele am dahilnu tituanak daakku. Kekeɗ ag baula uɗin, ippan danab ii diin gomana. Ag baula heppeg, aab okkai imu baula ii nauhma.” Yawe Nug anam awa atte.

Esekiel 6:5

Amu da heppi, kekeɗ ag aqanna, ag gaɗalkad kayak hambuppuak dottolkad noolagppa maadppeg daaglag. Ao, da heppi, ag ag ebehilag kayak hambuppuak dilag qaɗab guguittak, laih laih ohppa maadkkulag.

Esekiel 29:5

Ag anam heppeg, da heppi, ag na, nahip lenagppan kakai ele atu taɗakppa appa uuadppeg daaglag. Na amu, kakai ele ag dad okkai ad iidappa anam daappeg, danab laa nug na, kakai ele diia ii atognoadma. Da anam heppi, na, kakai ele oh ag wanppan doɗ, ai ele dilag ee daaglag. Anam, amge Paro, na am wagai. Kakai ag am Isip danab ah. Da anam heppi, Isip danab ah ⌊ii mauhppig daatteb,⌋ ag dooglag, da am Yawe.’ ” Naɗi Yawe Nug anam atte. Yawe Nug anam ana, Nug nai tuɗitta aum. “Paro na, na nahipad danab ah ele ag Israel danab ah tutukku ii ehanadppig. Ag am dudqak hokkat gai-iitta bia daaegeg, Israel amuppa ehanittak aoglagnu dabmeppig, amge ehanittak ii aoppig. Iitta.

Sam 83:11

Na heppe, danab eheɗ hekkulagnu atteb amu, ahilkad okkai danab ag Orep Sep ele mauhpiɗ bia mauhkkulagnu oɗ medattem. Ao, na heppe, ahilkad ikki danab ag Seba, Salmuna ele mauhpiɗ bia mauhkkulagnu unuqidttem.

Jeremaia 9:20

Aria gemu, ag Juda ah, ag Yawenu nai imu doyeg! Ag daulag human, nuhig nai doon autna aweg! Ag ag aɗelkad qanaknu kobol ippunadppeppeg doyeg! Ao ag akka akka ag nai oo doyak ele mattiak laa nug ippunidnana doyeg!

Jeremaia 9:21

Aɗinu? Qinob uug okkai laa heeb anidna akkulag. “Mauhak nug ig launigppa gililppa ulah ibuppa noa, ig launig ooppa neum. Ge, nug aab aɗ ɠagattagnab ele ihinkad, nug amu ooppa noum. Mauhak nug nid naunau ibppa daan qiɗ hetteb ele, nug ag aqe mauhna malappig. Ao, Mauhak nug nid danab bau, ag aab haɗap-ppa qagmetteb ele, nug ag aqe mauhna malappig.” Ag anam aon akkulag.

Jeremaia 16:6

Danab onig ele, danab onig iitta ele Juda wan ohppa mauhkkulag. Laa ag danab ah mauhkkulag ii boumadmana, Ag mauhak dilagnu ii mahina, oo doyak kobol laala ele amu dilagnu ii hemana.

Jeremaia 25:33

Haen amu uɗieb, Yawe heeb, ban ahakku, haen amuppa danab ban Yawe he beumppa mauhppig, am wan atu ohppa huanaknab daaglag. Ag huanaknab mauhak anam daappeg, laa ag ahilagnu mahiak ii hemana, laa ag gaɗalkad diin gona, ii boumadmana. Mauhak gaɗa am kinipan wan qaɗeppa anam daaglag.

Esekiel 39:5

Da Naɗi Yawe, da aakku mattie malami amunu, ag dad okkaippa mauhna, nena qena, gaɗalag appa niiglag.’ ” Naɗi Yawe Nug anam atte.