Jeremaia 51:12 - Nobonob Baibel

¹² Ag Babilon aqaglagnu pilak humeig! Meitta dayak danab laa otiatteg! Aɗi uɗitte anttak danab ag abenlagppa matteg! Lokkuma dayaya, aha ban haknu dabmak babaitteg! Aɗinu? Yawe Nug Babilon dilagnu aɗi hekkunu dabmeum am, Nug hekku. Ao, Nug Babilon danab ah dilagnu aɗi bekkunu ɗo nai mattiom amu, Nug heeb bekku.

Jeremaia 51:12 Referans Kwoze

Jeremaia 51:11

Ag lat doɗo babaitteg! Ahilag guppiɗ human aɗeg! Babilon ag heeg, Yawenu mettid lag nauhom amunu, Yawe Nug Babilon eheɗ hak amunu nob tutukku madakku. Yawe Nug heeb, Babilon nauhkkunu maittak awom daatte. Amunu Nug Midia dilag king Babilon ele ban hekkulagnu dabmak matta he, ag hekkulagnu yag bak dootteb.

Aisaia 13:2

Ag qauko laa igippa ad iitta ele, ag amuppa tena, ban danab ag ban hekkulagnu pilak laa qabappeg dayaɗ! Ao, ag baalag okkaippa ⌊daup ag uɗin, qagmekkulagnu⌋ huana eig! Ag eppelagppa ippunadppeg, ag gona ban hena, ag aab okkai laa ⌊Babilon⌋, appan danab ag dada danab daatteb amu, ban danab ag gona, aab okkai amunu od aoglagnu ban heig!

Nahum 2:1

He nauhak danab ag heeg, Jakop buɗub ag nauhakib daatteb. Ao, diig amunu, Yawe Nug heeb, Jakop buɗub ag anukka ɠagattag, onilag okkai ele daappig bia daaglag. Ge, Israel ag ɠagattag, onilag okkai ele daappig, amubia Jakop buɗub ag anam daaglag. Anam amunu, O Niniwe danab ah, kekeɗ ag ag ele ban hekkulagnu uɗitteb. Ag uɗitteb amunu, Niniwe danab, ag ahan, ag aab aɗ ɠagattagnab ele ahilag dabmenana, ag ib aɗan daan, ag oolag ɠagattag qettan, ag ɠagattag daaglagnu dabmak aon dayeg!

Jeremaia 51:29

Yawe Nug Babilon wan heeb nauhaknab dayeb, danab laa appa ii daamanu dabmeum, dabmak amu ɠagattag eppom daatte. Nug amu hekku amunu, danab guittak okkai naɗi doya, beɗu hahaɗeɗe, buɗibɗib oitte, Babilon amubia hekku.

Joel 3:2

Amu haen amuppa da ele heppi, wan atu ohppan danab ah oh ag uɗin, aben oolnu noak onig Jehosapat, appa qagmekkulag. Ag qagmeppeg, da ahilag eheɗ hak ag Israel dilagppa heppig, Israel am dahilad danab ah amu, eheɗ hak amunu da ag epeɗiadkkul. Amu wanppan wan laalappan danab, eheɗ hak ahilag am inam. Ag danab ah dahiladnab lamatteg gona, wanppan wan laalappa matatun gona daaegeg, wan ahilkad amu, ag oppateg ne, panin aoppig.

Gayak Nai 2:17

Yawe Nug aɗi keeke hekkunu maittak awa dayom amu, Nug aakku heum; Nug anukka aɗi keeke hekkunu ɗo nai aum amu, Nug he, nai amu meu oum. Nug oo gai-iitta doya oo metta ehanittak kobol ii dabmaama he, kekeɗ ag heeg, ag Juda, ag padal meppig. Ao, Nug he, ag Juda, ag nena qeppig amu, ahilkad kekeɗ ag amunu gamag ahak nau okkainab dooppig; Nug he, ahilkad kekeɗ ag ɠagattagnab daan oitteb.

Jeremaia 51:27

Daup ag anidna uɗin, Babilon ele ban hekkulagnu ag pilak qabappeg, attan dayaɗ! Ao, daup ag doon, Babilon ele ban hekkulagnu ag trampet wan atu kuɗumppa iwaleg! Heppeg, wanppan wan laalanu danab ag Babilon ele ban hekkulagnu babaitteg! Ao, ɗo maɗoɗ imu ag ban hekkulag; Ararat danab, Mini danab, am Askenas danab ele. Appan danab ag ahappeg, Babilon ele ban hekkulagnu ag nai meppeg ukkeb doyeg! Laa nug daup huanak Babilon ele ban hekkulagnu dilag okkai daakkunu otieg! Heppeg, bannu hos huanaknab, ag tap-lokus huanak daatteb bia daan, daup ag hos amu attan oin, ban hetteb ele ag goppeg, Babilon ele ban heig!

Jeremaia 50:2

“Ag laa wanppan wan ohppa danab ah dooglagnu nai laa imu appeg doyeg! Ao, danab nug danab ah laa ag anidna, dabmak aon, at amu gumidna wakkulagnu nug pilak laa qabatte, ag anam hena, nai imu appeg doyeg! Ag nai huppu nakok laa aib uuppig! Ohnab appeg doyeg! Ag inam aig! ‘Kekeɗ ag Babilon eɗadppeg, Babilon ag eppelagppa daakku. Kekeɗ ag heppeg, Babilon dilag kayak Bel nug uɗa nekku. Babilon dilag kayak Marduk, nug baɗak eheɗ nau dookku. Babilon danab ah dilag kayak hambuppuak dottolkad am uɗa nak nau dooglag. Dottolkad amu, ag am baɗak eheɗ nau dooglag.

Prowerb 21:30

Doyak dabmak ena ele laa, o diignu doyak tutukku laa, o maittak awak laa; amu oh oolagppanu Yawe eɗidkkunu elele iitta.

Josua 8:14

Aria, haen Ai dilag king nug aben oolnu noakppa appa Israel anatte amu, nug, nuhikkud ban danab ele ag buttuanab ahan gona, danab nug neekkeb ukkeb, atu onig Araba anidkkunu eleleppa, appa Israel ele ban hekkulagnu goppig. Nug anam heum, amge nug danab ag ban hekkulagnu aab okkai dimugppa, lokkumppig ele, ag haen beeb ban hekkulagnu daappig amu, nug ii doyom.

Jeremaia 4:28

Da dahilad danab ah bu anam madakkulnu ain malami; da nai dahil ii baolipa. Ao, da maittak amu awen malami. Da dabmak dahil ii eɗupa, amunu bu amu anam daakku. Anam dayebeb, wanppa danab ah ag mahiak okkai hekkulag. Habppa gatatu manak daakku.

Jeremaia 23:20

Yawenu oo nauhak am anamib dayebeb ukkeb, Yawe Nug nuhig dabmakppa aɗi aɗi hekkunu dabmette, Nug ooppa aɗi bekkunu maittak awom daatte, keeke amu oh ba maleb, oppoɗi bak amu iitta mekku. ⌊Amu Yawe atte⌋ “Butti haen adekku ag imunu diignu doyak tutukku aɗaglag.

Jeremaia 50:25

Da, Naɗi Yawe Dakka Ɠagattag Oh Ele da Babilon wanppa bu mettak uɗat laa hekkulnu daattem amunu, da kekeɗ ag uɗin, Babilon ele ban hekkulagnu, da dahil bu mattaknu keeke babaitte, kekeɗ eppelagppa memi daatte.

Aisaia 11:12

Naɗi Nug pilak laa, pilak amuam ad elab attan ukkak galaeg daatte, Nug pilak laa amubia galeb daakku. Nug pilak amu anam meeb, pilak amuam danab ah wan atu ohppanu ag anidna, ⌊pilak amuam Naɗi Nug nuhikkud danab ah ag diia ukka laih me dayak danab ah daatteb, Nug ag eɗua diikku ippunadkku⌋. Nug anam ha, Nug Israel danab ah ag diia ukka laih me dayak danab ah wan laalappa daatteb amu, Nug ag eɗua diikku. Ao, Nug Juda danab ah tamtam gona, aabaab daatteb, Nug ag eɗua diikku. Nug nuhikkud danab ah gona aben ohppanab daatteb eɗua diikku.