Jeremaia 50:42 - Nobonob Baibel

⁴² Daup amu ag lat, ban ele aɗaglag. Ag laa guittak mettaglagnu uug laa ii doomna. Ag laa dilagnu oo gai-iitta doya oo matta ehanittaknu kobol nakok laa dim ii lamidmana. Ag hos attan daanna oippeppeg, oqotti ahilag am yu heehe, oqotti otte amubia. O Babilon danab ah, ag ag ele ban hena aqaglagnu ag huu men uɗiglagnu bappaidkkulag.

Jeremaia 50:42 Referans Kwoze

Aisaia 5:30

Amu haen amuppa kekeɗ ag uɗin, geha Juda wan heppeg nauhebeb, ag enan, muttub qekkulag. Amu oqottilag amuam yu duban qaaqa, koɗkoɗ qa uɗia, yu ihippa aoɗaɗa, oqotti otte amubia daakku. Amu danab nug neekkeb, Juda wanppa uɗieb amu, nug gatatu manak, atu nauhak ele anidkku. Ao, nug bud hinqak tona, aamnu amahlak qehakka dayebeb anidkku.

Jeremaia 47:3

Kekeɗ ag uɗippeg, hos dawai ag qaiettan gobeppeg, oqotti ob dooglag. Daup ag bannu karisppa gobeppeg, bannu karis oqotti ob, ag dooglag. Nid mamelkad ag anadna, eheɗ baɗan, ag eppelag am gai-iitta luɗua nak dayeb, ag eɗun, nid ii ehanadmana.

Jeremaia 8:16

Kekeɗ ag uɗin, Dan appa daaegeg, danab nug hos noobppa nokoɗu qe doya, hos miag daatte dootte, amubia ig kekeɗ ag miag daatteb doottem. Danab nug hos dawai gaye, danab doya ottaitte, amubia ig Juda danab ah ohnab ottaittem. Kekeɗ ag wan imu oh, aɗi keeke wan imuppa daatte, ag diippeg, ahilag daaglagnu, ag amu ohnu aɗi hekkulagnu oolag daatte hekkulagnuib uɗitteb. Ao, ag wan imunu aab okkai oh, danab ah appa daatteb ele amu, ag amu oh diippeg, ahilag daaglagnu, ag amu ohnu aɗi hekkulagnu oolag daatte hekkulagnuib uɗitteb.’ Juda danab ah ag anam akkulag,” awa atte.

Aisaia 47:6

Da dahilad danab ah, ag hipunin heppig amunu, da ahilagnu ool nauhe, da hei, Babilon ag wana, ahilag wan aon, ahilag daakkunu aɗappig. Da hei, Israel danab ah ag, ag Babilon eppelagppa daappig, amge ag Babilon ag Israel dilagnu oo gai-iitta doya oo metta ehanittak laa iinab heppig. Iitta. Ag nid bau dilag eheɗ hadappig, amge amuib iitta. Iitta. Ag ele ahilag eheɗ hak tuɗidna, wagai mena, ag Israel danab ah kaino dilag eheɗ hattanna, uɗat nau, uug ele ag madappig.

Revelesen 16:6

Danab imu ag nahipad danab ah oppiaawak ele, amu propet nahipad ele tiilag aɗappig amunu, na tiig lakkulagnu mattame. Ag nob amu aoglagnu daappig, amu na heme, amuppa na elelenab heme,” awa aum.

Jems 2:13

Aɗinu? Danab laa nug layagnu oo gai-iitta doya oo metta ehanittak kobol ii dim lamidtte, nug layag eheɗ heumnu nob nau medatte, nug nob nau amu medakkunu ii uutte amu, Kayak Nug danab amu hettoɗiakppa nob nau medakku. Amge danab laa nug layagnu oo gai-iitta doya oo metta ehanidtte, nug hipuninnu nob nau ii medatte amu, nug geha hettoɗiakppa nob nau ii aoma. Oo gai-iitta doya oo metta ehanittak kobol am nob mettak kobol eɗidtte!

Jeremaia 50:14

Ag kekeɗ, ag lat pimaltteb ele, ag Babilon talilidna daan, nug ele ban hekkulagnu babaitteg! Babilon danab ah ag Yawe, nuhigppa hipunin heppig amunu, ag Babilon dilag kekeɗ ag lat doɗo eheɗ ewatteg! Ag laippu laippu aib eppig. Ag kuɗum, eheɗnab ewatteg!

Aisaia 14:6

Kingnu qakun amu aɗappig ele amu, ag oo nauhakppaib daan, ag haen oh danab ah laa oh eheɗib hadappig. Ao, ag oppoɗilag be amelag kokoɗ eppe, ag haen oh ban henana, wan laa oh eɗadnana heeg, agib waalagpa daappig.

Aisaia 5:28

Ahilag lat aeg am aeg hawaɗnab, ahilag lat am omanak daaglag. Ahilkad hos am ag baelag di ɠagattag, men bia; panakkunu ele iitta. Ahilkad bannu karis am huan, pahanab gokkulag, bannu karisnu wil itoɗiak am ulah kilibob itoɗiaya gotte, amubia itoɗikku.

Sam 74:20

Wan imuppa wan kuɗumppa gatatu daye, danab laa ag laa guittak nau mauhnoak madatteb amunu, na nug tituana nai qakkak nahip ig ele hemut amu, nai amu eɗua dautppa dokkunu unuqidttem.

Sam 46:6

Wan imuppan wan anen anennu danab ah ag akka akka nug qeegeg, ɗo maɗoɗ laala nena qetteb. Anam, amge Kayak Nug nai maditte, haen amuppa wan baolia le bia daatte.

Aisaia 47:1

Yawe Nug atte. “Ag Babilon danab ah ag enub danabnab aɗeg, ah makkun, uug nuhigppa be, nug aben enanag nuhig uua, wan qaɗeppa gappudppa heɗep na daatte, amubia ag ahilag aben enanag uun nona, gappudppa dayeg! Genab, ag Babilon danab ah, ag ah makkun laa, mameg am en naɗi okkai ele, nuhigppa uug be, gemu nug sia enanagppa ii daatte, nug noa wanppa hamu daatte, ag amubia wanppa dayeg! Aɗinu? Laa ag tatam ah makkun amu anidna, nuhignu, ‘Nug iɗu tuqaknab, uɗat laa hekkunu iinab daatte,’ appig, amge gemu nug nauhom daatte amunu, ag anam ii atteb, amubia ag Babilon danab ah, ahilagnu ele anamib bekku.

Jeremaia 30:14

Wan atu laalappan danab ag ehanadkkulagnu appig amu, danab amu ag ag Juda, ag ahilagnu ag daulag aakku atia malom. Ahilagnu ag, ‘Ag keeke hamu,’ doon oitteb. Ag Jakop buɗub, ag beɗulagppa aab nau ele. Ao, ahilag hipunin am huanak. Am anam amunu, da Yawe, da kekeɗ makkuɗadlo bia da ag makkuɗadmi. Ao, danab nug laa guittak medakkunu ooppa uug ii dootte amu, da amubia ag bu mattami.

Jeremaia 50:9

Aɗinu ag oolkkulag? Da heppi, huu okkainab, ɠagattag ele laala yawalti uɗitteppanu daatteb, ag ahan qagmena, ag Babilon ele ban hekkulagnu uɗiglag. Ag yawalti uɗitteppanu uɗin, Babilon ele ban hekkulagnu aben aon, keeke bappaidna, ag Babilon eɗidkkulag. Ag lat doɗo ekkulag amu, lat doɗo amu oh daup dabmak enanag ele bia daaglag. Laippu laa hamu ii goma. Iitta. Oh am Babilon daup aqaglag.

Jeremaia 51:27

Daup ag anidna uɗin, Babilon ele ban hekkulagnu ag pilak qabappeg, attan dayaɗ! Ao, daup ag doon, Babilon ele ban hekkulagnu ag trampet wan atu kuɗumppa iwaleg! Heppeg, wanppan wan laalanu danab ag Babilon ele ban hekkulagnu babaitteg! Ao, ɗo maɗoɗ imu ag ban hekkulag; Ararat danab, Mini danab, am Askenas danab ele. Appan danab ag ahappeg, Babilon ele ban hekkulagnu ag nai meppeg ukkeb doyeg! Laa nug daup huanak Babilon ele ban hekkulagnu dilag okkai daakkunu otieg! Heppeg, bannu hos huanaknab, ag tap-lokus huanak daatteb bia daan, daup ag hos amu attan oin, ban hetteb ele ag goppeg, Babilon ele ban heig!

Esekiel 26:3

Tair danab ah ag anam appig, diig amunu Naɗi Yawe Nug inam atte. ‘O Tair danab ah, ahilag hak amunu da eheɗ doyeye ool ii madattem. Amu da heppi, wanppan wan kuɗum dilag huu ag uɗippeg, ag ele ban hekkulag. Yuppa duban tuɗid ele uɗitte, amubia kekeɗ ahilagppa uɗiglag.

Joel 2:5

Tap-lokus ag qauko eɗadna ukkaegeg, ahilag oqotti am bannu karis ukkaegeg, oqotti otte bia, o qahak ewewe, oqotti otte, anam bia, o daup huanaknab ban hekkulagnu qagmetteb, am amubia oqotti otte.