Jeremaia 5:31 - Nobonob Baibel

³¹ Kobol naunab nau ag hetteb am inam. Propet danab ag doonna, propet nai hambuppuak maditteb. Mana mettak danab ag akka, ahilag dabmak dim lamidna, danab ah gumadtteb. Propet, mana mettak danab ele ag anam aakku hetteb, amge dahilad danab ah ag kobol amunu oolag mauhtte. Anam, amge ib amu batakppa ag attem anidkkulag?” awa atte.

Jeremaia 5:31 Referans Kwoze

Esekiel 13:6

Israel danab ah, ahilag propet hambuppuak ag tulegleg anidna, “Yawe mekkom,” atteb, amge amuam genab iitta; am tulegleg hambuppuak. Ao, ag eman hak ahilagppanu, “Imuam Yawenu nai,” atteb, amge amuam genab iitta; am emannu hambuppuak nai. Ag, “Yawe Nug inam atte,” atteb, amge da ag amu akkulagnu ii ami. Ag amu hetteb, amge ag hambuppun, “Ihinig nai am meu okku,” atteb.

Jeremaia 14:14

Da ai, Yawe Nug nob ma, da amelppa aum. “Propet amu da onil diin, ag dimppa aɗi bekkunu nai hambuppuak maditteb. Da ii maatti uɗippig. Da ag amelagppa nai laa ii mattimi. Da danab amu propet daaglagnu ii tituanadmi. Propet amu ag tuleglegppa keeke anidna, aeg dootteb, amge keeke ag tuleglegppa anidtteb ele am genab iitta. Ag eman kobol meu iittappa keeke doon, aeg dootteb, amge ag aɗi keeke ib amuppa dootteb am keeke genab iitta. Ag akka, ahilag dabmakppa keeke hambuppuak dabmetteb, amge keeke ag dabmetteb ele am genab iitta,” awa aum.

Maika 2:11

Propet danab nau laa, nug hambuppuak danab nug uɗia, ‘Da dimppa aɗi bekkunu nai ainne, ag le ɠagattag aon lanan, oo gamag ahakib dooglagnu ippu ippunadppi doon dim lamidkkulagnu uɗie hettem,’ akku dayeb amu, nug am propet danab ahilagnu elelenab.” Yawe Nug anam atte.

Esekiel 22:14

Da Yawe, da ag bu madakkul, amu deɗ laa da amu hekkul amu, ag oolagppa ɠagattag qettak daaglagte? Ag ɠagattag daaglagte? Iitta! Amu da Yawe, da aakku amu hekkulnu ain malami amunu, da anamnab aakku hekkul.

Aisaia 10:3

Ag anam hetteb amunu, Yawe Nug geha ahilag hak nau amu nob mekkunu haen tituanom, amuppa Nug ag uug naunab madakkunu dabmette amu, ag amu eɗidkkulagnu elelete? Iitta! Haen amuppa Nug danab wan laa umanu diieb, ag ulah ɠagattag uɗitte, amubia ag uɗin, ag ag eheɗ madappeg, ag geha attem hekkulag? Ag geha oolna, aun toppa ehanadkkunu gokkulag? Keeke kuɗum ag aoppig, geha ag keeke amu aben adekkuppa mekkulag?

Duteronomi 32:29

O gadon. Ag am danab ah doyak dabmak ena ele daanna, ag imu dooppeg, oolag maidlo am ena! O gadon. Ag aɗi kobol ahilagppa bekku oolag maidlo am ena!

Maika 2:6

Laa da, Maika, ag dahilnu atteb. “Na propet nai aib mattime! Na dimppa aɗi bekkunu nai aib mattime! Uug amu bekku am, uɗa nak nau guittak ele megakku, amge uug amuam ii bema,” aon atteb.

Gayak Nai 2:14

Ag Israel, ahilag propet ag tulegleg laala anidppig, amge tulegleg amuam hambuppuak; laa ehanidkkunu elele iitta. Ao, ag Juda danab ah ag hipunin henana, ag bu okkai aoglagnu aakku oippig, amge propet ag, ag Juda bu amu, amuam wan laappa diia ukka laih me dayak danab ah daaglagnu, ag bu amu ii aomnanu ippu ii ippunadppig. Nai ag madappig ele amu; nai amuam nai hambuppuak. Nai amuam ag omalatte, ag ib apiɗidna, eheɗ goppig.

Gayak Nai 1:9

Juda danab ah ag eheɗ henana, ag ah laa kalam qe, leppu nau nuhig lamen qette, ag lamen amubia daanna, ag oolagppa dubuttid ele daappig; amge haen amuppa ag dimppa ahilagppa aɗi bekkunu dabmak nakok laa ii aoppig. Ag eheɗ heeg, kekeɗ heeg nena qeppig amu, ahilag na qak am laanab; ag nena qena autna autna aoppig. Ao, ag anam nena qeeg, laa ag ehanatteb, oolag mekkunu laa ii dayom. Laa anam ii dayeye, Juda danab ah ag atteb. “O Yawe, kekeɗ ag eɗigppig amunu, na ihinig guittak nau neegna anidna ehanigkkutnu oɗ medattem,” aon atteb.

Aisaia 33:14

Hipunin hak danab ah Sion daatteb ele, ag eheɗ nau baɗatteb. Ao, Kayaknu nuhig haknu ele uuak danab ag hahaɗtteb. Ag hahaɗnan atteb. “Ig oonigppanu amu, aun nug Kayak, Kayak Nug aab aɗu keeke oh ewe iitta mette bia daatte amu, aun nug Nug ele daaglahnu elele?” Ao, ag hahaɗnan, “Ig oonigppanu aun nug Kayak, Kayak Nug aab aɗu keeke oh ewe iitta mette bia daatte amu, aun nug Nug ele hanhan daaglahnu elele?” atteb.

Aisaia 20:6

Haen Asiria ag uɗin, Isip amu Kus ele aqappeg, danab yu ihippa daatteb ag geha haen amuppa akkulag. ‘Antteg! Wan amuppan danab, ag ig ehanigppeg, Asiria ii iqamna dabmemut ele amu, ag aakku iitta meppig. Ig Asiria dilag qep elab eɗidkkunignu ig ib laa iitta,’ aon akkulag.” Yawe Nug anam aum.

Maika 3:11

Jerusalemnu danab okkai ag epeɗiak henana, ag lokkumakppa eheɗ haknu ehanittak aon hetteb. Danab ah ag Jerusalemnu mana mettak danab men doɗo mattaeg, ag ippunittak madatteb. Amu danab ag Jerusalemnu propet men doɗo mattaeg, ag propet nai ahilag maditteb. Ag nau amu oh hetteb, amge ag atteb. “Ig Yawe waappa daat, ehanittak aottem,” atteb. Ag anam anana, ag inam ele atteb. “Yawe Nug ig oonigppa iite daatte? Uug nau laa ihinigppa ii bema,” aon atteb.

Aisaia 43:27

Ag mamelag tatamnu amu, nug hipunin heum. Ahilag ikki danab ag da oɗel tappaeg neum.

Aisaia 47:7

Ag Babilon ag kuin laa nug nukka nuhignu, ‘Da hanhan kuin daakkul,’ atte, amubia ag Babilon ag, ‘Ig hanhan wan oh dilag okkai daagnig,’ appig. Ag anam appig, amge ag eheɗ hak ahilag, ag amunu nob nau ii dabmeppig. Ag eheɗ hak ahilag, ag amunu nob nau ahilagppa bekkunu elele amu, ag amunu dabmak nakok laa ii aoppig.

Jeremaia 12:4

O Yawe, wan gemu qaɗaietta, nauha auta awom daatte; amu haen gane laa ele ukkeb, uug amuam iitta mekku? Ao, gemu dad okkai ohppa gikkiɗah bunaɗom daatte; amu haen gane laa ele ukkeb, uug amuam iitta mekku? Nau hak danab ag wan imuppa daatteb, ag hipunin henana, ag, ‘Yawe Nug eheɗ hak ihinig ii anidtte,’ aon atteb amunu, uug nau amu be, doɗ ai ele ag aakku mauhppig.” ⌊Jeremaia nug anam unuqittom.⌋

Jeremaia 26:7

Yawe Nug Jeremaia amegppa anam a, Jeremaia nug aha, anam a, mana mettak danab, propet danab, amu danab ah oh ag Jeremaia nug nai amu Yawe laugppan Israel danab dilag haɗap-ppa dayaya mattie dooppig.

Gayak Nai 4:13

Ag amu bekkunu oolagppa genab ii dooppig, amge amu aakku beum. Kobol amu beumnu diig am inam. Juda dilag propet ag hipunin heeg; mana mettak danab ag ele hipunin heppig: ag aab okkai amuppa genab tutukku hak danab aqaeg mauhppig.

Gayak Nai 4:18

Kekeɗ ag meigna daan aut aotna aoegeg; ig lag dimittim, aabnu ibppa oignignu elele iitta daamut. Ihinig haen aakku iitta meum. Ig eɗut, ena daagnignu ib laa ii dayom; amunu diig am, ihinig gog tak aakku uɗia dayom.

Hosea 4:9

Anam amu, da danab ah laa oh bu madakkul, amubia da mana mettak danab bu madakkul. Ao, da geha mana mettak danab, amu danab ah ele, da ag oh ahilag hak nau amunu bu madakkul. Ge, da geha ag aɗi heppignu nob madakkul.

Hosea 6:10

⌊Ag anam hetteb amunu,⌋ da kobol naunab nau Israel appa anidmi. Israel danab ah ag kayak hambuppuak noolagppa dup nona binalag menan daatteb. Ge, Kayaknu neekkakppa ag oolagppa dubuttid teum daatte.

Hosea 9:5

Anam amunu, hobul dayaknu haen epeɗiak, haen amuppa ag aɗi hekkulag? Ao, ag Yawenu qagmak gamag ahak elenu deɗppa, ag aɗi hekkulag?

Duteronomi 32:20

Nug ag guhuɗatta, Nug aum. “Israel ag eheɗ hekkulagnu ag tiilagppa daatte. Ag oo metta ii uuak kobol hekkulagnu uutteb. Anam amunu, da ag ii ehanadpa. Da anam heppi, ag ahilag gog tak attem daakku amu, da anidkkul.

1 King 22:6

Jehosapat nug anam a, aria Ahap, Israel dilag king, nug he, propet danab, ahilag ebqak am 400 anam, ag uɗieg, nug ag oɗ mattom. “Da Ramot, Gileat wanppanu, banelag ukken, aab amu eɗue aokkulte, o iitta da iitai gopa?” awa oɗ mattom. Nug ag anam oɗ matte, ag appig. “Na ahan ukke! Naɗi Nug aab amu na eppenppa mekku,” aon appig.

Prowerb 17:4

Nau hak danab nug nai mattiak eheɗ dookkunu hette. Ao, hambuppuak danab nug laa heeb nauhkkunu nai dookkunu daug huma daatte.

Esekiel 13:10

Propet hambuppak ag dahil danab ah ulum nau mattanna, ag, ‘Maɗoɗ haen uɗiom daatte,’ atteb, amge maɗoɗ ii daama. Propet hambuppuak amu, ag am danab men awa, lagnu gilil hamu, simen iitta gai-iittanab he, laa gau hakkab teppu iitta ele, neekkakppa gilil ena daatte dabmak awaknu gililppa laidtte amu, ag propet hambuppuak ag laa gau amu laidtte bia hetteb.

Sepanaia 3:4

Propet danab Jerusalem daatteb ele ag am beɗuppa tak danab daatteb. Ao, ag hambuppuak kobolppa keeke ag oolag hette ele, ag amu aotteb. Mana mettak danab Jerusalemnu ag kobol eheɗ heegeg, Kayaknu mettid lag, nuhig neekkakppa am dubuttid teum daatte. Ge, ag hambuppunna, Kayaknu ɗo inam inam ippunigtte atteb, amge Kayaknu ɗo anam ii ippunigtte.