Jeremaia 44:21 - Nobonob Baibel

²¹ “Anukka ag mamelkad aɗi, ahilkad king, ahilkad ehanittak anuqak danab laa, ag gemu ippa Isip daatteb, amu Juda danab ah laa oh ele ag anukka Juda wanppa daanna, ag Judanu aabppa, Jerusalem aabppa ele ag kalu danab ile muttuɗig enanag bette ele aon manan, kayak hambuppuak madappig amu, Yawe Nug amu anttom ag iite dootteb? Nug amu antta amunu, dabmaama, dabmakppa iite meum.

Jeremaia 44:21 Referans Kwoze

Jeremaia 44:17

Ig kayak laa onig Astoret, onig laa Habnu Kuin, ig nug noobppa dup nota, nug binag mekkunignu nai atat, ɠagattag qakkamut amu, ig genabnab genab anam aakku hekkunig. Ig kalu danab ile muttuɗig enanag bette mait, nug mettagnig. Ig nuhignu wain gokkaɗaknu ofa hekkunignu wain gokkaɗkkunig. Ig, ig mamenkad aɗi, ihinkad king, ihinkad ehanittak anuqak danab laa ele anukka Judanu aabppa, Jerusalem appa ele heppig, amubia ig hekkunig. Aɗinu? Anukka, ig Juda wanppa amu hemut, haen amuppa ig ee ele daamut, uug laa ihinigppa ii beum.

Jeremaia 44:9

Anukka ag mamelkad aɗi, ahilkad king, ahilkad kuin ele, amu gemu ag ippa Isip daatteb amu, ahilkad ah ele ag Juda wanppa, Jerusalem aabppa ele daanna, nau digdig hedappig amu, ag amu daulag atiomte?

Jeremaia 14:10

Da anam unuqidmi, amge Yawe Nug Juda danab ah dilagnu inam atte. “Ag da uuiɗna, laih oiglagnu oolag okkainab daatte. Ao, ag akka ag heppeg, ag eheɗ amu hemananu ib ahilag keldokkunu nakok laa iinab hetteb,” awa atte. Amu Yawe Nug anam dootte amunu, Nug ag Juda danab ah, Nug ahilagnu ena ii dootte. Nug gemu ahilag nau hak dabmekku. Ao, Nug ahilag hipunin ag heegeg uɗie, gemu ele hetteb, Nug diig amunu ag bu madakku.

Jeremaia 11:13

O Juda danab ah, ag kayak hambuppuak kuɗumnab noolagppa dup nona binalag metteb. Ag ahilag wanppa aab gane daatteb, ag kayak hambuppuak ebqak amubia noolagppa dup nona binalag metteb. Laa amu, kayak hambuppuak laa onig Bal, kayak amu dim lamattaknu ɗo am uɗa nak ele, ag kayak amu noobppa dup nona binag mekkulagnu ag nuhig qaɗab kuɗum bappaidppig. Jerusalem aabppa ib gane daatte, ebqak amubia ag nuhig qaɗab bappaidppig.” Yawe Nug anam awa atte.

Aisaia 64:9

O Yawe na oo nauhak okkainab, melemel elele iittappa doomnanu, na hanhan hipunin ihinig dabmenan oimnanu oɗ medattem. O Yawe, ig am nahipad danab ah daattem amunu, na dabmegakkutnu unuqidttem.

Sam 79:8

⌊O Yawe,⌋ na ig mamenkad aɗi hipunin heppig amu, na amunu nob ig mekkamnanu oɗ medattem! Ao, na oot gai-iitta doon oot mekkan ehanigkkutnu unuqidttem. Aɗinu? Ig uug okkainabppa daattem.

Amos 8:7

Ag anam hetteb, amge Yawe, Israel dilag Kayak, Nug Nug onigppa nai imu ɠagattag qetta, inam atte. “Da ahilag kobol nau ohnu amu, da daul iinab atima,” awa atte.

Hosea 7:2

Anam, amge Israel danab ah ag da neekkatte dayeye, ahilag eheɗ haknu oh dabmein daattem amu, ag amu ii dootteb. Ag haen oh hipunin heegeg tonadtteb; haen oh hipunin amu da noolppa dayeye, da anadttem.

Revelesen 18:5

Aɗinu? Nuhig hipunin am ameg naɗi habppa teppig bia daatteb. Ao, kobol eheɗ nuhig am Kayak daugppa doum.

Revelesen 16:19

Mim ne amu, aab okkai amu nug obate, maha ewam bate, aria atu atu dilag aab okkai ag nena qeppig. Haen amuppa ele amu aab okkai Babilon onig, ɠagattag ele nug Kayak daugppa do, Nug nuhig oppoɗi bak okkainab kap-ppa wain bia mette, Babilon laum.

Esekiel 16:24

na eheɗ hak laa ele heme. Amuam na aabppanu haɗap ohppa na kobol nahip dim lamidkkutnu aben bappaidna, na appa kayak hambuppuak dilag mettid lag nakok ele bappaidme.

1 King 17:18

Aakku ah nug Elaiya amegppa aum. “Kayaknu danab, na aɗinu dahilppa kobol imu heme? Na uɗin heppe, Kayak Nug dahil hipunin eɗua daugppa dob heeb, nid dahil imu oɗe awa, mauhkkunu uɗimete?” awa oɗ mettom.

1 Samuel 15:3

Da amu hekkul amunu, na heppe, na Israel danab ele ag ahan, banelag gona, Amalek ele ban hena, ag Amalek oh, amu ahilkad keeke ohnab ele heppeg, ag dahilnuib, dahil pelemppa dayeg! Ag keeke laippu laa aibnab uuppeg dayom. Ag Amalek danab, ah, nid naunau, nid yuɗ ele, amu ahilkad makau, sipsip, kamel amu donki ele, ag amu ohnab aqappeg mauheg!’ ” awa aum.

Duteronomi 32:19

Israel danab ah, ag Yawe bekkod, aɗekkud ele amu, ag kobol nau heegeg, Nug amu antta, Nug oo nauhom. Nug oo nauhe, nug Israel danab ah guhuɗattom.

Duteronomi 32:34

Amu Yawe Nug atte. “Ag anam hetteb, amge da ahilag nau hak amu doyen, noob madakkulnu iite bappaidmi daatte? Ao, da nob mak amu keeke danab kunup ɠagattagppa ina qe daatte, amubia da iite bappaidmi daatte?

Jeremaia 32:32

Da heppi, aab amu nauhkku diig am, Israel danab ah, Juda danab ah ele ag eheɗ hak digdig heegeg uɗie, gemu ele heeg, da oppoɗil beum daatte. Ge, ahilag king, king dilag ehanittak anuqak danab, ahilkad mana mettak danab, propet danab amu, Jerusalem danab ah, Juda danab ah laa oh ele, ag oh anamib heegeg uɗie, gemu ele hetteb.

Jeremaia 44:20

Ag anam aeg, Jeremaia nug amu dilag oh, danab ele, ah ele, ag nug naippa nob meppig ele amu, nug ag oh amelagppa aum.