Jeremaia 36:2 - Nobonob Baibel

² “Jeremaia, na buk itoɗiak ele laa aon, da aɗi nai kuɗum na amenppa Israel wan, Juda wan, amu wanppan wan laa oh ele dilagnu ain malami amu, na buk amuppa ye! Da Josaia king daye digmein, na amenppa ai uɗie uɗie, gemu batak nai mattimi amu, na nai amu ohnab buk amuppa ye!

Jeremaia 36:2 Referans Kwoze

Jeremaia 30:2

Yawe, Israel dilag Kayak, Nug atte. “Jeremaia, na buk itoɗiak ele aon, aɗi nai laala da na amenppa akkul amu, na nai na amuppa ye!

Jeremaia 25:3

“Anukka Amon bekka Josaia nug Juda dilag king daye, nuhig king dayaknu maɗ 13ppa Yawe Nug digma he, da nuhig nai doomi. Da haen amuppa digmein dooi uɗie, maɗ 22 ukke, gemu am maɗ 23, amu maɗ 23 amu ooppa haen kuɗum Yawe Nug da, Jeremaia, Nug da nai laa meɗe doyeye, da Yawenu nai aɗi doomi amu, da ag amelagppa ami, amge ag daulag ii human dooppig.

Jeremaia 1:10

Antte! Gemu da na ehah laa medattem. Na wanppan wan laalappan danab ah, amu ɗo maɗoɗ laalappanu danab ah ele amelagppa nai madikkutnu elele daattem. Na laala amelagppa, danab laa nug uud keeke hiɗe bunaɗtteb, o lag keeke loppaɗtte, amubia da wan laa, o ɗo maɗoɗ laa amu, da ahilagppa heppi, ag nauhkkulag akkut. O na laala amelagppa danab laa nug keeke he nauhtte, o laa abenlagppanu lamatta, ahilag aben aotte, amubia da wan, o ɗo maɗoɗ laa amu heppi, ag padal mekkulag akkut. O na laala amelagppa danab nug lag bau he bette, o nug keeke eppe ena bette, amubia da wan o ɗo maɗoɗ amu heppi, ag ena daaglagnu akkut.” Yawe Nug anam awa, da amelppa aum.

Eksodas 17:14

Moses, Israel ele ag anam heeg, dimppa Yawe Nug Moses amegppa inam aum. “Dabmak imu iitta memanu amu, na nai imu buk itoɗiakppa yaan, na heppe, Josua nug doyaɗ! Aɗinu? Da geha heppi, Amalek ag iitta mena autna aoppeg, hab waappa amu, danab laa nug Amalek dilagnu baula dab-ii-mema.” Yawe Nug anam aum.

Esekiel 2:9

Yawe Nug anam da amelppa a, da neekki ukke, danab eppeg dahilppa bahia daye anidmi. Am nug eppegppa buk itoɗiak laa dayom.

Jeremaia 51:60

Nai nug mettom amu, nai amuam uug naunab oh Babilon dimppa bekkunu nai imu. Jeremaia nug nai aɗi aɗi Babilon dilagnu Yawe he doyom amu, nug nai amu oh buk itoɗiak eleppa ya, nug Seraia mettom.

Jeremaia 36:23

King nug aab anam uɗikka dayeye, Jehudi nug buk itoɗiak ele ebqaaqa, nug maha ewam o waɗele ebqa male, king nug buk amu awa, qep nagppa maha ebqa malom ele okkula awa, aabppa buɗie te ewewe, Jehudi baula maha ewam o waɗele ebqe, nug baula anam heum. Anam heeh ukke, king buk oh aabppa mane ewom.

Jeremaia 36:6

amunu, na da abenal aon, appa gokkutnu ool daatte. Na ee ohnu kud ma dayaknu deɗ laappa, na deɗ amuppa buk na Yawe nai ippuniɗe, da ai, na yaame imu amu, na buk itoɗiak amu aon, Yawenu mettid lag, na amuppa gona, danab ah appa daatteb ele dooglagnu na buk amuppan nai ebqekkut. Juda danab ah ag ahilkad aab anen anennu uɗitteb ele amu, na ag amelagppa ebqeppe, ag doyeg!

Aisaia 8:1

Am Yawe Nug da amelppa inam aum. “Na yaaknu buk itoɗiak ele okkai laa aon, na pen laa, danab oh ag pen amubiappa haen oh nai yaatteb ele amu, na amu ele aon, amuppa na pepa qaɗeppa nai imu yaakkut, ‘Maher Salal Has Baz.’

Sam 40:7

Anam amunu, da ami. “Da iikku daattem. Dahilnu nahip nai buk itoɗiakppa yaak niitte bia amu, da uɗimi daattem.

Esra 6:2

Darius nug anam he, danab ag amu anidkkulagnu heeg ukke ukke, ag prowins laa onig Midia, aab Ekbatana ooppa aben aɗ ɠagattagnab ele, appa ag buk itoɗiak laa anidppig. Buk itoɗiak amuppa yaak inam dayom. “Imuam King Sairusnu nai iikku.

Hosea 8:12

Da dahil ɗo oh ag mattami me, ag ɗo amu ii tonadtte bia hetteb.

Jeremaia 45:1

Anam, amge amu ii nak haenppa, haen Josaia bekka Jehoiakim, Juda dilag king, nug king abenab awa, nuhig king dayaknu maɗ waɗeleppa, haen Baruk nug buk itoɗiak eleppa nai Jeremaia nug mattieye yom, haen amuppa propet Jeremaia nug nai imu Neria bekka Baruk amegppa aum.

Jeremaia 36:29

Na nai amu oh buk itoɗiak ele laappa yona, na Juda dilag king Jehoiakim amegppa inam appe doyaɗ! ‘Yawe Nug inam atte. “Na buk itoɗiak ele laa amu manae ewe, na ame. ‘Jeremaia, aɗinu na Babilon dilag king nug genab uɗia, wan imuppa ban ha heeb, wan nauhakib dayebeb, ippa danab, doɗ ele ii daamna buk amuppa yaame?’ aon ame.” ’ ” Jeremaia nug nai amu doyom.

Jeremaia 2:4

Anam amunu, O Jakop buɗub, ag Yawenu nai imu doyeg! Ao, ag Israel buɗub oh, ag ahilag aab ikki atten attenppa daatteb, ag nuhig nai imu doyeg!

Jeremaia 1:5

“Jeremaia, da na anin ooppa heidmi, amge haen da na ii heidmi, haen amuppa da na tituanidmi. Ao, na anin nug na ii menuittom, haen amuppa da na uɗat laa hekkutnu otidmi. Da na otidmi, na propet daanna, dahil nai wan atu ohppa mehuqkkutnu na oninppa emi,” awa aum.

Job 31:35

O gadon, laa nug dahil nai dookkunu ool okkai daatte. Da eheɗ laa ii heminu nai pepappa yaak niitte amu, da pepa amuppa nai amu genab daatte laa ippunadkkulnu amu, da onil iikku yaattem. Ao, Laa Nukka Ɠagattag Oh Ele Nug dahil nai nob mekkunu ool daatte. Ge, laa nug da naippa yaaiɗtte amu, nug da aɗi eheɗ hemi uɗugppa yeeb anidkkulnu ool hette.

Duteronomi 31:24

Moses nug ɗo ohnab ye bukppa no amu,

Hibru 10:7

Anam amunu da ami. ‘Dahilnu nahip nai buk itoɗiakppa yaak niitte bia, da uɗimi daattem; O dahil Kayak, nahip dabmaknab awak aɗi daatte amu, da amu hekkulnu ool daatte,’ ” awa aum.

Jeremaia 1:9

Yawe Nug anam awowa, Nug eppeg bahia, da oɗel lauɗitta, Nug da amelppa aum. “Da dahil nai na oɗenppa aakku memi.

Jeremaia 36:14

Ag amu doon, kingnu ehanittak anuqak danab ag Netania bekka Jehudi, nug alag am Selemia, dokkiab am Kusi, ag nug ukka, Baruk amegppa, “Na buk itoɗiak ele na danab ah amelagppa ebqeme ele amu, na buk amu aon do!” akkunu meeg ukkom. Ag meeg ukka, Baruk amegppa anam aum amunu, Neria bekka Baruk nug aha, buk amu aɗaɗa, ag gumatta ukkom.

Jeremaia 36:18

Ag anam oɗ mettaeg, Baruk nug aum. “Ao, nug nai imu oh mattieye, da buk itoɗiak eleppa inkppa aakku yaami,” awa aum.