Jeremaia 34:22 - Nobonob Baibel

²² Da appi, Babilon dilag king, nuhikkud daup ele ag eɗun, aab okkai imuppa daanna, ban hekkulag. Ag aab imu eɗidna aon, ag manappeg eokku. Amu da heppi, Babilon dilag daup ag Judanu aab heppeg nauhattakib daappeg, danab ah laala ag amuppa daaglagnu elele iitta daaglag.” Yawe Nug anam awa atte.

Jeremaia 34:22 Referans Kwoze

Jeremaia 9:11

Amu Yawe Nug inam awa atte. “Da heppi, Jerusalem am kinipan ameg okkai hume tak daakku. Doɗ jakal ag aguppa daaglag. Ge, da heppi, Judanu aab laala ag nauhakib daaglag. Danab laa appa daakkunu elele iitta daaglag,” awa atte.

Jeremaia 39:8

Appa ag Sedekaianu anam heppig, amge Babilon daup Jerusalem daappig amu, ag kingnu lag enanagnab manaeg ewe, danab ah laulkad ele manatteg ewegeg, ag aab aɗ ele loppaɗeg, nauhakib dayom.

Jeremaia 52:13

Nug ba he, Babilon dilag daup ag Yawenu mettid lag, kingnu lag enanagnab, amu danab ah onilag ele, nug ag laulkad oh ele Jerusalem appa manatteg eoppig.

Jeremaia 52:7

Juda ag anam eheɗ daaegeg, Babilon ag aab okkainu aɗ aakku heeg, giɗo naɗi dayom. Giɗo naɗi daye, Juda dilag daup Jerusalem daappig ele ag ⌊Sedekaia ele⌋ tuqan amuppa kingnu dadppa wana gona, aab okkainu aɗ laih laih doa qal mettak daapiɗ odppa wana, dimittim gona, ag oolna, atu Araba, ag appa gokkulagnu goppig. Babilon ag aab talilidna daappig, amge Juda dilag daup ag ib amu anidna, oolna goppig.

Jeremaia 44:22

Yawe Nug amu antta, amunu dabma, Nug ag ahilag nau hak digdig, ahilag hak nug amunu ooppa uuaknab dootte ele, Nug ag uuatteb, ag hak amu tuɗidna hekkulagnu elele ii doya, Nug he, danab ah laa ag wan amuam eheɗ laa awaknu anak waappa daakkunu anan oiyegeg, wan amuam hele-ettak, wan meu waknu nakokib elele, am anam dayom, amu danab ah appa ii daappig. Gemu ele anamib daatte.

Jeremaia 33:10

Amu Yawe Nug inam atte. “Na attem. ‘Aben imuam hele-ettak, wan meu waknu nakokib elele, am anam daakku, amu danab, doɗ ele imuppa ii daamna,’ aon attem. Na attem am genab, Judanu aab, aab Jerusalem imu ele nauhakib daaglag, amu danab, doɗ ele ag appa ii daamna, amge da heppi, aben amu ohppa danab ah ag qinob eɗun daanna,

Matyu 22:7

Am king nug nai anam doya, nug oppoɗi huanak be ameg ele kokoɗ eppe, nug he, nuhikkud ban danab ag gona, danab ag nuhikkud maɗi nid aqaeg mauhppig ele, ag ohnab aqappig; aab okkai ahilag ele manaeg ewa, iitta meum.

Sekaraia 7:14

Da hei, ag wanppan wan uma, ulah kilibob he, keeke tamtam laih laih gona daatteb bia daappig. Da hei, ag gona appa daanna, ag aab diig danab iitta wan amuppa daappig. Hak ahilagppa ag heeg, wan ahilag am hele-etta auta autanab awom. Danab ah ag wan amuppa ii oippig. Israel danab ah ag heeg, ahilag wan enanag, ee meu huanak oum ele amu, wan amuam hele-ettak dayom.” Yawe Nug anam atte.

Sekaraia 1:12

Yawenu engel nug nai amu doya, nug Yawenu inam unuqittom. “O Yawe Nakka Ɠagattag Oh Ele, na anukka Jerusalem danab ah dilagnu, Juda danab ah laa ele dilagnu oot nauhe uɗie uɗie, gemu ele anam doottem. Oo nauhak nahip aakku maɗ 70 iikku dayaya, ii iitta meum; amu haen gane laa ele ukkeb, na heppe, nahip oo nauhak iitta meeb, na Jerusalem danab ah, Juda danab ah laa oh dilag ele oot gai-iitta doon oot mattan ehanadkut?” awa oɗ mettom.

Maika 7:13

Anam amge, wan laa oh hele-ettak daaglag. Aɗinu? Danab ah appa ana daatteb ele amu, ag ahilag hak am nau.

Amos 3:6

Haen aab okkai laappan aɗi uɗitte anittak danab nug kekeɗ uɗitteb antta, nug trampet iwale amu, aab okkai amuppanu danab ag hamu doon, ii baɗattebte? Iitta! Ag baɗatteb. Ao, aab okkai laa, ⌊amuppan danab ah ag hipunin heeg,⌋ uug nau aab okkai amuppa bette amu, uug amuam Yawe eppegppanu iite uɗitte? Ge, nuhigppan uɗitte.

Gayak Nai 1:1

O gadonnab gadon. Jerusalem appa danab ah ii daatteb bia; anukka danab ah ambak Jerusalem daappig, amge gemu appa ii daatteb bia. Anukka danab ah wan atu ohppanu Jerusalem binag meppig, amge gemu Jerusalem am ah qab bia daatte; anukka Jerusalem wan atu ohppa am onig okkai ele, kuin bia dayom, amge gemu nug begbeg maɗi nid bia daatte.

Jeremaia 38:23

Na nakka, na beɗun Babilon eppelagppa ii mekkut dayeb amu, nahipad ah oh, nahipad nid oh ele ag Babilon eppelagppa daaglag. Na ele, na ag eppelagppa daamnanu ib laa anidna, oolna laih ii gomana. Iitta. Babilon dilag king nug na aɗaitteb, na nug eppegppa daappe, Babilon dilag daup ag aab okkai imu manappeg eokku.” Jeremaia nug Sedekaia amegppa anam aum.

Jeremaia 32:29

Babilon daup, ag gemu aab okkai imuppan danab ah aqaglagnu ban hetteb, ag aab okkai imu eɗidna, ooppa uɗin, maippeg eokku. Ewebeb, Jerusalem danab ah ag lag laala koɗokkoppa tena, appa ag kalu danab ile muttuɗig enanag bette ele main, kayak hambuppuak Bal mettona, ag wain gokkaɗaknu ofa kayak hambuppuak laala dilagnu ele heeg, da oppoɗil beum amu, Babilon dilag daup ag lag amu ele maippeg eokku.

Jeremaia 4:7

Yawe Nug anam a, da, Jeremaia, da Juda danab ah amelagppa ami. “Laa amu uɗitte amu, nug am laion laa nug teɗ nuhigppan aha, doɗ aqeeb mauhkkulagnu oitte bia uɗitte. Ao, laa nug wan kuɗum he nauhtteb ele, nug uɗikkun aakku ahom. Nug heeb, ag Juda, ag ahilag wan am nauhaknab daakkunu ahom. Ao, nug heeb, ahilkad aab kuɗum am nauhakib daaglag. Danab ah laa appa ii daamna. Iitta.

Aisaia 64:10

Kekeɗ ag nahipad aab okkai, nahipnu tituanak daatteb, ag amu hatteg nauhppig, atu taɗak bia daatteb. Sion ele anamib. Ge! Ag heeg, Jerusalem am nauhakib dayeye, danab ah appa ii daatteb bia.

Aisaia 37:26

Senakerip, na anam ame, amge na nai imu iite doome? Anukkanab da Yawe, da keeke amu bekkunu tituanmi. Anukkanab da maittak amu aomi. Da amu hemi amu, gemu da hei, aakku beum. Ao, da hei, na amu oh henana, na hee, aab okkai ɠagattag aɗ ele am loppaɗattak, kinipan ameg okkai hume tak daatteb.

Aisaia 24:12

⌊Kekeɗ heppeg,⌋ aab okkai ⌊anen anen⌋ nauha aota aokku. Ag aɗnu od okkai amu heppeg na qa, aoɗakib daakku.

Aisaia 13:3

⌊Amu Kayak Nug atte.⌋ “Da dahil ban danab, huu da epeɗiadmi amu, da ag gona, ⌊Babilon eɗadkulagnu⌋ haknunab amelagppa ami. Ao, da ⌊Babilon danab ah dilagnu oppoɗil bette amunu, da⌋ ban danab dahil ag noob mettak nau ⌊Babilon⌋ mattaglagnu onilagppa emi. Ban danab huu amuppanu amu, ag da onil attannab daakkunu gamalagnab ahatte.” Yawe Nug anam atte.

Aisaia 6:11

Naɗi Nug anam a amu, da Nug inam oɗ mettami. “Naɗi, da anam heppi, haen gane laa ele ukkeb, da batakkul?” ami. Da ai amu, Nug inam da amelppa aum. “Geha aab okkai oh nauhppeg, wan ele nauhppeg, aab, lag ele hamu daappeg, danab ah aab, lag ele amuppa laa ii daappeg, na batakkut.

2 Stori 36:17

Ag eheɗ anam heegeg, Yawe Nug he, Babilon dilag king, nuhikkud daup ele ag Juda banelag uɗin, ag Juda dilag nid bau Yawenu mettid lag ooppa qep elabppa aqaeg mauhppig. King nug auntai laanu oo gai-iitta doya oo metta ehanittak kobol ii doyom. Iitta! Nid bautai, o ah bautai, o danab kaino, o danab kainonab, nug ag oh dilagnu oo gai-iitta doya oo metta ehanittak kobol dim lamidkkunu ii dabmeum. Yawe he, ag ohnab Nebukatnesar eppegppa daappig.

2 Samuel 16:11

Dawit nug anam anan, nug Abisai, nuhikkud ehanittak anuqak danab ele oh amelagppa nai tuɗitta aum. “Da bekkalnab, da nug menumi ele, nug da iweb mauhkkulnu hette. Danab imu nug Benyaminppanu danab, nug Saul ele tiig laippu, nug da eheɗ laa awaknu anak waappa daakkulnu dabmekkun elele amunu, uuppeg dayaɗ! Yawe Nug nug anam akkunu aumtai amunu, ig uupput haɗ!

2 King 25:6

amunu Babilon ag Sedekaia aɗappig. Ag nug aɗan, Babilon dilag king nug ⌊Hamat wanppa⌋ aab onig Ripla appa dayom amunu, daup ag Sedekaia aon gona, appa Nebukatnesar eppegppa meeg, nug ag nuhignu aɗi aɗi hekkulagnu aum.

Jeremaia 34:2

“Da Yawe, da Israel dilag Kayak, da inam attem. ‘Jeremaia, na ahan, Juda dilag king Sedekaia toppa gona, na inam appe doyaɗ! Yawe Nug inam atte. “Da heppi, Babilon dilag king nug aab okkai imu eɗitteb, nug eppegppa dayeb, nug amoteb eokku.

Jeremaia 50:13

Da, Yawe, da Babilon dilagnu ool nauheb, bu madakkul. Bu madappi, Babilon wan am hele-ettak daya autanab aokku. Danab laa appa ii daama. Anam dayeb, laa nug Babilon guguittak oiyaya, guittak okkainab awom antta, nug ameg iɗuak doya, Babilon danab ah awa awa aqakku.

Esekiel 13:22

Da genab tutukku hak danab ah uug dooglagnu ii hei, ag ah eheɗ hetteb ele ag nai hambuppuak mattiegeg, genab tutukku hak danab ah ag kobol ena dim lamidkkulagnu uug doon oitteb. Ag ah ag eheɗ hetteb, ag anam henana, ag nau hak danab ag mauhmananu, ag oolag eɗueb, eɗun ena daaglagnu dabmak ii madatteb. Iitta! Ag tuɗidna, eheɗ hekkulagnu atteb.

2 King 25:9

Nug ba he, Babilon dilag daup ag Yawenu mettid lag, kingnu lag enanagnab, amu danab ah onilag ele, nug ag laulkad oh ele Jerusalem appa manatteg eoppig.

Jeremaia 2:15

Am genab, kekeɗ ag laion gaatte bia hena heeg, ag eheɗ aoppig. Ao, kekeɗ ag laion bau nug liɗimtte bia hena heeg, ag eheɗ daappig. Kekeɗ ag heeg, ag Israel, ag ahilag wan am nauhaknab awom. Ao, kekeɗ ag ahilag aab amoteg ewe, appa danab ah ii daatteb.