Jeremaia 33:24 - Nobonob Baibel

²⁴ “Jeremaia, na wan laappan danab ag, ‘Yawe Nug Israel danab ah, Juda danab ah ele, Nug ag nuhikkud daaglagnu tituanattom amu, Nug ag geɗatom,’ atteb ele amu, na amu iite doome? Ag amu atteb amunu, ag dahilad danab ah dilagnu ena iinab doon, ag danab ah dahilad dilagnu, ag wan imuppan wan laala oolagppan wan laanu danab ah ii dabmetteb.

Jeremaia 33:24 Referans Kwoze

Sam 83:4

Ag atteb. “Ahappeg, ig hepput, Israel ag nauhna autnanab aoppeg, ahilag wan iitta maɗ! Ao, ahappeg, danab ah laa ag baula Israel wan ii dabmemananu ig hepput, Israel ag nauhna autnanab aweg!” aon atteb.

Esekiel 37:22

Da anam heine, da heppi, ag huu laippu, wan laippuppa, amuam Israel wan, ag aguppa daaglag. Ag amuppa daappeg, ahilag king laippu ag atognoattebeb, ag baula huu aɗit ii daamna. Ag baula wan aɗit iitta; laippuib.

Esekiel 36:2

na, ‘Naɗi Yawe Nug inam atte,’ awona, na nai imu appe doyeg! ‘Kekeɗ ag ahilagnu, “Ehe, enanag! Qauko anukka daaegeg uɗie uɗie, gemu ele daatteb amu, qauko amuam gemu ihinig daatteb,” aon appig.

Esekiel 26:2

“Danab bekka, Tair danab ah ag Jerusalem na qeumnu oolag gamag ahak eheɗ doon, ag inam appig. ‘Am enanag! Kekeɗ ag gona, aab okkai Jerusalem heeg nauha autanab awom. Gemu aab amuam loppaɗakib daatte. Jerusalem danab ah baula keeke meppeg, laa daden meppeg, men doɗo ii aomna. Ag ig ib amuppa men doɗo okkai aognignu ib baula oo ii nemata; ig anam aognig,’ aon appig.

Esekiel 25:3

na, ‘Ag Amon danab ah, ag Naɗi Yawenu nai doyeg!’ awona, na Naɗi Yawe Nug inam atte appe doyeg! ‘Haen kekeɗ ag uɗin heeg, dahil mettid lag nauhom, haen ag heeg, Israel wan oh nauhaknab dayom, haen ag heeg, Juda danab ah ag Babilon wanppa diia ukka laih me dayak danab ah daaglagnu goppig, haen amuppa diig amu ohnu ag Amon, ag oolag gamag ahe, “Enanag, ig oonig anamib hette,” appig.

Gayak Nai 4:15

Ag lamen ahilkad aɗamnanu baɗan, ag, “Ahan ukkeg! Ag Yawe ele ouqak daaglagnu elele iitta ⌊amunu ig ag ele ouqak daagnignu uuttem⌋!” aon atteb; “Ukkeg, ukkeg, ag aib aɗaigppig!” aon atteb. Ag anam eeg, diig amunu ag gonana, ag wan laalappa gona, yawaina oiyegeg, appanu laa ag ahan; “Umu amu, ag ig ele baula daagnignu elele iitta. Ag ukkeg!” aon atteb.

Jeremaia 30:17

O Jakop buɗub, laa ag ahilagnu nau, danab ah hamu bia dootteb. Ao, ag danab ah Sion daatteb, laa ag ahilagnu oo doyak ii dootteb. Amunu da heppi, danab beɗuppa oɗe nau ele, nug eɗua ena daatte, amubia ag eɗun ena daaglag. Ge, da heppi, ag danab ihi nau ele eɗua ena daatte, ag amubia ena daaglag.” Yawe Nug anam awa atte.

Sam 94:14

Aɗinu Yawe Nug amu hette? Nug danab ah nuhikkud di-ii-mattama. Ao, Nug nuhikkudnab danab ah ii uuadma.

Sam 71:11

Ag atteb. “Kayak uuittom daatte, laa ehanitteb, ig eppenigppa ii daakkunu laa ii daatte amunu, doppeg ig nug dim lamidta gota, nug ⌊aɗat qetu⌋!” aon atteb.

Aisaia 7:17

Anam bekku, amge ⌊ag oolag ii eɗutte amunu,⌋ geha Yawe Nug heeb, haen nau nahip-ppa, am nahipad danab ah dilagppa, am na baenadppa dilagppa ele uɗikku. Uug bekkunu daatte ele, amuam naunab, anukka uug beppig eɗattak, uug amu bekku. Haen Israel ag oppatna, Juda uun goppig ele, haen amuppa digmak uɗie, gemu batak uug nau bekkunu daatte amubia laa ii beum. Uug nau bekkunu amuam iikku. Yawe Nug geha Asiria dilag king awa uɗieb, ⌊Juda aqa oɗoɗadkku⌋,” awa aum.

Aisaia 11:13

Israel huu ag Juda dilagnu, ihinigppa anam daalon dabmak iinab aɗan daamna, amu Juda ⌊ag Israel⌋ aqaglagnu dab-ii-memana. Ao, Israel huu ag Juda dilagnu, ihinigppa anam daalon dabmak ii aɗan daamna, amu Juda huu, ag Israel dilagnu, “Ag ihinig kekeɗ daatteb,” ii doomna. Iitta.

Jeremaia 3:7

Da dahil dabmakppa, ‘Israel danab ah ag eheɗ hak amu oh hena malona, ag eɗun, dahilppa uɗiglag,’ ami, amge iitta. Ag eɗun, dahilppa ii uɗippig. Ag ii uɗieg, Juda danab ah, ag Israel ele ee makkegbia daatteb amu, ag da ippunadmi bia da dim lamiɗkkulagnu uun hena, ag Israel heppig anidppig.

Jeremaia 3:8

Juda ag Israel da dimeɗona kayak hambuppuak laala dim lamadppig anidna, ag da danab nug ah nuhig ewau pakkua gappai hette, diig amunu lamidtte bia, da Israel danab ah ahilag eheɗ haknu nob nau matten lamadmi anidppig, amge Juda danab ah, ag da ippunadmi bia, da dim lamiɗkkulagnu uun henana, ii baɗappig. Iitta. Ag ele ah gamu uuitta ukke, danab laa ele oittep bia, ag da uuiɗna, kayak hambuppuak kuɗum noolagppa dup nona binalag meppig.

Jeremaia 31:37

Anam amu, Yawe Nug imu ele atte. “Danab laa nug hab genab melemel ma, elab amu gane dookku dayeb, o danab nug wannu ukku ohnu keeke hettoɗia, amu oh doya malakku dayeb amu, da Israel dilag eheɗ hak dabmein, Israel buɗub oh geɗadkkul, amge anam iinab bema,” awa atte.

Jeremaia 33:23

Amu Yawe Nug nuhig nai imu Jeremaia mettom.

Jeremaia 33:26

da Jakop buɗub geɗatten, da dahil maɗi nid Dawit buɗub laa nug Abraham, Aisak, amu Jakop ele buɗulkad gumadkkunu ele ii tituanpa. Amge anam iitta. Da nai amu qakkami, ɗo ele amu memi amunu, da gumadkkunu tituankkul. Aɗinu da amu hekkul? Da Israel, Juda ele dilah danab ah dilag ool gai-iitta doye, ool matten ehanadppi, ag eɗun, wan imuppa uɗin, enaib daaglag.”

Jeremaia 51:5

Aɗinu Babilon anam nena qena nauhkkulag? Kayak, Nug Yawe Nukka Ɠagattag Oh Ele, Israel dilag Kayak, Nug Israel, Juda ele uuata auta autanab ii awom. Laa amu, Babilon danab ah ag hipunin heegeg, Kayak, Nug Israel dilag Kayak Oppiaawak Ele, Nug nuhig neekkakppa ag beɗulagppa aab ambak daatte.

Esekiel 36:20

Ag wanppan wan laalappa gona daaegeg, appan danab ah ag anadna, ‘Imuam Yawenu danab ah, amge kekeɗ ag eɗadna hena, ⌊Yawe ehanadkkunu elele iitta amunu,⌋ kekeɗ ag diin, wan laalappa, Yawenu wan iittappa, maatteg daatteb,’ appig amunu, amuppa Israel ag heeg, da onil oppiaawak ele laa dilag neekkakppa hamu bia dayom, gemu ele daatte.

Esekiel 37:11

Aria, ebehilkad oh ag anam bau bena daaegeg, Yawe da amelppa aum. “Danab bekka, Israel danab ah ag am ebehilkad imubia daatteb. Israel ag atteb, ‘Ig ebehinkad am qaɗaiedappig. Ig ena daagnignu dabmak aɗa oiyaknu ib laa iitta. Ig neta qeta auta aomut.’

Sam 83:5

Ag amu hekkulagnu amu, ag oh oɗelag ooho, ag amu hekkulagnu atteb. Ao, ag nahip-ppa amu hekkulagnu nai ana qagappig.

Jeremaia 31:36

“Da aamnu nai bappaidmi, kalam, hoɗopai ele dilag nai bappaidmi, yunu nai ele bappaidmi; amu keeke amu ohnu ɗo nai mattien ɗo amu memi, ɗo amu iitta mekkulag dayeb, Israel ag da noolppa huu daatteb bia ii daamna. Amge anam iinab bema,” awa atte.