Jeremaia 32:8 - Nobonob Baibel

⁸ Yawe Nug da amelppa Hanamelnu aum amu, anamnab da amal nakok Hanamel nug uɗia, da daup king gumappig laulagnu haɗap-ppa daamippa ba, nug da amelppa aum. “Dahil wan maha laa Benyamin wanppa, Anatot guguittak daatte amu, na ihinig ɗoppa wan amu laa eppegppa dayaknu qagaiettakppanu eɗua uhuqak hekkutnu daattem amunu, laa ag daden memananu, wan amu nahip daakkunu na daden me!” awa aum. Nug anam aum, da amu bekkunu tatam Yawe oɗeppa doomi amunu,

Jeremaia 32:8 Referans Kwoze

Jeremaia 32:7

‘Jeremaia na mamen nakok Salum bekka Hanamel, nug uɗia, na amenppa inam akku. “⌊Uug nau dahilppa be, da men doɗonu tutunab daattem amunu,⌋ da wan maha laa Anatot guguittak meppi, laa daden mekkunu hettem. Na da ele ii tiinih laippunab. Da anam na bia laa iitta. Na da ele ii tiinih laippunab amunu, ihinig ɗoppa na wan amu daden mekkutnu elele daattem, amge amu aakkuib iitta. Ihinig ɗoppa laa daden meeb, wan amu laa eppelagppa daamanu, na wan amu daden mekkutoitte,” ’ ” awa akku.

Jeremaia 32:2

Haen nug Jeremaia amegppa amunu aum amu, Babilon dilag king, amu nuhikkud daup ele ag Jerusalem oo mattan, aqaglagnu maadna daaegeg, propet Jeremaia nug King Sedekaia oɗeppan nai bia, nug Juda dilag daup king gumappig ele laulag, lag amuam Juda dilag kingnu lag enanagnab guguittak, nug lag amunu haɗap-ppa maniguittak dayom.

Jeremaia 33:1

Amu Sedekaia nug he, Jeremaia nug daup king gumappig laulagnu haɗap-ppa maniguittak dayeye, tatam Yawe Nug nuhig nai laa Jeremaia mettowa, amu dimppa Yawe Nug baula nai Jeremaia medatta, Nug nuhig nai imu Jeremaia mettom.

1 King 22:25

Sedekaia nug anam a, Mikaia nug nob ma aum. “Qinob, uug naunab beeb, na lag ooppa uma lokkumak daakkutnu wana daanna, na oɗmak nahipnu nob aakku dookkut,” awa aum.

Jon 4:53

Aeg amu nug aam ameg amuppanab Jesus Nug, nug bekkanu amegppa aum doyom amunu, nug nuhikkudppa ele ag oh oolagppa genab dooppig.

Sekaraia 11:11

Amuppa da nug tituana nai qakkak ag ele hemut amu deɗ amuppa aakku hei, iitta meum. Amu laa ag laa eppelagppa eheɗ nau aoppig, amge ag dahilnu, “Nug ehanikkeb, ena daagnignu hette,” oolagppa genab dooppig ele amu, ag da heminu, “Yawe Nug danab amunu hakppa keeke ippunigtte,” dooppig.

1 Stori 6:60

Israel danab ag Kohat buɗub ⌊Juda, Simeon ele wanppanu⌋ aab amu mattaeg, ag Israel dilag huu okkai Benyamin wanppanu aab imu madappig: Gibeon, Geba, Alemet, Anatot ele. Aab amu oh am gikkiɗah dad okkai aab am talilittak daatteb ele madappig. Aria, Israel ag aab ikki Kohat danab Juda, Simeon, Benyamin ele wanppanu aab madappig amu, aab amu ebqak am 13.

1 King 2:26

Am Solomon nug mana mettak danab Abiatar amegppa inam aum. “Na eɗun, Anatot appa gona, na nahip wanppa daye! Na nahip eheɗ hak amunu amu, na mauhkkutnu elele, amge gemu da na ii nidappi mauhmana. Aɗinu? Na anukka na da mamel Dawit ele daayya, na nuhignu Naɗi Yawenu Tituanak Nainu Kunup maome. Laa ele amu, haen Dawit nug uug laala maottom amu, na nug ele daayya, na ele eheɗ hak amunu uug mawadttame,” awa aum.

Jeremaia 1:1

Buk imuppa propet Jeremaia nug nai laala aum amu, nai amuam buk imuppa yaak daatte. Jeremaia nug mana mettak danab laa. Nug mameg onig am Hilkaia. Hilkaia, mana mettak danab laala ele, ag appalag diig onig am Anatot. Anatot am Benyamin wanppa daatte.

Jeremaia 32:25

Anam amu, na ame bia na heppe, Babilon ag aab okkai imu ag eɗidna aoppeg, ag eppelagppa daakku. Anam daakku, amge O Naɗi Yawe, na da amelppa, ‘Wan maha laa silwappa daden mewona heppe, laa amunu hak pepappa yaak anidna, ag onilag ele yeeg!’ ame amu ⌊da amunu diig tutukku ii doottem⌋.” Da Jeremaia, da unuqitten anam ami.

Jeremaia 37:12

Jeremaia nug Benyamin wanppa ukka, nuhig aab ikkinu wan ooppa wan laa nuhig daakkunu dayom, nug amu aokkun gokkunu dabma aha, Jerusalem uua gokkunu ukkom.

Esekiel 12:7

Yawe Nug anam da amelppa anam haknunab aum amunu, da aakku amu hemi. Amunppa da keeke laib laib, danab nug wan laappa diia ukka laih me dayak danab daakkunu awa gokku amu, da keeke amu battamppa inen, dimittim awe doi, tueb me, da aɗ eppelppa buue, gatatu neene da keeke gukkalppa mein, laa ag aniɗegeg, da ⌊ippu hak hein⌋ gomi.