Jeremaia 31:34 - Nobonob Baibel

³⁴ Amu da heppi, ig nug tituana nai qakkak amu heta malota amu, danab laa nug layagtai, o awagtai, o amagtai baula amegppa, ‘Na Yawe doye!’ ii ama. Iitta. Ag anam ii amananu diig am, ag ohnab, danab onig iitta, danab onig okkai ele, ag oh da dooiɗna oiglag amunu, ag laa nug laa amegppa, ‘Na Yawe doye!’ akkunu ii hema. Aɗinu? Da ahilag nau hak uhuqen madakkul. Yo, da ahilag hipunin daul atikku.” Yawe Nug anam atte.

Jeremaia 31:34 Referans Kwoze

Aisaia 43:25

⌊Ag hipunin henana, padal mekkulagnu elele,⌋ amge da, da Yawe, da diilnu dabmak anuqak awewe, da ahilag hipunin uhuqen madattem. Da ahilag hipunin uhuqen matten, da daul atie, baula dab-ii-mettem.

Hibru 8:12

Aɗinu? Da ahilag nau hak uhuqen madakkul. Yo, da ahilag hipunin daul atikku.” Naɗi Nug nai amu mattiom.

1 Jon 2:27

Amge ag Kristus eppegppanu Kayak Ouɗi aoppig, ag oolagppa ele daatte amunu, auntai laa nug ag keeke laa ippunadkkununab ii daatte. Aɗinu? Kayak Ouɗi, Nug keeke ohnu diig tutukku ippunadtte, Nug am genabib ippunadtte, Nug hambuppuak laa ii ippunadtte amunu, Nug ag ippunadtte amu, ag amu dim lamidna, Kristus ele laippu dayeg!

Aisaia 54:13

Danab ah oh Jerusalem daatteb, Juda laa oh ele amu, Yawe Nug ib tutukku ippuanatteb, ag maɗoɗnab daaglag.

Jeremaia 33:8

Da Israel danab ah, Juda danab ah ele ag dahilppa hipunin heppig amu, da hipunin amu oppien madakkul. Ge, Israel danab ah, Juda danab ah ele ag dahil nai tappaeg neene, dahilppa hipunin heppig amu, da hipunin amu oh uhuqen madakkul.

Jeremaia 50:20

Yawe Nug atte. “Haen amuppa laa ag Israel danab ah ag hipunin atten atten heppig ele, ag hipunin amu eɗun anidna dabmekkulagnu mattiglag, amge ag ii anidmana. Ao, laa ag Juda danab ah ag hipunin atten atten heppig ele, ag hipunin amu eɗun anidna dabmekkulagnu mattiglag, amge ag ii anidmana. Aɗinu? Da Yawe, da heppi, Israel danab ah oɗo yaak daaglag. Ag anam daappeg, da amu dilag hipunin uhuqadkkul,” awa atte.

Jon 6:45

Propet dilag yaakppa, nai inam niitte. ‘Danab ah oh am Kayak nukka nuhig kobol ippunadkku.’ Aria aun aɗi Nug ag ehanatta ippuanatte, ag Mame oɗe doona, nuhig kobol aona amu, ag dahilppa dotteb.

1 Jon 2:20

Anam, amge dahilad, ag Kayak Ouɗi aoppig amunu, ag oh aakku keeke doyak diig genabibppanu bette dootteb.

Jon 17:3

Bauklel hanhannu, amuam danab ag na Kayak, na nakkaib am Kayak genab, amu da, na bekkat, na da meiɗe uɗimi amu, ag i oh dooitkkulagnu daatte.

Maika 7:18

O Yawe, aun am Kayak na bia laa daatte? Kayak aun laa nug nuhikkudnab oɗo yaak danab ah dilag hipunin uhuqa madatte; eheɗ hak ahilkad ele uhuqa madatte? Na haen oh oo nauhak nahip ii aɗattem. Iitta. Na oot gai-iitta doon oot mattan ehanadkkutnu enanagnab doottem.

Jeremaia 24:7

Da heppi, ag da Yawe, ag da dooiɗkkulagnu, ag oolag okkai daakku. Ag oolag eɗueb, ag meulag ohppa dahilnu daaglagnu oolag daakku amunu, ag dahilad danab ah daaglag, da ahilag Kayak daakkul.

1 Jon 5:20

Ao ig ele doottem, Kayak Bekka Nug uɗia, ig Mame genab, Nug doognignu diignu doyak tutukku mekkom. Amu laa, Kayak Nug am genab diig, amu ig nuhigppa daattem, amu ig Nug Bekka Jesus Kristus, nuhigppa ele daattem. Kayak Nug am Kayak genab, Nug bauklel hanhannu diig ele.

Aposel 10:43

Nuhignuib propet ag inam yaappig. ‘Aun aɗi ag Jesusnu oolagppa genab dootteb ele amu, Kayak Nug, Nug onigppa, hipunin ahilag uhuqa madakku.’ ” Pita nug anam aum.

Habakuk 2:14

Aɗinu? Le yuppa ambak daatte, amubia wan atu ohppan danab ah ag Yawenu binag amahlak oppiaawak ele anidna dooglag.

Aisaia 44:22

Ag hipunin heppig, amge da hei, ulah lombig ye ukka ii daatte, amubia da ahilag hipunin oppii ii daatteb. Ao, ag hipunin heppig, amge aam he, buttuanu buttuɗai iitta mette, amubia da uhuqen mattai, hipunin ahilag ii daatteb. Da ag hipuninnu qagaiettakppanu eɗua uhuqak hein mattami amunu, ag dahilppa eɗun uɗieg!” Yawe Nug anam atte.

Hibru 5:12

Ag ippunittak danab bena daaglagnu haen elelenab dayom amge iitta, ag doyak ahilag qakub amunu, laa nug ag Kayak nainu diig eɗua ippuanatteb aoglagnu daatteb. Ag am ee ɠagattag lakkulagnu elele iitta, ag huhib lanana daaglagnu elele.

1 Tesalonaika 4:9

Amge layagnu oo mauhak kobolnu amu, da nai laa yaakkulnu uɗat laa ii daatte. Keeke amunu amu, Kayak Nug ag ippuanatta malom.

Epesus 1:7

Kayak Nug nuhig doyak dabmak ena ele oh, nuhig diignu doyak tutukku oh eleppa Nug dabmekka, Nug nuhig ehanittak okkai hamu mettak naɗinab megakka, Nug Jesus Kristus tiigppa Nug ig hipuninnu qagaiettakppanu eɗua uhuqak ha mekka, ⌊amuppanu laih amu⌋ ig hipuninnu uhuqak aomut.

Aisaia 11:9

Le yuppa ambeum, amubia danab ah huu ohnu, wan ohppa ag Yawenu dabmak amu aoppeg, ahilagppa ambekku. Anam daakku amunu, Yawenu qauko, qauko amuam Yawenu tituanak daatte, ⌊am qauko Sion aakku⌋ qauko amuppa ⌊wan ohppa ele⌋ laippu laa nug laa heeb ii nauhma; o keeke laa heeb ii nauhma, iitta!

2 Korint 2:10

Ag danab laanu hipunin uhuqna medatteb dayeb, aria da ele hipunin amu uhuqen medattem. Amu hipunin laa da uhuqen medakkulnu dayomtai o iitta ii dayomtai, amge anam dayom dayeb, da uhuqen mettami ele amu, da ahilagnu dabmak anuqak awen, Satan nug ig bubuikka eɗigmanu, da Kristus noobppa hipunin amu uhuqen mettami. Satan nug ig ib digdigppa ig eɗigkkunu hette amu, ig amunu kaaka ii daattem.

Matyu 11:27

Jesus Nug anam ana, Nug baula tuɗitta aum. “Da Mamel Nug keeke oh da eppelppa meum. Amu danab laippu laa nug Kayak Bekka ii dootte. Kayak Nug nukkaib Nug dootte. Ele amu, danab laippu laa nug da Mamel ii dootte. Iitta. Da, Kayak Bekka, da aakkuib Nug doottem, amu danab, da ag da Mamel ippunadttem ele, ag Nug dootteb,” awa aum.

Aisaia 33:24

Haen amuppa danab ah Sion daatteb, ag oolagppanu laa nug, “Da oɗe ele,” ii ama. Danab ah appa daatteb ele amu, Yawe Nug ahilag hipunin uhuqa madakku.

Aisaia 30:26

Qinob, haen amuppa Yawe Nug nuhikkud danab ah Nug eppegppa guittak aoppig ele oh ihilag ita heeb, ihilag oh qaɗaiedakku. Nug anam heebeb, kalamnu amahlak, am aamnu amahlak bia dayebeb, aamnu amahlak gemu amahlak laippu daatte, haen amuppa nuhig amahlak am amahlak eblaih aɗit bia daakku. Deɗ eblaih aɗitnu amahlak deɗ laippuppa haen amuppa daakku.

1 Stori 28:9

Amu Solomon da bekkal, da na amenppa attem. Yawe Nug danab dilag dabmak unuqagppa daatte mattia anidtte, Nug danab nug diig aɗinunab keeke hette ele dootte amunu, na, na mamenad dilag Kayak, Nugib am Kayak dabmena doon, na meut ohppa, nahip dabmak ohppa ele Nug waappa daan, Nug oɗe dim lamitte! Na Yawe anidna dim lamidkkutnu Nug madikkut dayeb, Nug heeb, na Nug anidkkut. Amge na Nug dimettan, uuidkkut dayeb amu, Nug ele na geɗitteb, na anam daappe ukkeb, gogppa teeb batakkut.

1 Samuel 2:12

Elkana, Hana ele aa goya aabppa daaeheh, Samuel nug Eli ele Silo appa daapiɗ. Aa anam daaeheh, Eli bekoɗ, aa onilah am Hopni, Pinias ele, aa mana mettak uɗat hepiɗ, amge aa am danab nau; aa Yawenu, “Nug am keeke hamu,” doopiɗ.

Jon 17:6

Mame, da wan imuppan danab ah oolagppanu danab na meɗame amu, da ag amelagppa na diitnu mehuqi dooppig. Ag am nahipad, na da meɗame, amu ag nahip nai dim lamidtteb.

Hibru 8:11

Amu da heppi, ig nug tituana nai qakkak amu heta malota, danab laa nug layagtai, o awagtai, o amagtai baula amegppa, ‘Na Naɗi doye!’ ii ama. Iitta. Ag anam ii amananu diig am, ag ohnab, danab onig iitta, danab onig okkai ele, ag oh da dooiɗna oiglag amunu, ag laa nug laa amegppa, ‘Na Naɗi doye!’ akkunu ii hema.

Aisaia 38:17

Am genab, da ehaniɗkkutnu na uug naunab dahilppa bekkunu ib oo ii neme. Na dahilnu oot mauhe, na dahil hipunin oh uhuqna meɗe, iitta mena, da beɗulppa iinab daatteb amunu, na ehaniɗe, da padal ii memi.

Jeremaia 32:40

Da heppi, da ag ele ig nug tituana nai qakkak hekkunig amu, nai qakkak amuam hanhan alet daakku. Nai amuppa da hanhan enaib hadakkul; da kobol amu ii tuqe aopa. Ag da dimeɗan, kayak laa dim lamidmananu da heppi, ag dahilnu ebehilag oh bodoetta le mekku.

Hosea 2:20

amu oo metta ii uuak kobol ele dim lamatten atognoadppi, ag dahilad daanna, ag dahilnu, ‘Nug am Yawe,’ dooiɗkkulag,” awa atte.

Sam 25:7

Da nid bau dayeye hipunin qein, nai tappe nak kobol ele dim lamidmi amu, na amu oh uhuqna meɗan, dab-ii-mekkutnu oɗ medattem. O Yawe, na enaib daanna, enaib hettem, amunu, na oo mauhaknab kobol nahip dim lamidna, dahilnu ena hekkutnu unuqidttem.

Aisaia 29:24

Laa ag dabmak tutukku iitta ele ag diignu doyak tutukku aoglag. Amu laa ag dahil nai dim lamidkkulagnu uug doon nai heppig amu, ag da oɗel aon, dim lamidkkulag.” Yawe Nug anam atte.

Aisaia 33:6

Nugib ig ena daagnignu ukkunab daatte. Doyak dabmak ena ele, doyak, amu padal mematanu ehanittak ele Nug eppegppa huanak, ig aognignu daatte. Danab nug amu aokkun amu, nug Yawenu ebehi oh bodoetta le meeb oiyaɗ! Nug amu hekku amu, nug amu oh aokku.

Aisaia 52:6

Anam amunu da heppi, danab ah dahilad ag ⌊oolag eɗueb, ag da dim lamiɗna,⌋ da onil doon, ⌊ɠagattag daappeg, wanppan danab oh ag amu anidkkulag⌋. Ao, anam amunu da heppi, danab ah dahilad ag ⌊oolag eɗueb, ag da dim lamiɗna,⌋ ag daib, ‘Da iikku daattem,’ attem doon, ag ⌊ɠagattag daappeg, wanppan danab oh ag amu anidkkulag⌋,” awa atte. Yawe Nug anam awa atte.

Jeremaia 9:23

Amu Yawe Nug atte. “Danab nug doyak dabmak ena ele, nug doyak dabmak ena ele amunu dabmaama, nug nukka nug onig aib humom. Danab nug beɗuppa ɠagattag ele, nug ɠagattag amunu dabmaama, nug nukka nug onig aib humom. Danab nug enub okkai ele, nug en amunu dabmaama, nug nukka nug onig aib humom.

Maika 7:19

Na am Kayak anam amunu, na baula ihinignu oot bodoetta, le mekku. Na ihinig hipunin tabappe nekkulag. Ao, na eheɗ hak ihinkad buɗiadppe, yu gamag unuqagnab ele, appa nokkulag.