Jeremaia 29:8 - Nobonob Baibel

⁸ Ao, Yawe Nukka Ɠagattag Oh Ele, Israel dilag Kayak, Nug inam atte. “Ag oolagppan laa ag, ‘Da am Kayaknu propet,’ hambuppuna atteb, o laa ag eman danab daatteb amu, ag ag hambuppualadmananu dabmeig! Ag ahilag nainu oolagppa genab aib dooppig. Amu ag akka, ag tul niitteb amu, ag ahilag tul niiaknu ele aib dabmeppig.

Jeremaia 29:8 Referans Kwoze

Epesus 5:6

Laa nug nai hamu mattiakppa ag eeɗatteb, kobol nau oh amuppa nomananu dabmeig! Aɗinu? Kayaknu oppoɗi bak uɗitte ele am danab oh ag Kayaknu ɗo tappaeg nette ele, ahilagppa daakku

Jeremaia 5:31

Kobol naunab nau ag hetteb am inam. Propet danab ag doonna, propet nai hambuppuak maditteb. Mana mettak danab ag akka, ahilag dabmak dim lamidna, danab ah gumadtteb. Propet, mana mettak danab ele ag anam aakku hetteb, amge dahilad danab ah ag kobol amunu oolag mauhtte. Anam, amge ib amu batakppa ag attem anidkkulag?” awa atte.

2 Timoti 3:13

Amge danab nau, hambuppuak aɗi ele, ag kobol nau henana, tuɗidna naunab henana, ag laa hambuppualattegeg, laa amu ag ele ag hambuppualadkkulag.

Jeremaia 28:15

Amu propet Jeremaia nug Yawenu nai Hanania amegppa anam ana, nug tuɗitta, propet hambuppuak Hanania amegppa imu ele aum. “Hanania, na nai doye! Yawe Nug na ii meitte uɗime, amge na hee, Juda danab ah ag nai hambuppuak na mattime ele, ag nai amunu oolagppa genab doon oitteb.

Jeremaia 27:9

Yawe Nug anam anana, Nug imu ele atte. “Da Yawe, da ag ahilkad okkai amelagppa akkulagnu imu ele attem. ‘Anam bekku amunu, ag ahilkad propet, ahilkad eman danab, danab ahilkad ag tul niiakppan meu heeg miag atitte, ahilkad mauhak ele gamag danab, amu ahilkad emaɗ hak danab ele dilag nai aib dabmeppig. Ag anen anen, ag amelagppa, “Na Babilon dilag king waappa maɗi nid ii daan, nuhig uɗat ii hemana,” aon atteb amge, ag ahilag nai amu aib dooppig; aib dabmeppig.

Jeremaia 14:14

Da ai, Yawe Nug nob ma, da amelppa aum. “Propet amu da onil diin, ag dimppa aɗi bekkunu nai hambuppuak maditteb. Da ii maatti uɗippig. Da ag amelagppa nai laa ii mattimi. Da danab amu propet daaglagnu ii tituanadmi. Propet amu ag tuleglegppa keeke anidna, aeg dootteb, amge keeke ag tuleglegppa anidtteb ele am genab iitta. Ag eman kobol meu iittappa keeke doon, aeg dootteb, amge ag aɗi keeke ib amuppa dootteb am keeke genab iitta. Ag akka, ahilag dabmakppa keeke hambuppuak dabmetteb, amge keeke ag dabmetteb ele am genab iitta,” awa aum.

Revelesen 19:20

Anam amge, laa ⌊hos hakkab attan dayom⌋ nug doɗ dakkuɗ aɗa, propet hambuppuak ele aɗom. Propet amu nug doɗ dakkuɗ ehanidkkunu epponak keeke kuɗum danab haknu elele iitta heum. Kobol amuppa nug danab oh, ag doɗ dakkuɗnu epponak keeke aoppig, ag ele doɗ dakkuɗ dottog noobppa dup nona binag meppig amu, nug ag hambuppualattom. Amunu doɗ dakkuɗ nug propet hambuppuak ele aa bau daaeheh, laa ⌊hos hakkab attan dayom ele,⌋ nug aa aɗalata, aab ameg kalu laa huana eotte onig salpa eotteppa buɗiate nopiɗ.

Revelesen 13:14

Kayak nug doɗ dakkuɗ geha ahom ele amu, Nug nuhig ib oo ii neum amunu, nug uɗat digdig amu, amuppa doɗ dakkuɗ tatamnu amu ehanitta heum. Amu kobol amuppa wanppanu danab ah hambuppualattom. Nug danab amelagppa inam aum. “Ag doɗ dakkuɗ anukka qep elabppa yaak awom, amge ii mauhom, nug bau dayom, ag nug dottog hoina, binag meig!” awa aum.

2 Tesalonaika 2:3

Ag heppeg, laippu laa nug ib laalappa aib buppualattom. Deɗ amu tatam iinab uɗima. Tatam Kayak dimettak kobol okkai beeb amu, ɗo ii dim lamittak danab, danab amu nug padal mekku ele amu, nug ele miag atikku.

Rom 16:18

Danab amu ag ihinig Naɗi Kristus waappa daan nuhig uɗat ii hetteb. Iitta. Ag am beɗulagnu dabmak nau amuib dim lamidtteb. Amu oo eeɗaknu nai ittag ele, ag amuppa danab ag kobol atten am ena, kobol atten am nau ii dootteb ele amu, ag buppualadtteb.

Luk 21:8

Ag anam aeg, Jesus Nug aum. “Laa ag hambuppualadmanu, ag dabmeig! Aɗinu? Danab kuɗum ag da onilppa uɗin, ‘Da am Kristus,’ ana, ‘Haen miag aakku doum,’ ele aon akkulag, amge ag ahan, ag aib dim lamadna goppig.

Luk 6:26

O gadonnab gadon ag danab ag gemu daaegeg, danab ah laa oh ag ag binalag metteb. Ag dabmeig! Aɗinu? Anukka ag alalkad ag anamib propet hambuppuak dilagppa heppig.

Matyu 24:24

Aɗinu? Geha danab laa ag hambuppuna, ‘Da am Kristus,’ o ‘Da am propet,’ akkulag. Ag anam anana, ag epponak keeke danab haknu elele iitta okkainab, amu kobol danab haknu elele iitta laala ele hekkulag. Ag amuppa Kayak danab ah, nuhikkud tituanattom ele, ag agnab hambuppualadkkulagnu hekkulag, amge elele iitta.

Sekaraia 13:4

Haen amuppa danab nug, ‘Da propet, da tulegleg laa anidmi’ akkunu uɗanak dookku. Danab laippu laa nug danab ah buppualattebeb, ag nuhignu, nug am propet, dabmekkulagnu nug propet dilag lamen ii takkama.

Maika 2:11

Propet danab nau laa, nug hambuppuak danab nug uɗia, ‘Da dimppa aɗi bekkunu nai ainne, ag le ɠagattag aon lanan, oo gamag ahakib dooglagnu ippu ippunadppi doon dim lamidkkulagnu uɗie hettem,’ akku dayeb amu, nug am propet danab ahilagnu elelenab.” Yawe Nug anam atte.

Jeremaia 23:21

Da ii propet amu maatti ahappig, amge ag ahilag nai huanak madippig. Da ag amelagppa nai laa ii mattimi, amge ag ahan, dimppa aɗi bekkunu nai hambuppuak madippig.

Epesus 4:14

Amu nai ittag, hambuppuak danab dilag, amu ele heeb, ig uub nug ulah kaɗag haenppa duban he, ukka qa, uɗia qa hette amubia ii hemata. Nid nakok ag amubia hetteb amu ig baula, ag bia ii daamta.

Jeremaia 23:27

Ag mamelkad aɗi ag kayak hambuppuak Bal dim lamidkkulag hena, da dim lamiɗak uuppig, amubia propet hambuppuak ag tul niiak anidtteb ele, ag amunu mattiegeg, laa dootteb amu, ag ib amuppa dahilad danab ah ag dahilnu daulag atikkunu oolag yaaglagnu hetteb.

1 Jon 4:1

O gamalad, propet hambuppuak kuɗum ag ihinigppanu qatin gona wan imuppa oitteb amunu, ag danab ag, “Da Kayak Ouɗi oɗe awen madittem,” atteb ele, ag amu oh dilag nai oolagppa genab aib dooppig. Iitta. Ag nai dootteb ele ag ouɗi aun laa nai maditteb ele ehanatte, ag nai maditteb, ag amu pehettan epeɗin, aun nug Kayak Ouɗippa nai maditte anidna, ahilag naiib ag oolagppa genab doyeg!

Jeremaia 23:25

Propet ag da onilppa propet nai hambuppuak maditteb ele amu, da ahilag nai doomi. Ag atteb. ‘Da tul laa niimi! Da tul laa niimi! ⌊Tul niiak amuppa da Yawenu nai aomi,⌋’ aon atteb.

Jeremaia 29:1

Nebukatnesar nug tatam uɗia, ban ha, Juda eɗatta, nug Juda dilag King Jehoiakin, Jehoiakin anig, Jehoiakinnu ehanittak anuqak danab, Juda dilag ikki danab, laa Jerusalemnu, laa Juda wanppa laih laihnu amu, danab uɗat laala haknu doyak okkai ele diie, aon ukkaeg, Babilon wanppa maatte, ag appa diia ukka laih me dayak danab ah daappig. Nebukatnesar anam he, ag anam appa digmena daappig. Ag Babilon appa digmena daaegeg, haen amu dimppa Jeremaia, nug Jerusalem appa dayaya, nug pas laa Babilon daappig dilagnu ya, me ukkom. Nug danab ah Babilon wanppa diia ukka laih me dayak danab ah daappig oolagppa danab okkai kaino ii mauhppig, mana mettak danab, propet danab, amu danab ah laa oh ele dilagnu yom. Nug ya, Juda dilag king Sedekaia nug Sapan bekka Eleasa, amu Hilkaia bekka Gemaria ele nai laa aoya, Babilon dilag king Nebukatnesar mettaglahnu maate gopiɗ amunu, Jeremaia nug pas nug yom, nug pas amu ele aa eppelahppa meeb, aa aoya goya danab ag appa daappig mattaglahnu aa matom. Pas amuppa amu nai inam dayom.

Jeremaia 29:21

Yawe Nukka Ɠagattag Oh Ele, Israel dilag Kayak, Nug Kolaia bekka Ahap, am Masea bekka Sedekaia ele, aa am ahilti propet aɗit, aa hambuppuya, aa Yawe keeke laa ippuanatom attep, amge Nug ii ippuanatom. Aa dimppa aɗi bekkunu nai hambuppuak amu madittep, amge aa mattieheh, Yawe Nug danab aɗit amu dilahnu aɗi atte amu, ag Babilon appa diia ukka laih me dayak danab ah daatteb, ag doyeg! Nug atte. “Da heppi, aa Babilon dilag king Nebukatnesar eppegppa daapeɗ, ag laa ag neegna daappeppeg, Nebukatnesar nug heeb, aa mauhkkulah.

Jeremaia 37:9

Yawe Nug anam anana, Nug imu ele atte. “Ag agakka hambuppualadmananu, ag, ‘Babilon ag genab hamu uuigna gokkulag,’ aib anam dabmeppig. Aɗinu? Babilon ag anam iinab hemana.

Gayak Nai 2:14

Ag Israel, ahilag propet ag tulegleg laala anidppig, amge tulegleg amuam hambuppuak; laa ehanidkkunu elele iitta. Ao, ag Juda danab ah ag hipunin henana, ag bu okkai aoglagnu aakku oippig, amge propet ag, ag Juda bu amu, amuam wan laappa diia ukka laih me dayak danab ah daaglagnu, ag bu amu ii aomnanu ippu ii ippunadppig. Nai ag madappig ele amu; nai amuam nai hambuppuak. Nai amuam ag omalatte, ag ib apiɗidna, eheɗ goppig.

Esekiel 13:6

Israel danab ah, ahilag propet hambuppuak ag tulegleg anidna, “Yawe mekkom,” atteb, amge amuam genab iitta; am tulegleg hambuppuak. Ao, ag eman hak ahilagppanu, “Imuam Yawenu nai,” atteb, amge amuam genab iitta; am emannu hambuppuak nai. Ag, “Yawe Nug inam atte,” atteb, amge da ag amu akkulagnu ii ami. Ag amu hetteb, amge ag hambuppun, “Ihinig nai am meu okku,” atteb.

Jeremaia 23:16

Amu Yawe Nukka Ɠagattag Oh Ele, Nug imu Juda danab ah dilagnu atte. “Ag propet ⌊hambuppuak⌋ dilag nai, propet ag nai amu maditteb amu, ag nai amu aib dooppig; aib dabmeppig. Propet amu ag heegeg, ag Juda danab ah ag, ‘Ig aakku ena daagnig,’ anan oitteb, amge iitta. Ag ena ii daamna,” awa atte. Propet amu ag akka ag dabmak ahilagppa keeke henan anidtteb, ag Yawe oɗeppanu nai laa aon, nai amu ii maditteb.

Jeremaia 29:15

Ag Babilon appa diia ukka laih me dayak danab ah daatteb, ag, “Yawe Nug he, propet ig oonigppa daan, ihinignu kobol ena bekkunu atteb amunu anam bekku,” akkulag.