Jeremaia 29:18 - Nobonob Baibel

¹⁸ Da heppi, kekeɗ ag qep elabppa aqappeg, enug aqeebeb, oɗe nau danab kuɗum aqe mauhtteb ele aqeebeb, wan atu laa ohppan danab ah ag ahilagnu naunab doon, guguattak daaglagnu uun autnanab aoglag. Amu da heppi, gemu Juda daatteb ag wan laalappa diia ukka laih me dayak danab ah daaglag amu, wan amuppan danab ah ag ag eheɗ laa aoglagnu anak waappa daaglagnu anana, ag anadna, amelag iɗuak doon, ag ahilagnu, ‘Keeke hamunab,’ dooglag.

Jeremaia 29:18 Referans Kwoze

Jeremaia 42:18

Aɗinu anam daakku? Am Yawe Nukka Ɠagattag Oh Ele, Israel dilag Kayak, Nug atte. ‘Da ool nauhe, oppoɗil beebe, Jerusalem danab ah bu eheɗ mattami, amubia ag laa, ag Isip gona daanna oiglag dayeb, da oppoɗil beeb, bu eheɗ ag madakkul. Danab ah laa ag ahilagnu ag eheɗ laa awaknu anak waappa daaglagnu anana, ag anadna, ameg iɗuak doon, ag naippa yaaladnana, ag aon aon aqaglag. Ag Isip gona daan oiglag, ag baula ahilag wan imu iinab anidmana.’ ” Yawe Nug anam awa atte.

Jeremaia 15:4

Hesekaia bekka Manase, Juda dilag king, nug Jerusalem dayaya, nug kobol eheɗ nau kuɗum heum amunu, da heppi, wan laa ohppan danab ah ag Juda danab ah dilagnu oolagppa uuaknab dooglag.

2 Stori 29:8

Ig mamenkad ag amu heppig amunu, Yawe Nug Juda danab ah, laa Jerusalemnu, laa Juda wanppa laih laihnu amu, Nug amu dilagnu oo huanak nauhe, Nug bu okkai ag mattom. Nug he, danab ah laihnu ag kobol Juda, Jerusalem ele dilagppa beum, ag kobol amu ahilagppa bemanu baɗak okkai doon, ag kobol amu anidna, ag amelag iɗuak doon, ag Juda danab ah dilagnu, ‘Keeke hamunab,’ ele doyegeg uɗie, gemu ele anam dootteb. Ag Lewi buɗub ag, ag Yawe aɗi kobol he beum, ag amu amelagppa aakku anidtteb.

Jeremaia 34:17

Nug anam atte amunu, Yawe Nug ele inam atte. “Ag dahil nai ii dim lamidppig. Ag laa, ag ag ele tiilag laippu, ahilkad maɗi nid daatteb amu, ag uhuqatteg, ag uhuqak aon, hamu ii daatteb. Iitta! Ag ag waalagppa ahilkad maɗi nid daatteb amunu, ag da dahil nai ii dim lamidppig ele, da ag uhuqak laa madakkulnu hettem. Uhuqak amuam ag qep elabppa mauhkkulag. Uhuqak amuam ag oɗe nau danab kuɗum aqe mauhtteb, ag amuppa mauhkkulag. Uhuqak amuam ag enugppa mauhkkulag. Amu da heppi, wan ohppa danab ah ag ahilagnu oolagppa uuaknab dooglag.

Jeremaia 24:9

Da heppi, Juda danab ah amu ag adeppa adeppa matatun gona daaglag amu, wan atu laa ohppan danab ah ag ahilagnu uuaknab dooglag. Ag ahilagnu, “Danab ah nau,” anan oiglag. Ag Juda danab ah dilagnu hamu bia doon, ag ahilagnu ag am nau bekkunu at daatteb dabmena, ag aon aon aqanna, ag eheɗ laa awaknu anak waappa daaglagnu akkulag.

Duteronomi 28:25

Yawe Nug heeb, ahilkad kekeɗ ag eɗadkkulag. Am ag kekeɗ ahilkad, ag ib laippu amuppaib banelag gona, aqaknu ban hekkulag, amge ag ib kuɗumppa ahilag kekeɗ noolagppanu oolna gokkulag! Ahilagnu amu, wan atu ohppan danab ah ag, ag anadna, amelag iɗuak dooglag.

Esekiel 12:15

Da heppi, Israel danab ah ag wanppan wan laalappa daaglag. Ao, da heppi, ag atu digdigppa matatun gona daaglag. Ag anam daan, ag dooglag, da am Yawe.

Jeremaia 25:9

da heppi, Babilon dilag king Nebukatnesar, dahil maɗi nid, nug nuhikkud daup ele, aria, laa oh ag wan imunu laih yawalti uɗitteppanu daatteb ele, ag Nebukatnesar nuhikkud daup ele oh banelag uɗiglag,’ awa atte. Amu Nug atte. ‘Da heppi, ag uɗin, ag wan imu aoglagnu, ag ippan danab ah, wan laala wan imu talilittak daatteb ele amu, ag ele oh ban hekkulag. Da heppi, wan imu, amu wan laala wan imu talilittak daatteb ele, ag dahilnuib, dahil pelemppa daaglag. Ag anam daappeg, wan laappan danab ah ag anidna, ameg iɗuak doon, ahilagnu, “Keeke hamunab,” dooppeg, wan imu, wan amu oh am hanhan padal mak anamib daaglag.

Aisaia 65:15

Ag ahilag hak nau, diig amuppa ag bu eheɗ amu aoppeg, dahilad danab ah ag ag onilag diin, anen anen laa amegppa, ‘Yawe Nug amu dilag bu mattom bia, nahip eheɗ laa awaknu anak waappa dayak am amubia daakkunu ool daatte,’ akkulag.” Yawe Nug anam atte. Amu Naɗi Yawe Nug heeb, ag nau hetteb ag mauhkkulag, amge Nug nuhikkud danab ah onig laa matteb ⌊ag enaib daaglag⌋.

Luk 21:24

Geha laala ag qep elabppa mauhkkulag, am laala, ahilkad kekeɗ ag ag diin gona, wan laa ohnu oolagppa maadppeg daaglag. Amu iitta aɗi ag uɗin, Jerusalem aon daana, uug medappeg ukkeb ukkeb, ahilag haen Kayak tituanom ele maleb malakku.

Sekaraia 7:14

Da hei, ag wanppan wan uma, ulah kilibob he, keeke tamtam laih laih gona daatteb bia daappig. Da hei, ag gona appa daanna, ag aab diig danab iitta wan amuppa daappig. Hak ahilagppa ag heeg, wan ahilag am hele-etta auta autanab awom. Danab ah ag wan amuppa ii oippig. Israel danab ah ag heeg, ahilag wan enanag, ee meu huanak oum ele amu, wan amuam hele-ettak dayom.” Yawe Nug anam atte.

Amos 9:9

Yawe Nug inam ele atte. “⌊Amuam genab bekku.⌋ Aɗinu? Antte! Da haknunab nai ain heppi, ag Israel buɗub ag epeɗiak uug ele wanppan wan laa oh ele laippu aon daaglag. Epeɗiak amuam danab nug ee aeg, menetit ele qagmak laippu daamanu uɗalakppa heehe, men laippunab laa ee aeg daakku abenppa iinab daatte, amubia ag daaglag.

Esekiel 36:19

Da hei, kekeɗ ag uɗin heeg, Israel ag tamtam wan kuɗumppa gona daappig. Da ahilag hak nau, ahilag kobol nau ele anidmi amunu, da bu awak eleleppa bu mattai, ag tamtam wan digdigppa gona daappig.

Esekiel 22:15

Ag eheɗ anam heegeg uɗie, gemu ele hetteb amunu, da bu anam matten heppi, kekeɗ ag uɗin eɗadna hekkulag. Ag heppeg, ag gona wanppan wan laalappa daaglag. Ao, kekeɗ ag heppeg, ag matatun gona, wan laalappa daaglag. Ag anam daappeg amu da heppi, ag hipunin hak gemu hetteb amu, ag anam baula iinab hemana.

Esekiel 6:8

Yawe Nug anam ana, Nug nai tuɗitta aum. “Da heppi, kekeɗ ag anam hekkulag, amge da ele heppi, ag Israel, ag oolagppa laa, ag oɗo yaak danab ah daaglag. Haen amuppa kekeɗ ag heppeg, danab ah amu ag wanppan wan laalappa tamtam gona daaglag, amge ag qep elabppa ii mauhmana.

Jeremaia 29:22

Danab aɗit amu aa Israel oolagppa eheɗ nau hepiɗ, gemu ele hettep amu, da doottem. Da anat-ttem. Aa mudippan lailti dilag ah ele ewau pakkua gappai heya, aa hambuppuak nai da ii matami, da aa mattiglahnu ii ami amu, aa nai amu mattiya, da ippuanatmi attep amunu, aa eheɗ hak ahilah, diig amunu qinob aa nob naunab aopeɗ, Juda danab ah oh ag Babilon wanppa diia ukka laih me dayak danab ah daatteb, ag laanu nug eheɗ laa awaknu anak waappa daakkunu akkulagnu hekkulag amu, ag inam akkulag. ‘Babilon dilag king nug Sedekaia, amu Ahap ele aab aɗuppa manate mauhpiɗ, amubia Yawe Nug heeb, nahip-ppa baɗ!’ aon akkulag.” Yawe Nug anam awa atte.

Jeremaia 26:6

da heppi, lag dahil imu nauhakib daakku; anukka da hei, aab Silo nauhom, amubia nauhak daakku. Da amu heppi, wan atu ohppan danab ah ag aab okkai Jerusalem onig aon, eheɗ laa awaknu anak waappa dayaknu nai ahilagppa mekkulag,” awa atte.’ ” Yawe Nug Jeremaia anam akkunu aum.

Jeremaia 19:8

Da heppi, aab okkai imuam nauhakib dayebeb, danab ah laa ag aab imuppan danab ah dilagnu, ‘Keeke hamunab,’ dooglag. Ge, aun aɗi ag aab imu guguittak oinna, ag aab okkai imu eheɗ nau awom anidna, ag dabmak huanak aona, ag aab imunu danab ah aon aon aqaglag.

Sam 44:11

Na hee, ig am sipsip danab aqadkkunu gotteb bia daattem. Ao, na ig huu okkai laala oolagppa tamtam daagnignu heme.

Duteronomi 28:64

Yawe Nug ag wan imuppanu maatteb gona, tamtam wanppan wan ohppa daaglag amunu, ag baula wan imuppa ii daamna. Appa ag danab laihnu dilag kayak menppa, adppa ele hadappig amu; ag amu, ag mamelkad aɗi ele ii dooppig ele amu, ag amu noolagppa dup noa binag mak kobol hekkulag.

Lewitikas 26:33

Da heppi, ag tamtam gona, wanppan wan anen anen, amu oolagppa ag daappeg, da heppi, danab ag banelag uɗin, ban heppeg ukkeb ukkeb aqaglag. Ahilag wan am nauhaknab dayeb, aab okkai ahilkad loppaɗe nak daaglag.

Namba 5:27

Lab, ah nug gamunu oo metta ii uuak kobol ii dim lamitte, gamu eleib ii niiya, nug danab laa ele gappai aopiɗ dayeb, nug anam heum dayeb, aakku nug ooppa dubuttid teum daatte, amu le ninig ele am he, ah nug eheɗ laa awaknu anak waappa daatte amu, haen ah amu nug lab, le amu ooppa noa heeb, ah nug guittak, ninig nau ele dookku. Nuhigppa anam ele dayebeb, nug oo titiɗeb, tuɗi laih laih oh ebehi teeb, nuhikkud danab ah laa ag nuhignu eheɗ nau dooglag.

Duteronomi 28:37

Anam beeb amu, wanppan wan laalappanu danab ah, Yawe Nug lamatte, ag goppig, ag oolagppa daatteb ele amu, laa amu ag kobol ahilagppa bekku amu anidppeg, ag ameg iɗuak doon, ahilagnu, “Keeke hamunab,” ele doon, imadkkulag.

Jeremaia 27:8

Anam, amge gemu wanppan wan laa, o ɗo maɗoɗ laa ag Babilon dilag king Nebukatnesar waappa maɗi nid daan, nuhig uɗat hekkulagnu uun, ag makau laa, doɗnu duugppan tuqai nug baagppa ii daamanu wagai ma hette bia hekkulag dayeb, da bu metten heppi, Nebukatnesar, nuhikkud daup ele ag wan amuppa gona, ban hena, Nebukatnesar, nuhikkud daup ele eppelagppa wan amuppan danab ah ag qep elabppa, enugppa, amu oɗe nau danab kuɗum aqe mauhttebppa ele mauhadppeppeg, wan amuam nauhakib daakku. Da anam awe attem.” ’ ” Yawe Nug anam awa atte.

Jeremaia 29:17

Ao, Yawe Nukka Ɠagattag Oh Ele, Nug ahilagnu inam atte. “Da heppi, ag qep elabppa, enugppa, amu oɗe nau danab kuɗum aqe mauhtteb ele, ag amuppa mauhkkulag. Da heppi, ag ad fig meu naunab, danab lakkunu elele iitta, ag anamnab aakku daaglag.

Jeremaia 32:24

Antte! Kekeɗ ag aab okkai imu eɗidkkulagnu ag wan buun, aon uɗin, gokkaɗegeg beebe, aɗ eleleppa bekkunu hetteb. Aab imuppan danab ah ag qep elabppanu mauhakppa, enugnu mauhakppa, oɗe nau danab kuɗum aqe mauhtteb, mauhak amuppa ele, Babilon ag aab okkai imu eɗidna aoglag. O Yawe, na aɗi keeke bekkunu ame amu, kobol anam aakku beebe na anidttem.

Jeremaia 44:12

Uug naunab Juda wanppa beum, dimppa ag kuɗum iitta, ag laib laib uug haen dimppa bau daan, Juda wanppa daappig, amge ag haen amuppa Isip gona daaglagnu dabmak aoeg ɠagattag eppom daye, ag aakku heppig. Ag uɗin, Isip wanppa daatteb; am ag amu heppig amu, da heppi, ag nauhkkulag. Ag oh Isip daanna nauhkkulag. Ag qep elabppa, o enugppa mauhkkulag. Danab okkai ukkeb, danab onig iitta ele, ag oh qep elabppa, o enugppa mauhkkulag. Danab ah laa ag ahilagnu ag eheɗ laa awaknu anak waappa daaglagnu anana, ag anadna, ameg iɗuak doon, ag naippa yaaladnana, ag aon aon aqaglag.

Jeremaia 44:22

Yawe Nug amu antta, amunu dabma, Nug ag ahilag nau hak digdig, ahilag hak nug amunu ooppa uuaknab dootte ele, Nug ag uuatteb, ag hak amu tuɗidna hekkulagnu elele ii doya, Nug he, danab ah laa ag wan amuam eheɗ laa awaknu anak waappa daakkunu anan oiyegeg, wan amuam hele-ettak, wan meu waknu nakokib elele, am anam dayom, amu danab ah appa ii daappig. Gemu ele anamib daatte.

Esekiel 23:46

Amunu Naɗi Yawe Nug inam atte. “Ag laa ag heppeg, danab kuɗum ag oppoɗi bak doon, ah aɗit amu gumatna gona hatappeg, aa baɗak eheɗ nau doopeɗ, ahilah keeke ele aweg!

Maika 6:16

Uug amu bekkunu diig am, ag Juda, ag Israel dilag king nau, Omri, ag nuhig ɗo dim lamidna, hipunin hetteb. Ao, ag Israel dilag king nau, Ahap, nug baekkudppa ele kobol ag aɗi aɗi heppig bia henana, Ahap aɗi ag kobol atten atten heppig amu, ag amu dim lamidna oitteb. Ag ahilag nai dim lamidtteb amunu, da laa ag heppeg nauhkkulagnu ippulag ii oo nepa. Da amu ii hepa amunu, wan laappan danab ah ag eheɗnab imadkkulag. Ao, wanppan wan oh dilag danab ah ag ahilagnu, ‘Keeke hamunab,’ dooglag,” awa atte.

Jeremaia 18:16

Diig amunu amu, kekeɗ ag heppeg, ag Israel, ag ahilag wan am nauhaknab daakku. Danab laa ag nauhak amu anidna, ag ag Juda, ag ahilagnu, ‘Keeke hamunab,’ dooglag. Aun aɗi ag nauhak amu anidna, ag dabmak huanaknab aonna, ag ikkilag matuɗkkulag.

Jeremaia 24:10

Da heppi, kekeɗ ag uɗin, qep elabppa aqappeg, enug haen beeb, oɗe nau danab kuɗum aqe mauhtteb ele beeb, ag mauhna, wan da ag mamelkad aɗi mattami amu, ag amuppa ii daamna.’ ” Yawe Nug anam awa atte.

Esekiel 5:15

Haen da ool nauheb, oppoɗil beeb, daug batak uug, eheɗ ele hein, bu eheɗ madappi, wan laala Jerusalem talilidna daatteb, amuppan danab ag ahilagnu hamu bia doon, aon aon aqan, ag da ahilagppa hemi anidna, ag ele padal memananu dabmak aona, da ag bu attem mattami anidna, ameg iɗuak dooglag. Da Yawe, da aakku attem.

Sekaraia 8:13

O Juda danab ah, Israel danab ah ele, wan laappan danab ag, ag laa nug eheɗ laa awaknu anak waappa daakkunu anana, ag, Juda danab ah, Israel danab ah ele ag eheɗ nau aoppig, amubia na ele eheɗ nau am awe! appig. Ag anam appig, amge da ag Juda danab ah, Israel danab ah ele ehanadppi, ag padal ii mena, enanag daappeg, wan laappan danab ag akka akka nug amegppa nai mattina, Juda danab ah, Israel danab ah ele ag itittak enanag aoppig bia, na ele amu awe! aon akkulag. Anam bekku amunu, ag ɠagattag dayeg! Ag aib baɗappig, Ag ahan, Kayaknu mettid lag babaitteg!” Yawe Nug anam atte.