Jeremaia 23:3 - Nobonob Baibel

³ Am da hei, danab ah dahilad ag wan laalappa gona, danab ah amu oolagppa oɗo yaak daatteb amu, geha da dakka danab ah dahilad amu ag huu ameg nakok daatteb, da ag qagmaadkkul. Da geha ag diie, omaladppi, ag eɗun wan ahilagppa uɗin daanna, am geha ag kuɗum menuadna, ag appatna, ag kuɗumnab daaglag.

Jeremaia 23:3 Referans Kwoze

Jeremaia 32:37

Qinob da wan oh, da dahilad danab ah ag ahilag eheɗ hak amunu ool huanak nauhe, oppoɗi bak okkainab ele doyen heppi, kekeɗ ag eɗadna diin, wan atu laalappa goppeg, matatun daaglag ele amu, da wan amu ohppanu qagmaatten omaladppi, ag eɗun uɗin, wan imuppa daaglag. Da ag ehanadppi, ag baɗak iittappa daaglag.

Jeremaia 29:14

Ge, ag da anam mattiɗnana, ag da aniɗkkulag. Ag da anam aniɗppeg, da omaladppi, ag wan laa, appan danab ag aɗualatteg, ag ag eppelagppa daatteb amu, da appanu omaladppi, ag eɗun uɗin, wan imuppa daaglag. Da ag wanppan wan oh, da hei, ag gona appa daatteb, da appanu qagmaatten omaladppi, ag wan atu oh, da hei, ag gona diia ukka laih me dayak danab ah daatteb amu, ag appanu eɗun uɗin, iguppa daaglag,” awa atte.

Jeremaia 30:3

Aɗinu? Haen laa dimppa da heppi, Israel danab ah, Juda danab ah ele ag wan laalappa gona, appa diia ukka laih me dayak danab ah daatteb, ⌊daaglag ele amu,⌋ ag appanu eɗun uɗin, wan imu, da ag mamelkad aɗi, ahilag daakkunu mattami amu, ag imuppa daaglag,” awa atte.

Esekiel 11:17

Jerusalem danab ah ag anam atteb amunu, na laa ag diia ukka laih me dayak danab ah daatteb, na ag amelagppa inam appe doyeg! Naɗi Yawe Nug inam atte. ‘Da heppi, ag wan laalappanu eɗun, ahilag wanppa uɗiglag. Ao, da heppi, ag wan laalappa da hei, ag appa matatun gona daatteb amu, da heppi, ag eɗun uɗin, ahilag wanppa daaglag. Da heppi, Israel wan anukka ahilagnu dayom amu, ag wan amuppa eɗun daaglag,’ awa atte.

Jeremaia 31:8

Antte, Israelnu wan laa, yawalti uɗitteppanu daatte, da appanu Israel danab ah diie uɗikkul. Yo, da ag wan batakppanu diie qagmaadkkul. Danab ah kuɗumnab, ag uɗiglag. Kuɗum laa ag beɗulag ena ele, amge laala ag amelag gaɗuak ele, laala ag baelag mauhak ele, laala ag ah oolkad ele, laala amu, ag ah nid menuadkkulagnu miag daatteb ele oh uɗiglag.

Sam 106:47

O Yawe, ihinig Kayak, ig na, na onin am oppiaawak ele, ig na amenppa, “Ena heme,” akkunignu, ge, ig gamag ahak okkai doot, na onin humagnignu, na ehanigppe, ig padal mematanu unuqidttem. Ao, na ehanigppe, ig qagaiettakppa ii daapput, wanppan wan laalappanu qagmeigppe, ig ihinig wanppa daagnignu oɗ medattem.

Esekiel 36:24

Amu Naɗi Yawe Nug inam ele atte. “Da ag Israel, da ag wanppan wan laalappa daattebnu diiadkkul. Ao, da ag Israel ag wan laalappanu qagmatten omalatte, ahilag wanppa eɗue uɗippi, ag ahilag wanppanab daaglag.

Esekiel 36:37

Amu Naɗi Yawe Nug inam ele atte. “Da paɗadppi, Israel danab ah ag unuqiɗppeg, da unuqittak ahilag amu doye heppi, anamib bekku. Da heppi, ag eheɗ appatna, kuɗumnab daaglag, sipsip huanak amubia.

Maika 7:12

Haen amuppa amu, Asiria danab, Isip aab okkaippan danab ele ag ⌊binalag mattaglagnu⌋ ag Israel, ahilagppa uɗiglag. Ge ag Isipnu ukka, le onig Yupretis batak, laih amu oh, appanu uɗiglag. Ag le naɗi laih daatte ukka, le okkai laih daatte amu, ag wan laih amu ohppanu uɗiglag. Ag qauko okkai ukka, qauko okkai laa ele gamagppanu uɗiglag.

Jeremaia 8:3

Amu haen amuppa da heppi, Juda danab ah, ag oh bia nau hetteb amu, ag kuɗumnab mauhkkulag, amge laala da heppi, kekeɗ ag laa ii mauhppig diin goppeg, wan laappa diia ukkak danab ah daaglag. Amu ag appa daanna, ag bau daan oiglagnu uuglag. Ag mauhkkulagnu oolag daakku.” Yawe Nukka Ɠagattag Oh Ele Nug anam atte.

Jeremaia 30:10

Amu Yawe Nug atte. “Da amu hekkul amunu, ag Jakop buɗub, ag dahilad maɗi nid amu, ag aib baɗappig. Ao, ag Israel danab ah, ag oolag uug nau aib qeum. Aɗinu? Da genab ag ehanadppi, ag wan laa, wan laa amuam umanab daatte, ag appanu eɗun uɗin, ena daaglag. Ao, da ehanadppi, ag buɗulkad ag wan laappa diia ukka laih me dayak danab ah daaglag amu, ag appanu eɗun uɗin, ena daaglag. Da amu heppi, haen amuppa ag Jakop buɗub, ag maɗoɗ, ɠagattag ele daappeg, laa ag heppeg ii baɗamna.

Jeremaia 31:7

Yawe Nug ⌊ag Israel ehanatteb, ena daaglag amunu,⌋ Nug inam atte. “Ag Israel, ag oo gamag ahak doon ahi etteg! Ao, ag wanppan wan oh oolagppan wan laa anuqak daatte, ag ⌊Yawe ag ehanattomnu gamag ahak doon,⌋ huana eig! Ge, ag Yawe binag humappeg, laa ag, ag doyatteg! Ag ‘O Yawe, na nahipad danab ah, ag oɗo yaak daatteb amu, na ag padal memananu ehanadkkutnu oɗ medattem,’ aon aig!

Jeremaia 46:27

Amu Yawe Nug Israel danab ah amelagppa inam atte. “O Jakop buɗub, ag dahilad maɗi nid amu, ag aib baɗappig. Ao, ag Israel danab ah, ag oo uug naunab qak aib dooppig. Aɗinu? Da ag ehanadppi, ag wan atu umanabnu eɗun uɗin, ag wanelagppa daaglag. Ao, ag gemu daatteb, ag wan laappa gona, diia ukka laih me dayak danab ah appa daaglag amu, da ag buɗulkad ehanadppi, ag appanu eɗun uɗin, ag wanelagppa daaglag. Haen amuppa amu Jakop buɗub ag maɗoɗ, ɠagattag ele ag wanelagppa daaglag. Laa nug heeb, ag ii baɗamna.

Lewitikas 26:9

Da geha ahilagnu ena heinne, ag nid madappi, danab kuɗum beppeg, amuppa da hei, da ag ele nug tituana nai qakkak hemut amu, nai dahil amu meu okku.

Jeremaia 16:15

Iitta. Ag, ‘Yawe Nug Israel danab ah wan yawalti uɗitteppanu, amu wan laala, Nug he, ag appa gona, diia ukka laih me dayak danab ah daappig, Nug appanu ele omalatte uɗippig amu, Nug genab bau daatte, genab amubia nai imu da madittem am genab,’ akkulag. Aɗinu ag anam akkulag? Da heppi, ag eɗun, ahilag wan, da wan amu ag mamelkad aɗi mattami amu, ag amuppa daaglag.” Yawe Nug anam awa atte.

Jeremaia 50:19

Amge da heppi, Israel danab ah ag eɗun, ag wanelagppa daaglag. Sipsip ag Karmel, am Basan ele appa gikkiɗah lanan, ena daatteb, amubia Israel ag ena daaglag. Ag Epraimnu qauko nakokppa, Gileat wanppa ele ee elele aon, oolag dittieb, elele daaglag,” awa atte.

Esekiel 36:11

Da heppi, Israel danab ah ag nid menuadppeg, appatna kuɗum daappeg, ahilkad doɗ ele anam hena daaglag. Da heppi, Israel danab ah ag daadppig bia daaglag. Daanna, da heppi, en okkai ele tatam daadppig amu, gemu ag amu eɗittak, okkainab ele daaglag. Da anam heppi amu, ag dooglag, da am Yawe.

Maika 2:12

Yawe Nug tuɗitta atte. “O Jakop buɗub, genab da ⌊ag bu madakkul, amge dimppa da⌋ ag oh qagmaadppi, ag eɗun daaglag. Ao, da genab heppi, Israel danab ah ag oɗo yaak daaglag amu, ag eɗun laippu daaglag. Da am sipsip gumak danab sipsip aɗ ooppa qagmaadtte bia, da Israel danab ah qagmaadkkul. Ao, sipsip gumak danab nug gikkiɗah dad okkai sipsip gikkiɗah lattebppa, nug appa qagmaadtte bia, da Israel danab ah qagmaadkkul. Da anam heppi, ⌊dahilad⌋ danab ah ag appatppeg, wan imu ambak daakku.