Jeremaia 19:4 - Nobonob Baibel

⁴ Aɗinu da anam hekkul? Juda danab ah ag da dim lamiɗaknu uun, kayak laihnu diiadna uɗin meeg, aben imuam kayak hambuppuak dilag aben aakku daatte. Ag aben imuppa doɗ manan, kayak hambuppuak amu mattegeg uɗie, gemu ele hetteb. Ag, am ag mamelkad aɗi ele ag kayak amu ii dooppig. Juda dilag king tatam daappig, ag ele kayak amu ii dooppig. Juda amu henana, ag laa eheɗ laa ii heppig, beɗulagppa aab iitta ele, ag ag hamu aqaeg mauhegeg uɗie, gemu ele hetteb.

Jeremaia 19:4 Referans Kwoze

Jeremaia 2:34

Laa amu, ag Israel ag danab ahilag keeke ii aoppig, ag eheɗ laa ii heppig ele, ag amu aqaeg mauhppig. Ag amu heppig, amge ag, ‘Ig hipunin hemut,’ ii appig. Iitta. Ag, ‘Ig beɗunigppa aab iitta. Yawe Nug ihinignu oo nauhak laa ii dootte,’ atteb. Ag anam atteb, amge iitta! Ag hipunin henana daanna, ‘Ig hipunin ii hemut,’ atteb amunu, da naippa yaalatten, bu madakkul.

Aisaia 65:11

Da dahilad danab ah dilagnu anam hekkul, amge ag laa, ag da, Yawe, ag da dimeɗan, da dim lamiɗkkulagnu uutteb, ag dahil qauko, qauko amuam dahilnu tituanak daatte amu, ag appa gona dahil mettid hekkulagnu daulag atitte, ag kayak hambuppuak onig Gad noobppa dup nona binag mekkulagnu henana, nug onigppa hobul hena, ag kayak hambuppuak onig Meni noobppa dup nona binag mekkulagnu ag nuhignu wain digdig kabolina, tappiɗ okkaippa inatteb ele amu, da ag hettebnu dabmekkul.

2 King 21:16

Amu Manase nug Jerusalem appa danab ah eheɗ laa ii heppig kuɗum, huanak aqe mauhppig. Nug anam ha, amu nug ele he, Juda danab ah ag hipunin heppig. Ag hipunin amu henana, ag Yawenu neekkakppa eheɗ heppig.

Duteronomi 28:20

Yawe Nug heeb, eheɗ laa awaknu anak waappa dayak, dabmak kaboliak, bu qak ele ahilagppa uɗikku. Ag aɗi hekkulagnu hekkulag amu, Nug anam aakku hekku. Nug anamib heeb ukkeb, ag nauhna autna aon, pahanab mauhkkulag. Yawe Nug aɗi diignu anam hekku? Amunu diig am, ag kobol nau henana, Nug dimettaglag, amunu Nug anam hekku.

Jeremaia 7:9

Ag yab hetteb. Ag layag qe mauhak hetteb. Ag ewau pakkua gappai hak kobol hetteb. Ag hettoɗiakppa nai hambuppuak aon, nai amunu, ‘Am nai genab,’ ahilag naippa ɠagattag qettan maditteb. Ag kayak hambuppuak Bal noobppa daanna, kalu danab ile muttuɗig enanag bette ele maina, nug medatteb. Ag kayak laala ele, ag anukka kayak amu ii dooppig, ag kayak amu ele dim lamadtteb.

Jeremaia 17:13

O Yawe, naib ig Israel buɗub ehanigppe, ig ena daagnig. Danab ah oh ag ib apiɗidna, na uuidna oitteb ele, ag uɗa nak aoglag. Laa ag na, Yawe, ag ib apiɗidna, na uuidna, oitteb, ag yaak gappudppa dayaya, paha nauhtte, ag amubia nauhkkulag. Aɗinu ag anam nauhkkulag? Ag na Yawe, na keeke ena ohnu diig daattem amu, ag ib apiɗidna, na uuidna oitteb.

Jeremaia 11:13

O Juda danab ah, ag kayak hambuppuak kuɗumnab noolagppa dup nona binalag metteb. Ag ahilag wanppa aab gane daatteb, ag kayak hambuppuak ebqak amubia noolagppa dup nona binalag metteb. Laa amu, kayak hambuppuak laa onig Bal, kayak amu dim lamattaknu ɗo am uɗa nak ele, ag kayak amu noobppa dup nona binag mekkulagnu ag nuhig qaɗab kuɗum bappaidppig. Jerusalem aabppa ib gane daatte, ebqak amubia ag nuhig qaɗab bappaidppig.” Yawe Nug anam awa atte.

Jeremaia 2:19

Ag nau hetteb amunu, nau hak ahilag am ag bu madakku. Ao, ag da dimeɗona kayak hambuppuak laala dim lamattegeg uɗie, gemu ele hetteb amunu, ahilag kobol amu, am ag daulag batakku. Anam amunu, ag da, Yawe, ahilag Kayak, ag da uuiɗna, ib laa oiyegeg, ag ebehilag oh dahilnu bodoetta le ii mette, diig amunu uug okkai ahilagppa anam bette, amu kobol amuppa ag nob eheɗ aona, mua naunab nau dootteb dabmenan oiyeg!” Naɗi, Yawe Nukka Ɠagattag Oh Ele, Nug anam aakku atte.

Jeremaia 2:17

Keeke amu oh ahilagppa beum amu, amunu diig am, ag da, Yawe, ahilag Kayak, da ag omalatti uɗippig amu, ag da uuiɗppig. Ag da uuiɗppig amunu, kobol eheɗ ahilagppa beum ele, amuam ag beɗulagppa iittate?

Jeremaia 2:13

Aɗinu? Danab ah dahilad, ag hipunin ib aɗit iikku heppig. Laa ag da, da am le bauklel diig amu, ag da uuiɗna, piɗe wana oitteb. Aria, laa amu, ag akka ag le aoglagnu wan moɗ buuppig. Ag amuppa le aoglagnu simen aɗappig, amge simen am aoɗom, le moɗ amuppa le daakkunu elele iitta.

Aisaia 59:7

Ag nau hekkulagnu qaiettan gotteb. Ao, ag danab eheɗ laa ii heum qeppeg mauhkkunu pahaettak daatteb. Ag hanhan kobol nau hekkulagnu dabmenan oitteb. Ag aɗi aɗi hetteb ele amu, ag amuppa keeke heeg nauhtte, ag heeg, keeke ena dayom am gemu nauhak daatte.

2 King 24:4

Amunu laa am, Nug Manase nug Jerusalem ohppa danab ah kuɗumnab, ag eheɗ laa ii heppig ele aqe mauhppig. Manase kobol heum amu, Yawe Nug antta, ⌊Juda danab ah kuɗum ele ag nug dim lamidppig antta, ag oolag ii eɗuom ele antta,⌋ Nug Juda dilag hipunin uhuqa madakkunu elele ii doyom.

Revelesen 16:6

Danab imu ag nahipad danab ah oppiaawak ele, amu propet nahipad ele tiilag aɗappig amunu, na tiig lakkulagnu mattame. Ag nob amu aoglagnu daappig, amu na heme, amuppa na elelenab heme,” awa aum.

Luk 11:50

Anam amunu, wan imunu digmakppanu propet aqe mauhak digmak Abel, nug mauhe uɗie, Sekaraia, ag nug qaɗab, Kayak laug ele gamagppa qeeg mauhom, nuhig mauhak batak amu, qe mauhak hipunin amu oh danab ah haen geha imunu ag qaɗelagppa daakku. Da genab ag amelagppa attem. Keeke imu oh am danab ah gemu daatteb ele dilagppa bekku.

Gayak Nai 4:13

Ag amu bekkunu oolagppa genab ii dooppig, amge amu aakku beum. Kobol amu beumnu diig am inam. Juda dilag propet ag hipunin heeg; mana mettak danab ag ele hipunin heppig: ag aab okkai amuppa genab tutukku hak danab aqaeg mauhppig.

Jeremaia 26:23

ag Uraia aɗan, eɗun aon, Isip uun, Juda wanppa uɗina, King Jehoiakim eppegppa meeg, Jehoiakim he, ag nug qep elabppa qeeg mauhom. Ag qeeg mauhe, ag gaɗa aon gona buɗieg, daɗek danab mauheg boumadppigppa ukka niiom.

Jeremaia 26:15

Amge ag imu tutukku doon oiyeg! Da keeke laa ag hak amunu iuppeg mauhkkulnu laa ii hemi amunu, ag da iuppeg ii mauhkkuloitte. Ag da iuppeg mauhkkul amu, ag aakku eheɗ heppeg, ag beɗulagppa aab daakku amunu, Yawe Nug ag, aab okkai imu, amu danab ah aab imuppa daatteb ele bu madakku. Amuam genabnab daattenu diig am, Yawe, laa iitta, Nugib keeke imu oh appi dooglagnu meiɗe uɗimi.” Jeremaia nug nai amu ag amelagppa mattiom.

Jeremaia 22:17

Amu Yawe Nug imu ele atte. “Anam, amge ⌊Jehoiakim,⌋ na nakka, na en okkainab aokkutnu oot heehe, na amu dabmena autna aottem. Ib enappa, o ib nauppa aokkut, nahip dabmakppa amuam keeke hamu; aokkutnuib dabmettem. Aokkutnu amu, na danab eheɗ laa ii heppig ele aqe mauhtteb. Aokkutnu amu, na danab ah ag nahip uɗat hamu, nob iitta hekkulagnu duttunadttem. Aokkutnu amu, na laa eheɗ hattana, na keeke lokkumakppa awaknu duttuna hak kobol dim lamidttem.” Yawe Nug anam atte.

Jeremaia 18:15

Dahilad danab ah ag ele anam bia alet dabmeɗan oilob, amge iitta, ag dahilnu daulag atiom. Ag ahan, kalu danab ile muttuɗig enanag bette manan, kayak hambuppuak madatteb. Kayak hambuppuak amu ag heeg, dahilad danab ah ag nena qena daatteb. Ao, kayak hambuppuak ag heeg, dahilad danab ah ag kobol ena, anukka ippunittak amu aoppig amu, ag ib amuppa elele ii oitteb. Ag heeg, dahilad danab ah ag ib ena apiɗidna oitteb. Ao, ag ib nauppa oinna, ib enappa ii oitteb.

Jeremaia 16:11

na ag amelagppa inam appe doyeg! ‘Yawe Nug inam atte. “Diig imunu uug naunab amu bekku. Ag mamelkad aɗi ag da uuiɗna, ag kayak laa waappa daanna, ag oɗelag dim lamidnana, ag ag noolagppa dup nona binalag meppig. Ag da uuiɗna, ag dahil ɗo ele ii dim lamidppig.

Jeremaia 15:6

Amu Yawe Nug inam ele atte. “Ag da geɗilna, ag hanhan dimeɗan oitteb amunu, da heppi, ag nauhkkulag. Da baula ool gai-iitta doyen, ool matten, ii ehanadpa.

Jeremaia 5:6

Danab ah imu oh ag anam hetteb. Ag Yawe oɗe huana tappaeg nette. Ao, ag haen kuɗum tuɗidna, Yawe dimettona kayak hambuppuak laala dim lamadtteb. Anam amunu, kekeɗ ag laion laa atuppanu uɗia, doɗ, o danab qe mauhtte bia heppeg nauhkkulag. Doɗ wulp, nug atu taɗak appanu uɗia, doɗ, o danab qe mauhtte bia kekeɗ ag heppeg, danab ah imu ag nauhkkulag. Doɗ laa onig lepad, pusi okkai amu, nug aab guguittak dayaya, aun laa aab dimittim uɗikku amu, doɗ amu nug aha, danab amu aɗa he, nug beɗu huppu naunau na niitte, amubia kekeɗ ag heppeg, danab ah imu ag nauhkkulag.

Jeremaia 2:30

Da ag Israel ag oolag eɗukkunu bu mattami, amge ag oolag eɗukkunu uuppig. Ag laion doɗ laa aqe mauhtteb, amubia ag qep elabppa dahil propet aqaeg mauhppig.

Duteronomi 28:64

Yawe Nug ag wan imuppanu maatteb gona, tamtam wanppan wan ohppa daaglag amunu, ag baula wan imuppa ii daamna. Appa ag danab laihnu dilag kayak menppa, adppa ele hadappig amu; ag amu, ag mamelkad aɗi ele ii dooppig ele amu, ag amu noolagppa dup noa binag mak kobol hekkulag.

Duteronomi 28:36

Yawe Nug heeb, ahilkad kekeɗ ag eɗadna heppeg, king ag nug gumadkkunu meppig ele nug, ag ele, ag oh wan ag ii dootteb ele amuppa gokkulag. Am ag mamelkad aɗi ag wan amu, ag ele ii dooppig ele. Anam daanna, ag am diia ukka laih me dayak danab ah daan, ag kayak adppa, menppa ele hattak, ag amu noolagppa dup noa binag mak kobol hekkulag.

Duteronomi 13:6

Na awante, amapte, bekkatte, aɗente, waatte, o na layapnabte, nug lokkumakppa na gumitta uɗia, na amenppa, “Doppe goɗa, kayak laa noolagppa dup noɗa binalag meɗu,” awa akkutai. Amuam kayak ag, amu ag mamelkad aɗi ele ii doyadppig.

2 King 23:10

Amu danab ag aben onig Topet, aben amuam oolnu noak onig Hinom Bekkanu Oolnu Noak, appa dayom amu, ag aben amuppa eɗun gona, ag bekkalkad, aɗelkad aqan manan, kayak hambuppuak Molek mettaglagnu baula hemananu, King Josaia nug aben amu ele he, dubuttid teum.

Jeremaia 1:16

Ge, dahilad danab ah ag da dimeɗana, ag kalu danab ile muttuɗig enanag bette manan, kayak hambuppuak mattanna, ag akka eppelagppa dottolkad hadappig ele, ag dottolkad amu noolagppa dup nona binalag mena, kobol nau amu oh aakku heegeg uɗie, gemu ele hetteb amunu, da bu okkai ag madakkul.

Jeremaia 7:6

amu ag laa, ag wan laihnu danab, aria nid ag mamelkad mauhppig, amu ah ag gamulkad mauheg, qab daatteb, ag amu eheɗ hattanana, ahilkad keeke yab bia aotteb amu, ag kobol amu genab uun, ii hekkulag dayeb, ag wan imuppa danab hamu aqappeg ii mauhkkulag dayeb, ag gemu kayak hambuppuak dim lamadna, amuppa eheɗ aotteb amu, ag kobol amu ele uuglag dayeb,

Jeremaia 17:20

na Juda aɗi ag amelagppa inam appe doyeg! ‘Ag Juda dilag king, ag Juda danab ah, ag Juda laa Jerusalem daatteb ele, ag aɗnu od imuppa uɗin oitteb ele amu, ag oh Yawenu nai imu doyeg!

Jeremaia 22:3

Yawe Nug inam atte. Ag nai doya mala hettoɗia epeɗia elele mettak kobol, kobol genab tutukku ele dim lamitteg! Ag nai doya mala hettoɗia epeɗia elele mettak kobol henana, aun aɗi ag gai-iitta daan, danab ɠagattag eppelagppa daaeg, eheɗ hattana, ahilag keeke yab aotteb amu, ag danab amu, danab nau amu eppelagppanu eɗun diieg! Ag wan laihnu danab ah, nid ag mamelkad mauhppig ele, ah qab ele dilagppa kobol eheɗ aib heppig; guittak ele aib madappig. Laa eheɗ laa ii heppig ele ippa aib aqappeg mauhppig.

Jeremaia 44:3

Juda danab ah ag eheɗ hak heppig amunu, aab amu ag anam daatteb. Juda danab ah ag kalu danab ile muttuɗig enanag bette main, kayak hambuppuak mattanna, ag kayak laala, ag, amu ag mamelkad aɗi ele kayak amu ii dooppig, ag kayak amu noolagppa dup nona binalag meppig amunu, amuppa ag heeg, da oppoɗil beum.

Esekiel 7:22

Da Israel dimadappi, wan laappan danab amu ag uɗin, ag lag dahil, mana mettak danab aakkuib ag appa wakkulagnu elele amu, ag amu ooppa gona, ag dubuttid mettaglag. Ao, yab danab nau amu ag da laul ooppa nona heppeg, dahil lag am dahil neekkakppa dubuttid tak ele daakku.

Esekiel 20:26

Da ag paɗatti, ag doɗ manadna, ahilkad nid ⌊danab⌋ tatamnu ele manadna, kayak hambuppuak mattan, amuppa ag dahil neekkakppa ag oolagppa dubuttid teum ele daappig. Da amu heminu diig am, ag amu heppeg, da heppi, danab keeke naunab antta, ameg iɗuak dootte, amubia ag ameg iɗuak doon, ag da am Yawe dooglagnu anam hemi.’ ” Yawe Nug anam awa atte.

Daniel 11:31

King amu nug heeb, nuhikkud daup ag heppeg, Kayaknu mettid lag am Kayaknu neekkakppa dubuttid tak ele daakku. Kingnu daup ag Israel deɗ oh doɗ manan, Kayak medatteb, ag amu baula hemananu appeg, ii hemana. Ag keeke naunab laa, keeke amuam heeb nauhak bekkunu keeke, ag keeke amu Kayaknu mettid lag, amuppa qabappeg daakku.

Ikki Danab 5:8

Israel ag Yawe dim lamidkkulagnu uun, kayak hambuppuak laala dim lamadkkulagnu heeg, kekeɗ ag uɗin, ban hekkulagnu daappig. Ag uɗippig, amge ig ihinkad ban danab 40,000 oolagppa, guppiɗ, o ban laa anidkkunignu elele iitta!

Sam 106:38

Ag danab ah eheɗ laa ii heppig ele aqappig. Amuam ag bekkalkad, aɗelkad ele. Ag amu hena diin, Kanannu dottolkad hattak amu, ag manan, kayak hambuppuak amu madappig. Ag amu hekkulagnu aqak heegeg, Kayaknu neekkakppa wan am dubuttid naunab ele dayom. Nug ooppa uuaknab doyom.

Esekiel 8:11

Keeke nau dottolkad anam daaeg, Israel dilag ikki danab 70 ag appa hippaidna, keeke nau dottolkad noolagppa daappig. Sapan bekka Jasania nug ag oolagppa ele dayom. Am danab 70 amu ag anam daanna, ag anen anen kalu danab ile muttuɗig enanag bette ele manaknu tappiɗ eppelagppa aɗan, kayak hambuppuak digdig binag mekkulagnu kalu danab ile muttuɗig enanag bette ele amoteg ewewe, muttuɗig enanag aakku teum.