Jeremaia 17:3 - Nobonob Baibel

³ qauko okkaippa, amu gikkiɗah dad okkaippa ele meeg daatteb amu, ag amu dabmena, appa ag kayak hambuppuak laala, amu Aserah ele noolagppa dup nona binag metteb amunu, da ahilag en, ahilag keeke ena ena ele laa hamu madakkul. Ag wan ahilagppa aben ohppa kayak hambuppuak noobppa dup nona binag menan hipunin hetteb amunu, da aben amu oh laa hamu madakkul.

Jeremaia 17:3 Referans Kwoze

Jeremaia 15:13

Ag Juda danab oh ag hipunin hetteb amunu, da ahilag en, ahilkad keeke ena ena ele kekeɗ madappi, ag hamu aon gokkulag.

Jeremaia 26:18

“Hesekaia nug ig Juda, ihinig king dayeye, propet onig Maika, Moreset ted, nug dimppa aɗi bekkunu nai mattia, nug Juda danab ah amelagppa inam aum. ‘Yawe Nukka Ɠagattag Oh Ele, Nug inam atte. “Kekeɗ ag heppeg, Sion am datta wan buuak bia daakku. Ao, kekeɗ ag heppeg, Jerusalem am kinipan ameg okkai hume tak daakku. Anam amu, dahil mettid lag, nuhig tomppan keeke oh ele qauko nakokppa daatte amu, aben amu oh am ad naunau qataiettak bena, wan tonan daaglag.” Yawe Nug anam atte,’ awa aum.

2 King 24:13

Nebukatnesar nug anam hewowa, nug Yawenu mettid lag ooppa noa, nug Israel dilag king Solomon lag amunu keeke golppa hattom amu, nug amu oh awa, aria en laa oh ele Yawenu mettid lagppanu awa, am kingnu lag enanagnabppan en ele awa, nug keeke amu oh akka, Babilon ukkom. Nug keeke oh akka ukkom amu, anukka Yawe Nug amunu nai mehuqom, amu Nebukatnesar nug anam haaha, nug anamib heum.

Maika 3:12

Ag Jerusalem danab okkai, ag nau amu hetteb, ag nai hambuppuak amu ele maditteb amunu, ag beɗulagppa kekeɗ ag heppeg, Sion am datta wan buuak bia daakku. Ao, kekeɗ ag heppeg, Jerusalem am kinipan ameg okkai hume tak bia daakku. Anam amu, Kayaknu mettid lag, amunu tomppan keeke oh ele qauko nakokppa daatte amu, aben amu oh am ad naunau qataiettak bena, wan tonan daaglag.

Esekiel 16:39

Da anam hein, da heppi, na laa, na ag ele niippig amu, na ag eppelagppa daakkut. Na anam daappe, ag aben na nahip kobol amuppa hekkutnu bappaidme loppaɗadna, ag kayak hambuppuak dilag mettid lag nakok bappaidme ele, ag amu ele loppaɗadkkulag. Ag nahip lamen oh uɗappeg ukkeb, nahip bala ele aɗidna aoglag. Ag amu heppeg, na bam iitta, beɗun miag daan, bala laa ele iitta daakkut.

Esekiel 6:3

Na nai mattinna, na inam a! ‘O Israelnu qauko, ag Naɗi Yawe, ag nuhig nai doyeg!’ Naɗi Yawe Nug qauko okkai, qauko nakok, oolnu noak nakok, oolnu noak okkai ele, Nug ahilagnu inam atte. ‘Da ahilagppa ban hein, da heppi, kayak hambuppuak dilag mettid lag nakok ahilagppa daatteb amu, lag amu oh nauhna autna aoglag.

Gayak Nai 1:10

Kekeɗ ag uɗin, Juda dilag en aon goppig; wanppan wan laala, amuppan danab ag Kayak ii dim lamidtteb ele, ag Yawenu mettid lag ooppa ukkaegeg, Juda danab ah ag amelagppa anadppig. O Kayak, na danab amunu ag na lautppa wana nokkulagnu aib ame; amge ag wana noppig.

Jeremaia 12:12

Kekeɗ huanaknab ag atu taɗak oppatna uɗiglag. Aɗinu? Ag da, Yawe, ag dahil qep elab daanna, ag dahil wan ohppa danab ah aqappeg mauhkkulag. Laippu laa nug maɗoɗ ele ii daama.

Aisaia 27:9

Yawe Nug anam hekku amunu, amu beeb, Israel wanppa kayak hambuppuak qaɗab laa ena ii daama. Iitta. Oh nauhadna autnanab aon, gappud bia daaglag. Israel wanppa kayak hambuppuak Aserah dabmekkulagnu biidod laa qappak ii daama. Amu qaɗab laa, qaɗab amuppa danab ag kalu danab ile muttuɗig enanag bette ele manatteb amu, kayak hambuppuak dilag qaɗab laa amu ele ii daama. Iitta! ⌊Amu beeb, Israel ag ele oolagppa keeke amu uuppeg amu, Yawe Nug⌋ ib amuppa, Nug Jakop buɗub dilag eheɗ haknu nob nau nuhig ɠagattag naɗippa heeb, iitta mekku. Ao, ag hipuninnu nob nau aolob, amge ag ii aomna.

Lewitikas 26:30

Da kayak hambuppuak dilag mettid lag nakok ahilag oh loppaɗadppi neppeg, kalu danab ilaeg muttuɗig enanag bette elenu qaɗab oh loppaɗkkul. Da heppi, ahilkad kekeɗ ag aqana, gaɗalag diin, kayak hambuppuak dottolkad qaɗelagppa maadkkulag. Da geha ahilagnu amu ena iinab doopa.

Sam 78:58

Ag kayak hambuppuak dilag mettid lag nakokppa ag kayak hambuppuak noolagppa dup nona binalag meppig amu, kobol amuppa ag heeg, Kayak oo nauhak doyom. Ao, ag kayak hambuppuak dottolkad noolagppa dup nona binalag meeg, Nug ahilagnu dahil doya laa aomanu doyak aɗa dayom.

Jeremaia 20:5

Amu da heppi, Babilon dilag king nug Jerusalemnu en oh, amuam men doɗo, gol, silwa, stoappan keeke, amu Juda dilag kingnu en oh ele, nug amu oh aokku. Nug awowa, nug awa, Babilon gokku.

Sepanaia 1:13

Da heppi, kekeɗ ag uɗin, ban hena, danab ah amu dilag en aon gokkulag. Ao, kekeɗ ag uɗin, anam henana, ag danab ah amu laulkad loppaɗppeg nauhkkulag. Danab ah eheɗ anam hetteb amu, ag laulkad heppig, amge ag appa ii daamna. Ge, ag grep dad ebappig, amge ag grep dad amuppanu meu laa aon, wain laa hena, nakok laa ii lamana.” Yawe anam awa atte.

Jeremaia 21:13

Yawe Nug anam anana, Nug ag amelagppa imu ele atte. ‘Ag Jerusalem daatteb, ag oolnu noak akka daugppa, men kuɗum daattebppa daatteb. Ag atteb. “Auntai nug eheɗ heigkkunu elele? Aun nug padal mak eɗitteb ena dayaknu aben ihinig imu bekkunu elele?” atteb. Ag anam atteb, amge da ahilag hak amunu eheɗ doyeye ool ii madattem.

Esekiel 23:46

Amunu Naɗi Yawe Nug inam atte. “Ag laa ag heppeg, danab kuɗum ag oppoɗi bak doon, ah aɗit amu gumatna gona hatappeg, aa baɗak eheɗ nau doopeɗ, ahilah keeke ele aweg!