Jeremaia 16:11 - Nobonob Baibel

¹¹ na ag amelagppa inam appe doyeg! ‘Yawe Nug inam atte. “Diig imunu uug naunab amu bekku. Ag mamelkad aɗi ag da uuiɗna, ag kayak laa waappa daanna, ag oɗelag dim lamidnana, ag ag noolagppa dup nona binalag meppig. Ag da uuiɗna, ag dahil ɗo ele ii dim lamidppig.

Jeremaia 16:11 Referans Kwoze

1 Pita 4:3

Danab ag Kayak bekkod iitta, ag kobol nau digdig hetteb. Aria, ag gemu nai imu aotteb amu, ag ele anukka kobol anamib hedappig, amge gemu ag ii hetteb. Laa ele amu, ag baula aib heppig! Kobol amuam inam. Hipaɗu ahak kobol, oo hak nau kobol, le ɠagattag lawowa kaaka qak kobol, goɗak qiɗ nau ele hak kobol, le ɠagattag lana mauhnoak oiyak kobol, kayak hambuppuak binag mak kobol ele; Kayak Nug kobol amunu ooppa uuaknab dootte.

Esekiel 11:21

Amge laa ag kayak hambuppuak dottolag, dottolkad amu ag uɗig wak ele, da dottolkad amunu uuaknab doottem amu, laa ag dottolkad amu dim lamidna, binag metteb ele amu, da heppi, ag uug nau dooglag. Ahilag hak attem daatte amu, da heppi, ag amunu bu elele aoglag. Naɗi Yawe Nug anam atte.”

Jeremaia 22:9

Ag anam oɗ meppeg amu, laa ag nob mena akkulag. ‘Yawe, Juda dilag Kayak, Nug he, Nug Juda ele ag nug tituanna nai qakkak heppig, amge Juda ag nai qakkak amu tippalna, kayak laala noolagppa dup nona binalag mena, amu waalagppa daan, ag oɗelag dim lamidppig amunu, Yawe Nug he, aab imu inam nauhom daatte,’ aon akkulag,” awa atte.

Jeremaia 8:2

ag wanppa hamu maadppeg daaglag. Juda danab ah amu ag anukka bau daanna, ag aam kalam hoɗoppai ele dilagnu, ‘Ihinig kayak,’ anana, ag keeke amu noolagppa dup nona binalag mena, ag amu dilag oolag mauhak doon, ag amu dilag mana mettak danab dilag nai doon dim lamidna, ahilagppanu aɗi aɗi hekkulagnu nai ele aoppig. Juda danab ah ag amu heppig amu, haen amuppa ag ebehilkad am wan qaɗeppa kinipan bia daappeg, laa ag qagmena, moɗppa ii memana.

1 King 9:9

Ag oɗmak anam hebeppeg, laa ag nob mena akkulag. ‘Imu beumnu diig am inam. Israel ag Yawe, ahilag Kayak, ag Nug uuppig. Nug ag mamelkad aɗi anukka Isipnu diia, omalatta uɗiom. Amge ag Yawe, ahilag Kayak, ag Nug uun, ag kayak hambuppuak dim lamadnana, ag noolagppa dup nona binalag meppig. Ag anam heeg, diig amunu Yawe Nug he, uug naunab imu beum.’ ” Yawe Nug Solomon amegppa anam aum.

Jeremaia 9:14

Ag anam da ii dim lamiɗppig. Iitta. Ag da oɗel dim lamidmananu dabmak ahilag ɠagattag eppe, ahilag dabmak dim lamidkkulagnu dabmenan heppig. Ag mamelkad aɗi ag kayak hambuppuak Bal iɗu iɗu dim lamadkkulagnu ippunadppig, ag amubia dim lamadppig. ⌊Amu diig amunu uug amu oh aakku beum.” Yawe Nug haen amuppa oɗmak amunu nob ma, anam awa akku.⌋

Jeremaia 2:8

Mana mettak danab ag da Yawe, ag dahilnu ii dabmeppig. Ao, danab ag danab ah laa dahil ɗo ippunadtteb ele, ag da ii dooiɗppig. Ikki danab ag da dimeɗan, dahil nai tappaeg neum. Propet danab ag Bal dabmenan, nug onigppa ahilag nai mehuqppig. Ag Bal, kayak hambuppuak laa ele, amu dottolkad dabmenana, dim lamadppig.

2 Stori 7:22

Ag oɗmak anam hebeppeg, laa ag nob mena akkulag. ‘Imu beumnu diig am inam. Israel ag Yawe, ag mamelkad aɗi dilag Kayak, ag Nug uuppig. Nug ag mamelkad aɗi anukka Isipnu diia, omalatta uɗiom. Amge ag Yawe, ahilag Kayak, ag Nug uun, ag kayak hambuppuak dim lamadnana, ag noolagppa dup nona binalag meppig. Ag anam heeg, diig amunu Yawe Nug he, uug naunab imu beum.’ ” Yawe Nug Solomon amegppa anam aum.

Amos 2:4

Yawe Nug inam atte. “Juda danab ag hipunin kuɗum heppig amunu, da ool nauhtte. Da ool nauhtte amunu, da ag bu madakkul. Da oppoɗi bak dahil heppi, iitta ii mema. Hipunin laa ag heppig am, ag da, Yawe, ag dahil ɗo dimedappig. Ao, ag dahil ɗo dim ii lamidppig. Ag amu henana, ag kayak hambuppuak dim lamadkkulagnu eeɗak doon, dim lamadppig; kayak hambuppuak amuam ag mamelkad aɗi kayak hambuppuak dim lamadppig, am kayak amuib.

Malakai 3:7

Am ag mamelkad aɗi ag dahil ɗo dimettan, dim ii lamidppig, ag ele anam hetteb. Gemu ag dahilppa eɗun uɗippeg, da ag ahilagppa eɗue wakkul.” Yawe Nukka Ɠagattag Oh Ele Nug anam atte. Nug anam atte, amge ag Nug oɗ medatteb. “Ig attem heta, nahip-ppa eɗut wakkunig?” aon atteb.

Ikki Danab 2:11

Israel ag anam hena, ag Yawe noobppa nuhig neekkakppa eheɗ henana, kayak hambuppuak Bal iɗu iɗu waalagppa daan, oɗelag dim lamidppig.

Jeremaia 13:22

Amu uug okkai amu beeb, haen amuppa ag akka akka ag, “Aɗinu nau imu ihinigppa beum?” ag oɗmak amu hekkulag dayeb amu, ag oɗmak amunu nob am iikkude doyeg! Ag hipunin huanak heppig amunu, laa ag ah gamu uuitta, laa ele oittep, ag nuhig lamen pattiɗna aoeg, beɗu miag daatte, ag beɗulagppa kobol amubia ahilagppa beum.

Jeremaia 44:3

Juda danab ah ag eheɗ hak heppig amunu, aab amu ag anam daatteb. Juda danab ah ag kalu danab ile muttuɗig enanag bette main, kayak hambuppuak mattanna, ag kayak laala, ag, amu ag mamelkad aɗi ele kayak amu ii dooppig, ag kayak amu noolagppa dup nona binalag meppig amunu, amuppa ag heeg, da oppoɗil beum.

Gayak Nai 5:7

Ig mamenkad aɗi hipunin hena, iitta meppig; amge ig ahilag bu mattak maot oittem.