Jeremaia 14:14 - Nobonob Baibel

¹⁴ Da ai, Yawe Nug nob ma, da amelppa aum. “Propet amu da onil diin, ag dimppa aɗi bekkunu nai hambuppuak maditteb. Da ii maatti uɗippig. Da ag amelagppa nai laa ii mattimi. Da danab amu propet daaglagnu ii tituanadmi. Propet amu ag tuleglegppa keeke anidna, aeg dootteb, amge keeke ag tuleglegppa anidtteb ele am genab iitta. Ag eman kobol meu iittappa keeke doon, aeg dootteb, amge ag aɗi keeke ib amuppa dootteb am keeke genab iitta. Ag akka, ahilag dabmakppa keeke hambuppuak dabmetteb, amge keeke ag dabmetteb ele am genab iitta,” awa aum.

Jeremaia 14:14 Referans Kwoze

Esekiel 12:24

Aɗinu? Da heppi, nai oh meu ob amu, Israel danab laa nug keeke hambuppuak, da tuleglegppa keeke amu ii ippunidmi amu, nug, ‘Da tuleglegppa amu anidmi,’ ii ama. O danab laa nug laa ag nuhignu oo eeɗaknu ittag nai madippig amunu, nug ‘Uuppe, da dahil eman kobolppa keeke oh enaib daakkunu doomi,’ Israel danab ah amelagppa ii ama.

Jeremaia 29:31

“Jeremaia, na nai imu pasppa yaan meppe, Juda danab ah ag Babilon wanppa diia ukka laih me dayak danab ah daatteb amu, ag doyeg! Na inam ye! ‘Yawe Nug Semaia, Nehelam baekkudppa laa amu, nug nuhignu inam atte. “Da Semaia ii mei ahilagppa ukkom; nug nukka dabmaama ahom. Nug amu haaha, nug nai hambuppuak ag amelagppa a, ag aakku oolagppa genab dooppig amunu, Semaia nug dimppa aɗi bekkunu nai hambuppuak amu a dooppig, diig amunu

Gayak Nai 2:14

Ag Israel, ahilag propet ag tulegleg laala anidppig, amge tulegleg amuam hambuppuak; laa ehanidkkunu elele iitta. Ao, ag Juda danab ah ag hipunin henana, ag bu okkai aoglagnu aakku oippig, amge propet ag, ag Juda bu amu, amuam wan laappa diia ukka laih me dayak danab ah daaglagnu, ag bu amu ii aomnanu ippu ii ippunadppig. Nai ag madappig ele amu; nai amuam nai hambuppuak. Nai amuam ag omalatte, ag ib apiɗidna, eheɗ goppig.

Maika 3:11

Jerusalemnu danab okkai ag epeɗiak henana, ag lokkumakppa eheɗ haknu ehanittak aon hetteb. Danab ah ag Jerusalemnu mana mettak danab men doɗo mattaeg, ag ippunittak madatteb. Amu danab ag Jerusalemnu propet men doɗo mattaeg, ag propet nai ahilag maditteb. Ag nau amu oh hetteb, amge ag atteb. “Ig Yawe waappa daat, ehanittak aottem,” atteb. Ag anam anana, ag inam ele atteb. “Yawe Nug ig oonigppa iite daatte? Uug nau laa ihinigppa ii bema,” aon atteb.

Jeremaia 5:31

Kobol naunab nau ag hetteb am inam. Propet danab ag doonna, propet nai hambuppuak maditteb. Mana mettak danab ag akka, ahilag dabmak dim lamidna, danab ah gumadtteb. Propet, mana mettak danab ele ag anam aakku hetteb, amge dahilad danab ah ag kobol amunu oolag mauhtte. Anam, amge ib amu batakppa ag attem anidkkulag?” awa atte.

Esekiel 21:29

Ag Amon, ahilag eman hak danab ag hambuppun, “Tuleglegppa anidmut amu, uug laa ihinigppa ii bema,” atteb. Ao, ag Amon, ahilag eman hak danab ag ahilag kobolppa hena, hambuppun, “Eheɗ laa ihinigppa ii bema,” atteb. Ag anam atteb, amge amuam hambuppuak. Uug ahilagppa bekku amu, danab nau aun aɗi ag mauhkkulagnu daatteb amu, ag mauhkulag. Bu awak haen ahilag aakku uɗiom daatte. Ao, bu awak haen ahilag am aakku gogppa teum daatte.

1 Timoti 4:2

Nai amuam hambuppuak danab ag kobol hambuppuak henana, nai hambuppuak amu yaaeg bette. Hambuppuak danab amu ag oolagppan oiyak ippunittaknu ulum am uɗat pehettak ii hette amunu, ag ahilag hipuninnu dab-ii-medatteb.

Sekaraia 13:3

Am inam bekku. Danab laa nug propet nai ⌊hambuppuak⌋ digma mattiebeb, nug mameg, anig ele aa ahaya, ‘Na, “Yawe ippuniɗom amunu, da nai imu madittem,” ame, amge nai amuam nai hambuppuak, Yawe oɗeppanu iitta amunu, na mauhkkutoitte,’ aoya akkulah. Aa bekkalah nug propet nai ⌊hambuppuak⌋ mattiebeb, aa, aanab nug menupiɗ, aa aya aa ahaiya, nug qep-ppa yaaglah.

Sekaraia 10:2

Kayak hambuppuak dottolkad danab ag laulkadppa maatteg daatteb, ⌊amu dilag eman danab⌋ ag nai hambuppuak danab ah madatteb. Ao, eman danab ag tulegleg danab ah ib hambuppuak ippunadtte anidna, nai maditteb. ⌊Danab amu⌋ ag tul niiak hambuppuak anidna, amu danab ah amelagppa amunu atteb. Ao, ag amu anidna, danab ah hambuppualadna, keeke oh enaib daakkunu maditteb, amge amuppa danab ah ag ehanittak genab ii aotteb. Ag amu hetteb amunu, danab ah dahilad ag amu dilag nai oolagppa genab doon, sipsip qettoɗna, hamu oitteb bia oitteb. Ao, sipsip ag sipsip gumak danab iitta ele ag mauhnoak oitteb, amubia dahilad danab ah ag gumak danab genab iitta amunu, ag uug digdig anidna oitteb.

Esekiel 13:23

Ag amu hetteb amunu, da heppi, ag baula tulegleg genab iitta ii anidmana. Da heppi, ag eman hak kobol ii hemana. Da danab ah dahilad ag eppelagppanu diippi, ag ena daaglag. Da amu heppi, ag dooglag, da am Yawe,” awa atte.

Jeremaia 37:19

Propet laa ag dimppa aɗi bekkunu nai genab iitta mattina, ag na amenppa, ‘Babilon ag uɗin, na nittaglagnu, wan imuppan danab ah ele aqaglagnu ban ii hemana,’ appig amu, ag gemu adeppa daatteb?

Jeremaia 29:21

Yawe Nukka Ɠagattag Oh Ele, Israel dilag Kayak, Nug Kolaia bekka Ahap, am Masea bekka Sedekaia ele, aa am ahilti propet aɗit, aa hambuppuya, aa Yawe keeke laa ippuanatom attep, amge Nug ii ippuanatom. Aa dimppa aɗi bekkunu nai hambuppuak amu madittep, amge aa mattieheh, Yawe Nug danab aɗit amu dilahnu aɗi atte amu, ag Babilon appa diia ukka laih me dayak danab ah daatteb, ag doyeg! Nug atte. “Da heppi, aa Babilon dilag king Nebukatnesar eppegppa daapeɗ, ag laa ag neegna daappeppeg, Nebukatnesar nug heeb, aa mauhkkulah.

Jeremaia 28:15

Amu propet Jeremaia nug Yawenu nai Hanania amegppa anam ana, nug tuɗitta, propet hambuppuak Hanania amegppa imu ele aum. “Hanania, na nai doye! Yawe Nug na ii meitte uɗime, amge na hee, Juda danab ah ag nai hambuppuak na mattime ele, ag nai amunu oolagppa genab doon oitteb.

Jeremaia 28:13

“Na ahan gona, Hanania amegppa inam appe doyaɗ! ‘Yawe Nug inam atte. Na doɗnu duugppan tuqai adppa hak hee qiiom, amge laa aenppa hak am doɗnu duugppan tuqai amu abenab daakku,’ awa atte.”

Aisaia 9:15

Ikki amuam ahilkad ikki danab, ahilkad danab onilkad ele. Boob amuam propet danab ahilkad, ag nai hambuppuak danab ah amelagppa mehuqtteb ele.

1 Jon 4:1

O gamalad, propet hambuppuak kuɗum ag ihinigppanu qatin gona wan imuppa oitteb amunu, ag danab ag, “Da Kayak Ouɗi oɗe awen madittem,” atteb ele, ag amu oh dilag nai oolagppa genab aib dooppig. Iitta. Ag nai dootteb ele ag ouɗi aun laa nai maditteb ele ehanatte, ag nai maditteb, ag amu pehettan epeɗin, aun nug Kayak Ouɗippa nai maditte anidna, ahilag naiib ag oolagppa genab doyeg!

Duteronomi 18:20

Amge propet laa nug aɗi nai laa da nug madikkunu ii ami, amge nug dahilppanu nai awom bia ha, da onilppa mattieb amu, ag nug qeppeg mauhaɗ! Amu ag propet laala ele, ag kayak hambuppuak onilagppa nai madippeg amu, ag ele aqappeg mauheg!” awa aum.

Aisaia 56:10

Israel dilag okkai ag danab ameg gaɗuom bia daatteb. Ag doyak iitta. Ag oh am qai baag nauhom bia daatteb. Ag oh am qai gaamɗu qekkunu elele iitta bia daatteb. Ag niinna, tul ele niitteb. Ag niiglagnu oolag mauhtte.

Jeremaia 8:11

Ag dokta nug danab beɗuppa guittak okkainab awom antta, hamu bia doya, itak nakoknabib qataqette, ag dahil danab ah dilagppa anam hetteb. Ag, “Ig maɗoɗib daagnig, ig maɗoɗib daagnig,” anan daatteb, amge maɗoɗ laa ii daatte.

Jeremaia 20:6

Nug amu hekku, amge Pasur, nahipnu amu, na, amu na lautppa daatteb oh ele, Babilon dilag king nug ag diia ukka, Babilon wanppa maatteb, ag appa diia ukka laih me dayak danab ah daaglag. Na appa daanna mauhppe, ag na appa boumidkkulag. Na, amu na laipad na ag amelagppa propet nai hambuppuak ame amu, na ag ele oh anamib ahilagppa daakku,’ ” awa atte.

Jeremaia 28:11

Nug anam ha, nug danab ah daappig oh amelagppa aum. “Yawe Nug inam atte. ‘Danab nug doɗnu duugppan tuqai amu he qiiom, amubia da heppi, maɗ aɗit ii neebeb, wan oh Babilon dilag king Nebukatnesar waappa daan nug oɗe dim lamidtteb ele, ag anam ii daamna. Da danab nug doɗnu duugppan tuqai makau duugppanu loppaɗe, makau hamu oitte, amubia da heppi, ag Nebukatnesar waappa ii daamna,’ awa atte.” Hanania nug anam aum. Nug anam a, propet Jeremaia nug aha ukkom.

Gayak Nai 2:9

Kekeɗ ag heeg, Sion aɗnu od nena qena, wanppa niitteb; od manak qaknu keeke teppu ele amu, kekeɗ ag heeg nauhppig. Juda dilag king, anuqak danab laa ele, anukka Sion daappig amu; ag gemu wan laalappa wan laappa diia ukka laih me dayak danab daatteb. Laa gemu Kayaknu ɗo nai laa ii ippunadtte; propet ag ele Yawe eppegppanu tulelegppa aɗi keeke ele ii anidtteb.

Jeremaia 8:10

Ag dahil nai geɗidna, ii dim lamidtteb amunu, da heppi, kekeɗ ag uɗin eɗadna, danab laa ag ahilag wan, ah ele diippeg, ahilkad daaglag. Aɗinu da anam hekkul? Juda danab ah oh, danab onig iitta, danab onig okkai ele, ag oh baubau awaknu hik aqeeqe oitteb. Ao, propet danab, mana mettak danab ele ag hambuppuak kobol dim lamidtteb.

Esekiel 13:2

“Danab bekka, na propet hambuppuak Israel wanppa daan, propet nai hambuppuak maditteb amu, na uug naunab ahilagppa beeb anidkkulagnu propet nai appe doyeg! Ao, na danab amu, ag ahilag dabmakppanuib propet nai maditteb amu, na ag amelagppa, ‘Ag Yawenu nai doyeg!’ a!