Jeremaia 10:5 - Nobonob Baibel

⁵ Danab nug ai ag melen uɗiɗidppeg nauhmanu nug danab dottog babaitta, lamen tagitta, melen eppomppa qappe daatte; kayak hambuppuak dottolkad ag amubia daatteb. Dottolkad amu ag nai mattiglagnu elele iitta. Ag baelagppa oiglagnu elele iitta amunu, danab ag adeppa daaglagnu dabmetteb amu, ag maon, appa gotteb. Ag Israel, ag dottolkad amu aib baɗadppig. Aɗinu? Ag ahilagnu aɗi eheɗ laa hattaglagnu elele iitta. Ag ehanadppeg, ag aɗitai laa ena aoglagnu ele, elele iitta.” Yawe Nug anam atte.

Jeremaia 10:5 Referans Kwoze

Aisaia 46:7

Ag heeg, danab nug dottog amu ha male, ag human, gukkalagppa maon gotteb. Ao, ag aben nug daakkunu bappaidppig ele, ag aguppa meeg daatte. Dottog amu nug laih laih gokkunu elele iitta. Nug aguppaib daatte. Laa nug dottog amu unuqidtte dayeb amu, nug noob ii mette. Dottog amu danab uug eɗidmanu ehanitteb, uugppa ii daamanu elele iitta.

1 Korint 12:2

Ag dootteb, anukka ag Kayak ii doon daaegeg, haen amuppa Satan eeɗatte, ag kayak hambuppuak dottolkad, ag nai ii maditteb ele, ag binalag mekkulagnu oolag yaaegeg, ag amu dim lamadna gokkulagnuib heppig.

1 Korint 8:4

Aria, doɗ teppu main kayak hambuppuak dottolkad madatteb, lanak amunu da inam attem. Ig doottem, kayak hambuppuak amuam keeke genab iitta; danabnu dabmak aakkuib. Amunu ag dottolkad hetteb am keeke laa genab ii ippunigtte. Kayak laippu aakkuib daatte.

Habakuk 2:19

Danab laa nug keeke adppa hoiyak, “Ahan, bau daye!” atte amu, danab amu, nuhignu am gadonnab gadon. Ao, danab nug men laa, men oh am keeke bau iitta, amge nug men laa amegppa, “Niiak uun ahe!” atte amu, nuhignu gadonnab gadon. Ad o men amuam danab amu ulum mettaglagnu elelete? Iitta! Am ad o men, beɗu aakkuib gol o silwa laidppig. Am keeke bau mak ele iitta; am ulah ii eeɗtte.

Aisaia 46:1

Babilon dilag kayak onig Bel, nug genab daalo, nug dup nolo. Babilon dilag kayak laa onig Nebo, nug genab daalo, nug gomela daalo. Danab ag dottolti aon, laih gokkulagnu uɗatnu doɗ gomeppa maatteg daattep. Danab ag kayak hambuppuak aɗit amu dottolti, ag keeke amu doɗ bahilag yaatte ele gomelagppa meeg maotteb.

Aisaia 45:20

Yawe Nug imu atte. “Ag danab ah wan atu laih laihnu, ag banppa ii mauhppig ele amu, ag qagmena uɗin, da noolppa daanna, ⌊dahil nai doyeg⌋! Aun aɗi ag kayak hambuppuak dottolkad maon oin, binalag metteb ele, ag am dabmak iitta. Ag kayak hambuppuak amu unuqadtteb, amge kayak hambuppuak amu ag ehanadkkulagnu elele iitta.

1 King 18:26

Aria, Balnu propet ag makau dawai laa, danab ah aon uɗin madappig amu, ag amu aon bappaidppig. Ag bappaidna malon, ag kayak hambuppuak Bal unuqidppig. Ag buttuanu digmena, unuqitteg ukke, aam ameg tutukku awom. Ag Bal onigppa unuqidna inam eppig. “O Bal, na ihinig unuqittak imu dookkutnu ig oonig daatte,” aon eppig, amge ag unuqidppignu, auntai laa aɗitai laa ii heum, oɗelagppa laa ele ii awom. Iittanab iitta. Ag ahi goɗan oolna tena, oolna nenan, qaɗab qeppig amu talilidppig.

Jeremaia 10:14

Danab ah oh ag kayak hambuppuak dottolkad noolagppa dup nona binalag metteb ele ag doyak dabmak ena ele iitta. Ao, keeke golppa hak danab ag kayak hambuppuak dottolkad bappaidtteb ele, ag uɗalag nekku. Aɗinu? Dottolkad ag hetteb ele, amuam keeke hamu. Ag kayak genab laa iitta. Dottolkad amu ag ulah eeɗnan, bau ii daatteb. Iitta.

Duteronomi 4:28

Wan laappa ag geha appa kayak hambuppuak, adppa, menppa keeke hattak, kayak amu ag ii neegtteb, ii dootteb, ag keeke ii uɗiqtteb, ii latteb ele amu, ag amu noolagppa dup nona binalag mak kobol hekkulag.

2 Stori 25:15

Nug anam heum amunu, Yawe Nug Amasaianu oo huanak nauhom. Nug oo huanak nauhe, Nug propet laa me ukka, propet amu nug Amasaia amegppa aum. “Kayak hambuppuak amu ag ahilkad danab ah na eppenppa padal memananu ehanadkkulagnu elele iitta daappig amunu, aɗinu na kayak amu ag ulum nai mettaglagnu oɗ madattem?” awa oɗ mettom.

Aisaia 16:12

⌊Gadon!⌋ Am inam daakku. Moap danab ah ag ahilag kayak hambuppuak dilag mettid lag nakokppa tena, unuqidkkulag, amge ag beɗulag bahiib yaakku. Ao, ag ahilag kayak hambuppuak dilag mettid lag nakokppa unuqidkkulagnu gonana, unuqittak hekkulag, amge amuam keeke hamu, ag ehanittak ii aomna.