Hosea 4:15 - Nobonob Baibel

¹⁵ Ag Israel, danab ah ag ewau pakkuna gappai hetteb, amubia ag da uuiɗna, kayak hambuppuak laala dilagppa dup nona binalag metteb, amge Juda danab ah, ag anam aib heppig. O Juda danab ah, ag kayak hambuppuak noolagppa dup nona binalag mekkulagnu Gilgal aib goppig. Ao, ag amu hekkulagnu Bet Awen aib goppig. Ge, ag kayak hambuppuak noolagppa dup nona binalag menana, ag ahilag nai ɠagattag qettan, ‘Yawe genab bau daatte, genab amubia da inam inam hekkul,’ aib anan heppig.

Hosea 4:15 Referans Kwoze

Hosea 12:11

Gileat danab ah ag am nau hak huana hettebte? Ge, appan danab ah ag kobol amu huanaknab hetteb. Danab ah ag Gilgal appa, menppa qaɗab hattak amuppa mana mettak hena, makau dawai manadttebte? Ag hetteb, amge men amu geha nena, dad okkai laa daugppa men hamu qagmak daatteb bia daaglag.

Hosea 9:15

Yawe atte. “Israel dilagnu amu, ag Gilgal appa hak nau huanak heppig amunu, appa da digmein, ahilagnu oolppa uuaknab doomi. Ge, da geha ag, ahilag hipunin amunu, da laulppanu lamadppi ahaglag. Da geha ahilagnu tuɗitten, ool ii hema; ikki danab ahilkad oh ag am nai tappe nak danab.

Amos 4:4

Amu Yawe Nug atte. “Ag ahan, Betel gona, hipunin heig! Ao, ag ahan, Gilgal gona, hipunin baubau tuɗidna heig! Ag buttua oh ahilag mana mettak aon uɗin, qaɗabppa manatteg! Ge, ag maɗ ewam ewamppa ahilkad keekenu obatak eblaih tanig ele ooppanu, obatak laippu aon uɗin, Lewi buɗub matteg!

Amos 8:14

Danab ah ag kayak hambuppuak Samaria daatteb onilag diin, ahilag nai ɠagattag qedatteb, o ag, ‘Dan danab, ahilag kayak genab bau daatte, genab amubia,’ o ag, ‘Berseba appa kayak laa genab bau daatte, genab amubia,’ atteb amu, danab ah amu ag nena qena, baula eɗun ii ahamna.” Yawe Nug anam awa atte.

Amos 5:5

Amge ag amu hekkulagnu ag Betel appa aib mattiɗna goppig. Ag Gilgal ele aib goppig. Berseba ele aib goppig. Aɗinu? Kekeɗ ag genab uɗin, danab ah Gilgal appanu diin goppeg, Gilgal danab ah ag wan laappa diia ukka laih me dayak danab ah daaglag. Ao, kekeɗ ag ele Betel loppaɗna heppeg, nauha autanab awa daakku.” Yawe anam atte.

Hosea 10:8

Betawen appa kayak hambuppuak dilag mettid lag nakok am, laa ag heppeg nauhak daaglag; Israel ag appa hipunin hetteb. Lag amu nauhak daappeg, uud keeke qaun ele amu, keeke amuam geha qaɗab amu oh teguadkkulag. Amu oh beeb amu, Israel danab ah ag geha qauko dilagnu, “Ag nena tonikkeg,” akkulag. Ao, ag qauko nakok dilagnu, “Ag nena, qaɗenigppa qeig!” aon akkulag.

Hosea 10:5

Am danab ah Samaria daatteb ele ag kekeɗ uɗin, makau gaiɗ dottog golppa hak, Bet Awen appa daatte amu, ag uɗin, dottog amu ahilag wanppanu aon gomananu baɗan daatteb. Amge kekeɗ ag uɗin anam hekkulag amunu, kayak hambuppuak amu dilag mana mettak danab, danab ah laa ag dottog amu dim lamidtteb ele, ag geha nuhignu oolag dookku. Ge, danab ah oh ag dottog amu, nuhig neekkak enanagnab ele, ag amunu gamag ahak okkai dooppig, gemu ele hetteb amu, haen kekeɗ ag appalagppa maon gobeppeg, ag diig amunu geha oo doyak aoglag.

Hosea 5:8

Kayak atte. “Gibea appa ag trampet iwaleg! Rama danab ag kekeɗ uɗitteb dooglagnu ag trampet appa iwaleg! Betawen appa ag ban haknu ewak heig! O Benyamin danab, ag ban hak amuppa anuqna ukkeg!

Jeremaia 5:2

Aab okkai amuppan danab ah ag ahilag nai ɠagattag qettaglagnu ag, ‘Yawe Nug genab bau daatte, genab amubia,’ atteb, amge ag nai amu hamu atteb. Ag ahilag nai amuppa ag aɗi keeke hekkulagnu maditteb, amge ag ii dim lamidtteb,” awa aum.

Epesus 5:11

Gatatu uɗat, meu iitta ele, dimittim danab ag hetteb ele amu, ag anam aib heppig. Iitta. Ag gatatu uɗat am nau, ag amu miag atippeg, danab ah oh antteg!

Amos 6:10

Amu tiilag laippu aɗit laa aa uɗiya, gaɗalag aoya gokkulahnu uɗiya heyaya, laa nug laa, “Gaɗa laa anidmete?” oɗ metteb, laa nug amegppa, “Iitta,” akku. Nug anam ab amu, laa oɗ meum ele nug akku. “I Yawe onig diiɗa iinab akkunihoitte amunu, na nai laa aib mattime!” awa akku.

Hosea 11:12

Israel danab ah ag hanhan buppuiɗtteb. Ge, Israel danab ah ag hanhan nai genab iitta da amelppa maditteb. Amge Juda danab ah ag Yawe ele ɠagattag daatteb. Ao, ag tuɗidna, oo metta ii uuak kobol dim lamidna, Kayak Oppiaawak Ele oɗe dim lamidtteb.

Hosea 4:12

Am dahilad danab ah ag dabmak aoglagnu keeke adppa hoyak oɗ madatteb. Ao, ad maha ag ulum nai madatte! Aɗinu? Ag ahilag kayak hambuppuak noolagppa dup nona binalag mekkulagnu oo hak nau doon hetteb amu, ahilag oo hak nau amuam he, ag ib apiɗidna gotteb; ag da, ahilag Kayak, ag da ippunadmi bia da dim lamiɗkkulagnu uun hena, ag kayak hambuppuak dim lamidna oitteb.

Esekiel 20:39

O ag Israel danab ah, ahilagnu amu Naɗi Yawe, Nug inam atte. “Ag anen anen ohnab, ag gemu gona, ahilag kayak hambuppuak noolagppa dup nona binalag mattaglag, amge qinob dimppa amu, ag genabnab dahil nai doon, ag baula ahilkad kayak hambuppuak noolagppa dup nona binalag ii memana, ahilag daakkunu keeke ele ii mattamna. Ag amu oh ii heppeg, amu haen amuppa da onil oppiaawak ele laa dilag neekkakppa hamu bia ii daama,” awa atte.

Aisaia 48:1

Ag Juda, ag ahilag nai ɠagattag qettaglagnu henana, ag Yawe onigppa ɠagattag qedatteb. Ao, ag ahilag nai ɠagattag qettaglagnu henana, ag Israel dilag Kayak onigppa hetteb. Ag amu hetteb, amge ag doyak diig genabib, ag amuppa ii hetteb. Ge! Ag kobol genab tutukkuppa ii hetteb. Amu ag Jerusalem, aab amuam Yawenu tituanak daatte amu, ag aab amunu, “Am ihinig aab okkai,” atteb. Ag anam anana, ag Yawe Nukka Ɠagattag Oh Ele, ag nuhig ehanittakppa ena oittebnu ele atteb. Ag amu hetteb, amge O Jakop buɗub, laa ahilagnu Israel atteb amu, ag doyeg! Ao, ag Jakop buɗub, ag alalag Juda amu, ag doyeg!

Jeremaia 44:26

Amu Yawe atte. “Ag amu hetteb amunu, ag Juda oh, ag Isip uɗin daatteb ele, ag Yawenu nai imu doyeg! Nug atte. ‘Da onil okkai ele awen, amuppa da dahil nai ɠagattag qetten, da attem. “Ag oolagppanu laa nug baula da onil awa, nuhig nai laa ɠagattag qedakkunu ha, ‘Naɗi Yawe bau daatte, genab amubia,’ ana, amuppa nai nuhig ɠagattag ii qettama,” ’ ” awa atte.

Josua 5:9

Haen ag beɗulkad pahaette amu, Yawe Nug Josua amegppa aum. “Gemu da hei, Isip danab ah dilag uug ag qaɗelagppa dayom amu, uug amuam iitta meum,” awa aum. Nug anam aum amunu, aben am onig Gilgal ataɗppig. Ag anam ataɗeg, onig amu gemu ⌊nai imu yaak haenppa⌋ ele daatte.

Josua 7:2

Amu Israel ag Jeriko eɗidna malaeg, Josua nug lokkumakppa atu italak danab maatte, aab onig Ai, Betelnu laih aam bedeppanu daatte, Betawen guguittak appa, atu italkkulagnu, “Ag gona, wan atu amu italeg!” ana, nug he goppig. Josua nug anam ana heum amunu, ag gona, Ai italppig.

2 Stori 17:4

Iitta. Nug amu ii heum, amge nug mameg ⌊anukkanu⌋ Dawitnu Kayak antta dim lamidkkunu Nug mattia, nug nuhig ɗo dim lamittom. Nug Israel danab heppig bia ii heum.

2 Stori 21:11

Amu Jehoram nug Juda dilag qauko nakok igippa kayak hambuppuak dilag mettid lag nakok bappalattom. Nug amu ha, nug he, Jerusalem danab ah, Juda danab ah laa ele ag kayak amu noolagppa dup nona binalag meppig. Nug Juda danab ah ib eheɗppa omalatte goppig.

Hosea 12:1

Israel danab ah ag am danab laa nug ulah lanan daakkunu hette bia hetteb. Ao, ag am danab laa nug kaɗag ulah deɗ ohppa dim lamittattaib hette bia hetteb. Ag hambuppuak kuɗumnab mattinna; ag danab ah guittak nau mauhnoak madatteb. Ag nug tituana nai qakkak Asiria danab ah ele heeg; ag ⌊Isip ahilagnu, “Ig lainig,” dooglagnu, ag amu daden nob daakkunu⌋ olip goɗen meeg, Isip gotte.

Hosea 12:12

Jakop nug awag baɗitta, nug oola ukka, Aram wanppa dayom. Nug appa dayaya, nug ah laa aweb, wau daakkunu haaha, nug danab laanu maɗi nid daya, nuhig uɗat heum. Ao, nug ah daden mekkunu, nug danab laanu sipsip gumattom.