Hosea 2:19 - Nobonob Baibel

¹⁹ Da geha heppi, ag Israel, ag dahilad danab ah, da waal ⌊bia⌋, hanhan daaglag. Ge, da anam hein, da genab tutukku hak kobol, nai doya mala hettoɗia epeɗia elele mettak kobol, oo mauhaknab kobol, oo bodoetta le mak kobol,

Hosea 2:19 Referans Kwoze

2 Korint 11:2

Kayak Nug ig danab ihinignu huana dabmaama, Nug nukka ig nuhignu tituanikkom, amubia da ele ahilagnu anamib dabmettem. Ao, da ah makkun, oiyak nuhig oppiakib, nug mameg danab laanu ah daakkunu nug baeg aɗatte bia, da ag oppiak amubia daabppeg, ag Kristus medakkulnu hettem.

Revelesen 21:2

Anam amu, da aab okkai, am Jerusalem bau Kayaknu tituanak daatte, aab amuam hab aabppa, Kayak toppanu neene anidmi. Nug am ah bau nug danab aokkunu bala mettom, amubia.

Aisaia 54:14

Ag genab tutukku hak kobol dim lamidnana, tutukku, ɠagattag anamib daaglag. Yawe Nug heeb, keeke laa ag baɗaglagnu ii daama amunu, eheɗ hak laa eppelagppanu amu, eheɗ hak amu ahilagppa bekkunu aib dabmeppig. Ao, Yawe Nug heeb, baɗak nau ag gukkuattak ii daama amunu, ag baɗak naunab ahilagppa bekkunu aib dabmeppig!

Sam 85:10

⌊Qinob, Kayak Nug heeb,⌋ oo mauhaknab kobol, amu oo metta ii uuak kobol ele aa ouqak miagib daaglah. Ge, genab tutukku hak kobol, amu maɗoɗ kobol ele am tamaniya daaglah.

Rom 7:4

Amunu O lailad, gemu ag laa, Nug mauhe, Kayak he, Nug eɗua hibaittom ele amu, nuhig daaglagnu, ag ig ele oh ig Kayaknu kobol ena hekkunignu, ag Kristusnu mauhakppa, danab laa mauha ɗo waappa ii daatte, amubia ag ɗo waappa ii daatteb.

Jon 3:29

Amunu amu da am nid baunu kadoi bia. Nid bau nug ah aotte amu, ah amuam nuhigib, amge kadoi nuhig nug layag ah aotte doya, maɗoɗppan gamag ahak dootte. Nid baunu kadoi nug maɗoɗppan gamag ahak amu dootte, amubia da Jesusnu oolppa maɗoɗppan gamag ahak okkainab doottem.

Esekiel 39:29

Amu da baula dahilad danab ah ii dimadapa. Iitta. Da dahil Ouɗi ahilagppa daakkunu madappi, ahilagppa daakku.’ ” Naɗi Yawe Nug anam atte.

Aisaia 1:27

Yawe Nug nai doya mala hettoɗia epeɗia elele mettak kobol dim lamitta heebeb, Juda danab ah ag laa eppegppa dayaknu qagaiettakppanu eɗua uhuqak ha madakku. Nug genab tutukku hak kobol dim lamitta haaha, Sion danab ah, ag oolag eɗuom ele, Nug ag laa eppegppa dayaknu, qagaiettak amuppanu uhuqadkku.

Joel 3:20

Isip, Edom ele aa anam daaglah, amge Juda wanppa amu, danab ah ag hanhan appa daaglag. Ao, Jerusalem appa amu, buɗub buɗub doobob, danab ah ag appa daaglag.

Aisaia 54:5

Aɗinu ag amu hekkulagnu elele daaglag? Laa Nug ag hattom ele, Nug ag gamulag daatte. Nug onig am Yawe Nukka Ɠagattag Oh Ele. Ao, aɗinu ag amu hekkulagnu elele daaglag? Am, Israel dilag Kayak Oppiaawak Ele, Nug ag Juda, ag laa eppelagppa dayaknu qagaiettakppanu eɗua uhuqak ha madatte. Nug wan oh dilag Kayak daatte.

Aisaia 54:6

Amu danab nug wau ⌊eheɗ he,⌋ uuitte, wau nug nukka laih oo uug nau elenab dayeye, gamu nug onigppa e, eɗua do, ewau daattep, amubia Yawe Nug ag Juda, ag onilagppa ekku. Ao, ah makkunnab gamu awa, ⌊eheɗ heum⌋ amunu, gamu uuitte, ah ukke, nukka dayeye, gamu nug onigppa e, eɗua do, ewau daattep, amubia Yawe Nug ag onilagppa ekku. Amu ahilag Kayak Nug atte.

Esekiel 16:8

Na anam ena mena dayeye, dimppa da baula laih gokkulnu na daameppa uɗie, da neekki ukke, na anitten, na elele ena mena, na danab aokkutnu elele daame anidmi. Da anam anitte, da na dahil ah daakkutnu tituanitten, bam iitta daamnanu lamen mette, da nahip danab daakkulnu dahil nai ɠagattagnab qetten mattii, na da ele ewau daagnihnu i nug tituanɗa nai qakkaɗa, na dahil aakku daame.’ ” Naɗi Yawe, Nug anam awa atte.

Hosea 14:4

Amu Yawe Nug ⌊danab anam unuqidkkulagnu dimppa inam akkunu⌋ atte. “Dahil oo nauhak am iitta ma, qeta awom. Qeta awom amunu, da heppi, ag baula da di-ii-meɗona, kayak hambuppuak laala ii dim lamidmana. Ao, da oo qak iittappa ahilagnu ool mauhkku,” awa atte.

Sekaraia 13:2

Yawe Nukka Ɠagattag Oh Ele Nug atte. “Deɗ amuppa da heppi, Juda wanppa danab o ah laippu laa nug kayak hambuppuak noobppa dup noa binag ii mema. Diig amunu amu, danab ah ag kayak hambuppuak laippu laa onignu ii dabmemana; oh am daulag atikku. Da heppi, propet ouɗi nau dilag ehanittakppa uɗat hetteb, amunu laippu laa, amu ouɗi nau amu oolagppanu laippu laa ele Juda wanppa iinab daama.