Hosea 2:13 - Nobonob Baibel

¹³ Geha da nug bu medakkul. Nug kalu danab ile muttuɗig enanag bette ele, nug kayak hambuppuak Bal iɗu iɗu dilagnu ile muttuɗig oum. Nug eppeg doɗoppan ring maatta, beɗunu bala laala ele maatta he, nug danab ele niippig, nug ag ele baula niiglagnu mattialatta heum, amge nug dahilnu daug atiom amunu, da nug bu medakkul.” Yawe anam mattia aum.

Hosea 2:13 Referans Kwoze

Hosea 13:6

Amge Israel dilagnu amu, da hei, ag Kanan wan aon daanna, ag ee kuɗum ele daan, ag laeg oolag aɗom; ag oolag aɗe, ag dada danab beppig. Ag anam bena, ag dahilnu daulag atiom.

Ikki Danab 3:7

Aakku Israel ag Yawenu neekkakppa eheɗ heppig. Ag Yawe, ahilag Kayak, ag Nug daulag atie, ag kayak hambuppuak Bal iɗu iɗu, Aserah iɗu iɗu ele waalagppa daan, oɗelag dim lamidppig.

Hosea 13:1

Anukka, Israel dilag huu okkai laa, ag Israel dilag huu okkai Epraim dilagnu baɗan hahaɗppig. Ag Epraim dilagnu, “Ag binalag ele,” dooppig. Amge danab ah Epraimnu ag kayak hambuppuak Bal noobppa dup nona binag mena, hipunin heppig amunu, ag nauhppig daatteb.

Hosea 11:2

Da amu hewoya, haen kuɗum laa ele da ⌊propet oɗelagppa⌋ Israel danab ah ag uɗin, da dim lamiɗkkulagnu onilagppa emi; amge ag da anam heiyi, ag da oɗel ii doon, ag da dimeɗan, uuiɗna tuɗidna umanab goppig. Dahilad danab ah ag doɗ main, kayak hambuppuak Bal iɗu iɗu madappig. Ao, ag kalu danab ile muttuɗig enanag bette ele ahilag kayak hambuppuak dottolkad binalag mekkulagnu main medappig.

Jeremaia 7:9

Ag yab hetteb. Ag layag qe mauhak hetteb. Ag ewau pakkua gappai hak kobol hetteb. Ag hettoɗiakppa nai hambuppuak aon, nai amunu, ‘Am nai genab,’ ahilag naippa ɠagattag qettan maditteb. Ag kayak hambuppuak Bal noobppa daanna, kalu danab ile muttuɗig enanag bette ele maina, nug medatteb. Ag kayak laala ele, ag anukka kayak amu ii dooppig, ag kayak amu ele dim lamadtteb.

Hosea 9:7

Israel dilag bu awak haen aakku uɗitte. Ao, ahilag noob awak haen aakku uɗitte. Israel danab ah ag amu doyeg! Ag Israel, ag hipunin kuɗum henana; ag Kayak, nuhikkud danab ele dilagnu kekeɗ mattan daatteb amunu, ag propet dilag, “Ag am ootot,” atteb. Ao, danab Kayak Ouɗi ehanatte, ag nai maditteb ele, ahilagnu ag, “Ag kaaka,” atteb.

Hosea 8:14

Da, Yawe, da Israel danab ah hattami, amge ag dahilnu daulag atie, ag king laulkad okkai okkai buualadppig daatteb. Juda danab ah ag ⌊kekeɗnu baɗan,⌋ ag aab kuɗumppa aɗ keeke heppig. Ag anam heppig, amge da heppi, aab dittia, ahilkad aab okkai, amu ahilkad aab okkai aɗ ɠagattagnab ele eokku.” Yawe Nug anam awa atte.

Hosea 4:6

Dahilad danab ah ag da ii dooiɗtteb amunu, laa ag heeg nauhtteb. Mana mettak danab ag, ag da dooiɗaknu uuppig amunu, gemu da ag, ag dahilad mana mettak danab daaglagnu geɗadttem. Ge, ag da, Kayak, ahilag Kayak, ag dahil ɗo nai ii dabmeppig amunu, da geha nid naunau ahilkad ii dabmadapa.

Hosea 4:13

Danab dahilad ag qauko attan kayak hambuppuak dottolkad noolagppa, ag amu dilagnu mana mettak hetteb. Ao, ag qauko nakokppa tena, ad ok, ad popla, ad terebint ele waalkadppa lokko ena daatte, diig amunu ag aguppa daanna, ag kalu danab ile muttuɗig enanag bette ele, ag kayak hambuppuak dilagnu ilatteb. O dahilad danab ah, diig amunu ag aɗelkad ag ib baag ah betteb. Ao, ag ahipalkad, nid danab waalkad amu, ag laa ele ewau pakkua gappai hak kobol hetteb.

Hosea 2:7

Geha da anam heppi, ag anilag nug danab nug ag ele niippig, nug ag ele baula niiglagnu dim dim lamadkku, amge nug ag aɗalatta diikkunu elele iitta daakku. Ao, nug danab nug ag ele niippig, nug ag ele baula niiglagnu mattialadkku, amge nug ag anadkkunu elele iitta. Da anam heppi, nug, ‘Da danab dahilnab ele amu, i gemu da daattem imu eɗittak enanag daamuɗ amunu, da eɗue, nuhigppa gokkul,’ akku.

Hosea 2:5

Ag anilag nug laa ele oiyya, ag menuattom; ag anilag nug nid amu uɗa nak nau guittak ele kobolppa nug oo noum. Ag anilag nug aum. ‘Da geha danab laala, da ahilagnu ool hette amu, da ag ele niignig. Da geha ag ele niitta, ag geha da ee, le ele, lamen sipsip uɗigppa hak, linenppa hak ele, olip goɗen, amu wain ele meɗaglag.’ Nug anam aum.

Esekiel 23:35

Anam amunu, Naɗi Yawe Nug inam atte. “Na dahilnu daut atie, da dimeɗan autnanab aonna, na gappai heeb baknu kobol henan, ib baag ah kobol ele heme amunu, na amunu bu aokkutoitte.” Yawe Nug anam atte.

Esekiel 22:12

Ag Jerusalem danab ah, ag oolagppan laa ag laa men doɗo mattaeg, ag laa aqaeg mauhtteb. Ag Jerusalem danab ah, ag lailkad lon mattan, ag lonnu intres digdig aotteb. Ge, ag gane medappig, amu eɗittak laa eɗun aotteb. Ag Jerusalem danab ah, ag mudippan laippu ele keeke lokkumakppa awaknu duttuna hak kobolppa ag eppelagppanu men doɗo keeke aotteb; amuppa ag keeke ii aolob aotteb. Ge, ag Jerusalem danab ah, ag dahilnu daulag atiom oitteb.’ ” Naɗi Yawe Nug anam atte.

Esekiel 16:17

Bala gol, silwa eleppa hak da na mettami amu, na bala amu aona, laa mettai, nug kayak hambuppuak dottolkad, danab beɗu bia, nug amu babaitta mette, na ag noolagppa dup nona binag mak hena,

Jeremaia 23:2

Yawe, Nug Israel dilag Kayak, Nug anam atte amunu, Nug gumak danab ag danab ah gumadtteb, Nug ag amelagppa inam atte. “Ag danab ah dahilad tutukku dabmattaglagnu daatteb, amge ag anam ii hetteb. Iitta. Ag dahilad sipsip amu, ag lamatteg, ag pitaiettan laih laih gotteb. Ag gumattak uɗat ena ii hetteb amunu, da Yawe, da ahilag eheɗ hak anidmi. Ag kobol nau heppig amunu, nob mekkulnu amu, da ahilag eheɗ hak amu nob elelenab ag madakkul.

Jeremaia 18:15

Dahilad danab ah ag ele anam bia alet dabmeɗan oilob, amge iitta, ag dahilnu daulag atiom. Ag ahan, kalu danab ile muttuɗig enanag bette manan, kayak hambuppuak madatteb. Kayak hambuppuak amu ag heeg, dahilad danab ah ag nena qena daatteb. Ao, kayak hambuppuak ag heeg, dahilad danab ah ag kobol ena, anukka ippunittak amu aoppig amu, ag ib amuppa elele ii oitteb. Ag heeg, dahilad danab ah ag ib ena apiɗidna oitteb. Ao, ag ib nauppa oinna, ib enappa ii oitteb.

Jeremaia 11:13

O Juda danab ah, ag kayak hambuppuak kuɗumnab noolagppa dup nona binalag metteb. Ag ahilag wanppa aab gane daatteb, ag kayak hambuppuak ebqak amubia noolagppa dup nona binalag metteb. Laa amu, kayak hambuppuak laa onig Bal, kayak amu dim lamattaknu ɗo am uɗa nak ele, ag kayak amu noobppa dup nona binag mekkulagnu ag nuhig qaɗab kuɗum bappaidppig. Jerusalem aabppa ib gane daatte, ebqak amubia ag nuhig qaɗab bappaidppig.” Yawe Nug anam awa atte.

Jeremaia 2:32

Ah laa nug nuhig ewau matulak awaknu bala daug ii atitte. Ao, ah nug ewau matulak awak haenppa aɗi bala meum am dabmette, daug ii atitte. Nug anam hette, amge ag Israel ag dahilnu haen elabnab daulag atie, dahilnu nakok laa ii dabmeppig.

Aisaia 17:10

Aɗinu? Ag ⌊Juda, ag⌋ Kayak ahilag, Nug ag ehanatte, ag padal ii metteb ele amu, ag Nug daulag atiom. Ao, ag ahilag Kayak, Nug kekeɗ aqamanu ehanattak ahilag, Nug am aab aɗ ɠagattagnab ele ahilag bia daatte amu, ag Nug dab-ii-metteb. Anam amunu, ag muɗi grep ena ena aon eppaglagtai. Ao, ag grep aben laihnu aon eppaglagtai. Ag buttua eppelagppa eppan heppeg, qaɗu buttua amuppaib belo. Ao, deɗ amuppa buttua ag eppan heppeg, haɗag ele qelo. Ag anam heppeg belo, amge meu awak haenppa keeke amu oh am keeke hamu. Ag grep meu laa ii aomna. Iitta. Ag meu diig aɗit laa, meu amuam oɗe digdig, amu guittak ii bodoedatte ele, ag meu amu aakkuib aoglag.

Sam 106:21

Ag Kayak, Nug ehanatte, ag padal ii meppig ele, ag nuhignu daulag atiom. Ao, ⌊ag ehanadkkunu⌋ Nug keeke okkai okkai Isip appa heum, amge ag nuhignu daulag atiom.

Sam 106:13

Amge ag pahanab Nug aɗi heum, ag amunu daulag atiom! Ag ulum nai mattaglagnu Nug ameg ii meppig!

Sam 78:11

Ag Nug aɗi keeke heum amu, ag amunu daulag atiom. Ao, ag Nug ahilagnu kobol danab hekkunu elele iitta heum amu, ag amunu daulag atiom.

Job 8:13

Amubia amu, danab ag Kayaknu daulag atitte, ag ele paha iitta metteb. Ao, danab ag Kayaknu, nuhig haknu ele uuak kobol dim lamidtteb amu, ag ena bena daaglagnu dabmak aɗan oiglagnu elele iitta.

2 King 21:3

Nug mameg Hesekaia aabaabppanu mettid lag nakok loppaɗom amu, Manase nug lag amu eɗua buualattom. Nug kayak hambuppuak Bal binag maknu qaɗab ele hatta, nug kayak hambuppuak Aserah dabmekkulagnu biidod ele heum. Amuppa, Manase nug Israel dilag king Ahap heum, amubia nug ele amu heum. Manase nug anam ha, nug ele aam, kalam, hoɗopai ele noolagppa dup noa binalag meum.

2 King 10:28

Aakku Jehu nug Israel aɗi ag kayak hambuppuak Bal noobppa dup nona binag meppig, ahilag kobol amu nug ib amuppa he, ag baula Bal noobppa dup nona binag ii meppig; ag uuppig.

2 King 1:2

Amu deɗ laappa Samaria appa King Ahasia nug laug oo attan amuppa ta dayom. Dayaya, nug gililppa ulah ibuppa daya, ad naunau, keeke laa oɗe amuppanu na qemanu lo akkak bia oɗe amuppa daappig amu, keeke amu qiie, nug attannu na qa ukka wanppa noa o, beɗu guittak awom. Anam amunu, nug eɗua ena daakkutai, o iittatai, amu dabmaama dookkunu, nug danab laala maatte, Pilistia wanppa Ekron aabppa gokkulagnu onilagppa eppig. Nug e uɗin daaegeg, nug amelagppa aum. “Ag gona, Ekron dilag kayak Balsebup, da eɗuen ena daakkulte amu oɗ metteg!” awa aum. Nug anam ana, nug he goppig.

1 Samuel 12:9

Amge ag Yawe, ahilag Kayak, ag Nug daulag atie, Yawe Nug he, Hasor dilag ban daup ikki Sisera, nuhikkud daup ele, amu Pilistia dilag daup, amu Moap dilag king, nuhikkud daup ele, ag oh haen anen anen uɗin, Israel ele ban henana, ag Israel eɗadppig.

Ikki Danab 10:6

Amu dimppa, Israel danab ah ag Yawenu neekkakppa baula eheɗ heppig. Ag kayak hambuppuak Bal, Astoret ele iɗu iɗu waalagppa daan, oɗelag dim lamidnana, ag Aram dilag kayak, Saidon dilag kayak, Moap dilag kayak, Amon amu Pilistia ele dilag kayak ele, ag kayak hambuppuak amu oh ele waalagppa daan, ag oɗelag dim lamidppig. Amuib iitta, ag Yawe uuidna, Nug waappa daya, oɗe dim lamittak uun autnanab aoppig.

Duteronomi 32:18

Israel danab ah ag laa Nug hanhan ɠagattag daatte, Nug ag mamelag beum daatte ele amu, ag nuhignu dup noa binag mak kobol ii heppig. Ao, ah ag nid menuadtteb bia, Kayak Nug he, ag huu laippu beppig daatteb, amge ag nuhignu daulag atiom.

Duteronomi 6:12

ag Yawe daulag atimanu dabmeig! Nug ag Isip, ag appa begbeg maɗi nid daaegeg, Nug appanu diia, omalatte uɗippig.

Eksodas 32:34

Amu na gona, na danab ah diin, aben da na amenppa ami amu, na amuppa gokkut! Doye! Engel dahil nug geha ibppa ag noolag awa, anuqa omaladkku, amge dimppa bu mattak haen tutukkuppa beeb amu, da geha uɗie, da danab ah ag hipunin heppig ele am bu madakkul,” awa aum.

Aisaia 65:7

Da ahilag hipunin, ag mamelkad aɗi ag hipunin amu heegeg, ag tuɗidna heegeg uɗie, gemu ele hetteb amu, da amu ohnu nob nau elele ag madakkul. Da ag doɗ main, kayak hambuppuak qaukoppa mattanna, ag qauko nakokppa dahil nai tappaeg neene, ⌊appa ele ag doɗ main, kayak hambuppuak madappig⌋ amunu, da bu eheɗ ahilag hak eleleppa ag madakkul.” Yawe Nug anam atte.

Esekiel 16:12

Da amu heine, da gagah na noomppa mein, bid na dautppa ele mein, haɗ neekkak enanag ele na ikkinppa memi.

Jeremaia 7:34

Da heppi, Juda wan am hele-ettak daakku amunu, Jerusalem appa, Judanu aab laa ohppa ele oo gamag ahak laa ii daama. Danab ah ele ag oo gamag ahak doon, ewau matulak ii aomna.” Yawe Nug anam awa atte.

Gayak Nai 1:4

Hobul dayaknu haen epeɗiakppa amu, gemu laa nug Sion ta, hobulppa ii daatte; amunu ib oh Sion tetteb ele, ib amu danab daalob, ag mahiak okkai helob. Jerusalem ooppa ukkaknu aɗ od ohppa gemu danab ah doa wanak ii hetteb. Aben amuppa danab laa ii daatte. Juda dilag mana mettak danab ag aiqakkanna daatteb; ah makkun ag mahitteb. Juda danab ah oh ag danab ooppa kahipan toɗe, mauhak bia dootte, amubia ag uug naunab dootteb.

Gayak Nai 5:14

Juda dilag ikki danab ag gemu ikki danab dilag qagmak aben aab ahilkad odppa daatteb, ag appa ii daatteb; nid bau ag gemu ahi laa ii edatteb.

Amos 8:10

Ag gemu hobul dayaknu gamag ahak dootteb, amge haen amuppa da heppi, ahilag hobul dayak haen anen anen am gamag ahak haen ii daamna. Iitta! Mahiak haen daaglag. Ao, gemu ag ahi edatteb, amge haen amuppa da heppi, ag ahi ii ettamna. Iitta. Ag gayakib gaaglag. Haen amuppa da heppi, ag oh oolagppa uug nau doon, lamen heɗiag ele takkan, ag ikkilkad uɗug hoiglag. Yo, da heppi, haen amuppa ag nid danab laippuib mauhe, anig mameg mahittep bia mahiglag. Ge, haen amu gogppa tak, amuam deɗ nau ninig ele daatte bia daakku,” awa atte.