Hosea 12:10 - Nobonob Baibel

¹⁰ Da ⌊ag nau aomnanu, da⌋ dahil propet amelagppa nai mattimi. Da hei, ag tulegleg kuɗum anidppig. ⌊Da amu hein, da hei, propet ag uɗin, ag amelagppa mattiegeg, ag dooppig⌋. Ele amu, da propet keeke danab ag dootteb ii dootteb ele ouaqatta, ippunittak nai kuɗum ippuanatti, ag mattiegeg dooppig.” Yawe Nug anam aakku atte.

Hosea 12:10 Referans Kwoze

2 King 17:13

Yawe Nug Juda, Israel ele, ag nau aomnanu nai, nuhikkud propet oh oɗelagppa mattom. Nug ag oɗelagppa, Juda, Israel ele dilagppa inam aum. “Ag oolag eɗueb, ahilag kobol nau am uueg! Ag dahil haknunab nai, am ɗo nai ele, da ag mamelkad aɗi dim lamidkkulagnunab mattoya, dahilad maɗi nid, propet, da ag oɗelagppa ele ag amelagppa mehuqmi amu, ag amu dim lamitteg!” awa aum.

Esekiel 20:49

Yawe Nug anam a amu, da ami. “O Naɗi Yawe, gadon, na nai amubia laala ele meɗae, da mattimi, amge Israel danab ah ag tuɗidna, dahilnu, ‘Nug keeke danab ag dootteb ii dootteb ele ouaqata ippunittak nai aakkuib iite maditte,’ atteb amunu, da attem hein, nai amubia baula appi dooglag,” awe ami.

Joel 2:28

Yawe Nug atte. “Amu dimppa da dahil Ouɗi danab ah diig oh dilagppanu ⌊danab ah laala⌋ madakkul. Da madappi, ag bekkalkad, aɗelkad ele ag propet nai madippeppeg, ahilkad danab kaino ag tul niiakppa keeke anidppeg, ahilkad danab bau ag tuleglegppa keeke anidkkulag.

Jeremaia 19:1

Amu Yawe Nug da, Jeremaia, da amelppa aum. “Jeremaia, na waa keeke hak danab laugppa gona, appa na hinai laa daden mewona, na Israel dilag ikki danab laa, amu mana mettak danab laa ele diin,

Jeremaia 7:25

Haen ag mamelkad aɗi ag Isip uun uɗippig uɗie uɗie, gemu batak, haen amu oh da hanhan propet danab dahilad ag dahil nai appeg dooglagnu maatti uɗippig

2 Korint 12:7

Tatam danab laanu mattimi amu daib. Paradisppa amu Kayak Nug da keeke ippuniɗom ele, amuam keeke okkainab. Amunu diig amunu Kayak Nug da dakka onil huan humapanu Nug da beɗulppa keeke laa, qaun bia, da yaaiɗkkunu meɗom. Amuam Satannu maɗi nid, nug da dakka onil huan humapanu tappiɗeb nekkulnu daatte.

2 Korint 12:1

⌊Korint danab, ag beɗulagppa⌋ da dakka da danab nug nukka onig humak hette bia hekkulnunab daatte. Genab, onig humak kobol am ig ii ehanigtte, amge da tuleglegppa keeke lokkumak laala, Naɗi Nug da amelppa miag atiom amu, da amunu ele madikkulnu iikku hettem.

Aposel 2:17

Kayak Nug inam Joel amegppa a doya yom. ‘Dimppa, haen malakkunu heebeb, haen gamag amuppa da dahil Ouɗi danab ah diig oh dilagppanu ⌊danab ah laala⌋ madakkul. Da madappi, ag bekkalkad, aɗelkad ele ag propet nai madippeppeg, ahilkad danab kaino ag tul niiakppa keeke anidppeg, ahilkad danab bau ag tuleglegppa keeke anidkkulag.

Amos 7:14

Amasaia nug anam mattia male, aria Amos nug nai nob ma aum. “Da daden aokkulnu propet uɗat ii hettem, amu da ele propet dilag huu laa oolagppa ii daattem. Aɗinu? Da ehanittak aokkulnu, da sipsip gumak danab daye, da ad fig ele atognoatte dabmatten daami.

Hosea 3:1

Aakku Yawe nug da Hosea, da amelppa aum. “Danab laa nug na waatnu oo hette, nug nug ele oittep. Na waat nug am ah ewau pakkua gappai hette me, na nug omalna, nagatop uɗin, na nuhignu oot mauhaɗ! Da Yawe, da Israel danab ah ag kayak laala noolagppa dup nona binalag metteb, ag keeke ena ena kayak amu ahilag daakkunu hamu madatteb me, da Israel dilagnu ool mauhtte. Aakku, da hettem bia amu, na waatnu oot mauhaɗ!”

Jeremaia 25:4

Ag dahil nai aakkuib ii dooppig. Iitta. Yawe Nug nuhikkud maɗi nid, ag propet, Nug ag laa kuɗum ele haen kuɗum maatte uɗin, ag amelagppa nai madippig, amge ag daulag human, ahilag nai ii doon, ahilag nai ele dab-ii-medappig.

Jeremaia 19:10

Yawe Nug anam awowa, Nug tuɗitta, da amelppa aum. “Jeremaia, na amu oh mattin malona, Juda dilag ikki danab aɗi na diin gokkut ele anidppeppeg, na hinai amu oppe aoɗaɗ!

Nehemaia 9:30

Ig mamenkad aɗi ag anam heegeg, maɗ kuɗum na oot bodoette, bu ii mattame. Ag oolag eɗueb, na dim lamidkkulagnu haen mattame. Nahip Ouɗi Nug propet danab ehanatte, na propet danab amu oɗelagppa danab amu daulag batame. Na anam heme, amge ag dab-ii-medappig amunu, na hee, ag kekeɗ ag taliliadna daappig ele eppelagppa daappig.

1 King 19:10

Yawe Nug anam oɗ mette, Elaiya nug nob ma aum. “O Yawe Kayak Nakka Ɠagattag Oh Ele, da na oɗen haen oh dim lamidkkulnu yag-nab-bak doyen hettem, amge Israel danab ah ag na hee, na ag ele ag nug tituanna nai qagappig amu, ag nai amu tippalna ii dim lamidtteb. Ag amu henana, ag qaɗab nahip ele loppaɗna, ag nahipad propet laa oh ele qep elabppa aqaeg mauhppig; da dakka iikku daattem, amu gemu ag da ele iuppeg mauhkkulnu mattiɗtteb,” awa aum.

1 King 17:1

Elaiya nug am propet laa. Nug appag diig am aab onig Tisbe. Aab amuam Gileat wanppa dayom. Haen laappa Elaiya nug King Ahap gumitta ukka, amegppa inam aum. “Yawe, ig Israel, ihinig Kayak, da nuhig maɗi nid daattem, amu Nug genab bau daatte, genab amubia amu, geha gu, baito ele maɗ laala wanppa baula ii nema. Anam dayebeb ukkeb, geha da appi, amu nekku,” awa aum.

1 King 13:1

Aria, Jeroboam nug mana mettak hekkunu qaɗab Betel appa ha, aguppa mana mettak hekkunu ukka dayeye, Kayaknu propet danab laa Juda wanppanu aha ukke, Jeroboam nug qaɗab amu guguitta hibaitta dayeye, propet amu nug Jeroboam gumitta teum. Propet amuam Juda danab, Yawe Nug propet amu amegppa nug Judanu aha, nug Betel gokkunu a ukkom.

Namba 12:6

Nug aum. “Aa nai dahil doyeɗ! Haen dahil propet danab laa ag oolagppa daatte amu, da Yawe, da tuleglegppa da diil, dahil nai ele nug ippunidttem, tul niiakppa da nug amegppa nai madittem.

Esekiel 17:2

“Danab bekka, na keeke danab ag dootteb ii dootteb ele ouaqata ippunittak nai imu, am dottognu naippa keeke ippunigtte amu, na nai imu Israel danab ah amelagppa anan,

Eksodas 20:2

“Da am Yawe, ahilag Kayak. Da ag Isip, ag appa begbeg maɗi nid daaegeg, da appanu diie, omalatti uɗippig.

Lewitikas 23:42

Am hobul dayak amunu deɗ eblaih aɗit amu ohppa amu, ag Israelnab danab ah, ag peh waappaib daaglagoitte.

Hosea 13:4

Amu Yawe Nug atte. “Da Yawe, ahilag Kayak, da ag Isipnu diien, omalatti uɗippig. Ag laanu, ‘Nug Kayak,’ aib appig. Ao, ag laanu, ‘Nug danab ah ehanatte, padal ii metteb,’ aib appig. Iitta! Daib.