Hosea 10:11 - Nobonob Baibel

¹¹ Israel danab ah ag gemu attem daatteb, ag amubiaib daaglagnu hetteb. Ag am makau balat laa, nug mameg nug ee aeg mumuɗaknu uɗat ippunitte, amu haknu oo hette bia daatteb. Ag anam daatteb amunu, gemu amu da heppi, Israel danab ah ag keeke ag hekkulagnu oolag ii hette ele amu hekkulag. Ag makau balat nug doɗnu duugppan tuqai uug ele nug baag enanagppa qakkak daye, nug wagai maama, wan buuaknu keeke tuqai amuppa eeɗe, wan buutte bia daaglag. Danab nug makau balat duttune, nug wan buuaknu keeke eɗaɗa, bahi yaak guittak ele dootte bia, Israel danab ah ag uug nau anam aakku dooglag. Ao, danab laa nug he, makau balat nug wan buua buua, bahi yaatte bia, Juda danab ah ag guittak dooglag. Genab, danab laa nug he, makau balat laa wan ɠagattag buutte bia, Jakop buɗub ag uug, guittak ele digdig dooglag,” awa atte.

Hosea 10:11 Referans Kwoze

Hosea 4:16

Israel danab ah ag oɗe dim lamidmananu dabmak ahilag ɠagattag eppom daatte. Ag makau balat laa oɗe dim lamittaknu uua, nuhig dabmak ɠagattag eppe daatte bia daatteb amunu, Yawe Nug ag aɗi keeke ag bau ena daaglagnu madakkunu elele iitta. O gadon, danab nug sipsip gaiɗ hibguitta ii hette ee medette, ena daakkunu elele, amge Yawe Nug amubia Israel dilag anambia hekkunu elele iitta.

Jeremaia 50:11

Amu Yawe Nug atte, “Ag kekeɗ ag dahiladnab danab ah eheɗ hattana, ahilag keeke aon gotteb ele, ag amunu oolag gamag ahatte. Makau balat, mameg qakkaknu muɗi uhuqe, enanag dootte bia, ag dahilad danab ah dilagppa eheɗ heppignu enanag dootteb. Ag hos dawai enanag doyaya, huana gaatte bia, ag gamag ahak doon etteb.

Duteronomi 25:4

Na makau okkai ebehi ele ee aeg, dappunkkeg ele piɗe piɗe daaglagnu uɗat ha, ee laabob, na aib lanak uukkunu oɗe hautna qakkame.

Rom 16:18

Danab amu ag ihinig Naɗi Kristus waappa daan nuhig uɗat ii hetteb. Iitta. Ag am beɗulagnu dabmak nau amuib dim lamidtteb. Amu oo eeɗaknu nai ittag ele, ag amuppa danab ag kobol atten am ena, kobol atten am nau ii dootteb ele amu, ag buppualadtteb.

Hosea 11:4

Da ahilagnu oo bodoettak doyak kobolppa hein; da ahilagnu oo mauhak ele doomi. Da ag kobol nau waappa daamnanu diiatti, dahilppa uɗippig; danab nug nuhig nid bahi qette bia, da ag ena daaglagnu ehanadmi.

Hosea 9:1

O Israel danab ah, ag aib gamag ahak dooppig. Ao, ag laa gamag ahak okkainab dootteb amu, ag gamag ahak amubia aib dooppig. Aɗinu? Ag ahilag Kayak ag ippuanattom bia Nug dim lamidkkulagnu uun hena, ag kayak hambuppuak dim lamidtteb; ag ib baag ah nug ee aeg mumuɗaknu abenppa uɗat nuhig haaha, men doɗo awa, gamag ahak dootte, amubia ag kayak hambuppuak dim lamidkkulagnu gamag ahak doon, kobol amunu ag oo mauhak dootteb.

Hosea 3:1

Aakku Yawe nug da Hosea, da amelppa aum. “Danab laa nug na waatnu oo hette, nug nug ele oittep. Na waat nug am ah ewau pakkua gappai hette me, na nug omalna, nagatop uɗin, na nuhignu oot mauhaɗ! Da Yawe, da Israel danab ah ag kayak laala noolagppa dup nona binalag metteb, ag keeke ena ena kayak amu ahilag daakkunu hamu madatteb me, da Israel dilagnu ool mauhtte. Aakku, da hettem bia amu, na waatnu oot mauhaɗ!”

Hosea 2:5

Ag anilag nug laa ele oiyya, ag menuattom; ag anilag nug nid amu uɗa nak nau guittak ele kobolppa nug oo noum. Ag anilag nug aum. ‘Da geha danab laala, da ahilagnu ool hette amu, da ag ele niignig. Da geha ag ele niitta, ag geha da ee, le ele, lamen sipsip uɗigppa hak, linenppa hak ele, olip goɗen, amu wain ele meɗaglag.’ Nug anam aum.

Aisaia 28:24

Dad hak danab nug dad nuhigppa wan buuawaib ii daatte. Ao, dad hak danab nug dad nuhigppa masinppa wan aduduɗak hak aakkuib ii daatte.

Jeremaia 28:14

Amu bekkunu diig am, Yawe Nukka Ɠagattag Oh Ele, Israel dilag Kayak, Nug inam atte. “Da wanppan wan ohppan danab ah ag Babilon dilag king Nebukatnesar waappa maɗi nid daan, nuhig uɗat hekkulagnu ag duulkadppa doɗnu duugppan tuqai laa aenppa hak meppi, ag nug waappa maɗi nid daan, nuhig uɗat hekkulag. Da amuib ii hepa. Iitta. Da ele heppi, doɗ dakkuɗ ele ag nug oɗe dim lamidkkulag,” awa atte.

Jeremaia 46:20

Amu Yawe Nug atte. “Laa Yawalti uɗitteppanu uɗin, Isip danab ah eheɗ hattaglag, ag am qabuttid nau makau balat enanagnab emaltte, ag amubia hekkulag.

Maika 4:13

Amunu Yawe Nug atte. “O Juda danab ah, ag ahan, danab nug ee aeg mumuɗtte, amubia ag kekeɗ ahilkad mumuɗatteg! Aɗinu? Ag amu hekkulagnu amu, da heppi, ag makau dawai qeqeɗi aenppa hak, baeg brasppa hak ele bia daan, ag wanppan wan kuɗum dilag daup eɗadna heppeg, mumuɗak haenppa wit keeke gumu heeg, huppu huppu nette, amubia ahilag kekeɗ ag nauhna autna aoglag.” Yawe Nug anam atte. Ag amu hewona amu, ag wan amu dilag danab ah dilag keeke, ag keeke amu ib pehettak iittappa aoppig ele amu, ag keeke amu aon, Yawe eppegppa mekkulag. Ao, wan amu dilag en amu, ag aon, Yawe, Nug am Naɗi, wan atu oh gumadtte ele, ag en amu aon, Nug mettaglag.