Hibru 12:11 - Nobonob Baibel

¹¹ Danab nug ena bekkunu tolitta, bu qak aotte ele amu, haen nug aotte danab amu nug maɗoɗppan gamag ahak ii dootte. Iitta. Nug ooppa guittak dootte, amge Kayak Nug danab amu nug ena bekkunu uɗat amu ha male, danab aun nug tolitta bu qak amu pehettak aotte ele amu, nug genab tutukku hak kobol dim lamitta oiyaya maɗoɗ ele daatte.

Hibru 12:11 Referans Kwoze

2 Korint 4:17

Amu inam. Ihinigppa uug bette amuam nakokib; am haen tutu aakkuib daatte. Geha dimppa hab aabppa amu ig bau hanhan, ena dayak amu aognig. Hab aabppa bau ena dayak amuam ig beɗunignu uug nakok imu huanak eɗadtte.

1 Pita 1:6

Gemu haen imuppa ag keeke digdigppa uug dooglagtai, amge ag ehanittak okkai amu aoglagnu daatteb amu, ag amunu maɗoɗppan gamag ahak okkai aotte.

Hibru 12:10

Ig mamenkad ag ig ena bekkunignu amu haen tutuib, ag oolag anam daatte ele, amu dim lamidna toligna, bu iqappig, amge Kayak Nug ig ehanigkkunu, Nug oppiaawak daatte, ig ele amubia daagnignu tolikka bu iqatte.

Sam 118:18

Yawe Nug da ena daakkulnu bu ɠagattag da meɗom, amge Nug da mauhpanu ehaniɗe, da ii mauhmi.

Aisaia 32:17

Genab tutukku hak kobol dim lamittak am maɗoɗ heeb bekku. Ao, genab tutukku hak kobol dim lamittak am maɗoɗ, baɗak iittappa dayak ele heeb beya, hanhan daaglah.

Prowerb 19:18

Na bekkat tolidna bu mette! Aɗinu? Amuppa na nug ena bekkunu dabmak aɗan oikkutnu elele; na nug tolidna, bu mettak ii hekkut amu, na nug mauhkkunu ibppa mettem.

Sam 119:165

Laa ag nahip ɗonu oolag mauhtte ele, ag oolag maɗoɗ okkai ele daanna, ag ii nena qetteb.

Prowerb 15:10

Danab nug doyaya ib apiɗidtte, nug tolitta bu mettak ɠagattag aokku; amu danab nug daug tolitta mettaknu nau ninig ele dootte amu, nug mauhkku.

Hibru 5:14

Amge ee ɠagattag am danab kalulag ele, ahilagnu daatte. Danab anam amu, ahilag dabmak am okkai meum, ag dabmak elele aon oitteb amunu, ag kobol ena, nau ele epeɗin dooglagnu elele.

Rom 14:17

Aɗinu? Ee lanak amu le lanaknu kobol ele aa Kayaknu ɗo maɗoɗnu diig iitta. Kayaknu ɗo maɗoɗ diig am genab tutukku hak kobol, maɗoɗ kobol, amu maɗoɗppan gamag ahak kobol ele. Keeke amu oh am Kayak Ouɗi Nug he bette.

Sam 89:32

da ag bu okkai ag hipunin heppignu madakkul. Ao, ag hipunin heppignu, da bu okkai ag madakkul.

2 Pita 2:14

Hambuppuak ippunittak danab amu ag ewau pakkua gappai hak kobol hekkulagnu ah oh neekkadnana daatteb, ag hipunin hekkulagnu oolag ahakib daatte. Ag kobol amu henana, laa ag kobol tutukku dim lamittaknu bodoettak amu eeɗatteh, ag hipunin hetteb. Ag baubau awaknu hik aqeeqe men doɗo awaknu kobol amu, ag amu doon autna aotteb. Ag eheɗ laa awaknu anak waappa daanna oitteb.

Aisaia 19:22

Yawe Nug heeb, geha oɗe nau danab kuɗum aqe mauhtteb ele Isip danab ah aqakku, amge Nug anam hewowa, Nug heeb, ag eɗun ena daaglag. Ag oolag eɗueb, ag eɗun, Nug waappa daappeg, nug ahilag unuqittak doya heeb, ag eɗun ena daaglag.

2 Timoti 4:8

amu gemu nob ena da aokkulnu amu, Kayak Nug aakku meum daatte. Nob ena amu Naɗi, Nug danab ah tutukkuib epeɗiadtte ele, Nug eɗua hibaittaknu deɗppa da meɗakku. Amge dakkaib iitta. Aun laa oh ag Nug eɗua uɗikkunu tappaɗidna daatteb ele, Nug ag ele madakku.

Genesis 21:11

Sarah anam aum, amge Ismael ele nug Abraham bekka amunu, Abraham nug oo uugnab doyom.