Eksodas 8:15 - Nobonob Baibel

¹⁵ Yawe Nug anam he, og amu mauhna iitta meeg, haen ena daye, Paro nug amu antta, Yawe aumbia, nug he, nuhig dabmak ɠagattag eppom. Nug Moses, Aron ele nai apiɗ amu doya, dab-ii-meum.

Eksodas 8:15 Referans Kwoze

Aisaia 26:10

Nau hak danab ah amu, ag genab tutukku hak kobol ii dootteb. Na ahilagnu kobol ena attem hekkut am ii ehanadma. Iitta. Ag eɗun, genab tutukku hak kobol hekkulagnu iinab dabmemana. Ag danab ah genab tutukku hetteb imu oolagppa daatteb, amge ag ahilag hak nau am ii uutteb. Ag tuɗidna henana, ag Yawe, Nug dagom onig ɠagattag ele daatte amu, ag amu dab-ii-metteb. Iitta!

Hibru 3:15

Amuam nai ig geha iikku anidmut amubia. Nai amuam inam. “Ag gemu Kayak Nug nai inam atte amu, ag daulag human doyeg! Ag mamelkad aɗi ag da oɗel dim lamidmananu dahil nai tappaeg ne heeg, ahilag dabmak am ɠagattag eppom, amge ag gemu daatteb, ag aib heppeg, ahilag dabmak ɠagattag eppom!”

Hibru 3:8

“Ag mamelkad aɗi ag da oɗel dim lamidmananu dahil nai tappaeg ne heeg, ahilag dabmak am ɠagattag eppom. Ao, haen ag atu taɗakppa ma anttak da meɗappig amu, ag heeg, ahilag dabmak ɠagattag eppom. Amge ag gemu daatteb, ag aib heppeg, ahilag dabmak ɠagattag eppom.

Eklisiastis 8:11

Danab eheɗ hena, ag paha bu ii aotteb dayeb, danab oh ag hibguitta henana, kobol eheɗ digdig hekkulagnu dabmetteb.

Eksodas 7:4

Da anam hekkul, amge Paro nug nahip nai amu ii dooma. Anam hekku amunu, da geha Isip bu eheɗ mattoya, geha da anuqe ukke, Israel dilag huu oh, ag dahilad danab ah amu, da ag omaladppi, ag Isip uun gokkulag.

Eksodas 14:5

Aria, Israel ag ukkaegeg, laa ag Isip dilag king Paro amegppa, “Israel ag oolna goppig,” aeg doyom, diig amunu nug, nuhikkud ehanittak anuqak danab ele, ag dabmak ahilag eɗue, ag appig. “Aɗinu ig heut, Israel ag ahan goppig? Ig anam hemut amunu, geha ag ihinig uɗat laa ii hemana. Ig kobol kaboliaknab hemut,” aon appig.

Eksodas 4:21

Am Yawe Nug Moses amegppa aum. “Dimppa na gona, Isip tewona amu, na kobol danab haknu elele iitta, da na kobol amu na hekkutnu ɠagattag mettami amu, na amu oh Paro noobppa hekkut. Na anam hekkut amge da heppi, Paronu dabmak aakku ɠagattag ebakku. Nuhig dabmak am ɠagattag eppa dayebeb, Paro nug danab ah uuatteb ii gomana.

Revelesen 16:9

Danab ag gakkaɗak huanaknab amu anam ewatta auta awe, ag Kayak Nug keeke nau danab uug okkai madatteb amu oh gumattom ele, ag nuhignu dabittak nai anana, ag oolag ii eɗuom, Kayak binag amahlak oppiaawak ele ii medappig.

Hosea 6:4

⌊Am Yawe Nug atte.⌋ “Ag Israel danab ah, da aɗi heppi, ag kobol ena hekkulag? Ao, ag Juda danab ah, da aɗi heppi, ag kobol ena hekkulag? Oo mauhaknab kobol ahilag dahilnu am buttua buttuɗai paha oppia gotte bia iitta mette. Yo, oo mauhak kobol ahilag dahilnu am buttua baito paha qaɗaiedatte bia iitta mette.

Prowerb 29:1

Danab nug oo eɗukkunu daug batak kuɗum awawa, hamu bia doyaya, nug oo eɗumanu dabmak nuhig ɠagattag eppe oitte, nug guittak okkai awa nauhkku; nauhaknu aɗi keeke bette amu, baoliaknu ib laa iitta.

Eksodas 8:8

Anam daye, aakku Paro nug Moses, Aron ele onilahppa e uɗieh, nug aa amelahppa aum. “Aa Yawe unuqidpeɗ, Nug og ihinigppa daatteb amu, Nug heeb, iitta meppeg, am geha da nahipaɗ danab ah paɗadppi gona, ag doɗ main Yawe mettaglag,” awa aum.

Eksodas 8:14

Isip danab ag og mauhadppig amu, ag akkan, aben laalappa ameg ameg qagmatteg daanna, beɗatteg, uɗig nau ahom.

Eksodas 8:16

Dimppa Yawe Nug bau laa Moses amegppa inam aum. “Na Aron amegppa appe, nug dudqak hokkat nuhig huma, wan gappud makkuɗeb, Isip wan ohnu gappud amu geha eɗueb, peipe huanaknab bekku,” awa aum.

Eksodas 8:28

Moses nug anam a, aria Paro nug aum. “Aakku amunu, da ag uuadppi, ag atu taɗakppa gona, ag doɗ main Yawe, ahilag Kayak, ag Nug mettaglag, amge ag umanab aib goppig. Aria, ag dahilnu ele unuqidppeg, da ehaniɗaɗ!” awa aum.

Eksodas 8:29

Aria, Moses nug eɗua inam aum. “Haen da na uuitten gokkul, haen amuppa da Yawe unuqidppi, butti Nug qid na lautppanu, am nahipad ehanittak anuqak danab laulkadppanu, am nahipad danab ah laulkadppanu ele lamadkku. Nug lamadkku, amge na eɗun, ig baula aib hambuppuigme. Na eɗun, Israel danab ah gona, doɗ main Yawe mettaglagnu ib baula aib oo neme,” awa aum.

Eksodas 8:32

Qid oh goppig, amge Paro nug he, haen imuppa ele nuhig dabmak ɠagattag eppe, Israel danab ah uuatte ii goppig.

1 Samuel 6:6

Ag Isip danab, Paro ele heppigbia aib heppig. Isip, Paro ele ag Kayaknu nai dim lamidmananu dabmak ahilag ɠagattag eppe, ag ii dim lamidppig amunu, Kayak uug naunab mattom. Matte, ag heeg, Israel ag ahan, atu laih gokkulagnu goppig.

Prowerb 26:11

Qai nug bahowa, nug eɗua awa latte; amubia, danab nug Kayak dab-ii-maama ii dim lamitte ele, nug Kayak dab-ii-maama hak kobol eɗua baubau hette.

1 Samuel 6:3

Ag anam oɗ mattaeg amu, Pilistia dilag mana mettak danab, keeke doyaknu eman hak danab ele ag appig. “Ag Israel dilag Kayaknu Tituanak Nainu Kunup meppeg, nug eɗua nuhig abenppa gokkunu hekkulagnu hetteb dayeb amu, ag hamu aib meppeg ukkom. Iitta! Ag keeke laa, eheɗ haknu ofa daakkunu ele meppeg ukkaɗ! Ag anam heppeg amu, Kayak Nug heeb, ag eɗun ena daaglagtai. Ena daaglag dayeb amu, amuppa ag genab dooglag, Yawenu Tituanak Nainu Kunup ippa dayom amunu, Nug he, uug okkainab aqom,” aon appig.

1 Samuel 6:9

Ag amu heppeg, makau aɗit amu aa uɗatnu karis Yawenu Tituanak Nainu Kunup ele, aa uɗatnu karis amu eeɗya, Yawenu Tituanak Nainu Kunup Israel wanppa, aab Betsemes appa tutukku gokkulahnu Betsemes gukkuidya gokkulah dayeb amu, amuppa ag dooglag, Yawe Nug he, uug naunab imu oh ihinigppa beum. Amge makau aa uɗatnu karis, Yawenu Tituanak Nainu Kunup ele appa tutukku aoya ii gokkulah dayeb amu, amuppa ig doognig: uug ihinigppa beum ele amu, amuam Yawe eppegppanu iitta. Uug amu oh ihinigppa hamu beum doognig,” aon appig.

1 Samuel 6:12

Ag kunup aɗit amu uɗatnu karis attan maatona, ag makau uhuqateg, makau aɗit aa Betsemes tutukku gokkulahnu ib aoya tepiɗ. Aa teyaya, aa qinonob gaayya gopiɗ. Aa laih naɗiap-ppa, o laih nanehppa ii gopiɗ. Iitta. Aa Betsemes tutukku gokkulahnu gopiɗ. Aa teeheh, Pilistia dilag king tanig ele ag aa dim lamatteg, Betsemes tomppa batappig.