Eksodas 7:4 - Nobonob Baibel

⁴ Da anam hekkul, amge Paro nug nahip nai amu ii dooma. Anam hekku amunu, da geha Isip bu eheɗ mattoya, geha da anuqe ukke, Israel dilag huu oh, ag dahilad danab ah amu, da ag omaladppi, ag Isip uun gokkulag.

Eksodas 7:4 Referans Kwoze

Eksodas 11:9

Yawe Nug matu keeke amu oh ii nak haenppa Moses amegppa ⌊nai laa aum amu, nai amu aakku meu oum.⌋ Nug aum. “Paro nug geha nahip nai ii doya hekku. Nug anam hekku, diig amunu da geha uɗat ɠagattagnab ele, da amu laala Isip dilagppa hekkul,” awa aum.

Eksodas 6:6

Anam amunu, na da oɗel imu aon, Israel amelagppa inam appe doyeg! ‘Da am Yawe. Da geha heppi, ag Isip dilag begbeg maɗi nid maɗi ah ele baula ii daamna. Ao, ag Isip waalagppa baula ii daamna. Da dahil ɠagattag naɗippa, dahil bu mettak okkai eleppa ag Isip dilag begbeg maɗi nidnu qagaiettakppanu eɗua uhuqak hein madakkul.

Eksodas 12:51

Deɗ amuppaib Yawe Nug Israel buɗub huu anen anen oh diia omalatte, ag Isip uun goppig.

Revelesen 19:2

Aɗinu? Nug nuhig epeɗia nob mattak am genab, tutukku ele. Kayak Nug ib baag ah onig, ɠagattag ele nug nuhig ewau pakkua gappai hak kobolppa he, wanppan danab ah ag oolkadppa dubuttid ele daappig amu, Kayak Nug eheɗ hak nuhig amunu nob nau mettom. Nug Kayaknu maɗi nid ele aqe mauhppig amunu, Kayak nuhig eheɗ amunu nob nau eɗua mettom,” aon appig.

Revelesen 16:7

Anam a amu, da qaɗab amuppanu baag laa eewo doomi. Nug ewa aum. “Ao genab, Naɗi Kayak Nakka Ɠagattag Oh Ele, nahip epeɗia nob mattak am genab, tutukku ele,” awa aum.

Revelesen 15:4

O Naɗi, na aakkuib oppiaawak daattem amunu, aun laa ag nahipnu ebehi oh bodoetta le mak ii doon, na binan amahlak oppiaawak ele ii mekkulag? Atu atu danab oh uɗin, na noomppaib dup nona binan mekkulag. Nahip genab tutukku hak kobol am miag atia beum amunu, ag hekkulag,” aon appig.

Esekiel 30:19

Da Isip danab ah bu anam madakkul amu ag dooglag, da am Yawe.” Yawe Nug anam aum.

Esekiel 30:14

Da heppi, kekeɗ ag heppeg, Isipnu wan laih, Patros, am nauhakib dayebeb, ag aab Soan amotppeg, ewa iitta mekku. Laa amu, da heppi, kekeɗ ag heppeg, Isipnu aab okkai Tebes bu medappeg, am ele nauhkku.

Esekiel 25:11

Da heppi, Moap bu anam aona, ag dooglag, da am Yawe,” awa atte.

Esekiel 14:21

Aɗinu? Naɗi Yawe Nug inam atte. “Bu mettak nau waɗele amu oolagppa laippu bekku dayeb am uug nau ele, amge da heppi, waɗele amu oh Israel danab ah aqadkku amu, amuam uug naunab nau. Bu mettak waɗele amuam ban, enug, doɗ nau, oɗe nau danab kuɗum aqe mauhtteb ele. Da heppi, bu mettak waɗele amu oh Israel danab ah, ahilkad doɗ ele ag mauhkkulagnu aqaglag.

Gayak Nai 3:3

Ge, Nug baubau deɗ oh amun tuqan ele; bu bodok iitta meɗeɗe oittem.

Aisaia 26:9

Tuqanppa, dabmak dahil oh nahip-ppa dayeye, da na ele daagnihnu ool huan daatte? Wagɗeb buttua amu, da ouɗil na ele oh daagnihnu oo huana hette. Aɗinu? Haen na nai doya mala hettoɗia epeɗia elele mettak kobol dim lamidna, wan danab ah oh toliadna gumadttem amu, haen amuppa wanppan danab ah ag genab tutukku hak kobolnu dabmak aotteb.

Prowerb 19:29

Danab ah ag awa awa qettak nai maditteb, ag bu aoglag. Ao, danab ag Kayak dab-ii-menan ii dim lamidtteb ele, ag bu ɠagattag aoglag.

Ikki Danab 2:15

Israel ag ban hekkulagnu ahan godappig, amu Yawe Nug anam hekkunu nai ɠagattag qetta aum bia, ag ippulag oo neene, kekeɗ ag eɗadttappig. Anam heehe, danab ah ag oolagppa uug naunab dooppig.

Eksodas 10:1

Dimppa Yawe Nug Moses amegppa inam aum. “Na gona, Paro antte! Aɗinu? Da Paro, nuhikkud ehanittak anuqak danab ele ag da Yawe, da dahilnu dabmettaknu kobol danab haknu elele iitta, da kobol dahil amu ag oolagppa hekkulnu, ⌊ag anidna, ag da genabnab genab daattem dooglagnu,⌋ da hei, nuhig dabmak, nuhikkud ikki danab dilag dabmak ele ɠagattag eppom.

Eksodas 9:3

Yawe, Nug ag Isip, ahilkad doɗ amu oɗe eheɗ naunab madakku. Nug geha nahipad doɗ dad okkaippa daatteb, amuam hos, donki, kamel, makau, sipsip amu meeme ele, Nug amu oh dilagppa heeb, oɗe naɗi amu aoglag.

Eksodas 6:26

Amu Moses, Aron ele onilah amu, danab buɗub imuppanu aguppa daattep. Danab aɗit laa iitta. Aa aakkuib. Yawe Nug danab aɗit amuib amelahppa aakku aum. “Aa Israel buɗub, Isip wanppa daatteb amu, aa huu anen anenppa omaladya ukkeɗ!” awa aum.

Eksodas 3:20

amunu, geha, da kobol digdig, danab haknu elele iitta Isip wanppa dahil ɠagattagppa geha heppi, kobol amu Isip danab ah eheɗ oɗoɗadkku. Aria, anam dayeb amu, dimppa Paro nug ag paɗatteb gokkulag.

Eksodas 3:19

Ag anam akkulag, amge da doottem, laa ɠagattag, okkai ele nug Isip dilag king uug eheɗ nau ii metteb, nug ag paɗualatteb ii gomana

Eksodas 6:1

Moses nug anam aum, amge Yawe Nug Moses amegppa aum. “Gemu amu, da Paro, nuhigppa keeke hekkul amu, na anidkkut. Da dahil ɠagattagppa ⌊eheɗ hedappi,⌋ diig amunu nug geha ag Israel uuatteb gokkulag. Ao, geha da dahil ɠagattagppa ⌊nug eheɗ naunab hedappi,⌋ diig amunu nug ag wan nuhigppanu lamatteb gokkulag,” awa aum.

Eksodas 7:13

Aqa laattom, amge Yawe Nug aum bianab, Paronu dabmak ɠagattag eppak dayom, nug Moses, Aron ele dilah nai amu ii doyom.

Eksodas 7:16

Gona daappe, nug dob, na Paro amegppa inam akkut. ‘Yawe, Nug ig Hibru, ihinig Kayak, Nug da na amenppa appi, na nuhikkud danab ah paɗadppe, ag gona, atu taɗakppa Nug noobppa dup nona binag mekkulagnu, Nug da na amenppa amu appi dookkutnu meiɗe uɗimi. Na anam hekkutnu aum, amge na nai amu ii doon hee, uɗia gemu batom

Eksodas 8:15

Yawe Nug anam he, og amu mauhna iitta meeg, haen ena daye, Paro nug amu antta, Yawe aumbia, nug he, nuhig dabmak ɠagattag eppom. Nug Moses, Aron ele nai apiɗ amu doya, dab-ii-meum.

Eksodas 8:19

Am Isip dilag baɗ mak danab ag Paro amegppa appig. “Kayak nukka keeke imu heum,” aon appig. Ag anam appig, amge Paro nug nuhig dabmak ɠagattag eppa daye, Yawe aum bia nug Moses, Aron ele nai apiɗ amu, nug amu dabmetta, ii doyom.

Eksodas 9:12

amge Yawe Nug he, Paronu dabmak ɠagattag eppa dayeye, nug Moses, Aron ele dilah nai, Yawe aumbia, nug nai amunu dab-ii-meum.

Eksodas 13:3

Yawe Nug anam a amu, Moses nug Israel danab ah amelagppa inam aum. “Ag Isip daanna, appa begbeg maɗi nid daaegeg, haen amuppa Yawe Nug nuhig ɠagattag amuppa ag Isipnu diia, omalatte uɗippig amunu, haen oh Yawe Nug deɗ imuppa ahilagnu keeke okkainab amu heum, keeke amu ag daulagppa doaɗ! Ag amu daulagppa doobob, ag bret yis ele hak amu, ag aib lappig.

Eksodas 13:9

Aria, Bret Yis Iitta Lanaknu Hobul Nakok, amuam geha danab nug aɗi keeke dabmekkunu oo hette ele, nug amu dabmekkunu nug eppeg gomeppa nai ye daatte, o nug uɗappa keeke laa aiha daatte amu, hobul amuam, ag Yawe Nug ahilagnu uɗat naɗi heum dabmekkulagnu, nuhig ɗo nai ele dabmena mattiglagnu at amubia daakku. Aɗinu ag Yawenu ɗo dabmena, amunu mattiglag? Yawe Nug uɗat naɗinab ha, Isipnu diia omalatte uɗippig.

Eksodas 18:8

Noya, Moses nug Yawe, Israel danab ah dilagnu dabmak anuqak awawa he, uug digdig Paro, nuhigppa, Isip danab ah oh ele dilagppa beppig amu, Moses nug amu ohnu nug tana Jetro amegppa mattiom. Nug amunu mattie doye, nug Israel danab ah dilagppa, uug digdig ibppa be, Yawe Nug ag ehanatte, ag ena daappignu ele mattie doyom.