Eksodas 7:17 - Nobonob Baibel

¹⁷ amunu, gemu Yawe Nug atte. “Kobol laa bekku amu, kobol amuppa na, da genab Yawe daattem, na amu dookkut,” ’ ” awa atte. Amu kobol amuam, geha da dudqak hokkat imuppa Nil le oppi, le eɗua tiig daakku.

Eksodas 7:17 Referans Kwoze

Eksodas 4:9

Amge ag dahilnu dabmettaknu kobol danab haknu elele iitta aɗit amu anidna, ag nahip nai oolagppa genab ii dooppeg amu, aria na Nil leppanu le laa itan, wanppa gokkaɗppe, geha le amu eɗua, tiig daakku,” awa aum.

Eksodas 7:5

Da Isip eheɗ matten, Israel omaladppi, Isip wan uun gokkulag, haen amuppa Isip ag da am Yawe dooglag,” awa aum.

Eksodas 5:2

Aa anam apiɗ, amge Paro nug aum. “Yawe am aun? Genab, Nug am aun amunu, da nuhig nai doyen, Israel danab ah uuadppi gokkulag? Yawe amu, da Nug ii doottem amunu, da Israel uuadppi iinab gomana,” awa aum.

Esekiel 39:28

Da amu oh heppi, Israel ag dooglag, da am Yawe, ahilag Kayak. Ag amu dooglagnu diig am, da genab hei, ag gona, wanppan wan laalappan danab oolagppa diia ukka laih me dayak danab ah daappig, amge da heppi, ag eɗun, ag wanelagppa daaglag. Laippu laa wan nug dayomppa ii daama.

Esekiel 38:23

Da amu heine, da heppi, danab ah ag da onil ɠagattag ele daattem, da oppiaawak daattem ele anidkkulag. Da heppi, wanppan wan digdig danab ag da dooiɗkkulag. Da keeke amu oh heppi, ag dooglag, da am Yawe.” Yawe Nug anam atte.

Sam 9:16

Yawe Nug hanhan nai doya mala hettoɗia epeɗia elele mettak kobol dim lamidtte amu, danab ah ag amu dootteb, amge nau hak danab ag akka ahilag pelemppa notteb. Ag amu dabmetteg! Sila.

Revelesen 11:6

Aa nai mehuqyaya, aa gu nemanu hepeɗ, hab qakkak daakkunu ɠagattag ele. Amu aa hepeɗ, le oh eɗun tiig daaglagnu, aa keeke nau kuɗum oh wanppanu danab ah aqaglagnu ele ɠagattag ele. Aa haen kuɗumtai, o iitta haen laippu laippuibtai anam hekkulahnu oolah dayeb amu, aa aakku hekkulahnu ɠagattag ele.

Revelesen 8:8

Ena daaeheh amu engel ebqak 2 nug trampet nuhig iwale, amu laa qauko naɗinab aab ewa dittiak ele bia buɗie ukka, yuppa noum. No amu yu laih laippu amu tiilag eɗuom; laih aɗit amu ena daapiɗ.

Daniel 5:23

Na amu helom, amge na ii heme, gemu ele ii hettem. Iitta. Na Naɗi, hab attan daatte, na Nug ele mehqak hekkulahnu hettem. Na he, laa ag nuhig mettid lagppan kap akkan uɗieg, na, nahipad okkai, na waatad, am na waatad amge waatadnab iitta ele ag amuppa wain lanana, ag kayak dottolkad golppa, silwappa, brasppa, aenppa, adppa, menppa hak ele binalag meppig. Kayak dottolkad amu ag keeke laa amelagppa anidkkulagnu iitta, ag daulagppa keeke laa dooglagnu iitta, ag dabmakppa keeke laanu diignu doyak tutukku aoglagnu elele iitta. Na amu heme, amge na Kayak, Nug nahip bau dayak, nahip oiyak ele Nug eppegppa aɗatte amu, na Nug binag ii meme.

Daniel 5:21

Nuhig dabmak eɗua, doɗ dilag bia daye, laa ag lamitteg ukke, nug danab ah ii daattebppa donki dakkuɗ ele daanna, nug makau gikkiɗah latteb bia gikkiɗah laum. Baito habppanu na, nug laittom. Nug anam daye ukke, nug Kayak Attannab Laa Oh Eɗattak Nug wanppan ɗo maɗoɗ oh gumadtte, Nug aun nug ahilag okkai daakkunu oo hette, nug king abenab medatte, nug dabmak amu tutukku doya, elele aɗa oiye, uug aguppa batom.

Daniel 4:37

Am gemu amu, da Nebukatnesar, da hab attannu King, Kayak, Nug aɗi hette amu, Nug tutukkuib haaha, Nug nai doya mala hettoɗia epeɗia elele mettak kobol ele dim lamitta hette amunu, da Nug binag okkai, onig okkai ele medattem. Laa ag dada danab daan oitteb ele, Nug heeb, ag onilag iitta daaglagnu elele.” Nebukatnesar nug anam aum.

Daniel 4:32

Laa ag lamidppeg, na danab ah ii daattebppa, appa doɗ dakkuɗ ele daaglag. Daan, na makau gikkiɗah latteb bia gikkiɗah lakkut. Maɗ eblaih aɗit ele na anam daappe ukkeb, na Kayak Attannab Laa Oh Eɗattak Nug wanppanu ɗo maɗoɗ oh gumadtte, Nug aun ahilag okkai daakkunu oo he, king abenabppa mette doon, dabmak amu tutukku doon elele aɗan oikkut, dimppa am na eɗun ena daakkut,” awa aum.

Daniel 4:17

Danab ah ag Kayak Attannab Laa Oh Eɗattak Nug wanppanu ɗo maɗoɗ oh gumadtte dooglagnu, ag auntai laa nug ɗo maɗoɗ laa dilag okkai daakkunu amu, Kayak Nugib he, danab laa, danab onig eletai, o danab onig iittanab eletai, nug huu dilag okkai daatte dooglagnu amu, amu miag atitte. Nai awa ukkak danab ag nai imu mattieg, laa dootteb. Ao, laa ag Kayaknu oppiaawak ele daatteb, ag keeke imu bekkunu nai imu atteb,’ awa eum.

Esekiel 32:15

Amu Yawe Nug ele atte. “Haen da heppi, Isip wan am hele-ettak dayebeb, wanppan keeke laa oh ele ii dayebeb, appan danab ah oh bu eheɗ aoglag, haen amuppa ag dooglag, da am Yawe.

Esekiel 30:19

Da Isip danab ah bu anam madakkul amu ag dooglag, da am Yawe.” Yawe Nug anam aum.

Esekiel 30:8

Haen da heppi, Isip wan am aab aɗu keeke ewe nauhtte, amubia nauheb, kekeɗ ag ele laa Isip ehanadtteb ele aqappeg mauhkkulag amu, Isip danab ah ag dooglag, da am Yawe.

Esekiel 29:9

Isip wan am hele-ettak, wan meu waknu nakokib elele daakku. Da anam heppi, ⌊Isip danab ii mauhppig ele⌋ ag dooglag, da am Yawe. Paro na, ‘Le Nil am dahil. Da hemi,’ ame amunu,

Sam 105:29

Nug wan amunu le he, eɗua tiig be, kakai ag mauhppig.

Sam 83:18

O Kayak, na heppe, ag na, na onin am Yawe amu, ag na nakkaib na wan imuppa Kayak Attannab Laa Oh Eɗattak daattem, naib wan imu gumattem amu, ag amu dooglagnu ool daatte.

Sam 78:44

Nug ahilkad leppan le he, tiig eɗue, auntai laa le amu lakkunu elele iitta daappig.

2 King 19:19

Ag kayak hambuppuak amu dilagnu anam heppig amunu, O Yawe, ihinig Kayak, na wan atu ohppan danab ah ag na, O Yawe, na nakka, na Kayak daattem dooglagnu, na ig Asiria dilag king eppegppanu awigppe, ig ena daagnignu od medattem.” Hesekaia nug anam unuqittom.

1 King 20:28

Amu Kayaknu propet laa nug nai awa ukka, King Ahap toppa ukka, nug Ahap amegppa aum. “Yawe Nug inam atte. ‘Aram danab ag da Yawe, dahilnu, “Nug am atu qaukonu Kayak, Nug am atu uɗemnu Kayak iitta,” aon atteb amunu, da geha heppi, ag Israel ag ahan, Aram ban danab ameg naɗi amu eɗattona, geha ag Israel ag dooglag, da am Yawe,’ awa atte,” awa aum.

Eksodas 6:7

Da geha heppi, ag am dahilad danab ah daappeg, da ahilag Kayak daakkul. Haen amuppa amu, ag da am Yawe, da ag Isip appa maɗi nid maɗi ah ele daappig, da amuppanu uhuqatti, ag hamu, ena daatteb dooglag.

Eksodas 1:22

Aria dimppa, Paro nug Isip danab ah amelagppa inam aum. “Hibru ah ag nid danab bau menuadppeg anidna, ag aɗadna, Nil leppa agappeg noig; amge nid ah menuadppeg amu, ag uuadppeg dayeg!” awa aum.

Eksodas 7:20

Amu Moses, Aron ele aa Yawe Nug aa amelahppa haknunab aum bianab amu, aa anam hepiɗ. Aron nug Paro, amu nuhikkud ehanittak anuqak danab ele noolagppa, nug dudqak hokkat awa, le Nil makkuɗe, le Nil, le amu oh eɗua tiig ba dayom.

Eksodas 10:2

Da amu heminu diig laa am, geha ag Israel danab ah, ag da dahilnu dabmettaknu kobol danab haknu elele iitta Isip danab ah ahilagppa hemi, da Isip danab ah ɠagattag hattami ele amu, ag Israel ag kaya amu, ag bekkalkad, alalkad ele amelagppa madippeg dooglagnu hemi. Laa ele amu, ag Israel, ag dahil hak amuppa, geha ag oh da am Yawe dooglagnu hemi,” awa aum.

Esekiel 25:17

Da heppi, ag nob naunab nau aoglag. Da ahilagnu oppoɗi bak doyeye, da bu okkainab madakkul. Da amu heppi amu, Pilistia danab ah ag dooglag, da am Yawe.” Yawe Nug anam awa atte.

Esekiel 32:6

Da heppi, na tiin am huana neeb, wan nahip qauko diigppa batak, wan amu oh qaɗeppa toneb, oolnu noak oh na teppun ambekku.