Eksodas 28:12 - Nobonob Baibel

¹² Ag amu hewona amu, ag men aɗit amu lamen enanag-epodnu qatti aɗit gukka laih laih tonat-ttep amu, ag amuppa qakkalatppeg, am geha Israel dilag huu okkai 12 dilag at daaglah. Anam daaglah amunu, am geha Aron nug gugappa ag onilag mawebeb, da Yawe, da anttena, da dahilad danab ah doyeye, deɗ oh dabmekkul.

Eksodas 28:12 Referans Kwoze

Eksodas 28:29

Ag keeke amu oh anam heppeg amu, haen Aron nug Oo Gun Ele, nug oo amuppa gokkunu haaha, nug momo tonaknu lamen, amuam Yawenu dabmak doya, dabmak awaknu lamen amu, nug lamen amu uttu taub nuhig guguittak aakku takka, Israel bekkod onilag menppa daatteb amunu, Yawe Nug ag dabmadakkunu, nug ag onilag aakku awa, Yawe daatte abenppa gokku.

Josua 4:7

Oɗ madappeg amu, ag inam appeg dooglag. ‘Yawenu Tituanak Nainu Kunup kontrak inak ele amu, kunup amu ukka, le daugppa dayeye, Yawe Nug he, Jodan leppa tak imuagppa, attan amuppanu le nekkunu ii heehe, kunup dayomppanu le ippu imuagppa, uppa qagmeum. Haen kunup amu Jodan le mataɗom amu, Yawe he, Jodan le amu otaɗe, nak iittanu eɗua le ibuppa nakok attan titiɗom. Anam beum amu, men amu Israel danab ah ag haen oh amunu dabmekkulagnu at daatte.’ Ag anam aon akkulag.” Josua nug ag amegppa anam aum.

Namba 31:54

Moses, mana mettak danab Eleasar ele aa ban daup ikki danab dilagppan gol amu diiya, mettid haknu peh lag danab ah appa qagmetteb ele, aa amuppa aoya nopiɗ. Amuam Yawe aɗi heum, amu Israel ag anidppeg, dabmak ahilagppa daakkunu at daakkunu mepiɗ.

Namba 16:40

Yawe Nug Moses amegppa a, Moses nug amelagppa nug anamnab hekkunu aum bianab heum. Anam haknu diig am, at amuam Israel danab ag amelagppa hanhan daakku. Anam dayeb amu, ag anidna, auntai laal iitta, Aron buɗubppan ag aakkuib Yawe noobppa kalu danab ile, muttuɗig enanag bette ele amu amotkkulag. Kora laikkud ele ag anam hena mauhppig, am laa ag ele anam helob amu, ag ele mauhlob.

Lewitikas 24:7

Amu na prankinsens ena dubuttid iitta ele amu, na amu aon, ⌊kap aɗit nakok golppa hak eleppa inan,⌋ huu yaak aɗit amu guguittak maatkkut. Prankinsens amuam bret laa oh ou daakkunu, ag manan Yawe mettaglagnu daakku. Amuam Yawe mettaknu aab aɗunu ofa aakku.

Aposel 10:4

Nug anam a amu, Kornilius nug ameg behabe, engel neekkittatta, huanak baɗaɗa nug aum. “O naɗi, amu aɗitai?” awa aum. A aria engel nug amegppa aum. “Kayak Nug nahip unuqittak doya, amu daɗek ehanittak kobol nahip ele antta, nahipnu dabmette.

Luk 1:54

Nug maɗi nid nuhikkud, amuam Israel danab amu, nug ah ehanattom. Nug ig alankad Abraham, nug buɗub ele, Nug amu dilagnu hanhan oo gai-iitta doya oo matta ehanadkkunu ig mamelkad aɗi amelagppa aum, Nug nai amu daug ii atitte. Iitta. Nug anam hette,” awa aum.

Aisaia 62:6

Juda danab ah, aɗi uɗitte anittak danab ag aab okkai Jerusalem ena daakkunu aab amunu aɗppa daan, ehanidnana, maɗi ahilag hetteb amu, amubia da ag ena daaglagnu ahilag ehanittak danab maatti daatteb. Ahilag ehanittak amu ag amunppa, tuqanppa ele toettan ii daamna. Ag Yawe unuqidkkulagnu ii uumna. O danab ah ag Yawe unuqidtteb ele amu, ag hik aon daaglagnu aib heppig!

Aisaia 12:2

Genab, Padal ii maknu ehanittak oh da aomi amu, Kayak Nug ehanittak amu oh diig daatte; da nuhignu oolppa genab doye, da geha ii baɗapa. Aɗinu? Yawe, ao Yawe, Nug am ɠagattag dahil. Nug uɗat ena hette, diig amunu da gamag ahak ahi edattem; Nugib dahil Padal ii maknu ehanittak daye, da padal ii memi.” Ag laib laib geha anam ahi ettaglag.

Aisaia 9:6

Aɗinu? Ihinigppa ah laa nid danab menukku. Ge, nid amu Yawe Nug ihinignu meeb uɗikku. Nug ihinig king daakku. Nug onig anaknu laala inam: Ulum Ena Mettaknu Danab Enanagnab, Kayak Nukka Ɠagattag Ele, Mamenig Hanhannu, King Maɗoɗ Ele.

Sam 89:19

O Kayak, na haen laa danab ah nahipad, ag nahipnu oo metta ii uuak kobol dim lamidtteb ele amu, na ag tulegleg anttak laa mattame. Tulegleg amuppa na ame. “Da ban danab laa hei, ɠagattag ele daatte. Ao, da nug danab dahilad oolagppan epeɗie hei, king beum.

Eksodas 28:7

Lamen amunu amu, ⌊ag momo, gome ele tonaknu qatti aɗit haatona,⌋ ag honap qakkaglagnu ag gukka laih laih tonaknu qatti aɗit ele haatona, amu aria, ag amu lamen laippu daakkunu, ag lamen qatti aɗit laa daug daugppa ele anam koitateg!

Eksodas 13:9

Aria, Bret Yis Iitta Lanaknu Hobul Nakok, amuam geha danab nug aɗi keeke dabmekkunu oo hette ele, nug amu dabmekkunu nug eppeg gomeppa nai ye daatte, o nug uɗappa keeke laa aiha daatte amu, hobul amuam, ag Yawe Nug ahilagnu uɗat naɗi heum dabmekkulagnu, nuhig ɗo nai ele dabmena mattiglagnu at amubia daakku. Aɗinu ag Yawenu ɗo dabmena, amunu mattiglag? Yawe Nug uɗat naɗinab ha, Isipnu diia omalatte uɗippig.

Eksodas 12:14

Yawe Nug anam anana amu, Nug nai tuɗitta aum. “Gemu kobol ahilagppa bekku ele amu, ag amu dabmekkulagnu ag kalam imunu deɗ imu tituankkulag. Am ag buɗub buɗub doobob, ag buɗulkad, ag ele amu dabmekkulagnu, da gemu ag aɗi hekkulagnu attem amu, ag ele deɗ imuppa anamib hekkulag. Ag oh hanhan maɗ anen anenppa deɗ imuppa da, Yawe, ag kobol da hekkul imu daulagppa dokkunu, ag deɗ imu da dabmeɗanna qagmak gamag ahak ele henan daaglagnu dabmekkulag. Am ɗo laa ag dim lamidkkulagnu laa aakku.

1 Korint 11:24

Mameg amegppa, “Ena heme,” awowa, pane ne Nug aum. “Imuam da beɗul, amuppa da ag ehanadkkul. Ag dahilnu dabmekkulagnu lanaknu kobol imu heig!” awa aum.

Eksodas 28:11

Na danab laa nug men daden nob okkainab eleppa nai otaɗak haknu doyak okkainab ele, ag nug uɗat amu medappeg, nug Israel bekkod onilag men aɗit amuppa otaɗeb, aria ag gol aon, aɗalataknu bala enanag nakok aɗit laa hena, ag men aɗit amu maatppeg dayeɗ!

Duteronomi 33:12

Moses nug Lewi buɗubnu anam awowa, nug Israel dilag huu okkai Benyamin dilag imu aum. “Yawe, Nug Benyamin danab ah dilagnu oo mauhtte. Ag nuhigppa baɗak iittappa daatteb. Aɗinu? Nug deɗ oh amun tuqan ele ag taliliatta daatte. Ao, Nug ag guittak aomnanu, ag aɗualatta dayaya, tuɗid ele dabmadatte,” awa aum.

Job 31:36

Nug anam hekku dayeb amu, da pepa amu da gukkalppa qataqewoya, mawewe oilom. O iitta, da ikkilppa haɗ bia mein mawewe oilom.