Eksodas 25:8 - Nobonob Baibel

⁸ Aria laa amu, na danab ah amelagppa appe, ag ⌊oolagppan danab ag uɗat amu haknu doon autna aotteb ele, ag⌋ dahil mettid haknu peh lag heppeg, am geha da ag oolagppa daakkul.

Eksodas 25:8 Referans Kwoze

2 Korint 6:16

Ig Kayaknu mettid lag amu kayak hambuppuak dottolkad ele ouaqadkkunigte? Amu oh am iitta! Ag dootteb Kayak bauklel ele nuhig mettid lag amu igib iikku. Anukka Kayak Nug nuhikkud danab ah dilagnu inam aum. “Geha da ag ele oh daatta, ag oolagppa oikkul. Da ahilag Kayak daakkul, ag am dahilad danab ah daaglag.”

Revelesen 21:3

Anam daye amu, da nai mattiak baag okkai sia king ⌊anuqak,⌋ amuppanu laa inam a doomi. “Gemu Kayak laug danab oolagppa daatte! Nug ag ele daaglag. Ag nuhig danab daaglag. Kayak Nug ag ele daaglag, amu Nug Kayak ahilag daakku.

1 King 6:13

Ele amu, da Israel danab ah oolagppa daakkul. Da ag ii uuadpa!” awa aum.

Eksodas 29:45

Am geha da ag Israel oolagppa, ahilag Kayak daakkul.

Sekaraia 2:10

Amu Yawe Nug atte. “O Sion danab ah, da ag oolagppa daakkulnu uɗittem amunu, ag gamag ahak okkai doon, ag baalag okkaippa eig!” awa atte.

Hibru 3:6

Amge Kristus Nug am Kayak Bekkanab, Nug oo metta ii uuak kobol dim lamitta, Kayaknu danab dilag ikki dayaya ag gumadtte. Amu ig ihinkad oo ɠagattag qettak aɗat, amu ig Kristus, Nug am ena bekkunu dabmak aɗa oiyaknu diig, ig amunu mehuqttem amu, ig Nug ele aɗat amu, ig Kayaknu danab ah daattem.

Sekaraia 8:3

Amu Yawe Nug laa ele inam atte. “Da eɗuen, qauko Sion appa ukken, da Jerusalem daakkul. Da amu heppi, danab laa ag Jerusalemnu, aab okkai amu onig am Yawe Dim lamittaknu Oo Metta Ii Uuak Kobol, akkulag. Amu qauko Sionnu, qauko amuam Yawe Nukka Ɠagattag Oh Elenu amu, ag qauko amunu, qauko amu onig am, Qauko Kayaknu Tituanak Daatte, akkulag,” awa atte.

Aisaia 12:6

O danab ah Sion daatteb, Israel dilag Kayak Oppiaawak Ele, Nug nuhig ɠagattag okkaippa ag ehanatta, atognoadtte amu, Nug ag oolagppa daatte amunu, ag baalag okkaippa enan, ag gamag ahakppa ele ahi etteg!

Namba 5:3

Ag danabte, o iitta ahte ag uug amu laa ele amu, ag oh maadppeg, aab dimittim gokkulag. Ag aab kalakppa daanna amu, geha heppeg, dahil neekkakppa ahilag aab am dubuttid tak ele daakku. Da ag Israel, ag oolagppa daattem amunu, danab ah amu ag aab heppeg, dahil neekkakppa dubuttid tak ele daamanu amu, ag maadppeg, aab dimittim gona dayeg!” awa aum.

Lewitikas 21:12

Mana mettak ikki danab nug mauhaknu keeke laala hekkunu, nug Kayaknu mettid haknu peh lag iinab uuitta gokkuoitte. Nug heeb, Kayaknu lag dubuttid tekku iinab hekkuoitte. Aɗinu? Danab laittaknu goɗen amu mana mettak ikki danab igippa gokkaɗe no, laitta mala he, nug aakku amuppa nug dahilnu tituana mettak daatte. Da am Yawe.

Lewitikas 4:6

Nug noa, eppeg doɗo laa meeb, tiig amu ooppa nob, taula awa, nug haen eblaih aɗit ele Yawe noobppa Oo Gun Ele, Oo Gunnab Ele makkulaknu lamen guguittak tauɗ qedakku.

Eksodas 15:2

Yawe Nug nukka da ɠagattag iukkunu dootte; Nugib da ehaniɗtte amunu, da gamag ahak doye, ahi edattem. Nugib da ehaniɗe, da padal ii mettem. Nug am dahil Kayak, da Nug onig humakkul. Nug am da mamelnu Kayak, da Nug binag okkai humakkul.

Lewitikas 10:4

Aakku Moses nug Misael, Elsapan ele onilahppa e uɗipiɗ. Aa amu Aron mameg nakok Usiel bekoɗ. Nug onilahppa e uɗieh, Moses aa amelahppa aum. “Aa uɗiya, lailti gaɗalti mettid haknu peh lag imu odppa, aben imuppan mawatya, haen tutu dayaknu aab kalak dimittim ukkeɗ!” awa aum.

Aposel 7:44

Aria, ig mamelkad aɗi anukka ag atu taɗakppa daappig amu, haen amuppa ag mettid haknu peh lag men maha aɗit ɗo nai yaak niitte ele appa daattep amu, ag peh lag amu ele aon oippig. Ag mettid haknu peh lag heppig amu, ag hekkulagnu dottog Kayak Moses ippunittom amu, ag amubia heppig.

Eksodas 29:46

Da aben amuppa anam daappi, geha ag da am Yawe, ahilag Kayak, ag anam dooglag. Da dakkaib, da ag oolagppa daakkulnu, da aakku ag Isipnu diien, omalatti uɗippig. Daib am Yawe, ahilag Kayak,” awa aum.

Lewitikas 26:11

Da geha ag oolagppa dayeye, ahilagnu nau ii doopa.

Duteronomi 12:11

ag keeke oh da ag haknunab attem amu, ag amu oh akkan, Yawe, ahilag Kayak, Nug onig aguppa daakkunu aben epeɗikku ele, ag amuppa wakkulagoitte. Keeke amuam inam: manaknu ofa, mana mettak laala ele, keeke obatak eblaih tanig ele ooppanu obatak laippu Kayak mettak, Kayak hamu ɗo mettak, aria aɗi keeke ena ena ag nai genab ana qakkaknu ofa hekkulagnu appig ele.

Josua 22:31

Ag oolagppa ena, elele doona, mana mettak danab Pinias, Eleasar bekka, nug nai nob ma, Ruben, Gad amu Israel dilag huu okkai Manase mahaib dilag danab amelagppa aum. “Ag Yawe ippunikkomnu oo metta ii uuak kobol dim lamidkkulagnu ii uun, kobol nau ii heppig amunu, gemu ig doottem, Yawe Nug ig oh oonigppa aakku daatte. Amu gemu ag heeg, Yawe Nug ig Israel bu ii iqama,” awa aum.

Eksodas 15:17

Aria, geha na ig omaigna gona heppe, ig ɠagattag daagnig. Ao, ig qauko na aut daatteb, ig amuppa ena daagnig. O Yawe, na nahip dayaknu aben aguppa daakkunu tituanme. Ao, Naɗi, na nahip mettid lag aguppa daakkunu tituanme.

1 Stori 22:19

Anam amunu, gemu ag Yawe, ahilag Kayak, ag meulag ohppa Nug anidna dim lamidkkulagnu Nug mattieg! Ag Yawenu Tituanak Nainu Kunup kontrak inak ele aon uɗin, Nug laugppa mekkulagnu, ag keeke laala Kayaknu tituanak daatteb, ag amu ele aon, Nug laugppa mekkulagnu amu, ag ahan, Yawe Kayaknu mettid lag digmeig! Ag lag hekkulag amu, lag amuam Yawenu, Nug onig aguppa daakku,” awa aum.

Esekiel 37:26

Amu da Israel danab ah ag hanhan maɗoɗ ele daaglagnu, da heppi, da ag ele nug tituanta nai qakkagnig. Nai qakkak amuam hanhan daakku. Amu da heppi, ag ɠagattag ena daan, huan appatna, kuɗumnab daappeg, da dahil mettid lag ag oolagppa hanhan daakkun mekkul.

Esekiel 37:28

Da heppi, dahil mettid lag ag oolagppa hanhan daakkunu aguppa dayeb, wanppan wan ohppan danab ah ag da Yawe, da hei, Israel ag danab ah, ag dahilnu, oppiaawak ele aakku daatteb dooglag.’ ” Yawe Nug anam aum.

Esekiel 43:7

Nug aum. “Danab bekka, aben imuam dahil sia kingnu aben, da daakkulnu aben iikku. Aben imuppa da Israel oolagppa hanhan daakkul. Israel ag, ahilag king ele ag baula kayak hambuppuak noolagppa dup nona binalag ii memana; ag ele ahilag king dottog aon qappan, amuppa ag da onil oppiaawak ele heeg, danab ah laa dilag neekkakppa nau dayom amu, ag amu baula ii hemana.