Eksodas 15:9 - Nobonob Baibel

⁹ Kekeɗ ag akka ag onilag human, ag ihinignu appig. ‘Geha ig ag baelag mattat gota aɗualadta, geha ig ahilag keeke ena ena amu aot, ig ihinig huuppa panignig. Aria, keeke oh ig aognignu oonig daatte ele amu, geha ig aognig. Geha ig ag ele qep elabppa heta, ihinig ɠagattagppaib ig ag hepput nauhkkulag.’

Eksodas 15:9 Referans Kwoze

Ikki Danab 5:30

‘Sisera nug nuhikkud daup ele ag banppan en mattin otiadtteb. Ao, ag ah laipputai, iitta ah aɗittai danab oh anen anen madatteb. Ag lamen geɗaɗa ele Siseranu otitteb. Ge, dahilnu amu, ag lamen geɗaɗa ele, baagppa kobol kobol ele koitak otin meɗaglagnu hetteb. Amu oh am banppan awak, aakkuib.’ Sisera anig nug anam aakku nukka nuhignu aum.

Eksodas 14:5

Aria, Israel ag ukkaegeg, laa ag Isip dilag king Paro amegppa, “Israel ag oolna goppig,” aeg doyom, diig amunu nug, nuhikkud ehanittak anuqak danab ele, ag dabmak ahilag eɗue, ag appig. “Aɗinu ig heut, Israel ag ahan goppig? Ig anam hemut amunu, geha ag ihinig uɗat laa ii hemana. Ig kobol kaboliaknab hemut,” aon appig.

Luk 11:22

Amge haen danab ɠagattagnab laa, nug lag mameg eɗittak, nug uɗie, aa nug qeya, aria laa uɗiom ele nug lag mamegnu ban haknu keeke nug ehanidkkunu ooppa genab doyom ele, nug amu aɗitta awa, nug keeke oh awa pania, danab laa madakku.

Aisaia 53:12

Diig amunu da heppi, Nug danab ah oolagppa okkainab daya, Nug banppan awak keeke laa ag Nug dim lamidna, danab ɠagattag daatteb ele, Nug ag madakku. Da heppi, anam bekkunu diig laa am, nug doyaya, nuhig bauklel uua dayom. Laa am, ag nug danab nau ele laippu qagmaadna ⌊qeeg mauha, amuppa nug eheɗ haknu nob nau iitta mekkunu he elele mettom⌋. Laa am nug danab ah kuɗumnab dilag hipunin mawom. Amu laa am, Nug danab ah hipunin heppig ele, Nug amu dilagnu unuqittom,” awa atte.

Habakuk 3:14

Danab amu, nuhikkud daup ag ahan, huan uɗin, ig danab ɠagattag iitta ele, ig daɗek danab lokkumta daamut, ag ig lamigppeg, ig oolta, tamtam daagnignu, ag ig iqappeg mauhkkunignu dabmena, gamag ahak doon, danab ee lab iitta mekkunu hette bia ihinigppa hekkulagnu daappig amu, haen amuppa na daup amu dilag okkai, na danab amunu ban gudkkud aɗan, nuhig ban gudkkud igippa yaae noum.

Genesis 49:27

Benyamin, nahipnu amu, na am doɗ wulp, enug eheɗ qette ele, na amubia daattem. Buttua na ban henana, kekeɗ eɗadttem. Ao, tueb na banppa keeke aome amu, na keeke amu paniadttem.” Jakop nug anam awa aum.

Aisaia 36:20

Kayak amu oh am ahilkad danab ah ehanadppeppeg, ena daaglagnu elele iitta daappig. Kayak amu ag ahilkad danab ah ehanadppeg, da ag ii eɗadpanu elele ii daappig. Anam amunu, Yawe Nug ag Jerusalem daatteb, Nug ag ehanatteb, ag da eppelppa iite daamna? Iitta,’ awa atte.” Asiria dilag ban daup ikki banppa o ban guguittakppa daatte nug anam nuhig okkai oɗe awowa, anam awa aum.

1 King 20:10

Ag gona, Benhadat amegppa anam aeg, Benhadat nug doya, nug nai laa Ahap dookkunu me ukkom. Nai amuam inam. “Da heppi, dahilad daup ag danab nug wan paduduɗe, kalu nette, ag Samaria aabnu anam bia heppeg, Samaria nauheb, aab amu oh kalu daalo amu, kalu amu oh dahilad daup ag eppelkadppa aɗaglagnu elele. Ag eppelkad am-ii-bema. Da amu heppi, meu ii beeb amu, kayak laala ag bu okkainab meɗaglagnu ool daatte,” awa aum.

1 King 19:2

Nug a doye amu, Jesebel nug nai inam me, Elaiya toppa ukkom. “Na gemu dahil kayaknu propet kuɗum aqee, ag mauhppig daatteb amunu, da heppi, butti haen inamppa batak amu, na ag oolagppanu laa daatte bia ii daakkut dayeb amu, kayak laala ag bu okkainab meɗaglagnu ool daatte.” Nug nai amu me ukkom.

1 Samuel 30:8

Abiatar nug anam he amu, Dawit nug Yawe oɗ metta aum. “Da ag ele ban hekkunignu da ban danab amu dim lamadkkul, o iitta? Da ukke amu, da ag gumatte wakkul, o iitta?” Dawit nug Yawe anam oɗ mettom. Nug Yawe oɗ mette, Yawe Nug nob ma, amegppa aum. “Ao, na ag dim lamatte! Aɗinu? Na dim lamadna gona, geha na gona, ag gumadna wana, na danab ah aɗualadna diin goppig amu oh diiadkkut.” Yawe Nug anam aum.

2 Samuel 22:38

Da kekeɗ dahil oɗoɗatti nauhppig. Ao, da laa ii uuadmi. Iitta. Da hei ukke, ag ohnab nena qeppig.

Prowerb 16:19

Danab nug nukka onig qe neene, laa ag laa dilag eheɗ hattak waappa daatteb, nug ag oolagppa daatteb, amuam uug daatte, me am ele ena; amge danab nug dada hak danab ele layam bateb, keeke dada hak danab yab aoppig ele laippu aɗan oiglag, amuam ena iitta.

Jeremaia 46:17

Ag gona, appa tena, ag akkulag. “Isip dilag king Paro, nug oɗeppaib mattiak danab; keeke laa ii hette. Nug keeke hekkunu haen dayom, amge nug ii heum,” ’ aon akkulag.” Yawe Nug Jeremaia amegppa anam aum.