Eksodas 14:30 - Nobonob Baibel

³⁰ Amu Yawe Nug deɗ amuppa Israel, Isip eppelagppanu eɗua diie, Israel ag Isip danab mauhadppig amu, langppa niiegeg anadppig.

Eksodas 14:30 Referans Kwoze

Sam 106:10

Nug ag padal memananu ehanatte, kekeɗ eppelagppa ii daappig. Ao, Nug ag kekeɗ eppelagppa dayaknu qagaiettakppanu eɗua uhuqak heum.

Sam 106:8

Ig alankad ag anam heppig, amge Yawe Nug ag padal memananu ehanadkkunu matu aum amunu, nug anam heum. Nug amu heumnu diig laa am, Nug Nug onignu dabmak anuqak awa, danab ah ag nuhignu nai eheɗ mattinna, “Yawe Nug keeke hekkunu aum, amge Nug ii heum,” amananu heum. Laa am, Nug ɠagattag nuhig attemu ele danab ah ippunadkkunu heum.

Jut 1:5

Aria, ag dahil nai imu ebqetteb ele amu, ag nai imu oh dootteb, amge ag daulagppa eɗua dokkunu attem. Nai amuam inam. Naɗi Nug Israel danab Isipnu eɗua diiom, amge dimppa Nug danab laa nuhignu oolagppa genab ii dooppig ele amu he, ag padal meppig.

Sam 58:10

Genab tutukku hak aɗi ag Yawe Nug laa ag eheɗ ahilagppa heppig ele nob tutukku madakku anidkkulag amunu, ag gamalag ahakku. Daup laa ag kekeɗ nena qeeg, tiilag na, wan qaɗeppa dayeye, daup amu ag kekeɗ lamadnana, tiilag baelagppa tappan gotteb, amubia genab tutukku hak danab ag nau hak danab eɗadna, gamalag ahakku.

Sam 59:10

Kayak dahil Nug dahilnu oo mauhaknab dootte amunu, Nug uɗia da ehaniɗkku. Nug da ehaniɗa heeb, da kekeɗ dahil oh eɗadkkul.

1 Samuel 14:23

Amunu deɗ amuppa Yawe Nug Israel ehanatta, Pilistia eppelagppanu diiom, amu Israel ag Pilistia lamadna gona, aab onig Betawen eɗidna goppig.

Eksodas 14:13

Aria, Moses nug danab ah ag anam aeg doya, nug inam ag amelagppa aum. “Ag aib baɗappig. Ag ɠagattag daanna, gemu ag geha Yawe Nug ag ehanadkkunu ɠagattag heeb anidkkulag. Aɗinu? Ag gemu Isip anadtteb umu, ag geha dimppa baula ii anadmana.

Aisaia 63:9

Haen ag uug nau dooppig amu, Nug ele uug nau doya he, laa nugatoppa daatteb amu, nug ehanatte, padal ii meppig. Nug ahilagnu oo mauhak doya, ag dabmatta, oo gai-iitta doya oo metta ehanittak kobol ele dim lamittom amunu, haen kuɗum ag nau doyegeg, Nug amunu qagaiettakppanu eɗua uhuqak heum. Anukka, haen amuppa, maɗ kuɗum ukkom amu, Nug danab laa nid nakok laa ehanitta awa maotte, amubia ag ehanattom. ⌊Yawe Nug nukka amu oh ahilagnu heum.⌋

Sam 91:8

Anam beeb, na amenppanab Yawe Nug nau hak danab attem bu madatte amu, na neegna anidkkut.

2 Stori 32:22

Yawe Nug anam heum amunu, Nug Hesekaia, Jerusalem danab ah ele ehanatte, ag Asiria dilag king, Senakerip eppegppa ii daappig. Amu Yawe Nug ha, nug Juda danab ah ag kekeɗ laa eppelagppa daamnanu ele ehanattom. Nug ib kuɗumppa atognoatta he, wan laala ag taliliadna daappig amu, ag danab amu ele maɗoɗ ele daappig.

Duteronomi 4:34

Am kayak atten laa nug danab ah ameg laa, wanppan wan okkai laappan diia he, nuhig danabnab bena, ag wanppan wan laappa daaglagnu daappigte? Iitta! Amge Yawe, ahilag Kayak, Nug ahilagnu Isip appa anam heum. Nug nuhig ɠagattag okkaippa ag ehanatta, ahilagnu heewo, ag amelagppanab anidppig. Nug oɗe nau Isip dilagppa he be anidppig. Nug Isip ele ban heppig. Nug nuhignu dabmettaknu kobol danab haknu elele iitta he, Isip danab ah ag eheɗ nau baɗappig.

1 Samuel 11:13

Ag anam appig, amge Saul nug aum. “Gemu Yawe Nug ig Israel ig ehanikka, ig Amon eppegppanu eɗua awikkom amunu, ig ikka laa qeppeg ii mauhma. Iittanab iitta!” awa aum.

Aisaia 63:8

Yawe Nug nuhikkud danab ah dilagnu, Nug aum. “Genab, danab ah imuam dahilad. Ag am da bekkalad, ag da ii buppuiɗmana,” awa aum. Nug anam aum amunu, Nug ahilag Padal ii maknu ehanittak beum.

Aisaia 63:11

Nug anam he, nuhikkud danab ah ag anukka Yawe Nug ag ehanattomnu dabmeppig. Ag Mosesnu haenppa Nug kobol digdig ehanadkkunu heum amu, amuam ag daulagppa doum. Ag amu dabmena, akka akka nug oɗ medappig. “Laa Nug yu gamagppa ib he, ig memetankad aɗi, ahilag okkai Moses ele, ag ib amuppa laih ena goppig amu, Nug gemu adeppa daatte? Laa Nug nuhig Ouɗi Oppiaawak Ele ag oolagppa meum amu, Nug gemu adeppa daatte?

Ikki Danab 10:11

Ag Yawe anam unuqitteg, Nug nob ma aum. “Da ag ehanatte, ag Isip, Amo, Amon, Pilistia, Saidon, Amalek amu Maon danab ele eppelagppanu eɗue diimi. Haen ag ag eheɗ hatteg, ag dahilnu gaaeg amu, da ag ehanatte, ag eppelagppanu eɗue diimi.

Hosea 1:7

Amge da, da Yawe, ahilag Kayak, da geha oo gai-iitta doya oo metta ehanittak kobol Juda danab ah dilagppa hekkul. Da dakka geha ahilkad kekeɗ eppelagppanu eɗuen diiadkkul. Da amuam latppa, o qep elabppa, o banppa, o hosppa, o bannu karisppa ii hepa. Iitta. Da dakkaib, da hekkul,” awa aum.