Eksodas 12:48 - Nobonob Baibel

⁴⁸ Amu danab laa, nug wan laihnu danab nug uɗia, ag oolagppa dayaya, nug da Yawe, dahil Pasowanu Hobul gamag ahak ele hekkunu dabmekku amunu, aria nug heeb, laa nug, nug bekkod, amu danab laa nug laugppa daatteb ele amu, nug ag gaɗalag otaɗeb, nug aakku Israel ted bia dayaya, lakku. Danab laa nug gaɗa otaɗak iitta amu, nug hobul amunu ee ii lama.

Eksodas 12:48 Referans Kwoze

Namba 9:14

Aria, wan laihnu danab, ag uɗin, ag oolagppa daatteb amu, ag oolagppanu laa nug ag ele oh Pasowanu Hobul gamag ahak ele hekkulagnu oo daakku dayeb amu, nug hekkun elele, amge nug Yawenu Pasowa haknu ɗo oh dim lamidkku. Israel danab, o wan laihnu danab ele oh, ag ɗo laippu amuib dim lamidkkulag,” awa aum.

Kolosi 3:11

Amunu kobol bau amuppa laa nug Juda danab, o Grik danab, o gaɗa otaɗak, o gaɗa ii otaɗak, o Rom danab, o Skitia danab, o begbeg maɗi nid, o begbeg maɗi nid iitta daatte, amu oh am keeke hamu; huu anen anen dayak amubia ii daatte. Iitta. Kristus Nug nukka ag ikkilag daatte, amu Kristus Nug nukka nuhikkud danab iɗu iɗu ohnu oolagppa noum daatte.

Galesia 3:28

Amunu gemu Juda danab, Grik danab ele, begbeg maɗi nid, begbeg maɗi nid iitta ele, danab amu ah ele, ag oh elele eleleib daatteb. Ag oh Jesus Kristusnu daan, laippu daatteb.

Esekiel 47:22

Wan amuam ahilag, ag aulag daakkunu anam paniglag. Wan amuam Israel dilag, ag aulag anam daakku, amu wan laihnu danab, ag uɗin, ag oolagppa daanna, nid menuadppig ele amu, ag aulag ele daakku. Ag Israel ag danab ah amu dilagnu, ‘Ag ig ele am laippu,’ dooglag. Ag Israel ag wan laa ahilag, ag aulag daakkunu panin aoglag, danab ah amu ele, ag wan laa, ag aulag daakkunu, ag Israel oolagppa panippeg aweg!

Eksodas 12:43

Yawe Nug Moses, Aron ele amelahppa inam aum. “Pasowanu ɗo imu aa doyatteɗ! Wan laihnu danab nug ee amu ii lama!

Eksodas 12:19

Hobul amunu deɗ eblaih aɗit ele amu, deɗ amu ohppa yis ag laulagppa aib dayom! Aɗinu? ⌊Hobul amunu deɗ amu ohppa,⌋ mudippan danab lailag laatai, o wan laihnu danab laatai, nug bret yis ele lab amu, aria nug Israel oolagppanu geɗittak daakkuoitte.

Esekiel 44:9

Amu Naɗi Yawe Nug inam atte. “Wan laihnu danab, ag oolag babaittak iitta, beɗulag gaɗa otaɗak iitta ele amu, amunu laa nug dahil mettid lag ooppa iinab tema. Ge, wan laihnu danab, ag ag Israel oolagppa daatteb ele, ag oolag babaittak iitta, beɗulag gaɗa otaɗak iitta ele amu, ag ele, ag iinab temana.

Genesis 17:12

Buɗub buɗub doobob, nid danab, ag anilkad ag laulkadppa menuadkkulag ele amu, deɗ eblaih ewamppa ag gaɗa otaɗak aoglag. Amu wan laihnu danab, ag ele tiilag laippu iitta, ag daden maadna diiglag amu, ag ele gaɗa otaɗak aoglag.

Genesis 17:11

Gaɗa otaɗak am da hei, da ag ele nug tituanta nai qakkamutnu at daatte. Amu ag anam hekkulagoitte.

Esekiel 14:7

Aɗinu? Israel danab laa, o wan laihnu danab nug uɗia, Israel oolagppa daatte amu, amu laa nug nukka nug dahilnu nug awaitta dimeɗa, nug kayak hambuppuak dim lamadkkunu dabmak nug ooppa meum daatte, nug kayak hambuppuak dottolkad, amuam keeke nau, danab he na qette amu, nug amu noolagppa dup noa binalag mette dayeb, nug amu haaha oiya, nug aha, dahil propet laa keeke laanu oɗ medakkunu gumitta gokku dayeb amu, da, Yawe, da dakka nuhig hipunin dabmeinne, da amunu nob elele medakkul.

Lewitikas 19:34

Ag amu dilagnu amu, ag akka ag ahilkad menuattak ena hadattebbia, ag anamib amu dilag hattan, ag akka ahilagnu oolag mauhtte bia, ahilagnu oolag mauhkkuoitte. Aɗinu? Ag ele am haen laa, Isip wanppa, wan laihnu danab ah daappig. Da am Yawe, ahilag Kayak.