Eklisiastis 9:9 - Nobonob Baibel

⁹ Wan imuppan dayakppa am dayak gaɗappa, unuqagppa ele anttak laippu iitta, amu Kayak Nug wan imuppa na haen gane bau daan oikkutnu tituanom amu, haen amu oh na ah nahip, na nuhignu oot mauhtte amu, na gamag ahak ele nug ele daayya oiyeɗ! Aɗinu? Kayak Nug na amu hekkutnu metta, aam waappa na uɗat heɗiag ele henan daakkutnu ele mettom.

Eklisiastis 9:9 Referans Kwoze

Eklisiastis 2:10

Da aɗi keeke da amelppa antten, aokkulnu ool heum amu, da aomi. Ao, da oo haknu anuqak doyak kobol aɗi ippuniɗom amu, da dim lamidmi. Da aɗi keeke hemi, da amu heinne, da gamag ahak okkainab doyeye hemi; amuam dahil uɗatnu nob ena aakku.

Malakai 2:15

Haen na ah aome amu, Yawe Nug he, na waat ele laippu iite daapiɗ? Gaɗalahppa, ouɗilahppa ele aa nuhig daattep. Kayak Nug diig aɗinu kobol amu daakkunu meum? Nug aa nid ag genab tutukku hak kobolib dim lamidkkulagnu menuadkkulahnu oo hette. Anam amunu na nakka dabmettan autna awe! Na bau daanna, na nai nahip loppaɗmananu, na waatnu dabmenan oiye!

Eklisiastis 6:12

Aɗinu? Danab nug wanppa dayaya oitte, nuhig haen wanppa daakkunu am tutuib. Daya, gaɗappa, unuqagppa ele anttak laippu iittanu oiyak nuhigppa am aamppa danab itotog bia amunu, auntai laa nug danab laanu, nug nuhig wanppa oiyakppa nuhignu aɗi keeke am ena ab dookkunu elele? Auntai laa nug danab laa mauheb, aam waappa aɗi kobol nuhig mauhak dimppa bekkunu daatte akkunu elele? ⌊Anam amunu, nai nai mattiak kuɗum am meu iitta.⌋

Eklisiastis 3:13

Baula anak am, danab ah oh ag ee, le ele lanana, ag aɗi uɗat Kayak ag mattom am henana, uɗat amunu ag oo hak dooglagnu am ena. Amuam Kayak danab oh, ahilag daakkunu hamu mette, Nug eppegppanu uɗitte.

Eklisiastis 7:15

Amu da bau wanppa daye, da gaɗappa, unuqagppa ele anttak laippu iittanu oiyak dahil imuppa oiyeye, da keeke aɗit anidmi. Laa am genab tutukku hak danab nug genab tutukku hak kobol haaha oitte, amge nug paha mauhtte; laa am nau hak danab nug nau hak haaha oitte, amge nug paha ii mauhtte. Iitta. Nug haen elab bau dayaya, wanppa oitte.

Eklisiastis 5:18

Da amu oh antten amu, da aakku dabmak aomi. Dabmak amuam inam. Danab nug wanppa dayaya, nug ee, le ele lanana, nug uɗat aɗi heɗiag ele aam waappa haaha, amuppa oo hak dookku am ena. Nug haen tutu Kayak Nug wanppa bau daakkunu mettom amu, nug amu hekku. Kayak anam mettom amunu, nug anam hekku.

Eklisiastis 3:22

Amu da anidmi, danab nug nuhig uɗat hekkunu gamag ahak doyaya hekku, am ena. Keeke laa amu eɗittak laal ii daatte. Aɗinu? Kayak Nug anam babaittom daatte. Laa amu, danab auntai laa nug laa butti aɗi kobol aɗi bekkunu daatte, nug amu ippunitteb dookku?

Eklisiastis 2:24

Da amu oh anitti ukke, keeke laa ele anidmi. Amuam danab nug ee, le ele lanana, nug aɗi uɗat Kayak nug mettom am haaha, uɗat amunu nug oo hak dookkunu am ena; kobol laa oh eɗittak. Kobol amuam Kayak eppegppanu ihinigppa uɗitte, da anam anidttem. Am kobol ena.

Prowerb 19:14

Lag, en laa ele amu, amuam anig mameg ele aulah keeke; amge danab wau, ah amu nug eheɗ bemanu dabmak awa dabmak amu dim lamittak ah daatte dayeb, Yawe Nug ah amu epeɗia, danab amu mettom.

Prowerb 18:22

Danab nug ah aotte, nug en okkainab, wannu en laa oh eɗattak aotte; Yawe Nug nuhig daakkunu mette awom.

Sam 144:4

Amu danab nug ulah laippu noobppa aotte amu, ulah awak amuam haen tutuib doawa, eɗua dimittim gotte; am danab ah ig amu, ig amubia daattem. Ig haen tutuib daattem. Ihinig haen dayaknu am keeke itotog laa haen tutu dayowa qettoɗtte, am amubia daatte.

Sam 39:5

Na he, dahil bau dayak haen am tutunab daatte. Nahip neekkakppa, da wanppa bau daattem, bau dayak amunu digma ukka, gogppa tak am keeke ii ba ukkom bia daatte. Ao, danab ah dilag bau dayak haen am tutunab; amuam danab laa nug hik tutuib haen laippuib awom bia daatte.” Sila.

Genesis 26:8

Aisak, Rebeka ele haen elab appa daaeh ukke, deɗ laa Abimelek, Pilistia dilag king, nug gililppa ulah ibuppa daya, neekke ukke, Aisak wau ele aa ewau kobol laa heya daaeheh anatom.