Eklisiastis 4:8 - Nobonob Baibel

⁸ Amuam danab nug tiig laippu laa iitta. Ao, nug nid iitta, awag, amag laa ele iitta. Anam amu, nug am uɗatib hette, nug hamu ii daatte; Nug anam daya haaha, en okkai aotte, amge nug ena ii dootte. Iitta. Nug baubau aokkunu hette. Nug nukka, nug oɗ inam ii medatte. “Da aun nug en imu aokkunu uɗat hettem? Ao, da aunnu uɗatib heinne, gamag ahak nakok aolom, amge da ii aottem?” Nug amu oɗ ii medatte. Kobol amu daatte, amge amu ele am gaɗappa, unuqagppa ele anttak laippu iitta; am kobol guittak ele.

Eklisiastis 4:8 Referans Kwoze

1 Jon 2:16

Aɗinu? Ig doottem, wanppan keeke oh, amuam beɗu kobol haknu oo hak nau dim lamittak, ameg qak doya awaknu oo hak nau dim lamittak, amu nukka binag maknu oo hak nau dim lamittak ele, kobol amu oh am Mame toppanu iitta, keeke amu oh am wanppanuib.

Prowerb 27:20

Mauhak am danab daalo, padal mak ele danab daalo, aɗit amuam baubau danab ah diilopnu doolop; amubia, danab ag keeke baubau aoglagnu oolag hette.

Luk 12:20

Nug dabmak nuhigppa anam aum, amge Kayak Nug amegppa aum. ‘Na am Kayak dab-ii-maama ii dim lamittak danab! Gemu tuqan imuppanab amu, na mauhkkut. Anam am, keeke oh na bappaidme daatte amu, aun nug aokku,’ awa aum?”

Eklisiastis 1:8

Keeke oh anamib; danab nug amu ohnu madikkunu elele iitta amunu, keeke oh am bahi yaak megatte. Danab ameg nug neekka, keeke anidkkunu uuak ii dootte. Ge, danab daug nug nai dookkunu uuak ii dootte.

Matyu 11:28

Jesus Nug anam ana, Nug baula ele aum. “Ag danab oh, ag uɗat okkai henana, keeke uug ele maotteb amu, ag gumiɗna doig! Doppeg, da heppi, ag hik aoglag.

Eklisiastis 1:13

Amu tatam da dakka, da danab doyak dabmak ena ele ag keeke dooglagnu henana, aɗi kobol oh dim lamidna henan keeke dootteb amu, da kobol amuppa keeke oh wan imuppa heeg bette ele dookkulnu dabmein, amu anam hekkulnunab digmemi. Da amu hein, da Kayak Nug uug okkainab ig danab ah mekkom anidmi.

Aisaia 5:8

O gadonnab gadon, ag danab ag lag kuɗum, wan kuɗum ele aonna, ahilagnu qagmetteb. Ag anam hetteb, amu geha ag wan oh aoppeg, danab laa ag daaglagnu aben laa ii daama. Ag akka, ⌊Kayak anamnu ii aum bia,⌋ agib appa daaglag.

Eklisiastis 5:10

Danab nug men doɗonu oo mauhtte, nug deɗ laa men doɗo awa, “Da aakku elele aomi,” ii atte. Iitta! Nug baubau aokkunu hette. Ao, aun nug ennu oo mauhtte amu, nug men doɗo uɗatppan aotte ele amu, nug amunu elele ii dootte. Amu ele am gaɗappa, unuqagppa ele anttak laippu iitta.

Sam 39:6

Danab ah ig am danab ah ittotolag bia daattem. Itotolag amu aɗitai laa ii hette. Ig paha paha keeke kuɗum hettem, amge amu oh am meu iitta. Ig en huana awota, ig mauhttem. Ig mauhota, ig en bakkalen qagmettem amu, ig aun men doɗo amu gumakku ii doottem.

Genesis 2:18

Anam awowa, Yawe Kayak Nug aum. “Danab imu nug nukka daakkunu am ena iitta. Da nuhig ehanittak layag hekkul,” awa aum.

Aisaia 55:2

Aɗinu ag ee, ag ɠagattagnab ii madatte ele, ag amuppa men doɗo heeg iitta mette? Ao, ag aɗinu ee ag beɗulagib ehanidtte ele, ag amuib daden metteb? Ag daulag human daappeg, da ag ee ag meulkad oh ehanidkkunu elele amu, da ag ee amu adeppa aoglagnu appi doyeg!

Eklisiastis 2:23

Aɗinu? Danab amu hekkulagnu ag wanppa bau daan, uɗat henana, guittak doonna, oolag uug ele doon, tuqan ele ag dabmak aonnaib daatteb. Kobol amu ele am gaɗappa, unuqagppa ele anttak laippu iitta.

Eklisiastis 2:21

Uug da doominu diig am, danab laa nug uɗat nuhig hekkunu doyak dabmak ena okkai ele, uɗat amu haknu diignu doyak tutukku ele, eppeg uɗat amu haknu dootte amunu, nug ha autanab aotte, amge dimppa nuhig uɗatnu meu am laa nug uɗat ii heum ele, nug eppegppa gokku. Kobol amu ele am gaɗappa, unuqagppa ele anttak laippu iitta; kobol amuam uug naunab ele.

Eklisiastis 4:7

Amu da baula aam waappan keeke gaɗappa, unuqagppa ele anttak laippu iitta aakku anidmi.

Sam 39:7

O Naɗi, anam aakku daatte amunu, da wan imunu keeke laa dabmein, keeke ena bekkunu dabmak aɗe oikkulnu elele iitta. Keeke ena bekkunu dabmak aɗe oikkulnu am nahip-ppaib daatte.

Eklisiastis 5:9

Danab okkai amu oh, amge agib iitta, king ele, ag oh daɗek ag dattanu keeke aotteb, ag amunu takis anan heeg, daɗek ag madatteb.