Eklisiastis 3:14 - Nobonob Baibel

¹⁴ Da doottem, keeke oh Kayak heum am hanhan daakku, iitta ii mema. Danab laa nug Kayaknu hakppa keeke laa buuidkkunu elele iitta; laa nug nuhig hakppanu keeke laa hiɗa aokkunu ele elele iitta. Kayak Nug ig nuhignu ebehinig oh bodoetta le mekkunu anam babaittom.

Eklisiastis 3:14 Referans Kwoze

Jems 1:17

Keeke hamu mekkak ena, elelenab ele, keeke amu oh hab aabppanu uɗitte. Aam, kalam, hoɗoppai keeke ag habppa daanna, amahlak megatteb ele amu, keeke amu oh Mamelag, Nug keeke enanag amu oh me, ihinigppa uɗitte. Mame Nug kobol nuhig eɗua eɗua ii mette. Nug keeke laa aamnu amahlakppa itotolag eɗun eɗun qetteb amubia ii hette.

Sam 33:11

Amge Yawe Nug aɗi keekenu maittak aotte amu, keeke amuam ɠagattag hanhan daatte. Yo, Nug aɗi keekenu oo unuqagnab, amuppa maittak aotte ele amu, keeke amuam ɠagattag hanhan dayaya bette.

Rom 11:36

Iittanab! Nug nukka aakkuib keeke oh diig daatte. Nug nukka aakkuib keeke ohnu Mamelag daatte. Keeke oh am nuhignuib daatteb. Binag amahlak oppiaawak ele hanhan nuhignu dayaɗ! Genab.

Aposel 5:39

Amge genab Kayak Nug keeke amu he bette amu, ag Nug ippu oo nekkulagnu am elele iitta. Ag anam hena amu, ag aakku Kayak ele ban hekkulag,” awa aum.

Prowerb 30:6

Nug aɗi atte amu, na aib tuɗidna, laa ele ame; na amu hekkut dayeb amu, Nug na daut bata, na am hambuppuak danab daattem ippunidkku.

Taitus 1:2

Doyak diig genabib amuam he, ag bauklel hanhannu aoppig daatteb dootteb. Kayak, Nug hambuppuak nakok laa iinab maditte amu, Nug ag bauklel hanhannu amu aoglagnu anukkanab, keeke ii heum haenppa nai qakka aum.

Prowerb 21:30

Doyak dabmak ena ele laa, o diignu doyak tutukku laa, o maittak awak laa; amu oh oolagppanu Yawe eɗidkkunu elele iitta.

Epesus 3:11

Amuam Kayaknu maittak hanhan daattom, amu Nug ihinig Naɗi Jesus Kristus, nuhig uɗat okkaippa anam hekkunu aum amu, Nug aakku heum.

Aposel 4:28

Ag anam hekkulagnu qagmena anam heppig amu, Kayak na nahip ɠagattagppa, nahip doyak dabmak ena eleppa keeke oh anam bekkunu anukka ib amunu ame amu, ag amuib heppig.

Aposel 2:23

Kayak Nug anukka nuhig doyakppa anam hekkunu nai mattiom, amu Nug Jesus awa, ag eppelagppa me, ag danab nau, ahilag ehanittakppa, ag ad emaitakppa atulna, qeeg mauhom.

Aisaia 46:10

Da digmak haenppa keeke laanu gogppa tak haenppa bekku amu hei, miag atitte. Da anukkanab aɗi keeke butti aɗi bekku ai dooppig. Da attem. ‘Da aɗi keeke dabmein attem amu, da hei bette. Da aɗi oh hekkulnu hettem amu, da hekkul.’

Eklisiastis 7:18

Na Kayak ippunikkomnuib dabmena, ib gamagppa oikkut am ena; amunu diig am, danab nug Kayaknu ebehi oh bodoetta le mette amu, nug aɗi keeke haknu, nug nuhig dabmak buɗieb ukkeb, hakib hekkunu kobol am uukku.

Eklisiastis 5:7

Dabmak hamu hamu awakppanu nai mattiak okkai bette, amu diig amunu na Kayaknu ebehin oh bodoetta le maɗ!

Prowerb 19:21

Danab ag keeke laala haknu maittak digdig kuɗum aotteb; amge Yawe Nug aɗi bekkunu oo daatte ele amu, gog takppa amuib aakku bette.

Sam 76:10

Danab ah ag nahip oppoɗi bak eheɗ haknu anidtteb amu, ag na onin humidtteb. Ao, laa ag nahip oppoɗi bak anidna dootteb ele amu, ag nau haknu uutteb.

Sam 64:9

Anam beeb, laa oh ag Kayaknu ebehilag oh bodoetta le mekku. Ao, ag Kayak Nug keeke okkai okkai heumnu, ag laa amelagppa amunu mattiglag. Ge, ag amunu dabmena autna aoglag.

Revelesen 15:4

O Naɗi, na aakkuib oppiaawak daattem amunu, aun laa ag nahipnu ebehi oh bodoetta le mak ii doon, na binan amahlak oppiaawak ele ii mekkulag? Atu atu danab oh uɗin, na noomppaib dup nona binan mekkulag. Nahip genab tutukku hak kobol am miag atia beum amunu, ag hekkulag,” aon appig.

Daniel 8:8

Meeme dawai nug anam he, sipsip dawai nug nauha daye, meeme dawai nug onig, ɠagattag okkai ele awa oiyom. Nug anam oiyom, amge nug ɠagattag, onig ele okkainab maama, gogppa te, laa he, qeqeɗi amu qiiom. Qeqeɗi amu qiie, aben qeqeɗi dayomppa amu qeqeɗi waɗele aakku beppig. Qeqeɗi amu ag elab mena, tutukku qappak ii daappig. Iitta. Ag kalin laih laih gona daappig. Laa kalia yawalti uɗitteppanu daye, laa kalia kaɗag uɗitteppanu daye, laa kalia yau uɗitteppanu daye, laa kalia qaban uɗitteppanu dayom.

Eklisiastis 12:13

Keeke oh amu, ig aakku doomut; amu keeke amu ohnu gogppa tak am inam. Na Kayaknu ebehin oh bodoetta le maɗ! Ao, na nuhig haknunab anak dim lamitte! Aɗinu? Amuam keeke anuqak, Kayak Nug danab hekkulagnu mattom. Keeke laa iitta.

Duteronomi 32:4

Nug am hanhan ɠagattag daatte; nuhig uɗat am qa oppiaawak ele. Keeke oh Nug hette amu, Nug nai doya mala hettoɗia epeɗia elele mettak kobol dim lamitta hette. Kayak Nug diig nuhignu oo metta ii uuak kobol dim lamittatta, Nug eheɗ laa ii hette. Nug tutukkuib daatte, Nug nai doya mala hettoɗia epeɗia elele mettak ibuppa hanhan daatte.

2 Samuel 22:31

Kayaknu amu, nuhig hak am, qa oppiaawak ele. Ao, Yawenu nai am enaib; hambuppuak, o kaliak nakok laa nuhig naippa ii daatte. Nug danab aun aɗi laa ag padal mak eɗitteb ena dayaknu abenppa daaglagnu nuhigppa uɗitteb amu, Nug ahilag guppiɗ daatte.

Eklisiastis 5:6

Na oɗenppa nai laa mattiona, hipunin aib heme. Na keeke laa hekkutnu genabnab hekkutnu nai anan qagakkut dayeb, dimppa na Kayaknu mettid lakka gona, appan mana mettak danab amegppa, “Da kakitten, nai amu mattimi,” aib ame. Na anam heppe, Kayak Nug oo nauhkku, amu Nug heeb, keeke oh na eppenppa uɗat heme ele nauhkkutai.