Eklisiastis 2:22 - Nobonob Baibel

²² Aɗinu? Danab nug wanppa dayaya, keeke qagmekkunu uɗat tuɗid ele haaha, nug uɗat ebehi guittette hette amu, nug uɗat amu ohnu aɗi meu ena laa ii aotte.

Eklisiastis 2:22 Referans Kwoze

Eklisiastis 1:3

Danab nug wanppa aam waappa dayaya, ⌊beɗu ehanidkkunu⌋ uɗat okkai hette amu; amuppanu nug aɗi meunab aotte?

Sam 127:2

Yawe Nug danab ah Nug ahilagnu oo mauhtte ele, Nug danab ah amu niiak ena madatte amunu, na aun, na ee aon lakkutnu hik huana nidette, uɗatib buttuanab ukka tueb batak henan daattem amu, kobol na hettem amu, kobol amuam meu iitta.

1 Pita 5:7

Kayak ag gumatta atognoadtte amunu, ag uug ahilag oh amu Nug eppegppa meig!

1 Timoti 6:8

amunu amu, takkaknu keeke elele, ee ele elele dayeb amu ig, “Imuam dahilnu elele,” aot akkunig.

Pilipai 4:6

Ele amu, ag aɗi keeke laippunu dabmak qak aib doon daappig. Iitta! Ag keeke ohnu unuqittak digdigppa, “Ena heme,” anakppa ele, ag Kayak Nug ahilagnu aɗi aɗi hekkunu oolag daatte amu, ag oo hak amu Kayak amegppa aig!

Matyu 6:34

Anam amunu, ag keeke buttinu aoglagnu dabmak aib aqom. Buttinu amu, nukka piɗe nuhig keekenu dabmekku. Am uug laa deɗ amuppa bekku amu, deɗ amunu am aakku elele.

Eklisiastis 4:6

Danab nug ee nakokib maɗoɗ ele latte amu, amuam ena; danab nug uɗat bodok iitta, hamu hamu ulah aɗakkunu, ulah dim lamittak bia haaha, ee okkainab latte, amuam ena iitta.

Eklisiastis 3:9

Uɗat nid nug uɗat okkai haaha, nug aɗi keeke hanhannu aotte?

Matyu 16:26

Danab nug wanppanu keeke oh aokku dayeb, amge nug bauklel hanhannu ii aokku, wanppan keeke oh awom amu, keeke amu nug attem ehanidkku? Nug amuppa bauklel hanhannu daden mekku? Iittanab!

Matyu 6:11

Ig ee megattem amu, na gemunu ele megakkutnu na oɗ medattem.

Eklisiastis 8:15

Amunu amu, da danab nug aam waappa dayaya, gamag ahak dookkunu attem. Aɗinu? Nug ee, le ele lakku, gamag ahak ele aokku am enanag; keeke laa amu ii eɗidtte. Nug amu hekku dayeb amu, Kayak nug haen gane wan imuppa daya, uɗat hekkunu mettom amu, nug haen amuppa nuhig uɗat haknu gamag ahebeb daakku.

Eklisiastis 5:17

Nug keeke aɗi ena laa ii aotte. Nug oo doyak, oɗe qak, oo nauhak ele aakkuib doyaya andatta oitte.

Eklisiastis 4:8

Amuam danab nug tiig laippu laa iitta. Ao, nug nid iitta, awag, amag laa ele iitta. Anam amu, nug am uɗatib hette, nug hamu ii daatte; Nug anam daya haaha, en okkai aotte, amge nug ena ii dootte. Iitta. Nug baubau aokkunu hette. Nug nukka, nug oɗ inam ii medatte. “Da aun nug en imu aokkunu uɗat hettem? Ao, da aunnu uɗatib heinne, gamag ahak nakok aolom, amge da ii aottem?” Nug amu oɗ ii medatte. Kobol amu daatte, amge amu ele am gaɗappa, unuqagppa ele anttak laippu iitta; am kobol guittak ele.

Luk 12:29

Amu ag aɗi ee le ele lakkulagnu hik aib aqom. Ag keeke amubianu aib dabmak aqom.

Luk 12:22

Aria, Jesus Nug nuhikkud ippunittak awak danab amelagppa aum. “Anam daatte amunu, da ag amelagppa attem. Ag wanppan bau dayaknu dabmak aqadna, ‘Ig ee elete daagnig?,’ o iitta beɗulagnu, ‘Ig beɗunigppa takkaknu amu, ig lamen elete daagnig?’ aib appig.

Matyu 6:25

Anam daatte amunu, da ag amelagppa attem. Ag wanppan bau dayaknu dabmak aqadna, ‘Ig ee le elete daagnig?,’ o iitta beɗulagnu, ‘Ig beɗunigppa takkaknu amu, ig lamen elete daagnig?’ aib appig. Bau dayak amu ee lanakib iitta, beɗu nug lamen takkaknuib ele iitta.

Prowerb 16:26

Danab nug uɗat ha, nug enug qak dootte, enug qak amuam ehanidtte; amunu diig am, nug ee aokkunu uɗat tuɗid hette.

1 Korint 16:16

Ag danab anam amu dabmattanna, ag oɗelag dim lamidna, amu danab laala ag danab amu ele uɗat hetteb amu, ag ahilagnu ele anam heig!

Eklisiastis 2:11

Da eppelppa uɗat amu okkai hein; da aɗi keeke bekkunu uɗat heinne daami. Da anam hemi, amge da hein malen, keeke amu oh am gaɗappa, unuqagppa ele anttak laippu iitta anidmi; keeke amu oh am danab nug ulah aɗakkunu, ulah dim lamidtte, am amubia. Aam waappa uɗat amu oh hemippa, am keeke meu ele ii beum.