Eklisiastis 11:2 - Nobonob Baibel

² Na nug ehanittak nahip am ib kuɗumppa hee! Aɗinu? Na wanppa aɗi uug naunab digdig bekkunu daatteb amu, na ii doottem.

Eklisiastis 11:2 Referans Kwoze

Prowerb 6:16

Am keeke eblaih laippu ele, Yawe Nug amunu nau ninig ele dootte. Ge, Yawe Nug keeke eblaih aɗit elenu ooppa uuaknab dootte.

Sam 112:9

Genab tutukku hak danab nug daɗek danab huana ehanadtte. Ao, nuhig genab tutukku hak kobol am hanhan alet daatte. Ge, nug danab laa noolagppa binag okkai ele daakku.

Job 5:19

Kayak Nug baubau ehanitteb, na qagaiettakppa ii daamna. Ge, haen kuɗum uug nahip-ppa bekkunu daakku, amge nahip-ppa ii bema.

Daniel 4:27

Anam aakku amunu, O king, da ulum nai laa medappi, na nai amu aon dim lamidkkutnu oɗ medattem. Na hipunin baula aib heme, amu na aɗi hettem amu, na hanhan kobol genab tutukkuib he! Ao, na eheɗ laa aib heme, amu na danab ah, ag laa eppelagppa daaeg, eheɗ hadatteb ele, na amu dilagnu oo gai-iitta doya, oo metta, ehanattak kobol he! Na amu hekkut dayeb amu, Kayak Nug ehanitteb, na tuɗidna, maɗoɗ ele daakkuttai.” Daniel nug King Nebukatnesar amegppa anam aum.

Hibru 13:3

Ag lailkad laa maniguittakppa daatteb ele, ag ag ele oh maniguittakppa daalob bia doon, ag amu dilag dabmenan dayeg! Ele amu, ag lailkad laa, danab laa ag eheɗ hadatteb amu, ag ele guittak amu aolob bia doon, ag amu dilag dabmenan dayeg!

Epesus 5:16

Ag amu dabmenana, gemu am haen nau amunu, ag uɗat ena hekkulagnu laa dayeb anidna, ag aib uuppig. Ag haen aguppanab heig!

Galesia 6:1

O lailad, danab laa nug hipunin laa heeb, ag anidna amu ag danab ag Kayak Ouɗi ele, ag danab amu eɗun aoglagnu nai bodoettak eleppa oo babaitteg! Ag aib nuhignu guhuɗittak kobol heppig. Ag oh anen anen ahilagnu dabmeig! Satan nug ag ele eheɗ hekkulagnu oolag eeɗkkunu daatte.

Luk 17:4

Amu nug nahip-ppa deɗ laippuppa hipunin heeb, ukka eblaih aɗit teeb, haen eblaih aɗit nug eɗua na gumitta uɗia, ‘Gadon, da eheɗ hemi,’ awa ab amu, na nuhig hipunin amu uhuqna mette!” awa aum.

Matyu 18:22

Pita nug anam a amu, Jesus amegppa aum. “Eblaih aɗit batak iitta. Iitta! Na amu eɗittak haen ohppa uhuqna mette!

Matyu 5:42

Aria, danab nug keeke medakkutnu oɗ metteb amu, na mette! Amu aun nug nahip-ppanu lon aokkunu oɗ metteb amu, na medakkut.

Maika 5:5

Am danab amu Nug heeb, maɗoɗ daakku. Asiria ag ig Israel eɗigkkulagnu uɗiglag. Ao, ag ihinkad aab aɗ ɠagattagnab eleppa laippu tappa ukkakppa oiglag. Amu diig amunu ig danab sipsip gumadtteb, ig gumak danab amubia eblaih aɗit ele otiadkkunig. Ao, ig ikki danab eblaih ewam ele otiadkkunig.

Esta 9:22

Nug ag deɗ aɗit amuppa ag lanak hobul okkai, gamag ahak okkai ele henana, ee hamu nug mettanna, ag daɗek ele ahilag daakkunu keeke hamu mattaglagnu aum. Amuam henana, Juda ag kekeɗ eppelagppan eɗua diiak amu daulagppa dookkunu aum. Haen amuam, ahilag haen nauhkkulagnu dayom, amge ag ahilkad kekeɗ eppelagppanu eɗua diiak aoppig. Ag oolagppa uug nau dooppig, amge ag eɗun, gamag ahak aoppig. Ag mahiak naɗi heppig am iitta me, gamag ahak aoppig.

Esta 9:19

Diig amunu Juda aab naunauppa daatteb, ag kalam Adarnu deɗ 14, ag deɗ amuppa gamag ahak doon, ee lanak hobul naɗi henana, ag ee laanu daakkunu hamu mettak hetteb.

Nehemaia 8:10

Amu Nehemaia nug aum. “Gemu deɗ imunu amu, ihinig Naɗi Nug amunu, dahilnu tituanak daatte anidtte amunu, ag ahan gona, ag ee ena, le ubuhi ele lanana, ag laa keeke anam iitta ele madappeg, ag ele laig! Ag aib gaappig. Aɗinu? Yawenu gamag ahak doyak am aab aɗ ɠagattagnab ele ahilag bia daatte,” awa aum.

Prowerb 19:17

Aun nug daɗek ehanadtte, amuppa nug Yawe keeke lon mettom bia hette; Yawe Nug nug heumnu nob ena eɗua medakku.

Eklisiastis 11:3

Lombigppa gu huana daatte dayeb, gu wanppa nette; ad laa qiia ukka wanppa niitte amu, ad amu qiia ukka dayomppa aakku niitte. Am yau uɗitteppanu ad qiia ukka niitte amu, yawalti uɗitteppanu aakku niitte. Yawalti uɗitteppanu ad qiia ukka niitte amu, yau uɗitteppanu aakku niitte.

Eklisiastis 11:8

Danab nug maɗ kuɗum wanppa dayaya oikkutai. Nug anam daakku dayeb amu; nug nuhig oiyak ohnu gamag ahak dookku am ena. Aɗinu? Gatatu manak haen am uɗikku; haen amuam elab daakku amunu, nug amu dabmettaɗ! Keeke oh bekkunu am gaɗappa, unuqagppa ele anttak laippu iitta.

Eklisiastis 12:1

Na kaino mena, uug digdig anidkkut. Ao, na kaino mena, na, “Da gemu dahil oiyaknu ool ittag ii qette,” akkut, amunu gemu, haen amu ii uɗiom daatte, na gemu na nid bau daanna; na laa Nug na heittom ele amu, na Nug dabmette!

1 Samuel 25:8

Na nahipad maɗi nid oɗ madappe, ag ele geha amu appeg dookkut. Amu gemu na hobul okkai laa hekkutnu aakku daatte amunu, da na ⌊ig kobol ena nahipad danab dilag hemut amu, na amu dabmenana,⌋ nid bau dahilad, na amu dilag daut ii atimanu oɗ medattem. Dahilad danab ag am maɗi nid nahipad, amubia daaegeg, da am na bekkat bia daattem amunu, na aɗi keeke nakok nahip-ppa daatte anidttem amu, na nakka pakkol mena, megakkutnu oɗ medattem.” ’ ” Dawit nug danab nuhikkud ag Nabal amegppa anam akkulagnu amelagppa aum.