Duteronomi 7:25 - Nobonob Baibel

²⁵ Ag kayak hambuppuak dottolkad adppa hoyattak aab aɗuppa manadppeg eoppeg, silwate, iitta golte amuppa tonadppig dayeb amu, ag gol, o silwa amu amelag qeeb aolobnab dabmak eheɗ aona, aib aoppig. Aɗinu? Yawe, ahilag Kayak, Nug keeke amunu ooppa uuaknab dootte. Ag aib aoppig. Ag aoglag amu, ag pelemppa tena, padal mekkulag.

Duteronomi 7:25 Referans Kwoze

Eksodas 32:20

Moses nug anam hewowa, nug makau gaiɗ dottog ag heppig ele aab aɗuppa mana awa, aoɗa maduduɗe, kalu ne, nug kalu amu le qaɗeppa gokkaɗe noa, le attan qaɗeppa teppu iitta dayeye, Moses nug he, Israel ag le amu lappig.

1 Stori 14:12

Dawit aɗi ag Pilistia eɗatteg, ag kayak hambuppuak dottolkad ahilkad uuadna ooleg, Dawit aɗi ag uɗin manatteg eoppig.

Duteronomi 17:1

Ag makau okkai ebehi ele, o sipsip oɗe mak ele, o makau okkai ebehi ele, o sipsip ag beɗulagppa eheɗ ele, ag amu aon main, Yawe, ahilag Kayak, Nug aib medappig. Nug anamnu amu, Nug ooppa uuaknab dootte amunu, ag anam aib heppig.

Josua 7:21

Da banppa keeke aomut ooppanu amu, da lamen elab enanag laa Babilon appa heppig antten awe, da 2.3 kilogram silwa, amu gol maha laa, uug nuhig am 600 gram, da amu ele awen uɗimi. Da keeke amu amel qe aolomnab dabmak eheɗ aomi amunu, da akke uɗimi. Da dahil peh waappa, wan ooppa lokkumadmi daatteb. Silwa amu laa oh eɗattak unuqagnab boummi daatte,” awa aum.

Duteronomi 12:3

Ag ahilkad qaɗab loppaɗadppeg neppeg, men gappi oh aoɗadppeg nauheg! Ag kayak hambuppuak Aserah dabmekkulagnu biidod amu maippeg ewebeb, kayak hambuppuak dottolkad amu otaɗadppeg neig! Ag keeke amu oh heppeg iitta meig! Laa nug kayak hambuppuak amu onilkad dabmemanu, ag keeke amu ohnab heppeg iitta meig!

Aisaia 30:22

Amu haen amuppa ag ahilkad kayak hambuppuak dottolkad silwappa hak, golppa hak ele, ag dottolkad amu heppeg nauhppeg, ag dottolkad amunu kinipan nau, beɗak doon, baula anidmananu ag agappeg gokkulag.

Josua 7:1

Amge Israel ag keeke Yawenuib nuhig pelemppa daappig, ag keeke amunu Kayak ippunattomnu oo metta ii uuak kobol ii dim lamitteg, laa nug keeke amunu laala awom. Danab onig Aakan nug keeke amu laa yab awom amunu, Kayak nug Israel dilagnu oo huana nauhom. Aakan nug Karmi bekka. Karmi nug Simri bekka. Simri nug Sera bekka. Aakan nug Israel dilag huu okkai Juda, amuppanu.

Duteronomi 23:18

Yawe, ahilag Kayak, Nug ib baag ah, ib baag danab ele, Nug ahilagnu am ooppa uuaknab dootte amunu, danab o ah amunu laa ib baag kobol hakppa men doɗo awa medakku dayeb, na men doɗo amu aon, Yawe, ahilag Kayak, Nug laugppa gona, Yawe keeke genab medakkutnu nahip nai anan ɠagattag qettan ame ele, na amu Yawe men doɗo amuppa medakkutnu aib meme.

Duteronomi 7:5

Amunu, ag Israel, ag danab ah appa daatteb, ag amu dilagppa inam hekkulag. Ag danab amu dilag kayak hambuppuak dilag qaɗab amu, ag heppeg nauhatteg! Ag men gappi ahilkad aoɗadna heppeg, iitta meig! Amu ag kayak hambuppuak Aserah dabmekkulagnu biidodnu amu, ag amu okkuladppeg naɗ! Ag amu hena, ag ahilag kayak hambuppuak dottolag ele manadppeg eweg!

Revelesen 17:5

Nug iɗuppa onig laa nai tonakppa yaappig. Onig amuam inam. “Aab okkai Babilon onig, ɠagattag ele, nug am ib baag ah, amu wanppanu keeke nau digdig, Kayak Nug amunu ooppa uuaknab dootte, am amu oh anilag aakku.”

Sepanaia 1:3

Ah kinipan tate ukkak bia, da heppi, danab, am doɗ ele oh wanppa ii daamna. Ao, ah kinipan tate ukkak bia, ai hagagaɗna oitteb, kakai leppa oitteb, ag oh wanppa ii daamna. Haen da heppi, danab ah wanppa ii daamna amu, haen amuppa nau hak danab dilag keeke am kinipan ameg okkai hume tak aakkuib daaglag.” Yawe Nug anam atte.

Duteronomi 7:16

Yawe, ahilag Kayak, Nug danab ah huu laalappanu diia, ag eppelagppa mekku amu, ag hadappeg nauheg! Ag aib ahilagnu oolag gai-iitta doon, oolag mattan, ehanadppeg, ag oolagppa daappig. Ag ahilkad kayak ele noolagppa dup nona binalag aib meppig. Aɗinu? Ag amu hekkulag dayeb amu, ag doɗ pelemppa teum daatte bia daaglag.

Eksodas 8:26

Paro nug anam aum, amge Moses nug aum. “Ig Isip wan ooppa doɗ mait, Yawe, ihinig Kayak, ig Nug mettagnig, amuam ena iitta. Aɗinu? Isip danab ah ag geha doɗ aqat, Yawe mettak kobol ihinig anidna, ag amunu oolagppa uuaknab dooglag. Amunu diig am, ig Hibru danab ig doɗ aqat, Yawe medattem amu, Isip ag ihinig kobol amunu oolagppa uuaknab dootteb. Anam amunu, Isip ag ig amu hebupput anigna, ag oolag aeg beeb, menppa ig iqappeg mauhkkunig.

Eksodas 20:17

Na layap laugnu aib amen qeeb aolomnab dabmak eheɗ aome. Laa amu, na layap wau, o nuhig maɗi nid, o nuhig maɗi ah, o nuhig makau okkai ebehi ele, o nuhig donki, o nuhig keeke laala oh ele amu, na aib amen qeeb aolomnab dabmak eheɗ aome.” Yawe Nug nai amu oh Israel danab ah amelagppa aum.

Duteronomi 13:16

Anam hena, ag danab amu dilag keeke oh akkan, aab gamagppa haɗap okkaippa mena main, ag aab nakok amu oh maippeg, ewa iitta maɗ! Amuam ag manaknu ofa, Yawe, ahilag Kayak, ag Nug medatteb, am amubia daakku. Aria, aab nakok amu nug nauhak anam aakku alet daakku. Ag aab amu aib eɗun bappaidppig.

2 King 23:14

Josaia nug men gappi aoɗe, huppu huppu neeg, kayak hambuppuak Aserah dabmekkulagnu biidod okkulatte neeg, nug danab mauhppig ebehilkad kuɗumnab awa, aben keeke amu daappigppa akke ukkaeg, aben amu oh tonappig.

Lewitikas 13:52

Gi, gaɗa oɗe nau bia linen lamen eppegppa, o masinppa akkak, o sipsip uɗig lamen eppegppa, o masinppa akkak, o doɗ gaɗa hamu, o keeke amuppa hak, amu amuppa aakku daatte amunu, mana mettak danab nug maneb eokkuoitte. Keeke amu aab nug eweb, iitta ma auta aokkuoitte.

Lewitikas 19:4

Ag aib kayak hambuppuaknu oolagppa genab dooppig. Ele amu, ag aib kayak hambuppuak dottolag aenppa, keeke hattana, noolagppa dup nona binalag meppig. Da am Yawe, ahilag Kayak.

Duteronomi 27:15

“Laa nug kayak hambuppuak dottog aɗi keekeppa ha, lokkumakppa qabatte amu, nug eheɗ laa awaknu anak waappa dayaɗ! Kayak hambuppuak dottolkad danab uɗat amu haknu doyak okkai ele amu, Yawe Nug dottog amunu ooppa uuaknab dootte,” aon akkulag. Ag anam aon appeg, danab ah oh ag, “Genab, anam dayaɗ!” akkulag.

Aisaia 41:24

Amge ⌊ag elele iitta⌋. Ag keeke ii daatte bia daatteb. Ag keeke laa hekkulagnu elele iittanab. Aun nug ag dim lamadkkunu dabmak awa dim lamadtte amu, Yawe Nug ⌊kobol amunu⌋ ooppa uuaknab dootte,” awa atte.